Ani Ojieɔ Hiɛsɔɔ Kpo Ohaa Kpokpaa Nɔkwɛlɔ lɛ Saramɔ Lɛ?
1 Nɔkwɛlɔi gbɛfalɔi tsu nii babaoo kɛwo asafoi lɛ hewalɛ yɛ klɛŋklɛŋ afii 100 lɛ mli. Amɛkɛ ŋaawoo ni he hiaa lɛ ha. (1 Tes. 2:1, 10-12) Amɛkɛ gbɛtsɔɔmɔi ni jɛ nɔyeli kuu lɛ dɛŋ lɛ baha. (Bɔf. 16:4, 5) Amɛgba niiashikpamɔi, ni amɛtsɔɔ bɔ ni ashiɛɔ sanekpakpa lɛ ahaa mɛi krokomɛi hu. (Bɔf. 14:27, 28) Mɛɛ bei kɛha hewalɛwoo po saramɔi nɛɛ baaji nɛkɛ!
2 Ŋmɛnɛ, mɛi babaoo kɛ miishɛɛ kpáa kpokpaa nɔkwɛlɔ lɛ saramɔ lɛ gbɛ. Shi ayɔse akɛ jeee mɛi fɛɛ ahiɛ sɔɔ saramɔi nɛɛ ni amɛfiɔ sɛɛ. Ani ojieɔ hiɛsɔɔ kpo otsɔɔ saramɔi nɛɛ? Ákɛ aŋkroaŋkroi lɛ, mɛɛ gbɛ nɔ wɔbaanyɛ wɔtsɔ wɔná otsi krɛdɛɛ nɛɛ mli nitsumɔ lɛ he jwɛŋmɔ kpakpa?
3 Su Kpakpa ni Aaaná He Miihia! Kpokpaa nɔkwɛlɔi kɛ amɛŋamɛi kɛ afii babaoo ená niiashikpamɔ yɛ anɔkwale lɛ kɛ be-fɛɛ sɔɔmɔ lɛ mli. Amɛsumɔɔ nyɛmimɛi hii kɛ yei ni yɔɔ asafoi ni amɛyasaraa lɛ amli lɛ waa diɛŋtsɛ. Akɛni nii ni wɔkɛ amɛ aaatsu yɛ shiɛmɔ nitsumɔ lɛ mli lɛ yeɔ ebuaa wɔ ni wɔtsɔmɔɔ tsɔɔlɔi kpakpai, ni ehaa wɔnáa mumɔŋ jɔɔmɔi babaoo hewɔ lɛ, esaaa akɛ wɔsheɔ gbeyei akɛ wɔkɛ amɛ aaatsu nii.
4 Yɛ saramɔi ni tamɔ nɛkɛ amli lɛ, wɔbaanyɛ wɔkɛ lɛ agba wɔ diɛŋtsɛ wɔnaagbai ni gbáa wɔmumɔŋ shidaamɔ naa lɛ hu he sane. Ani obaanyɛ oto gbɛjianɔ kɛha sɛɛsaramɔ loo Biblia mli nikasemɔ yɛ shwane ko mli? Kpokpaa nɔkwɛlɔ lɛ baaná he miishɛɛ akɛ eeefata ohe kɛya, ni emli hu baafili lɛ akɛ eeekwɛ o-Biblia nikasemɔ lɛ nɔ eha bo kɛ́ oosumɔ.
5 Kɛ́ nyɛkpokpaa nɔkwɛlɔ lɛ ebote gbalashihilɛ mli lɛ, no lɛ eŋa lɛ kɛ nyɛmimɛi yei lɛ baatsu nii yɛ shia kɛ shia shiɛmɔ nitsumɔ lɛ, sɛɛsaramɔ, kɛ shia Biblia mli nikasemɔi afeemɔ mli. Akɛni nii ni etsuɔ yɛ shikpɔŋkukuji srɔtoi amli lɛ eha ená niiashikpamɔ hewɔ lɛ, ehe esa yɛ shiɛmɔ nitsumɔ lɛ mli. Ebaaná he miishɛɛ waa akɛ ekɛ nyɛmimɛi yei babaoo aaatsu nii yɛ shiɛmɔ nitsumɔ lɛ mli, koni eye ebua amɛ ni amɛya amɛhiɛ akɛ tsɔɔlɔi. Mɛni hewɔ otooo gbɛjianɔ koni okɛ lɛ atsu nii yɛ saramɔ otsi lɛ mli? Ebaafee mumɔŋ jɔɔmɔ babaoo jɛɛhe diɛŋtsɛ kɛha bo.—Abɛi 1:5.
