Adafitswai

◼ Wolo ni akɛbaaha yɛ October: Buu-Mɔɔ kɛ Awake! woji tɛtrɛbii lɛ. November: Kasemɔ Nii Kɛjɛ Tsɔɔlɔ Kpele lɛ Ŋɔɔ. December: Gbɔmɔ ni Fe Mɔ Fɛɛ Mɔ ni Ehi Shi Pɛŋ. January: Abaanyɛ akɛ woji ni hiɛ baafai 192 ni akala yɛ wolo ni hiɛ tsuɔ nɔ loo ni su etsake, loo wolo fɛɛ wolo ni afee dani afi 1990 shɛ, ni ekolɛ nyɛyɔɔ eko yɛ nyɛ asafo lɛ mli lɛ eko fɛɛ eko aha. Asafoi ni bɛ enɛɛmɛi eko lɛ baanyɛ amɛkɛ Nyɔŋmɔ Sɛɛ Gbɛ ni Adesai Taoɔ wolo lɛ aha.

◼ Nɔ ni aŋma ahɔ Wɔ Maŋtsɛyeli Sɔɔmɔ nɛɛ mli lɛ ji “Teokrase Sɔɔmɔ Skul He Gbɛjianɔtoo Kɛha 2005,” ni esa akɛ akɛto koni akwɛ mli be fɛɛ be yɛ afi 2005 lɛ mli.

◼ Be fɛɛ be ni asafoŋ kpeei, kpokpaa nɔ kpee, loo kpokpaa wulu nɔ kpee ni obaaya yɛ maŋsɛɛ lɛ fata ogbɛfaa he gbɛjianɔtoo ahe lɛ, esa akɛ okɛ wolo ni obaaŋma ni okɛbi saji ni kɔɔ gbii, bei, kɛ hei ni abaafee kpeei lɛ yɛ lɛ he lɛ amaje nitsumɔhe nine ní kwɛɔ nitsumɔ lɛ nɔ yɛ nakai shikpɔŋ lɛ nɔ lɛ. Ato nitsumɔhe niji lɛ adrɛs anaa yɛ Yearbook ni je kpo nyɛsɛɛ nɛɛ naagbee baafa lɛ mli.

◼ Ehe miihia ni nitsumɔhe nine lɛ ahiɛ onukpai asɛinɔtalɔi kɛ woloŋmalɔi fɛɛ adrɛs kɛ tɛlifoŋ nɔmba heei. Kɛ́ tsakemɔ ko ba yɛ be ko mli lɛ, esa akɛ Asafoŋ Sɔɔmɔ Ajinafoi lɛ aŋma nitsumɔhe nine lɛ wolo amrɔ nɔŋŋ. Nɔ ni fata enɛ he ji tɛlifoŋ nɔmbai ni atsakeɔ.

◼ Nitsumɔhe nine lɛ kɛ woji ni shiɛlɔi aŋkroaŋkroi lɛ diɛŋtsɛ shɛɔ lɛ emajeee amɛ. Esa akɛ onukpai asɛinɔtalɔ lɛ ato gbɛjianɔ ni atswa adafi daa nyɔŋ nɔ koni mɛi fɛɛ ni miisumɔ ní amɛná amɛ diɛŋtsɛ amɛ woji lɛ aha nyɛmi nuu ni kwɛɔ woji anɔ lɛ ale, dani akɛ asafo lɛ wolo ni akɛshɛɔ nibii lɛ amaje nitsumɔhe nine lɛ. Nyɛfainɛ nyɛhaa woji ni ashɛɛɛ ashwieee shi lɛ ahia nyɛjwɛŋmɔ mli.