Shiɛmɔ Wiemɔ Iɛ Yɛ Shia kɛ Shia
1 Ani abaanyɛ aye odase yɛ shia kɛ shia, yɛ amrɔ nɛɛ naatsii nɛɛ shishi? Hɛɛ abaanyɛ! Kɛjɛ be mli ni February 1990 Wɔ Maŋtsɛyeli Sɔɔmɔ lɛ kɛ ŋaawoo nɛɛ ha yɛ baafa 1, kukuji 5 kɛ 6 yɛ saneyitso ni ji “Ha Ohiɛ Ahi Ohe nɔ Ni Okɛ Biblia Kasemɔ he Woji Aha” lɛ mli lɛ, shiɛlɔi kɛ gbɛgbalɔi pii naa shia kɛ shia shiɛmɔ nitsumɔ lɛ mli ŋɔɔmɔ. June nɔ lɛ hu hiɛ saneyitso ko ni ji “Bo hu, Obaanyɛ Oye Omanye yɛ Trukaa Odaseyeli Mli,” ni asusu saji otii ni baaye abua wɔ lɛ ahe yɛ mli. Mɛni mɛi komɛi feɔ yɛ nɛkɛ ŋaawoi nɛɛ kɛ nitsumɔ mli?
2 Kuui lɛ ekomɛi toɔ kpeei kɛha shiɛmɔyaa he gbɛjianɔ ni kuu lɛ hiɛnyiɛlɔ lɛ nyiɛɔ hiɛ ni amɛtiɔ ŋaa gbɛi ni atsɔɔ lɛ amli dani amɛkɛ amɛhe woɔ shia-kɛ-shia sɔɔmɔ nitsumɔ lɛ mli. Asusuɔ hiɛkpamɔ wiemɔi ni abaanyɛ akɛtsu nii yɛ ŋaa mli kɛ sanebimɔi ni shiatsɛmɛi lɛ baanyɛ abi lɛ hu ahe. Akɛ nɔkwɛmɔ nɔ lɛ, hiɛnyiɛlɔ lɛ bi kuu lɛ akɛ: “Mɛni ji nɔ ni obaakɛɛ kɛji shiatsɛ lɛ yoo akɛ Odasefonyo ji bo ni no hewɔ lɛ ekai bo akɛ atsi wɔnitsumɔ lɛ naa, aloo ‘agu’ wɔnitsumɔ lɛ, taakɛ mɛi komɛi kɛɔ lɛ?”
3 Ŋaawoo ko ni akɛha yɛ February Wɔ Maŋtsɛyeli Sɔɔmɔ lɛ mli lɛ ji ni wɔya shikpɔŋkuku ko mli ni wɔbi shiatsɛ lɛ akɛ wɔmiitao Ashimashi ko. Esa akɛ otsi tã hu akɛ mɔ ni otaoɔ lɛ ji Yehowa Odasefoi lɛ ateŋ mɔ kome ni nakai nɔŋŋ bo hu oji. Beni shiatsɛ lɛ etsɔɔ mli faŋŋ kɛji ele mɔ lɛ loo eleee lɛ lɛ sɛɛ lɛ, nyɛmimɛi lɛ ekomɛi biɔ shiatsɛ lɛ kɛji Yehowa Odasefoi baa eŋɔɔ yɛ tsutsu be ko ni eho lɛ mli. Kɛji eha hetoo akɛ dabi lɛ, no lɛ shiɛlɔ lɛ kɛɔ lɛ akɛ: “No lɛ onuko gbɛjianɔ ni Nyɔŋmɔ eto ni ebaatsɔ nɔ ekɛ toiŋjɔlɛ aba wɔ shikpɔŋ nɛɛ nɔ ekoŋŋ lɛ he sane, aloo jeee nakai?” Kɛkɛ lɛ abaanyɛ akɛ Saneyitso Kɛha Sanegbaa hee lɛ atsa nɔ. Kɛji shiatsɛ lɛ ha hetoo akɛ hɛɛ lɛ, no lɛ ona hegbɛ fɛfɛo yɛ enɛ hu mli akɛ okɛ lɛ agba Saneyitso Kɛha Sanegbaa hee lɛ loo saneyitso kroko ko he sane yɛ gbɛ ni yɔɔ mlɛo kwraa po nɔ.
4 Kɛji oyabi Ashimashi ko ni ji Odasefonyo lɛ shi ni ebalɛ akɛ shiatsɛ lɛ le lɛ ni etsɔɔ bo he ni eyɔɔ lɛ, bɔɔ mɔdɛŋ waa ni oya Ashimashi lɛ shia lɛ, bɔni afee ni oha onibimɔ lɛ afee anɔkwale. Nyɛmimɛi yei enyɔ komɛi fee nakai ni amɛnyɛ amɛyaŋa nyɛmiyoo ni amɛbi eshi yɛ shiatsɛ lɛ dɛŋ lɛ. Kɛkɛ ni amɛku amɛsɛɛ amɛtee shiatsɛ lɛ ŋɔɔ ni amɛyadalɛ shi. Ni amagba lɛ sane ni yɔɔ Luka 17:11-19 lɛ, he ni Yesu tsa kpitiyelɔi 10, shi amɛteŋ mɔ kome pɛ ku esɛɛ ni ebada lɛ shi lɛ. Nyɛmimɛi yei lɛ tsɔɔ mli akɛ amɛsumɔɔɔ ni amɛfeɔ trumui; kɛkɛ ni amɛtsɔɔ bɔ ni anyɛɔ akɛ Biblia lɛ tsuɔ nii yɛ wɔgbii nɛɛ amli lɛ hu. Enɛ tsa nɔ kɛbote Biblia mli sanegbaa mli, kɛ bɔ ni nilee hu yɔɔ eshishitoo mlai lɛ ni akɛaatsu nii yɛ shihilɛ mli lɛ mli. Ani bo hu obaanyɛ ofee nɔ ko tamɔ nakai?
