Gbɛtsĩi Nii Anɔ ní Ayeɔ Koni Anyɛ Akɛ Sanekpakpa lɛ Ayaha Mɛi

WƆTSƆNE lɛ yashɛ he ko ní akwɛɔ tsɔji amli yɛ, ni mɛi aaafee 60 ni ji hii kɛ yei, kɛ oblahii kɛ oblayei bibii ní hiɛ tui ji mɛi ni kwɛɔ jɛmɛ. Amɛteŋ mɛi komɛi wo asraafoi atade; mɛi krokomɛi hu wo atadei foji. Amɛteŋ mɛi babaoo hiɛ tui ni kɛ́ atswa shikome lɛ ekpaaa tswaa, ja agbe. Etamɔ nɔ ni amɛmiimɛ wɔ. Maŋ basabasafeemɔ miiya nɔ.

Gbii ejwɛ sɔŋŋ nɛ ni wɔje wɔgbɛfaa lɛ shishi, ni Biblia kasemɔ he woji ni tsiimɔ shɛɔ tɔn nyɔŋma yɛ wɔtsɔne lɛ mli. Wɔsusu wɔyiŋ kɛji amɛbaaha wɔho loo amɛhaŋ wɔho. Ani amɛbaabi ni wɔha amɛ shika? Be enyiɛ ebaanyɛ ehe kɛkɔne amɛyiŋ akɛ wɔgbɛfãa lɛ he bɛ gbeyei?

Nuu kome ko ni sumɔɔ tu tswaa lɛ tswa etu lɛ ewo kɔɔyɔŋ ní ekɛkai wɔ akɛ lɛ ekwɛɔ amɛnɔ. Ehiɛ gba tɛlifoŋ srɔtoi ni wɔhiɛ lɛ anɔ ni ebi ni wɔkɛha lɛ. Beni wɔshashao shi kɛ nakai feemɔ lɛ, ekɛ enine fo esɛ̃ ni ekɛfee okadi kɛtsɔɔ akɛ, ebaafolɔ wɔyitsei kɛji akɛ wɔbooo nɔ ni ekɛɔ wɔ lɛ toi. Wɔkɛ tɛlifoŋ ni wɔhiɛ lɛ ha lɛ.

Oona kɛ onaaa lɛ, yoo ko ni wo asraafoi atade lɛ kɔ etu lɛ ni ebɛŋkɛ wɔ. Lɛ ji “amɛwoloŋmalɔ,” ni lɛ hu eetao ni wɔha lɛ nɔ ko. Nibii amli ewa, ni esa akɛ wɔha lɛ “nɔ ko” fioo ni ekɛkwɛ nɔ. Asraafonyo kroko hu gbele wɔtsɔne lɛ pɛtrol tsɛŋsi lɛ naa ni efo eko ewo galɔn ni ehiɛ lɛ mli. Ebooo fai ni wɔkpa lɛ ni ekafee nakai lɛ toi, shi nɔ ni ekɛɛ wɔ kɛkɛ ji akɛ fãmɔ ni akɛha lɛ ji no. Nɔ ko bɛ ni wɔbaanyɛ wɔfee. Wɔshwelɛ ji akɛ mɛi krokomɛi ni eshwɛ lɛ efeŋ nɔ ko tamɔ nakai nɔŋŋ.

