Ní Aaaye Abua Shiɛlɔi Heei kɛ Mɛi ni Ebɔi Shiɛmɔyaa Ekoŋŋ lɛ yɛ Shiɛmɔ Nitsumɔ lɛ Mli
1. Mɛɛ gbɛ nɔ atsɔ aye abua bo ni oje shiɛmɔ nitsumɔ lɛ shishi?
1 Eka shi faŋŋ akɛ beni oyɔse klɛŋklɛŋ kwraa akɛ ehe miihia ni okɛ ohe awo shiɛmɔ nitsumɔ lɛ mli lɛ, jeee akɛ aha bo shikpɔŋkuku ko pɛ kɛkɛ koni otsu mli nii, ni jeee akɛ akɛɛ bo kɛkɛ akɛ oyashiɛ yɛ jɛmɛ. Dabi, mɔ ko jɛ mlihilɛ mli eye ebua bo koni oje nitsumɔ ni he hiaa fe fɛɛ nɛɛ shishi. Ani efeŋ nɔ ni sa jogbaŋŋ akɛ bo hu oooye obua shiɛlɔ hee ko loo mɔ ko ni aye abua lɛ ni ebɔi shiɛmɔyaa ekoŋŋ lɛ. Mɛi ni kɛ yelikɛbuamɔ ni tamɔ nɛkɛ haa lɛ, nuɔ he diɛŋtsɛ akɛ “nɔ hamɔ mli yɛ jɔɔmɔ fe hemɔ.”—Bɔf. 20:35.
2. Mɛɛ gbɛ nɔ oootsɔ oye obua shiɛlɔ hee loo mɔ ko ni ebɔi shiɛmɔyaa ekoŋŋ?
2 Yelikɛbuamɔ ni Aaaya Nɔ Akɛha: Mɛɛ gbɛ nɔ oootsɔ oye obua mɔ ko ni tamɔ nɛkɛ? Hesaamɔ ji oti ni he hiaa fe fɛɛ. Obaanyɛ okɛ lɛ afee ekome kɛtsu enɛ he nii kɛtsɔ shiɛmɔ wiemɔi ni akɛha kɛha woji tɛtrɛbii heei lɛ kɛhamɔ loo wolo ni akɛmiitsu nii yɛ nakai be lɛ mli lɛ mli saji otii ni nyɛaasusu he lɛ nɔ. Ehe miihia ni shiɛlɔ hee loo mɔ ni aye abua lɛ ni ebɔi shiɛmɔyaa ekoŋŋ lɛ ale wolo ni akɛhaa lɛ mli saji jogbaŋŋ bɔni afee ni ená ekãa babaoo beni ekɛ mɔ lɛ wieɔ yɛ shinaa lɛ naa lɛ.
3. Ani shiɛmɔ he nɔkwɛmɔnɔ ni aaafee lɛ he miihia? Tsɔɔmɔ mli.
3 Nɔ kroko hu ni nyɛbaanyɛ nyɛfee ji ní nyɛsusu shitee-kɛ-woo wiemɔi ni akɛfɔɔ kpee lɛ ahe kɛ bɔ ni nyɛbaajie naa nyɛha lɛ ahe. Mɛni hewɔ nyɛfeee he nɔkwɛmɔnɔ nyɛkwɛɛɛ, koni nyɛteŋ mɔ kome afee shiatsɛ ni miitee shitee-kɛ-woo ni akɛfɔɔ kpee lɛ ashi ni mɔ kroko lɛ hu afee nakai nɔŋŋ? Enɛ baaye abua lɛ koni ehiɛ akagbo ni eyiŋ akafutu lɛ yɛ shitee-kɛwoo wiemɔ ko ni ekpaaa gbɛ lɛ hewɔ.
4, 5. (a) Abaanyɛ aye abua shiɛlɔ lɛ koni ená hekɛnɔfɔɔ kɛ miishɛɛ yɛ shiɛmɔ nitsumɔ lɛ mli yɛ mɛɛ gbɛ nɔ? (Jaj. 4:9, 10) (b) Yɛ 1 Tesalonikabii 5:11 lɛ kɛ gbeekpamɔ naa lɛ, wɔbaanyɛ ‘wɔha wɔnaanyo nane amɔ shi’ be mli ni wɔkɛ wɔhe ewo shiɛmɔ nitsumɔ lɛ mli sɛɛ yɛ mɛɛ gbɛ nɔ?
4 Ekolɛ shishijee lɛ oshiɛmɔ nitsumɔ hefatalɔ lɛ baashe gbeyei ni enaŋ hekɛnɔfɔɔ yɛ lɛ diɛŋtsɛ emli, no hewɔ lɛ, eji nɔ ni yeɔ ebuaa kɛ́ otsɔ hiɛ okɛ lɛ to gbɛjianɔ kpakpa koni okɛ lɛ afee ekome kɛtsu nii. Ehiɛ baasɔ akɛ mɔ ko kɛ lɛ miitsu nii ni baaye abua lɛ kɛji ehe bahia. (Jaj. 4:9, 10) Shishijee lɛ, ekolɛ ehe baaba sɛɛnamɔ kɛji akɛ nyɛtsu nii yɛ shikpɔŋkuku ko ni ewaaa akɛ aaaje sanegbaa shishi yɛ mli lɛ mli. Ŋmɛɛ mɔ ni oyeɔ obuaa lɛ lɛ gbɛ koni ekɛ ehe awo mli. Kɛji akɛ wiemɔi fioo pɛ amɛwie po lɛ, enɛ baaha amɛná ekãa kɛ miishɛɛ babaoo yɛ shiɛmɔ nitsumɔ lɛ mli.
