Nitsumɔ ko ni Biɔ Heshibaa
1 Nyɔŋmɔ Wiemɔ lɛ woɔ wɔ ŋaa koni ‘wɔjwɛŋ heshibaa jwɛŋmɔ, ni wɔkɛ efɔŋ akato efɔŋ najiaŋ, shi moŋ wɔkɛ jɔɔmɔ aha.’ (1 Pet. 3:8, 9) Yɛ anɔkwale mli lɛ, nakai ŋaawoo lɛ kɔɔ shiɛmɔ nitsumɔ lɛ he. Lɛɛlɛŋ, Kristofoi asɔɔmɔ nitsumɔ lɛ baanyɛ afee wɔheshibaa lɛ he kaa.
2 Heshibaa ji su ko ni yeɔ ebuaa wɔ koni wɔŋmɛ wɔtsui shi yɛ shihilɛi ni ehiii mli. Kɛ wɔmiishiɛ lɛ, wɔyaa mɛikpɔji aŋɔɔ beni amɛtsɛko wɔ, ni wɔle akɛ amɛteŋ mɛi komɛi baafee amɛnii yɛ gbɛ ni ehiii nɔ. Ákɛ wɔɔya nɔ wɔshiɛ yɛ shihilɛ ni tamɔ nɛkɛ mli fɛɛ sɛɛ lɛ biɔ heshibaa. Nyɛmimɛi yei gbɛgbalɔi enyɔ komɛi kɛ afii enyɔ tee shia kɛ shia daa gbi yɛ shikpɔŋkuku ko ni mli wa diɛŋtsɛ mli ni amɛnáaa mɔ ko amɛkɛwie! Shi kɛlɛ, amɛkã he, ni ŋmɛnɛ lɛ ayɛ asafoi enyɔ yɛ nakai akutso lɛ mli.
3 Sakasakafeemɔ Naadaamɔ: Heshibaa baaye abua wɔ koni wɔkase Yesu kɛji mɛi krokomɛi tseee amɛhiɛ amɛhaaa wɔ. (1 Pet. 2:21-23) Yɛ shia ko mli lɛ, yoo ko jɛ́ nyɛmi yoo ko, ni no sɛɛ lɛ yoo lɛ wu lɛ hu jɛ́ nyɛmi yoo lɛ, ni nuu lɛ kɛ fãmɔ ha koni nyɛmi yoo lɛ ashi amɛshia lɛ mli ní eya. Nyɛmi yoo lɛ fee ehiɛ ŋmɔlɔŋmɔlɔ kɛkɛ ni ekɛɛ akɛ ebaasumɔ ni ekɛ amɛ awie yɛ be kroko mli. Enɛ ha gbalashihilɛ mli hefatalɔi lɛ anaa kpɛ amɛhe aahu akɛ amɛbo Odasefonyo kroko ni ba amɛŋɔɔ lɛ toi, ni amɛkpɛlɛ ninefɔɔ akɛ amɛba kpee yɛ Maŋtsɛyeli Asa lɛ nɔ lɛ nɔ. Nyɛmi yoo ni ajɛ́ lɛ lɛ yɛ jɛmɛ ni eŋa amɛ ni eye amɛ odase babaoo. Wɔ hu ekolɛ wɔbaaha mɛi ni kpooɔ wɔ lɛ ashitee-kɛ-woo lɛ naa aba shi kɛtsɔ “mlijɔlɛ kɛ bulɛ ni mli kwɔ” kpo ni wɔɔjie lɛ nɔ.—1 Pet. 3:15, NW; Abɛi 25:15.
4 Kwa Henɔwomɔ: Biblia mli nilee ni wɔyɔɔ lɛ haaa wɔ nɔdaamɔ nɔ ko ni wɔkɛaagbe mɛi ahe guɔ loo ni wɔɔwie wɔshi amɛ. (Yoh. 7:49) Yɛ no najiaŋ lɛ, Nyɔŋmɔ Wiemɔ lɛ woɔ wɔ ŋaa ‘koni wɔkawie mɔ ko he efɔŋ.’ (Tito 3:2) Kɛ wɔba wɔhe shi yɛ wɔtsui mli taakɛ Yesu fee lɛ, wɔhaa mɛi krokomɛi náa hejɔɔmɔ. (Mat. 11:28, 29) Heshibaa mli ni wɔjɛɔ wɔbɛŋkɛɔ mɛi lɛ haa anáa wɔshɛɛ sane lɛ he miishɛɛ.
5 Hɛɛ, heshibaa haa wɔmiaa wɔhiɛ yɛ shikpɔŋkuku ni mli wa mli. Ebaanyɛ eha mɛi ni kpooɔ wɔ lɛ ahe ajɔ, ni ehaa mɛi krokomɛi boɔ Maŋtsɛyeli shɛɛ sane lɛ toi. Nɔ ni fe fɛɛ lɛ, esaa Yehowa, ní ‘duroɔ heshibalɔi’ lɛ hiɛ.—1 Pet. 5:5.