6 Kpeei ni afeɔ yɛ kpokpaa nɔkwɛlɔ lɛ saramɔ be lɛ mli lɛ hu baanyɛ aha wɔda yɛ mumɔŋ. Bɔɔ mɔdɛŋ ni oya asafoŋ kpeei fɛɛ ni afeɔ yɛ otsi krɛdɛɛ lɛ mli lɛ. Bó wiemɔi fɛɛ ni ehaa lɛ toi jogbaŋŋ. Kadimɔ Ŋmalɛ mli otii ni onáa he miishɛɛ loo ŋaawoo fɛɛ ŋaawoo ni kɔɔ wɔhe lɛ. Kpee ni ekɛ gbɛgbalɔi lɛ feɔ lɛ yeɔ ebuaa amɛ koni amɛnitsɔɔmɔ hesaai lɛ aya hiɛ ni amɛná miishɛɛ yɛ amɛsɔɔmɔ nitsumɔ lɛ mli. Kpeei ni akɛ onukpai kɛ asafoŋ sɔɔlɔi feɔ lɛ haa hii ni ajɛ mumɔ mli ahala amɛ nɛɛ anine shɛɔ ŋaawoo kɛ gbɛtsɔɔmɔ ni he hiaa ni jɛ Nyɔŋmɔ gbɛjianɔtoo lɛ ŋɔɔ lɛ nɔ. Kpeei nɛɛ fɛɛ woɔ asafo lɛ hewalɛ.—Bɔf. 15:36, 41.
7 Hesaamɔ Kɛha Saramɔ Lɛ: Kɛ́ atswa kpokpaa nɔkwɛlɔ lɛ saramɔ lɛ he adafi nɔŋŋ lɛ, jee shishi obɔi ohe saamɔ. Wɔbaanyɛ wɔto wɔdaa gbi nifeemɔi ahe gbɛjianɔ bɔni afee ni wɔfĩ otsi krɛdɛɛ kɛha nitsumɔ lɛ sɛɛ jogbaŋŋ. Shiɛlɔi komɛi toɔ gbɛjianɔ koni amɛfee gbɛgbalɔi awalɔi. Mɛi komɛi biɔ gbɛ yɛ amɛnitsumɔi amli koni amɛkɛ amɛhe awo shiɛmɔ nitsumɔ lɛ mli yɛ otsi lɛ mli. Mɛi krokomɛi hu bɔɔ mɔdɛŋ waa koni amɛkɛ amɛhe awo mli Hɔɔ loo Hɔgbaa. Mɛi ni bɔɔ mɔdɛŋ ni tamɔ nɛkɛ lɛ anine shɛɔ jɔɔmɔi babaoo nɔ.—Rom. 1:11, 12.
8 Nɔ ni esaaa akɛ wɔkuɔ wɔhiɛ wɔfɔɔ nɔ hu ji hegbɛ ni wɔná akɛ wɔɔfee nɔkwɛlɔ gbɛfalɔ lɛ kɛ eŋa lɛ gbɔ. Nine ni mɛi babaoo fɔɔ amɛ kɛba amɛ shia kɛha niyeli lɛ eha mɛi nɛɛ kɛ amɛ ená naanyobɔɔ ni yɔɔ miishɛɛ mli ŋɔɔmɔ. Naanyobɔɔ kpakpa ni yaa nɔ yɛ okpɔlɔ lɛ he lɛ haa gbekɛbii ni yɔɔ weku lɛ mli lɛ náa hiɛsɔɔ kpele kɛhaa Yehowa gbɛjianɔtoo lɛ. Nyɛmimɛi babaoo ahiɛ sɔɔ amɛshia ni amɛha nɔkwɛlɔi gbɛfalɔi bahi, loo niyenii ni amɛkɛ amɛye lɛ mli saji ni amɛkaiɔ kɛ agbɛnɛ hu hewalɛwoo ni amɛnine shɛ nɔ lɛ.—3 Yoh. 5-8.
9 Kɛ́ onukpai lɛ tsɔ hiɛ mra amɛto gbɛjianɔ kɛha saramɔ lɛ, ehaa anáa hiɛsɔɔ kɛhaa saramɔ lɛ. Amɛtoɔ gbɛjianɔ koni aná wɔɔhe ni yɔɔ hiŋmɛi nɔ, ni mli yɔɔ hiahia, ni mli tse. Eyɛ mli akɛ kpokpaa nɔkwɛlɔ lɛ kɛ eŋa lɛ hiɛ sɔɔ niyenii ni asafo lɛ kɛhaa amɛ lɛ moŋ, shi niyenii kpakpa ni hewalɛ yɔɔ mli he miihia amɛ. Esa akɛ onukpai kɛ amɛwekui lɛ kɛ amɛhe awo otsi nitsumɔ lɛ mli jogbaŋŋ koni amɛkɛha aná hiɛsɔɔ kɛha saramɔ lɛ.
10 Saramɔ ni nɔkwɛlɔi ni edara yɛ mumɔŋ lɛ basaraa yɛ be kɛ beaŋ lɛ miiya nɔ eeye eebua Yehowa webii. Kwɛ bɔ ni esa akɛ wɔhiɛ asɔ akɛ wɔyɛ hii anɔkwafoi ni tamɔ nɛkɛ ni basaraa ni amɛwoɔ wɔ hewalɛ koni wɔya wɔhiɛ yɛ wɔsɔɔmɔ nitsumɔ lɛ mli! (Fil. 2:22, 23) Sɛɛ ni wɔnáa akɛ aŋkroaŋkroi lɛ damɔ bɔ ni wɔfee klalo akɛ wɔɔhere kpokpaa nɔkwɛlɔ lɛ ni wɔfi esaramɔ lɛ sɛɛ lɛ nɔ. Nyɛhaa wɔ fɛɛ wɔtswaa wɔfai shi akɛ wɔbaafi kpokpaa nɔkwɛlɔ lɛ saramɔ ni kã wɔhiɛ lɛ sɛɛ jogbaŋŋ kɛmɔ shi.