Gbɛjianɔtoo Hee Kɛha Kpokpaa kɛ Gbi Kome Kpee Nifeemɔi Amlitĩi

Beni Satan je lɛ miiya nɔ eekpɔtɔ kwraa lɛ, Yehowa miiwaje wɔ “koni wɔkwa nɔshafeemɔ kɛ je nɛŋ akɔnɔi lɛ, ni wɔkɛ jwɛŋmɔ kpakpa kɛ jalɛ kɛ Nyɔŋmɔ gbeyeishemɔ ahi shi yɛ je nɛŋ.” (Tito 2:12) Nɔ ni fata gbɛjianɔi ni etsɔɔ “tsulɔ anɔkwafo kɛ nilelɔ” lɛ nɔ etoɔ lɛ he ji daa afi kpokpaa nɔ kpee kɛ gbi kome kpee krɛdɛɛ he gbɛjianɔtooi. (Mat. 24:45) Kwɛ bɔ ni nɛkɛ mumɔŋ henaabuamɔi nɛɛ woɔ wɔ hewalɛ ha!

Bɔni afee ni aye abua wɔ ni wɔnyɛ wɔkai tsɔsemɔi ni akɛhaa wɔ lɛ koni wɔkɛtsu nii lɛ, akɛ gbɛjianɔtoo hee ko ni akɛbaati nɛkɛ kpeei nɛɛ amli nifeemɔi lɛ amli lɛ baatsu nii yɛ afi 2005 sɔɔmɔ afi lɛ mli. Hiɛkpamɔ wiemɔi ni kɔɔ kpokpaa kɛ gbi kome kpeei srɔtoi amli wiemɔi ni abaaha kɛ sanebimɔi kɛha saji amlitĩi he lɛ baaje kpo yɛ January afi 2005 Wɔ Maŋtsɛyeli Sɔɔmɔ lɛ mli. Asafoi baasusu saji nɛɛ ahe yɛ Sɔɔmɔ Kpee lɛ shishi beni eshwɛ fioo ni amɛbaaya amɛkpokpaa kɛ gbi kome kpee lɛ kɛ beni amɛtee amɛba lɛ sɛɛ nɔŋŋ. Te abaato he gbɛjianɔ aha tɛŋŋ?

Beni eshwɛ otsi kome loo otsii enyɔ ni asafo lɛ baaya kpokpaa nɔ kpee lɛ, abaaha wiemɔ ko ni heɔ miniti 10 ni damɔ sane ni kɛɔ akɛ “Kpokpaa nɔ Kpee Hee He Gbɛjianɔtoo” lɛ nɔ lɛ yɛ Sɔɔmɔ Kpee lɛ shishi koni akɛtee miishɛɛ shi kɛha nifeemɔ lɛ. Wielɔ lɛ baagbala jwɛŋmɔ hu kɛya sanebimɔi ni akɛtiɔ saji amli lɛ anɔ ni ebaawo mɔ fɛɛ mɔ hewalɛ koni eŋmala nibii eshwie shi koni ekɛsaa ehe kɛha saji amlitĩi ni baanyiɛ sɛɛ yɛ kpee lɛ sɛɛ otsii fioo komɛi lɛ shishi lɛ.

Yɛ kpee lɛ sɛɛ otsii fioo komɛi lɛ, akɛ klɛŋklɛŋ kpee gbi lɛ mli nifeemɔi amlitĩi ni baahe miniti 15 baafata Sɔɔmɔ Kpee lɛ he. Yɛ otsi ni baanyiɛ sɛɛ lɛ mli lɛ, akɛ miniti 15 baatsu nii ni akɛtĩ kpee gbi in ji enyɔ lɛ mli nifeemɔi lɛ amli. Akɛ sanebimɔi kɛha saji amlitĩi ni akɛbaaha yɛ sɛɛ mli lɛ baatsu nii kɛha nakai saji lɛ ahe susumɔ. Esa akɛ saji amlitĩi lɛ akɔ sɛɛnamɔi diɛŋtsɛ ni yɔɔ sane ni asusuɔ he lɛ he titri. Onukpai lɛ baanyɛ ato gbɛjianɔ koni amɛfee Sɔɔmɔ Kpee fãi lɛ kuku, amɛjie ekomɛi kɛjɛ mli, loo amɛto be kroko kɛha fãi lɛ ekomɛi ahe nitsumɔ bɔni afee ni akɛ saji amlitĩi fãi nɛɛ ahɔlɔ mli.

Akɛ nakai gbɛjianɔtoo lɛ nɔŋŋ baatsu nii yɛ gbi kome kpee krɛdɛɛ he gbɛjianɔtoo lɛ gbɛfaŋ, shi akɛ saji amlitĩi fã ni baahe miniti 15 lɛ ekome pɛ baatsu nii kɛsusu nifeemɔ muu lɛ fɛɛ he. Wɔ fɛɛ wɔbaasumɔ ni wɔkɛ nɔ ni abaaŋma ahɔ nakai wolo lɛ teŋgbɛ lɛ ato koni wɔkɛtsu nii kɛná tsɔsemɔi kpakpai ni Yehowa kɛhaa lɛ ahe sɛɛ.—Yes. 48:17, 18.