Gbɛi Krokomɛi
5 Nyɛmimɛi yei enyɔ komɛi ni miiye odase yɛ shia kɛ shia yɛ amrɔ nɛɛ naatsii nɛɛ mli lɛ na nuu ko ni eka tso ko shishi eehere kɔɔyɔɔ. Amɛtsi amɛbɛŋkɛ lɛ ni nyɛmimɛi yei lɛ ateŋ mɔ kome kɛɛ: “Oohere kɔɔyɔɔ fioo yɛ biɛ. Enɛ haa mikaiɔ Biblia mli shiwoo ko ni yɔɔ Mika yitso 4. kuku 4 lɛ.” Nyɛmiyoo lɛ wie ŋmalɛ lɛ he kuku ni ebi lɛ akɛ: “Ani oheɔ shiwoo nɛɛ oyeɔ?” Enɛ tsa nɔ kɛtee sanegbaa ni ŋɔɔ mli yɛ Nyɔŋmɔ Maŋtsɛyeli lɛ mli jɔɔmɔ lɛ ahe.
6 No hewɔ lɛ, kɛ wɔkɛ gbɛi ni atsɔɔ nɔ ayeɔ trukaa odase ni asusu he yɛ June Wɔ Maŋtsɛyeli Sɔɔmɔ lɛ mli lɛ miitsu nii lɛ, ehe ehiaaa ni wɔyabi ni atsɔɔ wɔ Yehowa Odasefonyo ko shia dani wɔtsɔ nɔ wɔje wɔhiɛkpamɔ wiemɔ lɛ shishi. Kɛji wɔbaanyɛ wɔkɛ gbɛi sɔrɔtoi pii atsu nii yɛ wɔhiɛkpamɔ wiemɔi lɛ amli lɛ, no hi jogbaŋŋ, bɔni afee ni gbɔmɛi lɛ akayoo sɛɛ oya akɛ wɔmiiye odase diɛŋtsɛ wɔmiitsɔɔ amɛ.
7 Yɛ kuu kome ko mli lɛ, kuu lɛ hiɛnyiɛlɔ lɛ ha shiɛlɔi heei lɛ fata ehe kɛtee shiɛmɔ. Yɛ be mli ni eje sanegbaa lɛ shishi sɛɛ lɛ, etsɛ nɔ ni ewie jɔɔmɔi ni Nyɔŋmɔ maŋtsɛyeli lɛ kɛbaaba lɛ ahe, ni ebi nɛkɛ shiɛlɔi hɛɛ lɛ nɔ ni nɛkɛ jɔɔmɔi nɛɛ ekomɛi ji.Ni shiɛlɔ lɛ tsa nɔ kɛ shiɛmɔ lɛ taakɛ amɛtsɔ hiɛ amɛto he gbɛjianɔ momo lɛ, ni yɛ nɛkɛ gbɛ nɔ lɛ, ena mɛi heei etɛ ni ebaanyɛ eya amɛŋɔɔ kɛha sɛɛsaramɔ. No hewɔ lɛ aawo kuu hiɛnyiɛlɔi lɛ ahewalɛ koni amɛto gbɛjianɔ kpakpa amɛha mɛi heei lɛ kɛ mɛi ni eyaaa shiɛmɔ daa lɛ hu ni amɛkɛ amɛ aya shiɛmɔ, bɔni afee ni amɛ hu amɛna wɔsɔɔmɔ nitsumɔ lɛ fa nɛɛ mli ŋɔɔmɔ, ni amɛtsɔ no nɔ hu amɛyɛ amɛbua mɛi pii ni amɛbale anɔkwa Nyɔŋmɔ lɛ.—1 Tim. 2:4.
8 Nilee yɛ mli babaoo akɛ oooshi shiai lɛ ekomɛi yɛ teŋ yɛ be mli ni oyeɔ odase yɛ amrɔ nɛɛ shihilɛ nɛɛ mli lɛ. Yɛ anɔkwale mli lɛ. Yehowa fiɔ wɔsɛɛ. (Yer. 1:19) Nuŋtsɔ Yesu Kristo miitsɔ ŋwɛibɔfoi krɔŋkrɔŋi lɛ anɔ eekudɔ nɛkɛ tsɔsemɔ nitsumɔ kpeteŋkpele nɛɛ yɛ wɔgbii nɛɛ amli. (Mat. 28:19, 20; Kpoj. 14:6, 7) No hewɔ lɛ nyɛhaa wɔ fɛɛ wɔkɛ ekaa kɛ ŋaalee ayaa nɔ, ni ‘wɔshiɛ wiemɔ lɛ, ni wɔkã he daa nɛɛ, kɛ wɔyɛ shihilɛ kpakpa mli jio, jaramɔ shihilɛ mli jio,’ ni kɛtsɔ no nɔ lɛ eeefee odaseyeli kpele, yɛ amrɔ nɛɛ naatsii shihilɛ nɛɛ mli po, ni fɛɛ kɛ yijiemɔ aha Yehowa gbɛi kpeteŋkpele lɛ.—Lala 96:10; 2 Tim. 4:2.