Nibii Fɔji Fɛɛ Asɛɛ Baafo!

NYƆŊMƆ eha wɔ e-Wiemɔ ni ajɛ mumɔŋ aŋma lɛ ni no tsɔɔ wɔ yiŋtoi ahewɔ ni mɛi feɔ nibii fɔji lɛ. Agbɛnɛ hu eha wɔ nyɛmɔ ni wɔbaanyɛ wɔkɛkpɛ wɔyiŋ, kɛ nyɛmɔ ni wɔkɛye wɔhe nɔ, ni enɛɛmɛi yeɔ ebuaa wɔ ni wɔkafee nibii gbohii. (5 Mose 30:15, 16, 19) Akɛni wɔyɛ nyɛmɔi nɛɛ ahewɔ lɛ, wɔbaanyɛ wɔyɔse sui gbohii fɛɛ ni wɔyɔɔ lɛ ni wɔfee tsakemɔi ni he hiaa lɛ. Kɛ́ wɔtsi wɔhe kɛjɛ nifeemɔi gbohii ahe lɛ, ebaaha wɔ kɛ mɛi krokomɛi fɛɛ aná miishɛɛ.—Lala 1:1.

Kɛlɛ, yɛ mɔdɛŋ fɛɛ ni wɔbɔɔ akɛ wɔbaatsi wɔhe kɛjɛ nibii gbohii ahe lɛ, je lɛŋ eyi obɔ kɛ nifeemɔi fɔji. Biblia lɛ bɔɔ wɔ kɔkɔ akɛ: “Ná enɛ ole akɛ naagbee gbii lɛ anɔ lɛ jaramɔ bei baaba.” Etee nɔ etsɔɔ nɔ ni baaha gbii nɛɛ afee “jaramɔ bei” lɛ mli akɛ: “Gbɔmɛi aaatsɔmɔ hesuɔlɔi, shika suɔlɔi, shwãlɔi, hewolɔi, musubɔlɔi, fɔlɔi anɔ toigbolɔi, trumui, mɛi ni he tseee, mɛi ni edɔɔɔ mɔ he, kpaŋmɔ mlikulɔi, oshekuyelɔi, mɛi ni nyɛɛɛ amɛkɔnɔ nɔ amɛye, mɛi ni hiɛ yɔɔ la, mɛi ni sumɔɔɔ ekpakpa, sɛɛgbɛtsɔɔlɔi, yiwalɔi, henɔwolɔi, mɛi ni sumɔɔ shwɛmɔ kɛ ŋɔɔmɔ fe Nyɔŋmɔ, mɛi ni hiɛ Nyɔŋmɔ jamɔ su, shi amɛkwa emli hewalɛ lɛ; tsi ohe kɛjɛ nɛkɛ gbɔmɛi ahe.”—2 Timoteo 3:1-5.

Ekolɛ okadi wiemɔ ni ji “naagbee gbii lɛ” yɛ gbalɛ ni atsi tã kɛtsɔ hiɛ lɛ mli. Te onuɔ enɛ shishi tɛŋŋ? Taakɛ mɛi pii le lɛ, kɛ́ akɛɛ “naagbee gbii lɛ,” etsɔɔ akɛ nɔ ko miiba enaagbee. Mɛni baa enaagbee lɛ? Kadimɔ shiwoi ni Nyɔŋmɔ kɛhaa yɛ e-Wiemɔ lɛ mli lɛ.

Abaakpata efɔŋfeelɔi lɛ ahiɛ kwraa.

“Eshwɛ fioo kɛkɛ ni mɔ fɔŋ lɛ bɛ dɔŋŋ, ni kɛ́ okwɛ eshihilɛhe lɛ, ebɛ jɛi. Shi mɛi ni he jɔ lɛ, shikpɔŋ lɛ aaatsɔ̃ amɛnɔ̃, ni amɛmii aaashɛ amɛhe yɛ hejɔlɛ babaoo mli.”—LALA 37:10, 11.