5 Yɛ no sɛɛ lɛ, ehe baaba sɛɛnamɔ kɛji akɛ nyɛsusu mɛi ni nyɛtee amɛŋɔɔ lɛ kɛ nɔ ni nyɛbaanyɛ nyɛfee ni nyɛkɛha miishɛɛ ni amɛná yɛ sane lɛ he lɛ aya hiɛ yɛ saramɔ be kroko mli lɛ ahe. Ná jwɛŋmɔ ni ja ni ojie eyi yɛ mɔdɛŋ ni ebɔ lɛ he. (1 Tes. 5:11) Bɔɔ mɔdɛŋ ni oto be pɔtɛɛ ko ni nyɛfee ekome kɛtsu nii ekoŋŋ. Beni be shwieɔ mli lɛ, ebaaná ekãa, jeee yɛ nyɛmɔ ni eyɔɔ yɛ Maŋtsɛyeli shɛɛ sane ni ekɛhaa yɛ shinaai anaa lɛ pɛ mli, shi moŋ yɛ nyɛmɔ ni eyɔɔ ni eeegba mɛi krokomɛi anɔkwale lɛ he sane yɛ gbɛ ni mɔɔ shi nɔ lɛ mli.
6. Mɛɛ gbɛ̀i pɔtɛɛ anɔ wɔbaanyɛ wɔtsɔ wɔye wɔbua shiɛlɔi heei loo mɛi ni ebɔi shiɛmɔyaa ekoŋŋ lɛ koni amɛya amɛhiɛ?
6 Beni wɔyaa nɔ wɔkɛ mɛi nɛɛ tsuɔ nii lɛ, wɔbaanyɛ wɔkɛ amɛ agba bɔ ni akɛ Reasoning wolo lɛ, concordance loo Bible Topics for Discussion wolo lɛ tsuɔ nii ahaa; bɔ ni atoɔ sɛɛkuu kɛ saramɔ shishi yɛ klɛŋklɛŋ saramɔ lɛ mli ahaa; bɔ ni asaa he kɛha sɛɛkuu kɛ saramɔ kɛ bɔ ni afeɔ lɛ ahaa; bɔ ni afeɔ ajeɔ Biblia mli nikasemɔ shishi kɛ bɔ ni afeɔ ayaa hiɛ akɛ tsɔɔlɔ lɛ ahe saji. Enɛɛmɛi fɛɛ ji dɛŋdadei kɛ hesaai ni esa akɛ shiɛlɔ ni woɔ yibii lɛ aná.—2 Tim. 4:5.
7. Yɛ Abɛi 27:23 lɛ kɛ gbeekpamɔ naa lɛ, mɛni akpaa gbɛ ni Asafo Woloŋ Nikasemɔ nɔkwɛlɔi afee, ni wɔbaanyɛ wɔkɛ amɛ afee ekome yɛ mɛɛ gbɛ nɔ?
7 Woloŋ Nikasemɔ Nɔkwɛlɔi: Esa akɛ woloŋ nikasemɔ nɔkwɛlɔ fɛɛ nɔkwɛlɔ asusu aŋkroaŋkroi fɛɛ ni yɔɔ ekuu lɛ mli lɛ ahe bɔni afee ni enyɛ eyɔse kɛji mɔ ko efɔɔɔ kpeei baa loo ebɔɔɔ mɔdɛŋ yɛ shiɛmɔ nitsumɔ lɛ mli. (Abɛi 27:23) Esa akɛ ebɔ mɔdɛŋ ni ekɛ mɛi ni fa saŋŋ atsu nii bɔ ni eeenyɛ yɛ shiɛmɔ nitsumɔ henɔi srɔtoi lɛ fɛɛ amli, ni ekɛ yelikɛbuamɔ ni suɔmɔ yɔɔ mli aha kɛji ehe bahia loo kɛji mɔ ko bi ni aye abua lɛ. Mɛni hewɔ okwɛɛɛ akɛ obaanyɛ okɛ owoloŋ nikasemɔ nɔkwɛlɔ lɛ loo shiɛlɔi krokomɛi ni he esa lɛ atsu nii koni oná niiashikpamɔi ni amɛyɔɔ lɛ ahe sɛɛ?
8. Mɛɛ mumɔ esa akɛ wɔkɛye wɔbua shiɛlɔi heei kɛ mɛi ni ebɔi shiɛmɔyaa ekoŋŋ lɛ?
8 No hewɔ lɛ, “bɔ ni mɔ fɛɛ mɔ ená duromɔ keenii lɛ, nyɛkɛsɔmɔsɔmɔa nyɛhe, tamɔ Nyɔŋmɔ duromɔ nii srɔtoi lɛ anɔkwɛlɔi kpakpai.” Be mli ni wɔfeɔ enɛ lɛ, wɔtaooo hiɛnyam wɔhaaa wɔhe, shi moŋ wɔsumɔɔ akɛ “atsɔ Yesu Kristo nɔ awo Nyɔŋmɔ hiɛ nyam yɛ nii fɛɛ mli.” Beni okɛ ‘nikeenii’ nɛɛ tsuɔ nii kɛyeɔ obuaa mɛi krokomɛi lɛ, obaaná hegbɛi krokomɛi kɛwo Nyɔŋmɔ hiɛ nyam.—1 Pet. 4:10, 11.