Ani Obaanyɛ Okɛ Yelikɛbuamɔ Aha?
1 Yehowa miitao gbɛ̀i anɔ ni ebaatsɔ daa koni eye ebua enɔkwa tsuji. (2 Kron. 16:9; Yes. 41:10, 13) Be ni Yesaia kɛ lɛ toɔ tookwɛlɔ ni yɔɔ suɔmɔ he lɛ, eŋma akɛ: “Eeehiɛ etoobii lɛ yɛ ekpɔkɔiaŋ, ni eeehole amɛ eshãkã etsitsi, ni too nyɛmɛi lɛ hu, eeekpala amɛ blɛoo.” (Yes. 40:11) Susumɔ gbɛ̀i komɛi anɔ ni wɔbaanyɛ wɔtsɔ wɔkase suɔmɔ mli ni Yehowa jɛɔ esusuɔ mɛi ahe lɛ he okwɛ.
2 Ye Obua Mɛi Heei Lɛ: Wɔbaanyɛ wɔye wɔbua mɛi heei lɛ kɛtsɔ nine ni wɔɔfɔ amɛ koni amɛkɛ wɔ aná naanyobɔɔ ni tswaa mɔ emaa shi mli ŋɔɔmɔ lɛ nɔ. (Abɛi 13:20) Nyɛminuu ko kai bɔ ni mɛi krokomɛi ye amɛbua lɛ be ni ekɛ asafo lɛ bɔi bɔɔ lɛ, ni ekɛɛ akɛ: “Weku ko kɛ mifataa amɛweku nikasemɔ lɛ he shii abɔ. Be ni mibɔi hiɛyaa lɛ, gbɛgbalɔi komɛi ni ji gbalashihilɛ mli hefatalɔi ni darako tsɔ lɛ fɔɔ mi nine daa koni mafata amɛhe gbi muu fɛɛ yɛ shiɛmɔ nitsumɔ lɛ mli. Wɔgbaa mumɔŋ nibii ni nɔ bɛ lɛ ahe saji daa.” Ekɛfata he akɛ: “Dani mibatsɔ Kristofonyo lɛ, mifɔɔ kpojee Sohaa kɛ Hɔɔ gbɛkɛ. Shi naanyobɔɔ ni mikɛ nyɛmimɛi lɛ ná mli ŋɔɔmɔ lɛ haaa mihe afee shoo.” Suɔmɔ mli ni asafo lɛ jɛ esusu nyɛminuu nɛɛ he lɛ ye kɛbua lɛ koni enane amɔ shi jogbaŋŋ yɛ hemɔkɛyeli lɛ mli, ni amrɔ nɛɛ eesɔmɔ akɛ Betel weku lɛ mlinyo.—Kol. 2:6, 7.
3 Nyɛtswaa Nyɛhe Nyɛmaa Shi: Kɛ́ wɔyɔse akɛ wɔnyɛmimɛi lɛ kɛ shihilɛ ko ni mli wa miikpe lɛ, ekolɛ no baatsɔɔ hegbɛ ni wɔná ni wɔkɛaaye wɔbua amɛ. Ani obaanyɛ oto gbɛjianɔ koni shiɛlɔ ko ni bɛ gbɔmɔtsoŋ hewalɛ lɛ afata ohe kɛye odase yɛ tɛlifon nɔ, loo ofɔ lɛ nine koni efata ohe kɛha Biblia mli nikasemɔ ko feemɔ, loo ekolɛ ni okɛ onikaselɔ lɛ aya eshia kɛha nikasemɔ lɛ feemɔ? Ani ekolɛ fɔlɔ ko ni yɔɔ gbekɛbii bibii lɛ baasumɔ ni aye abua lɛ be ni ekɛ ehe woɔ shiɛmɔ nitsumɔ lɛ mli? Ani mɛi ni sheɔ gbeyei lɛ baasumɔ akɛ oye obua amɛ be ni amɛfeɔ sɛɛsaramɔi loo amɛkɛ amɛhe woɔ sɔɔmɔ nitsumɔ lɛ fãi krokomɛi amli lɛ? Suɔmɔ mli ni wɔɔjɛ wɔsusu wɔnyɛmimɛi lɛ ahe lɛ baatsirɛ wɔ koni wɔtao gbɛ̀i ni wɔɔtsɔ nɔ wɔha amɛnane amɔ shi.—Rom. 14:19.
4 Be mli ni wɔkaseɔ Yehowa musuŋtsɔlɛ ni eyɔɔ kɛha etsuji lɛ, wɔwoɔ wɔhe hewalɛ, wɔyeɔ wɔbua ni asafo lɛ feɔ ekome yɛ suɔmɔ mli, ni wɔwoɔ wɔŋwɛi Tsɛ lɛ hiɛ nyam.—Efe. 4:16.