“Yehowa baa mɛi fɛɛ ni sɔmɔɔ lɛ lɛ ayi; shi mɛi fɔji lɛ, eeekpata amɛ fɛɛ amɛhiɛ.”—LALA 145:20.

Nɔnyɛɛ bɛ dɔŋŋ.

“Ejaakɛ eeejie ohiafoi ni bolɔɔ lɛ, kɛ nɔnalɔ ni bɛ bualɔ lɛ. Eeekpɔ̃ amɛsusuma kɛaajɛ fĩfĩamɔ kɛ yiwalɛ mli, ni amɛlá jara aaawa yɛ ehiɛ.”—LALA 72:12, 14.

“Bɔɔ nii lɛ diɛŋtsɛ hu baaye amɛhe kɛjɛ fitemɔ nyɔŋyeli lɛ mli kɛya Nyɔŋmɔ bii lɛ anunyam heyeli lɛ mli.”—ROMABII 8:21.

Gbɔmɛi baaná amɛheloonaa hiamɔ nii.

“Ni mɔ fɛɛ mɔ aaatá eweintso kɛ egbamitso shishi, ni mɔ ko woŋ amɛhe gbeyei; ejaakɛ Yehowa Zebaot naabu wie.”—MIKA 4:4.

“Amɛaamamɔ tsũi, ni amɛaahi mli, ni amɛaafee weintromi, ni amɛaaye mli yibii! Amɛmamɔŋ tsũi, ní mɔ kroko ahi mli, ni amɛhuŋ hu, ní mɔ kroko aye; ejaakɛ mimaŋ lɛ gbii aaatamɔ tsei agbii, ni mɛi ni mihala lɛ aaaye amɛnine naa nitsumɔ lɛ mli nii aahu po.”—YESAIA 65:21, 22.

Abaaye jalɛ sane.

“Ni kɛ́ Nyɔŋmɔ aaaku ehiɛ afɔ̃ ehalamɔbii ni bolɔɔ tsɛ́ɔ lɛ shwane kɛ nyɔɔŋ lɛ nɔ aahu tete lɛ, aso ebafãŋ amɛhe? Miikɛɛ nyɛ akɛ, eeefã amɛhe oyá.”—LUKA 18:7, 8.

“Yehowa sumɔɔ jalɛsaneyeli, ni ekwaaa emɛi krɔŋkrɔŋi lɛ. Abáa amɛyi kɛyaa naanɔ.”—LALA 37:28.

Jalɛ nifeemɔ baaye pɛsɛmkunya nifeemɔ najiaŋ.

“Je lɛŋ bii lɛ kaseɔ jalɛ.”—YESAIA 26:9.

“Yɛ eshiwoo lɛ naa lɛ wɔmiikwɛ ŋwɛi hee kɛ shikpɔŋ hee ni jalɛ hiɔ mli lɛ gbɛ.”—2 PETRO 3:13.

Mɛi Miitsake Amrɔ Nɛɛ Po

Ŋwanejee ko bɛ he akɛ, wɔteŋ mɔ fɛɛ mɔ baanya shiwoi nɛɛ ahe jogbaŋŋ. Shi mɛɛ nɔmimaa wɔyɔɔ akɛ shiwoi nɛɛ baaba mli? Yɛ anɔkwale mli lɛ, amrɔ nɛɛ wɔyɛ odaseyeli ni tsɔɔ akɛ Nyɔŋmɔ shiwoi lɛ baaba mli. Mɛni ji odaseyeli nɛɛ? No ji akɛ mɛi akpekpei abɔ ni yɔɔ je lɛŋ ŋmɛnɛ lɛ enyɛ etsi amɛhe kɛjɛ pɛsɛmkunya, jeŋba sha, loo basabasafeemɔ he ni amɛtsɔmɔ mɛi ni yeɔ anɔkwa, mɛi ni sumɔɔ toiŋjɔlɛ, kɛ mɛi ni mli hi. Ŋmɛnɛ lɛ, Yehowa Odasefoi ni fa fe akpekpei kpawo lɛ kɛ ekomefeemɔ hiɔ shi ni hewolonɔ su, weku ni mɔ ko jɛ mli, maŋ ni mɔ ko jɛ mli, maŋkwramɔŋ kɛ shika, ni nomɛi eha nyɛ̃ɛ, basabasafeemɔ, kɛ lashishwiemɔ eyi adesai ayinɔsane mli lɛ gbalaaa amɛteŋ.a Tsakemɔi nɛɛ ni yaa nɔ ŋmɛnɛ lɛ haa wɔnáa nɔmimaa akɛ Nyɔŋmɔ shiwoi lɛ baaba mli yɛ gbɛ ni da nɔ.