Naagbee lɛ, amɛgbele gbɛ kɛha wɔ, ni wɔtsá wɔgbɛfãa lɛ nɔ. Mi kɛ mɔ ni fata mihe lɛ tsui nyɔ wɔ mli. No mli lɛ wɔtsui fã waa, shi amrɔ nɛɛ, hei ni akwɛɔ tsɔji amli yɛ ni yɔɔ tsuifãa nɛɛ efãaa wɔtsui dɔŋŋ. Kɛjɛ April afi 2002 kɛyashi January afi 2004 lɛ, wɔfã gbɛ shii 18 kɛjɛ lɛjiadaamɔhe ni yɔɔ Douala yɛ Cameroon lɛ kɛtee Bangui ni ji Central African Republic maŋtiase lɛ mli. Wɔkɛ osharai kɛ nibii ni wɔkpaaa gbɛ kpeɔ be fɛɛ be yɛ gbɛfãa ni heɔ kilomitai 1,600 nɛɛ mli.a

Joseph kɛ Emmanuel ni ji tsɔne kudɔlɔi ní fãa gbɛ nɛɛ daa lɛ tsɔɔ mli akɛ: “Gbɛfãa nɛɛ eha wɔkase nibii babaoo. Nilee yɛ mli akɛ ooosɔle shii abɔ yɛ otsui mli ni asaŋ oná tsui. Lalatsɛ lɛ ŋma akɛ: ‘Nyɔŋmɔ nɔ mihiɛ kã, misheee gbeyei, mɛni gbɔmɔ aaanyɛ mi afee?’ Wɔbɔɔ mɔdɛŋ akɛ wɔná su ni tamɔ nakai. Wɔyɛ nɔmimaa akɛ Yehowa le akɛ nɔ̃ hewɔ ni wɔfãa gbɛ lɛ ji koni wɔkɛ shɛɛ sane ni haa mɔ náa hiɛnɔkamɔ ni he miihia mɛi waa lɛ ayaha mɛi.”—Lala 56:12.

Aabɔ Mɔdɛŋ Koni Aha Mɛi Aná Nyɔŋmɔ He Nilee yɛ Jeŋ Fɛɛ

Mɛi babaoo ni yɔɔ he ni wɔyɔɔ yɛ Afrika lɛ sumɔɔ akɛ amɛbo Nyɔŋmɔ Maŋtsɛyeli lɛ he sanekpakpa lɛ toi. Afee woji ni wɔkɛyahaa mɛi yɛ hei srɔtoi nɛɛ koni eye ebua amɛ ní amɛná Nyɔŋmɔ he nilee. (Mateo 5:3; 24:14) Yehowa Odasefoi anitsumɔhe nine ní yɔɔ Douala yɛ Cameroon lɛ kɛ woji yahaa Maŋtsɛyeli shiɛlɔi ni fa fe 30,000 kɛ mɛi ni yɔɔ wiemɔ lɛ he miishɛɛ ni yɔɔ Cameroon kɛ maji ejwɛ ni ebɔle lɛ lɛ daa.

Jeee Cameroon akalaa woji nɛɛ yɛ. Akalaa woji nɛɛ ateŋ babaoo yɛ England, Finland, Germany, Italy, kɛ Spain. Kɛ́ akala woji nɛɛ agbe naa lɛ, abuaa naa yɛ France ni akɛtsɔɔ ŋshɔ hiɛ kɛbaa Cameroon. Efɔɔ kaa akɛ daa otsii enyɔ lɛ, Biblia he woji bashɛɔ Douala lɛjiadaamɔhe lɛ yɛ adeka agbo ko mli.

Akɛ adeka agbo lɛ maa tsɔne nɔ ni akɛyaa nitsumɔhe nine lɛ. Mɛi ni tsuɔ nii yɛ He ni Ajɛɔ akɛ Woji Majeɔ yɛ nitsumɔhe nine lɛ toɔ woji lɛ yɛ hei ni akɛbaaya lɛ anaa. Ebɛ mlɛo kwraa ákɛ akɛ woji nɛɛ baaya hei ni amɛtse amɛhe banee lɛ. Shi nakai feemɔ fata sanekpakpa lɛ ni aaashiɛ “kɛyashi shikpɔŋ lɛ naagbeehei lɛ” he. (Bɔfoi lɛ Asaji 1:8) Nitsumɔhe nine lɛ kɛ ehefɔ̃ɔ nyɛmimɛi ni kɛ amɛhe eha ni yɔɔ hekɛ-afɔleshãa su ni jɛɔ amɛsuɔmɔ mli amɛfãa gbɛ ni yɔɔ oshara nɛɛ nɔ. Amɛgbɛfãa nɛɛ haa mɛi akpekpei abɔ ni yɔɔ Afrika teŋgbɛ lɛ anine shɛɔ Biblia he woji anɔ daa.

