Ebiɔ ni Wɔ Fɛɛ Wɔkɛ Wɔhe Awo Mli Koni Anyɛ Agbe Nitsumɔ lɛ Naa
1 Esa akɛ Yesu Kristo kaselɔ fɛɛ kaselɔ anu shishi akɛ mɔdɛŋ ni ebɔɔ koni ekɛfi Maŋtsɛyeli shiɛmɔ nitsumɔ lɛ sɛɛ kɛ ehe ni ekɛwoɔ mli lɛ he miihia waa diɛŋtsɛ. Yesu yɔse akɛ ekaselɔi lɛ baawo Maŋtsɛyeli yibii lɛ yɛ yibɔi sɔrɔtoi anɔ. (Mat. 13:23) Eyɛ mli akɛ gbɛgbalɔi ni tsuɔ nii waa lɛ ateŋ mɛi babaoo etsu shiɛmɔ nitsumɔ lɛ babaoo moŋ, shi mɛi fɛɛ ni kɛ mɔdɛŋbɔɔ yaa nɔ kɛwoɔ Nyɔŋmɔ hiɛnyam kɛtsɔ yibii babaoo ni amɛwoɔ bɔ ni amɛaanyɛ lɛ nɔ lɛ sa yijiemɔ.—Yoh. 15:8.
2 Mɔdɛŋbɔi lɛ Fɛɛ Nyɛɔ Babaoo Etsuɔ: Yesu gba efɔ̃ shi akɛ, ekaselɔi lɛ fɛɛ anitsumɔi ni abua naa lɛ baafe enɔ lɛ. (Yoh. 14:12) Kɛji akɛ wɔ aŋkroaŋkro shihilɛi eŋmɛɛɛ wɔ gbɛ bɔ ni wɔbaanyɛ wɔfee babaoo loo eŋmɛɔ wɔ gbɛ koni wɔtuu be babaoo wɔwo Maŋtsɛyeli shiɛmɔ lɛ mli jio lɛ, wɔ fɛɛ wɔhe miihia koni anyɛ agbe nitsumɔ lɛ naa. Etamɔ bɔ pɛ ni Paulo kɛɛ lɛ akɛ: “Gbɔmɔtso muu lɛ fɛɛ mɔmɔɔ ehe shimɔshimɔɔ ehe nɔ ni etsɔɔ nɔ ni jɛɔ talɔ fɛɛ talɔ mli lɛ nɔ etsaratsaraa ehe nɔ yɛ henɔ fɛɛ henɔ nitsumɔ susumɔ lɛ naa, ni ehaa gbɔmɔtso lɛ daa.”—Efe. 4:16.
3 Mɛi komɛi baanu he akɛ amɛmɔdɛŋbɔi lɛ faaa. Shi kɛlɛ, yɛ Yehowa hiɛ lɛ, nɔ ni he hiaa ji akɛ wɔsɔɔmɔ lɛ afee susuma muu fɛɛ nɔ. Nɔ fɛɛ nɔ ni wɔfeɔ wɔhaa lɛ lɛ jara wa ni ehiɛ sɔɔ.—Okɛto Luka 21:1-4 he.
4 Yaa Nɔ ni Ofi Nitsumɔ lɛ Sɛɛ: Wɔ fɛɛ wɔyɛ hegbɛ akɛ wɔkɛ heloonaa nii aaaye abua kɛha jeŋ fɛɛ nitsumɔ lɛ. Mɛi krokomɛi hu baanyɛ amɛkɛ amɛhewalɛ aye abua koni amɛkɛfi Maŋtsɛyeli nitsumɔ lɛ sɛɛ. Mɔ fɛɛ mɔ baanyɛ abɔ mɔdɛŋ koni ekɛ sane hetooi ni esaa ehe jogbaŋŋ yɛ mli lɛ aha yɛ kpeei ashishi ni ekɛ ehe awo Teokrase Sɔɔmɔ Skul lɛ mli. Kɛtsɔ hegbɛi ni wɔŋɔɔ ni wɔkɛwoɔ mɛi krokomɛi hewalɛ lɛ nɔ lɛ, wɔkɛ yelikɛbuamɔ ni jara wa haa asafo lɛ yɛ mumɔŋ, ni enɛ haa enyɛmɔi ni eyɔɔ ni ekɛaagbe nitsumɔ ni atuu awo edɛŋ lɛ naa lɛ yaa hiɛ.
5 Lɛɛlɛŋ, ebiɔ ni wɔ fɛɛ wɔkɛ wɔhe awo mli koni anyɛ agbe nitsumɔ lɛ naa. Esaaa akɛ mɔ ko mɔ ko nuɔ he akɛ ehe ehiaaa. Wɔ mɔdɛŋbɔi ni abua naa, agbo kɛ bibioo lɛ fɛɛ yɛ Yehowa sɔɔmɔ mli lɛ haa akadiɔ wɔ akɛ, Nyɔŋmɔ anɔkwa tsuji pɛ ni yɔɔ. (Mal. 3:18) Wɔteŋ mɔ fɛɛ mɔ baanyɛ aná Yehowa hiɛnyamwoo yɛ gbɛ ni shishinumɔ yɔɔ mli lɛ mli gbɛfaŋnɔ, kɛ mɛi krokomɛi ni abaaye abua amɛ koni amɛle lɛ, ni amɛsɔmɔ lɛ lɛ hu mli gbɛfaŋnɔ.