Shi mɛni haa amɛfeɔ tsakemɔi ni tamɔ nakai? Wɔnaa hetoo lɛ yɛ Biblia mli shiwoo kroko ni gbalɔ Yesaia ŋma lɛ mli. Eŋma akɛ:

“Klaŋ kɛ gwantɛŋ bi aaahi shi, ni kootsɛ kɛ abotia bi aaabu shi; ni tsina bi kɛ jata bi kɛ kooloo ní ewo fɔ fɛɛ aaahi he kome, ni gbekɛ bibioo aaakpala amɛ. . . . Jata aaaye jwɛi tamɔ tsina. Fufɔoo aaashwɛ yɛ shikpãa bu naa, ni gbekɛ ní etse fufɔ hu, aaaŋɔ enine awo onufu bu mli. Amɛfeŋ efɔŋ ni amɛfiteŋ nii yɛ migɔŋ krɔŋkrɔŋ lɛ nɔ fɛɛ; ejaakɛ shikpɔŋ lɛ nɔ aaayi obɔ kɛ Yehowa he nilee lɛ, tamɔ bɔ ni nu ha ŋshɔ shishi lɛ.”—Yesaia 11:6-9.

Ani gbalɛ nɛɛ miikɔ be ni kooloi kɛ gbɔmɛi baahi shi yɛ toiŋjɔlɛ mli lɛ he pɛ? Dabi, eyaa shɔŋŋ fe nakai. Kadimɔ akɛ ŋmalɛ lɛ naagbee wiemɔi lɛ tsɔɔ nɔ ni kɛ tsakemɔi nɛɛ baa, akɛ: “Shikpɔŋ lɛ nɔ aaayi obɔ kɛ Yehowa he nilee.” Ani Nyɔŋmɔ he nilee haa kooloi tsakeɔ amɛnifeemɔ? Dabida. Shi ebaanyɛ etsake gbɔmɛi, ni efeɔ nakai hu! Gbalɛ nɛɛ miitsɔɔ akɛ mɛi komɛi ni kulɛ amɛfeɔ amɛnii tamɔ kooloi lɛ baatsake ni amɛbaajie Kristo sui lɛ akpo akɛni amɛmiikase Biblia lɛ ni amɛkɛ nɔ ni amɛkaseɔ lɛ miitsu nii lɛ hewɔ.

