Nyɛyaa Nyɛhiɛ Yɛ Yehowa Nine Ni Wa Lɛ Shishi
1 Kɛjɛ be mli ni atse atua yɛ Eden nɛɛ, ehe ebahia ni anɔkwa jamɔ aŋmɛ etsui shi daa yɛ shitee-kɛ-woo ni jɛ apasa jamɔ dɛŋ lɛ shishi. Jamɔ ni akpɛlɛ nɔ ni Habel tsu he nii lɛ ha elaaje ewala, ni lɛ eje la odasefoi ahe yinɔsane kakadaŋŋ ni Yesu tsɔɔ akɛ ebaaya nɔ aahu kɛyashi amanehulu kpeteŋkpele belɛ mli lɛ shishi.—Luka 11:51; 21:16, 17.
2 Hebribii yitso 11 tsiɔ mɛi ni feɔ “odasefoi babaoo ni ebɔle wɔhe tamɔ atatu” ni ŋmɛ amɛtsui shi yɛ hemɔkɛyeli he kaa lɛ mli ni amɛye kunim yɛ mli lɛ ekomɛi agbɛi ata. Jɛmɛ wɔkaneɔ yɛ mɛi ni “akɛ piŋmɔ gbe amɛ, ni amɛkpɛlɛɛɛ kpɔmɔ” ni “je nɛŋ esaaa amɛ lɛ” ahe sane yɛ. (Heb 11:35-38; 12:1) Ni wɔle bɔ ni Nuŋtsɔ lɛ diɛŋtsɛ kɛ klɛŋklɛŋ afii oha lɛ mli kaselɔi lɛ na shitee-kɛ-woo ni mli wa mli amanehulu yɛ apasa jamɔ mli hiɛnyiɛlɔi lɛ adɛŋ lɛ jogbaŋŋ. Ani eyɛ naakpɛɛ mɔ, belɛ, akɛ yɛ Ghana ŋmɛnɛ lɛ, mɛi ni kɛɛ amɛji jamɔi ni etsɛ lɛ aaawo jeŋ nɔyelɔi lɛ ayiŋ koni amɛkɛ naatsii aba mɛi ni diɔ anɔkwa jamɔ sɛɛ lɛ anɔ lɛ?—Yohane 15:20, 21.
Nitsumɔ Lɛ Miiya Nɔ Yɛ Shitee-Kɛ-Woo Fɛɛ Sɛɛ
3 Yɛ Ezra kɛ Nehemia gbii lɛ amli lɛ, anɔkwa jamɔ henyɛlɔi lɛ amli fu waa akɛ aatswa Yerusalem ama shi ekoŋŋ. Amɛtsɔ ŋaa gbɛi sɔrɔtoi anɔ koni amɛgbe Yehowa nitsumɔ lɛ. Ani Yudafoi lɛ kpa nitsumɔ lɛ? Dabi! Amɛtee nibii ni sa ni amɛtee nɔ yɛ Yehowa nitsumɔ lɛ mli, yɛ Enine ni Wa lɛ shishi.—Ezra 4:4, 11-22; Nehemia 4:13, 15-23.
4 Ŋmɛnɛ, wɔ ni wɔyɔɔ nɛkɛ maŋ nɛɛ mli lɛ naa wɔhe yɛ shihilɛ ni tamɔ nakai nɔŋŋ shishi. Yɛ naatsii lɛ fɛɛ sɛɛ lɛ, wɔhenyɛlɔi lɛ enaaa ni wɔfee shwɛm yɛ mumɔŋ. No hewɔ lɛ amɛsusuɔ akɛ wɔnitsumɔ lɛ miiya nɔ lolo, ni amɛyaa nɔ amɛbolɔɔ kɛ mlifu kɛ hegbeyeiwoo. Mɛni wɔbaafee?
5 Taakɛ Nehemia kɛ ekuu lɛ fee lɛ, wɔ hu wɔbaato gbɛjianɔ ni he hiaa koni wɔya wɔhiɛ yɛ Yehowa nine ni wa lɛ shishi. “Nyɛkashea amɛ gbeyei; shi moŋ nyɛkaia Nuŋtsɔ [Yehowa] kpeteŋkpele ni he yɔɔ gbeyei lɛ, ni nyɛwuua.” (Neh. 4:14) Ani oofee nakai?