Bɔ ni Gbɛfãa lɛ Yɔɔ

Atsɔɔ lɔlei anɔ akɛ woji yahaa maji ni yɔɔ Cameroon, Chad, Equatorial Guinea, Gabon, kɛ Central African Republic. Nyɛhaa wɔkɛ tsɔji nɛɛ ateŋ ekome kɛ ekudɔlɔi lɛ afãa gbɛ lɛ. Feemɔ he mfoniri akɛ ota tsɔne kudɔlɔi lɛ amasɛi yɛ tsɔne lɛ mli, na ole akɛ oooba obafã gbɛ ni baahé gbii nyɔŋma loo nɔ ni fe nakai, ni ekolɛ okɛ osharai hu akpe.

Tsɔne kudɔlɔi ekpaa ji mɛi ni fãa gbɛ nɛɛ. Esa akɛ amɛfee mɛi ni yɔɔ hewalɛ, mɛi ni he esa, mɛi ni yɔɔ tsuishitoo, kɛ mɛi ni esaa amɛhe jogbaŋŋ. Amɛwo Afrikabii atadei aloo atadei ni afĩ tai ashwie nɔ. Yɛ bei ni eho lɛ amli lɛ, mɛi ni heɔ too yɛ nibii ni akɛjɛɔ maŋsɛɛ kɛbaa maŋ lɛ mli lɛ he, ni amɛkwɛɔ koni akɛ nibii ni esaaa akaba maŋ lɛ mli lɛ fɔɔ amɛhe wiemɔ akɛ: “Naa tsɔne kudɔlɔi ni esaa amɛhe jogbaŋŋ ni hiɛ tsɔne ni he tse taakɛ onaa yɛ mfonirii ni yɔɔ amɛwoji lɛ amli lɛ pɛpɛɛpɛ lɛ.” Nɔ ni he hiaa waa fe tsɔne kudɔlɔi lɛ ahesaamɔ lɛ ji suɔmɔ mli ni amɛjɛɔ ni amɛyaa he fɛɛ he ni ehe hiaa akɛ amɛya ni amɛkɛsɔmɔ mɛi krokomɛi lɛ.—Lala 110:3.

Amɛshiɔ Douala aaafee leebi ŋmɛji ekpaa kɛ́ hulu je nɔŋŋ, bɔni afee ni amɛfo maŋ wulu nɛɛ ni atoko nibii ahe gbɛjianɔ jogbaŋŋ yɛ mli ni tsɔji pii hu nyiɛɔ gbɛjegbɛi lɛ anɔ lɛ dani tsɔji lɛ abɔi gbɛ lɛ nɔ nyiɛmɔ. Beni wɔfo nu hiɛ agba ni bɛŋkɛ nitsumɔhe nine lɛ ni wɔshi maŋ wulu lɛ mli sɛɛ lɛ, wɔwó wɔhiɛ wɔwo bokagbɛ kɛtee he klɛŋklɛŋ ni wɔbaayajie woji lɛ yɛ lɛ, ni ji Yaoundé, Cameroon maŋtiase lɛ.