Ákɛ nɔkwɛmɔnɔ lɛ, susumɔ Pedro he okwɛ.b Ekɛ ehe yadɔmɔ kuu ko ni tutuaa mɛi ni amɛyeɔ amɛ awui lɛ he kɛ́ jwɛŋmɔ lɛ akɛ eyaawu eshi jalɛ sane ni ayeee. Beni atsɔse lɛ agbe naa lɛ, afã lɛ akɛ eyatswa okpɛlɛm ewo polisifoi ashihilɛhe ko. Beni etoɔ gbɛjianɔ ni efee nakai lɛ, amɔ lɛ. Pedro ye nyɔji 18 yɛ tsuŋwoo mli, ni beni eyɔɔ jɛmɛ fɛɛ lɛ, ekã he eetao bɔ ni eeefee ni etsu maŋ nɔyeli butumɔ lɛ he nii. Beni Pedro yɔɔ tsuŋwoo mli lɛ, Yehowa Odasefoi kɛ eŋa bɔi Biblia lɛ kasemɔ. Beni ajie Pedro kɛjɛ tsuŋwoo mli lɛ, lɛ hu ebɔi Biblia lɛ kasemɔ, ni nɔ ni ekase yɛ Yehowa Nyɔŋmɔ he lɛ tsirɛ lɛ ni efee tsakemɔi wuji yɛ eshihilɛ mli ni etsake jwɛŋmɔ ni ehiɛ yɛ wala he lɛ. Pedro kɛɛ akɛ: “Miida Yehowa shi akɛ migbeee mɔ ko mɔ ko yɛ afii ni miye akɛ mɔ ni tutuaa mɛi ni eyeɔ amɛ awui lɛ mli. Amrɔ nɛɛ mikɛ Nyɔŋmɔ mumɔŋ klante ni ji Biblia lɛ tsuɔ nii koni mikɛ anɔkwa toiŋjɔlɛ kɛ jalɛsaneyeli he shɛɛ sane—Nyɔŋmɔ Maŋtsɛyeli lɛ he sanekpakpa lɛ aha mɛi.” Pedro tee polisifoi ashihilɛhe ni kulɛ etao ni etswa okpɛlɛm ewo jɛmɛ lɛ po ni eyashiɛ toiŋjɔlɛ kɛ jeŋ ni basabasafeemɔ bɛ mli lɛ he sane yɛ jɛmɛ.

Bɔ ni Nyɔŋmɔ Wiemɔ lɛ yɔɔ hewalɛ waa ni ehaa mɛi tsakeɔ lɛ ji yiŋtoo kroko hewɔ ni esa akɛ wɔhe wɔye akɛ Nyɔŋmɔ shiwoo akɛ efɔŋfeemɔ sɛɛ baafo lɛ baaba mli. Hɛɛ, mɛi kaŋ he amɛfeŋ efɔŋ kɛyaŋ naanɔ, shi moŋ amɛbaafee gbɔmɛi kpakpai. Etsɛŋ ni Yehowa baajie Satan Abonsam, mɔ ni kɛ efɔŋfeemɔ ba ni lɛ nɔŋŋ ehɔ nibii fɔji ni yaa nɔ yɛ je lɛŋ lɛ asɛɛ lɛ kɛya. Biblia lɛ kɛɔ akɛ: “Jeŋ muu lɛ fɛɛ kã mɔ fɔŋ lɛ mli.” (1 Yohane 5:19) Shi etsɛŋ ni abaakpata ehiɛ. Abaakpata mɛi ni tsiii amɛhe kɛjɛɛɛ amɛgbɛ fɔŋ lɛ he lɛ ahiɛ. Kwɛ bɔ ni ebaafee miishɛɛ akɛ ooohi shi yɛ nakai beaŋ!

Mɛni esa akɛ mɔ ko afee koni enine ashɛ wɔsɛɛ shihilɛ nɛɛ nɔ? Kaimɔ akɛ “Yehowa he nilee” ji nɔ ni haa mɛi tsakeɔ ŋmɛnɛ, ni no baaha jeŋ muu lɛ fɛɛ atsake wɔsɛɛ. Kɛ́ okase Biblia lɛ ni okɛ nɔ ni okaseɔ lɛ tsu nii—taakɛ Pedro fee lɛ—bo hu obaanyɛ okpa gbɛ akɛ obaahi jeŋ ni “jalɛ hiɔ mli” lɛ mli. (2 Petro 3:13) No hewɔ lɛ, wɔmiiwo bo hewalɛ ni oŋɔ hegbɛ lɛ amrɔ nɛɛ kɛkase Nyɔŋmɔ kɛ Yesu Kristo he nii, ejaakɛ no baaha oná naanɔ wala.—Yohane 17:3.—w10-E 09/1.

[Shishigbɛ niŋmaai]

[Wiemɔ ni akɔ ni akɛmiitsu nii ni yɔɔ baafa 9]

Bo hu obaanyɛ okpa gbɛ akɛ obaahi jeŋ ni “jalɛ hiɔ mli” lɛ mli.—2 PETRO 3:13