Okɛ Mɛi Krokomɛi Aja Nii yɛ Amɛhiamɔ Nii Anaa
1 Yehowa tsɔɔ “tsulɔ” anɔkwafo lɛ nɔ ekɛ nibii haa koni etsu wɔmumɔŋ hiamɔ nii ahe nii. (Mat. 24:45-47) Nibii ni ekɛhaa nɛɛ babaoo bafeɔ woji, Bibliai, wolokpoi, vidioi, kasɛtii ni amɔmɔ nibii awo nɔ, kɛ kɔmpiuta disk srɔtoi ni akɛtaoɔ saji amli yɛ Biblia mli. Nɔ ni Yehowa kɛhaa lɛ fá daa nɛɛ ni efiteee eko kwraa. Ekpaa gbɛ akɛ wɔkɛ mɛi krokomɛi baaja nii ní wɔkwɛ ni mɔ fɛɛ mɔ aná he sɛɛ pɛpɛɛpɛ.
2 Shika ni fá waa diɛŋtsɛ ji nɔ ni akɛfeɔ nɛkɛ nibii nɛɛ fɛɛ. Jeŋ muu fɛɛ nyɛmimɛi anaanyobɔɔ lɛ woɔ shika ni akɛtsuɔ enɛɛmɛi ahe nii lɛ he nyɔmɔ. Enɛ yɛ mli anɔkwale, titri lɛ kɛjɛ beni Asafo lɛ to gbɛjianɔ koni akɛ woji lɛ aha ni jeee yɛ jara pɔtɛɛ ko naa ní too ni ajɛɔ tsui mli ayeɔ lɛ ji nɔ ni adamɔɔ nɔ kwraa koni akɛwo he nyɔmɔ lɛ.
3 Te Wɔɔfee Tɛŋŋ Wɔye Wɔbua: Wɔbaanyɛ wɔkpɛlɛ ŋaawoo ni Paulo kɛha koni wɔkɛ mɛi krokomɛi aja nii ‘yɛ amɛhiamɔ nii anaa’ lɛ nɔ. (Rom. 12:13) Kɛ wɔkɛ shika ye too kɛha jeŋ muu fɛɛ nitsumɔ lɛ, no lɛ wɔkɛ wɔnyɛmimɛi ni yɔɔ je lɛŋ he fɛɛ he lɛ miija nɔ ni wɔyɔɔ lɛ tɛ̃ɛ. Akɛni enɛ yɔɔ mɛi komɛi ajwɛŋmɔ mli hewɔ lɛ, amɛkpɛ amɛyiŋ akɛ amɛkɛ shika pɔtɛɛ ko baafɔ̃ shi koni amɛkɛye amɛbua jeŋ muu fɛɛ nitsumɔ lɛ daa nyɔŋ, taakɛ amɛfeɔ yɛ shika ni akɛtsuɔ Maŋtsɛyeli Asa he nii lɛ gbɛfaŋ lɛ. Amɛyɔseɔ akɛ jeee woji afeemɔ pɛ ji nɔ ni akɛ nɛkɛ shikai srɔtoi nɛɛ tsuɔ he nii, shi akɛtsuɔ nitsumɔ lɛ fãi srɔtoi lɛ fɛɛ he nii hu. Susumɔ sɛɛnamɔ babaoo ni wɔ jeŋ muu fɛɛ nyɛmifeemɔ lɛ baaná lɛ he okwɛ, kɛ́ mɛi babaoo kɛ amɛhe baawo mli daa yɛ nɛkɛ gbɛ nɔ.
4 Kɛfata he lɛ, wɔbaanyɛ ni wɔkɛ amɛ aja kɛ́ wɔfee mɛi ni fiteee nii yɛ nibii ni wɔnine baanyɛ ashɛ nɔ amrɔ nɔŋŋ lɛ mli. Nibii diɛŋtsɛ ni he hiaa wɔ lɛ ni wɔɔshɛ no pɛ lɛ, haa wɔnyɛmimɛi ni yɔɔ hei krokomɛi lɛ hu anine shɛɔ mumɔŋ nibii ni akɛhaa, ni ehe hiaa ni amɛ hu amɛnine ashɛ nɔ koni amɛhe awa daa, ni amɛya hiɛ yɛ sanekpakpa lɛ shiɛmɔ mli yɛ hei srɔtoi ni amɛyɔɔ yɛ je lɛŋ lɛ anɔ.—Heb. 13:16.
