Ani “Oosumɔ ni” Oye Obua Mɛi Krokomɛi?
1 Yesu susuɔ gbɔmɛi ahe diɛŋtsɛ. Beni kpitiyelɔ ko kpa Yesu fai ni eye ebua lɛ lɛ, ekpã enine mli, eta nuu lɛ he, ni ekɛɛ akɛ: “Miisumɔ, ohe atse.” (Mar. 1:40-42) Mɛɛ gbɛ̀i anɔ wɔbaanyɛ wɔkase subaŋ ni Yesu jie lɛ kpo yɛ mɛi krokomɛi ayelikɛbuamɔ he lɛ yɛ?
2 Gbɔmɛi ni Yɔɔ Wiemɔ lɛ He Miishɛɛ: Asafo lɛ mli bii lɛ ateŋ mɔ fɛɛ mɔ tsuɔ gbɛfaŋnɔ ko yɛ mɛi ni yɔɔ wiemɔ lɛ he miishɛɛ lɛ ayelikɛbuamɔ mli koni amɛbatsɔmɔ Yehowa jálɔi. Kɛji akɛ mɛi heei ba kpeei lɛ, ŋã amɛ ni ole mɛi ni amɛji. Taomɔ gbɛ̀i ni oootsɔ nɔ owo amɛ hewalɛ. Jiemɔ amɛyi yɛ hetooi ni amɛhaa lɛ hewɔ. Jiemɔ hiɛsɔɔ kpo yɛ mɔdɛŋ ni amɛbɔɔ koni amɛkɛ Biblia shishitoo mlai atsu nii yɛ amɛshihilɛ mli lɛ mli. Ye obua amɛ ni amɛna sɛɛnamɔ ni baajɛ anɔkwa nanemɛi ni amɛnáa yɛ asafo lɛ mli lɛ mli aba lɛ.
3 Nanemɛi Heyelilɔi: “Mɛi ni ji hemɔkɛyeli lɛ webii lɛ” titri ji mɛi ni esa akɛ wɔye wɔbua amɛ yɛ gbɛ̀i srɔtoi babaoo nɔ. (Gal. 6:10) Mɛi pii kɛ helai miikpe. Kɛji akɛ oyasara amɛ kɛwo amɛ hewalɛ lɛ, obaanyɛ otsɔ nɔ okɛ naanyobɔɔ ni he hiaa lɛ aha, ekolɛ koni oye obua hu yɛ gbɛ̀i srɔtoi ni sa nɔ. Ekolɛ mɛi komɛi hu kɛ naagbai krokomɛi ni mli wawai miikpe yɛ amɛshihilɛ mli. Jiemɔ bɔ ni osusuɔ amɛhe lɛ kpo kɛtsɔ be ni oooná ni okɛbo amɛ toi ni otswa amɛ oma shi lɛ nɔ. (1 Tes. 5:14) Ekome ni wɔkɛ onukpai lɛ hu aaafee lɛ he miihia, yɛ be mli ni amɛtsuɔ amɛgbɛnaa nii ahe nii lɛ. (Heb. 13:17) Kɛji akɛ wɔjie mumɔ ni sumɔɔ ni yeɔ buaa kpo lɛ, wɔbaanyɛ ‘wɔtsɔmɔ hewalɛwoo nɔ̃ ni wajeɔ mɔ’ wɔha wɔnanemɛi heyelilɔi lɛ.—Kol. 4:11.
4 Weku Mli Bii: Esa akɛ wɔbɔ mɔdɛŋ hu ni wɔkase bɔ ni Yesu susuɔ gbɔmɛi ahe lɛ he yɛ wɔweku kɔkɔrɔɔ lɛ mli. Mɔ he susumɔ babaoo lɛ kanyaa fɔlɔi ‘koni amɛya nɔ amɛlɛ amɛbii lɛ yɛ Yehowa tsɔsemɔ kɛ ŋaawoo mli.’ (Efe. 6:4) Gbekɛbii baanyɛ afee amɛ gbɛfaŋnɔ kɛtsɔ klalo ni amɛaafee amrɔ nɔŋŋ ni be aaashɛ kɛha weku nikasemɔ, asafoŋ kpeei, loo shiɛmɔyaa. Gbekɛbii ni amɛdara lɛ baanyɛ ajie Yesu mɔbɔnalɛ lɛ kpo kɛtsɔ mlihilɛ mli ni amɛaajɛ amɛye amɛbua amɛfɔlɔi yɛ naagbai ni gbɔlɛ kɛbaa amɛnɔ lɛ mli. Wɔ fɛɛ wɔbaanyɛ wɔtsu ‘Nyɔŋmɔ jamɔ hetuu-kɛhamɔ he nii yɛ wɔ we’ yɛ enɛ kɛ gbɛ̀i krokomɛi anɔ.—1 Tim. 5:4.
5 Kɛ́ wɔkase Yesu ni wɔkɛye wɔbua mɛi krokomɛi lɛ, ekolɛ wɔbaanyɛ wɔye wɔbua kɛba naagbai lɛ ashi, ni egbalaa wɔweku lɛ kɛ asafo lɛ kɛbɛŋkɛɔ amɛhe. Nɔ ni he hiaa fe fɛɛ lɛ, wɔkɛ woo haa Yehowa, “musuŋtsɔlɛi atsɛ” lɛ.—2 Kor. 1:3.