Te Wɔɔfee Tɛŋŋ Wɔye Wɔbua Gbalashihilɛ Mli Hefatalɔi ni Jeee Odasefoi?
1 Yehowa tsuji babaoo kɛ aŋkroaŋkroi ní sumɔɔ nyɛmimɛi asane, ni amɛyɛ asafo lɛ he miishɛɛ shi amɛsumɔɔɔ ni amɛbatsɔmɔɔ Nyɔŋmɔ tsuji lɛ ebote gbalashihilɛ mli. Wu ko kpɛlɛ nɔ akɛ: “Shia kɛ shia shiɛmɔyaa he jwɛŋmɔ lɛ ji gbɛtsii nii agbo ko kɛha mi.” Ekolɛ mɛi krokomɛi hu hiɛ sui ni Ŋmalɛi ekpɛlɛɛɛ nɔ ni ehe miihia ni amɛye nɔ, loo ekolɛ amɛbaanu he akɛ amɛnyɛŋ ni amɛhi shi yɛ teokrase gbɛjianɔtoo ni dekã bɛ mli kwraa ni amɛhefatalɔ lɛ hiɛ mli lɛ naa. Te wɔɔfee tɛŋŋ wɔye wɔbua amɛ?
2 Jiemɔ Miishɛɛ Kpo: Mɛi krokomɛi ahe miishɛɛ ni aaana kɛ nibii ni haoɔ amɛ ni aaakadi lɛ baagbele gbɛ kɛha amɛ ni amɛbo Biblia mli anɔkwale lɛ toi. (Fil. 2:4) Bei pii lɛ, mɛi ni tsutsu ko lɛ amɛkɛ amɛhefatalɔi lɛ bɛ hemɔkɛyeli kome mli lɛ tsĩɔ suɔmɔ ni miishɛɛ yɔɔ mli ni mɛi krokomɛi jie lɛ kpo lɛ tã. Wu ni atsĩ etã kɛtsɔ hiɛ lɛ tsɔɔ mli akɛ: “José, ni ji onukpa yɛ asafo lɛ mli lɛ ná mihe miishɛɛ krɛdɛɛ ko. Misusuɔ akɛ, ehewalɛwoo lɛ ha yɛ naagbee lɛ mikɛ hiɛdɔɔ je nikasemɔ shishi.” Wu kroko hu kaiɔ akɛ nyɛmimɛi ni basaraa lɛ lɛ bɔ mɔdɛŋ ni amɛwie nibii ni eyɔɔ he miishɛɛ lɛ ahe. Ekɛɛ akɛ: “Mije shishi mikwɛ [miŋa] hemɔkɛyeli lɛ yɛ gbɛ kroko kwraa nɔ. Enanemɛi lɛ le nii waa ni amɛnyɛɔ amɛwieɔ saji srɔtoi babaoo he.”—1 Kor. 9:20-23.
3 Okɛ Hewalɛwoo ni Anyɛɔ Atsuɔ He Nii Aha: Hefatalɔi ni jeee Odasefoi lɛ hu baanyɛ aná yelikɛbuamɔ ni mlihilɛ yɔɔ mli ni akɛaaha amɛ lɛ he miishɛɛ. (Abɛi 3:27; Gal. 6:10) Beni wu ko ni heee yeee lɛ kar fite lɛ, Odasefonyo oblanyo ko baye ebua lɛ. Ekɛɛ akɛ: “Miná enɛ he miishɛɛ waa diɛŋtsɛ.” Nyɛminuu kroko hu kɛ gbi muu fɛɛ tsu nii ni ekɛye ebua nyɛmiyoo ko wu ni heee yeee lɛ ni ekɛfo afabaŋ ewo eshia lɛ he. Beni amɛfee ekome kɛtsuɔ nii ni amɛgbaa sane lɛ, amɛje naanyobɔɔ shishi. Otsii enyɔ sɛɛ lɛ, nuu lɛ tee nyɛminuu lɛ ŋɔɔ ni ekɛɛ: “Be eshɛ ni esa akɛ mafee tsakemɔi komɛi yɛ mishihilɛ mli. Ani obaanyɛ okɛ mi akase Biblia lɛ?” Etee ehiɛ oyayaayai ni amrɔ nɛɛ eji Odasefonyo ni abaptisi lɛ.
4 Be mli ni wɔyaa nɔ wɔtaoɔ mɛi ni sa yɛ wɔshikpɔŋkuku lɛ mli lɛ, nyɛhaa wɔyaa nɔ wɔyea wɔbuaa mɛi ni kɛ nanemɛi heyelilɔi ebote gbalashihilɛ mli lɛ.—1 Tim. 2:1-4.