6 Wɔyɛ miishɛɛ akɛ wɔɔnyɛ wɔkɛɛ akɛ shiɛlɔi pii kɛ ekaa kpee “naatsii” lɛ he adafitswaa lɛ naa ni amrɔ nɔŋŋ pɛ kɛkɛ ni amɛsɔle ni amɛje shishi akɛ amɛkɛ nibii ni amɛkase lɛ aaatsu nii, bɔni afee ni amɛhi wala mli yɛ mumɔŋ ni amɛya nɔ yɛ Yehowa nitsumɔ lɛ mli. Shi mɛi krokomɛi hu ŋɔ nɛkɛ adafitswaa nɛɛ akɛ etsɔɔ nitsumɔ lɛ kpamɔ kwraa aloo nitsumɔ lɛ naagbee, yɛ be mli ni mɛi krokomɛi po leee nɔ ni esa akɛ amɛfee. Onukpai lɛ ateŋ mɛi komɛi po gbaaa amɛhe naa akɛ amɛaabua sɔɔmɔ nitsumɔ lɛ he akɔntaabuu lɛ anaa, taakɛ bɔ ni shiɛlɔi komɛi hu gbaaa amɛhe naa akɛ amɛaabu amɛsɔɔmɔ nitsumɔ lɛ he akɔntaa lɛ. Nɔ ni jɛ mli ba ji akɛ yɛ June naagbee lɛ, yɛ be mli ni akɛ May akɔntaabuu ni kpe sɛɛ po efata he lɛ, shiɛlɔi 22,913 pɛ bu amɛsɔɔmɔ nitsumɔ he akɔntaa. Enɛ ji oha mlijaa 28 shibaa. July ehiii kwraa, shiɛlɔi 16,283 pɛ bu amɛsɔɔmɔ nitsumɔ lɛ he akɔntaa, ni eji oha mlijaa 49 shibaa. Nɛgbɛ shiɛlɔi ayifalɛ ni fe fɛɛ ni ji 34,559 ni bu amɛsɔɔmɔ nitsumɔ he akɔntaa yɛ April mli lɛ fa ni eshwɛ lɛ yɔɔ?
Taomɔ Hegbɛ
7 Shiɛlɔi lɛ ateŋ mɛi komɛi po miiya nɔ yɛ amɛshia-kɛ-shia nitsumɔ lɛ mli, amɛtsɔɔ ŋaa gbɛi ni baahi aha amɛ lɛ anɔ amɛtsuɔ nii, ni enɛɛɛmɛi ekomɛi ji nɔ ni amɛkane kɛjɛ wɔwoji amli ni nyɛmimɛi ni yɔɔ maji ni agu nitsumɔ lɛ yɛ jɛmɛ lɛ tsɔɔ nɔ amɛtsuɔ nii lɛ. (1930-1985 Index lɛ, baafai 318 kɛ 936 baaye abua bo ni ole nɛkɛ gbɛi sɔrɔtoi nɛɛ ekomɛi.) Anɔkwa sane lɛ ji akɛ, yɛ Ghana lɛ, MLA ŊMƐƆ GBƐ ni mɔ ko afee Yehowa Odasefoi lɛ ateŋ mɔ kome. No hewɔ lɛ ehe ehiaaa ni mɔ ko atee ehe ni ekajie ehe kpo akɛ mɔ ni tamɔ nakai. Yɛ bei babaoo mli lɛ nɔ ni he hiaa fɛɛ nɛ koni mɔ ko aje sanegbaa ni kɛ mɔ yaa trukaa odaseyeli ni woɔ yibii mli lɛ shishi. Gbɔmɛi yɛ sanebimɔi kɛ nɔ ni amɛbaawie yɛ wɔshidaamɔ yɛ saji komɛi kɛ “naatsii” lɛ ahe lɛ he, ni amɛfɔseɔ nɛkɛ sanebimɔi kɛ wiemɔi nɛɛ amɛshwieɔ shi, kɛ hegbɛ lɛ ba pɛ. Bɔɔ mɔdɛŋ kɛkɛ ni okwɛ jogbaŋŋ ni okwa ŋwanejee. Ohe afee oya ni ogbala jwɛŋmɔ kɛya Maŋtsɛyeli lɛ kɛ jeŋ hee lɛ nɔ yɛ bei fɛɛ mli. Kadimɔ obei lɛ, kɛji akɛ eji miniti kome loo enyɔ pɛ. Obaanyɛ ebua naa ni efa kɛji akɛ otee nɔ nakai.