5 Esa akɛ wɔha enɛ ahi wɔjwɛŋmɔ mli titri kɛ́ wɔmiishɛ nibii ni Asafo lɛ kɛ shika babaoo feɔ lɛ. Nɔ ni fata enɛɛmɛi ahe ji vidioi, CD-ROM srɔtoi, woji wuji ni akɛtaoɔ saji amli, wolokpoi, kɛ kasɛtii ni ashɛɔ. Yɛ nɔ najiaŋ ni aaashɛ eko aha mɔ fɛɛ mɔ yɛ shia lɛ mli lɛ, ani weku muu lɛ fɛɛ baanyɛ ni amɛkɛ ekome pɛ atsu nii? Ani wɔbaanyɛ wɔshɛ nɔ diɛŋtsɛ ni he hiaa wɔ amrɔ nɛɛ lɛ pɛ? Kɛ wɔfolɔ nɔ ni wɔkɔlɔɔ wɔhaa wɔhe lɛ nɔ lɛ, ebaaha mɛi krokomɛi hu aná nibii kpakpai ni wɔnáa mli ŋɔɔmɔ lɛ nɔŋŋ eko.—Fil. 2:4.
6 Ekolɛ tooyeli ni wɔkɛhaa Asafo lɛ jeŋ muu fɛɛ nitsumɔ lɛ yɛ Maŋtsɛyeli Asa lɛ nɔ kɛ nɔ ni mɛi ni yɔɔ wiemɔ lɛ he miishɛɛ ni heɔ woji lɛ kɛhaa lɛ baawo woji ni wɔkɛhaa yɛ shiɛmɔ mli lɛ jara lɛ he nyɔmɔ yɛ gbɛ ko nɔ. Shi kɛlɛ, kɛ́ aawie woji ni wɔshɛɔ wɔhaa wɔhe lɛ he, ni lala woji, Yearbook srɔtoi, Bibliai kɛ amɛsɛɛ bɔdɔɔ, kalandai, kɛ ekrokomɛi fata he lɛ, wɔnyɛŋ wɔkpa gbɛ akɛ mɛi ni yɔɔ sɛɛ lɛ baawo enɛɛmɛi ahe nyɔmɔ amɛha wɔ. Yehowa sɔɔlɔi ni ejɔɔ amɛhe nɔ lɛ diɛŋtsɛ ji mɛi tuuntu ni kɛ shika ni tamɔ nɛkɛ baafĩ sɛɛ. Akɛni no yɔɔ shiɛlɔi babaoo ajwɛŋmɔ mli hewɔ lɛ, amɛbuɔ akɔntaa amɛnaa bɔ ni woji nɛɛ ajara baanyɛ aji aha kɛ́ aafee koni ahɔɔ, ni amɛyeɔ too ni shɛɔ nakai pɛpɛɛpɛ amɛhaa. Ákɛ nɔkwɛmɔnɔ lɛ, Biblia kɛ esɛɛ bɔdɔɔ kɛ enaabu tamɔ wuɔfɔ lɛ jara baanyɛ afee ₵45,000 yɛ gbɛ ni waaa kwraa nɔ loo nɔ ni fe nakai, wolo ni akɛtaoɔ saji amli baanyɛ afee kɛjɛ ₵60,000 kɛyaa, ni kɛ hoo lɛ abaanyɛ ahɔɔ kalanda ni akɛkpɛtɛɔ gbogbo he kɛ emli mfonirii babaoo lɛ ₵10,000, kɛ CD-ROM he ensaiklopedia jara ni ji kɛjɛ ₵100,000 kɛyashi ₵200,000 loo nɔ ni fe nakai. Afɔɔ compact disc srɔtoi ni lalai yɔɔ nɔ lɛ ahɔɔmɔ aaafee ₵35,000, ni bei pii lɛ ahɔɔ vidioi komɛi fe nakai kwraa. Kɛ akɛ tooyeli ni fa bɔ ni sa haaa kɛha nibii ahe nyɔji ni awoɔ lɛ, yɛ naagbee lɛ, ebaanyɛ egbala nɔ ni ekolɛ Asafo lɛ baanyɛ atsu yɛ jeŋ muu fɛɛ nitsumɔ lɛ nɔyaa mli lɛ sɛɛ.
7 Yesu jaje akɛ nɔ ni baaha ayɔse enɔkwa sɛɛnyiɛlɔi lɛ faŋŋ ji suɔmɔ ni amɛaananaa amɛha amɛhe lɛ. (Yoh. 13:34, 35) Heloonaa nibii saŋŋ ni wɔkɛaaha kɛ nibii ni wɔkɛ mɛi krokomɛi aaaná mli gbɛfaŋnɔ yɛ amɛhiamɔ nii anaa ni pɛsɛmkunya bɛ mli lɛ ji gbɛ̀i kpakpai diɛŋtsɛ ni wɔɔtsɔ nɔ wɔtsɔɔ akɛ anɔkwa Kristofoi ji wɔ.