8 Esa akɛ wɔtswa wɔfai shi akɛ wɔbaaya wɔhiɛ yɛ Yehowa nitsumɔ lɛ mli. Esa akɛ onukpai lɛ kɛ shiɛlɔi lɛ ateŋ mɔ fɛɛ mɔ awie akɛ mɔ aŋkro ni amɛye amɛbua amɛteŋ mɔ fɛɛ mɔ ni amɛna bɔ ni mɔ lɛ aaafee ni ena shiɛmɔ nitsumɔ lɛ mli gbɛfaŋnɔ yɛ shihilɛ ni mɔ lɛ yɔɔ mli lɛ shishi. Yɛ trukaa odaseyeli mli ni akɛ he aaawo lɛ sɛɛ lɛ, mɛi komɛi baanyɛ aya ni amɛyasara mɛi ni tsutsu lɛ amɛkɛ amɛ feɔ shia Biblia mli nikasemɔ, mɛi ni heɔ wɔwoji tɛtrɛbii lɛ yɛ tsutsu, mɛi ni shɛɔ eko yɛ tsutsu, kɛ mɛi krokomɛi. Enɛɛmɛi ahe akɔntaabuu he hiaa. Kɛ obɛ S-4 ni akɛbuɔ sɔɔmɔ nitsumɔ he akɔntaa lɛ eko lɛ, ŋmaa yɛ wolo ko nɔ koni okwɛ ni woloŋmalɔ lɛ nine ashɛ nɔ. Mɛi ni kwɛɔ kui anɔ lɛ akwɛ ni amɛye amɛbua yɛ enɛ mli.
Hii Wala Mli
9 Enɛ ji bei ni wɔbaasumɔ ni wɔfee nɔ fɛɛ nɔ ni wɔɔnyɛ ni wɔhi wala mli yɛ mumɔŋ. Yɛ bei babaoo mli lɛ, kɛ nɔ ko ni tamɔ nɛkɛ ba lɛ nɔ ni jɛɔ mli baa ji nɔ nɔ ni asɔŋɔɔ loo mɛi amli ni ashaa, ni eshaa mɛikomɛi amli ni amɛjieɔ amɛhe kpo akɛ amɛji tutuu. Wɔ lɛ esa akɛ wɔtswa wɔfai shi shiŋŋ akɛ wɔbaaya wɔhiɛ, ni wɔkɛ wɔhe afɔ Yehowa nɔ. Okɛ ohe awo kpeei ni ayaa lɛ amli ni ona nitsumɔ ni Yehowa kɛha wɔ lɛ mli gbɛfaŋnɔ. Enɛ ji gbɛ pɛ ni oootsɔ nɔ koni akasha bo ni ashɛ bo afɔ tamɔ tutuu.
10 Yehowa tsɔ egbalɔ lɛ nɔ ekɛɛ akɛ: “Wajemɔ ohe ko . . . ejaakɛ mikɛ nyɛ yɛ.” (Hag. 2:4) No hewɔ lɛ nyɛkashea gbei. Nyɛhiɛ ahia nyɛhe nɔ kɛkɛ ni nyɛhia shi akɛ mɛi ni he tse yɛ gbɔmɔtsoŋ kɛ mumɔŋ. Esaaa ni wɔteŋ mɔ ko mɔ ko feɔ enii tamɔ Akan kɛtsɔ esha ko ni wɔɔfee ni baaha Yehowa mlifu aba ewebii asafo muu lɛ fɛɛ nɔ yɛ nɛkɛ be nɛɛ mli lɛ nɔ. (Yosh. 7:1) Yɛ be mli ni wɔsaa ehiɛ kɛtsɔɔ toiboo ni wɔfeɔ wɔhaa lɛ yɛ nibii fɛɛ mli lɛ nɔ lɛ, wɔle akɛ ebaaje gbɛ kɛha wɔ ni wɔje mli.—1 Kor. 10:12, 13.