Tsɔne kudɔlɔi ekpaa lɛ fɛɛ baakɛɛ bo akɛ ewa akɛ aaakudɔ tsɔne ni ewo woji tɔn nyɔŋma. Wɔtsɔ gbɛjegbɛi kpakpai anɔ yɛ wɔgbɛfãa lɛ klɛŋklɛŋ gbii etɛ lɛ mli, ni no hewɔ lɛ wɔkɛ naagbai fioo ko pɛ kpe, eyɛ mli moŋ akɛ enɛ babi ni wɔkɛ wɔjwɛŋmɔ fɛɛ ama gbɛfãa lɛ nɔ. Kɛkɛ ni trukaa lɛ nugbɔ bɔi nɛmɔ. Awoko gbɛ ni eshwɛ lɛ nɔ. Wɔnyɛɛɛ wɔna shɔŋŋ nii, gbɛ lɛ nɔ miishãmɔ, ni esa akɛ wɔnyiɛ blɛoo yɛ gbɛ lɛ nɔ ejaakɛ enɔ yɛ dokoidokoi. Jeŋ bɔi namɔ. Be eshɛ ni esa akɛ wɔwa ni wɔtao niyenii ko wɔye, ni no sɛɛ lɛ wɔbɔ mɔdɛŋ koni wɔwɔ beni wɔkɛ wɔnaji eshwie tsɔne lɛ hiɛgbɛ lɛ. Nakai ji bɔ ni shihilɛ lɛ yɔɔ ha yɛ gbɛfaai nɛɛ amli!

Wɔtsa wɔgbɛfaa lɛ nɔ leebi maŋkpa, beni je tsɛre lɛ. Tsɔne kudɔlɔi lɛ ateŋ mɔ kome yeɔ ebuaa kɛtsɔ ehiɛ ni ehaa ehiɔ bɔ ni gbɛ lɛ nɔ yɔɔ ha lɛ nɔ. Ebɔɔ wɔ kɔkɔ oya nɔŋŋ kɛji akɛ wɔkpalaŋ kɛtee bu ni yɔɔ gbɛ lɛ toi lɛ he fe nine lɛ. Tsɔne kudɔlɔi le jogbaŋŋ akɛ kɛji amɛkpalaŋ kɛbote bu ko mli lɛ, ebaahe amɛ gbii babaoo dani amɛbaajie amɛtsɔne lɛ. Gbɛjegbɛi ni wɔtsɔ nɔ beni wɔfo mli kɛbote Central African Republic lɛ hi fioo kɛkɛ fe nɔ ni wɔtsɔ nɔ kɛtsɔ hiɛ lɛ. Yɛ gbɛ ni heɔ kilomitai 650 ni nyiɛ sɛɛ lɛ nɔ lɛ, wɔtsɔ maŋ lɛ akrowai ni gɔji yɔɔ jɛmɛ kɛ amɛnɔ jwɛifɔ ni yɔɔ fɛo lɛ amli. Beni wɔtsɔɔ akrowai nɛɛ amli blɛoo kɛhoɔ lɛ, gbekɛbii, onukpai kɛ yei fɔ́ yei ni kpɛ amɛbii yɛ amɛsɛɛ ni yɔɔ jɛmɛ lɛ fɛɛ fɔ̃ wɔ nine. Akɛni maŋ ta miiya nɔ yɛ jɛi hewɔ lɛ, tsɔji fioo ko pɛ nyiɛɔ gbɛjegbɛi lɛ anɔ, no hewɔ lɛ mɛi kwɛ wɔ gãa.

Niiashikpamɔi ni Yɔɔ Miishɛɛ

Janvier ni ji tsɔne kudɔlɔi lɛ ateŋ mɔ kome lɛ kɛɛ wɔ akɛ, yɛ dekã ni amɛbɛ lɛ fɛɛ sɛɛ lɛ, yɛ bei babaoo mli lɛ amɛjɔɔ amɛhe fioo yɛ akrowai bibii amli ni amɛjaa Biblia kasemɔ woji amɛhaa mɛi. Ekɛɛ akɛ: “Kɛ́ wɔshɛ akrowa ni ji Baboua lɛ mli lɛ, wɔbɔɔ mɔdɛŋ be fɛɛ be akɛ wɔkɛ helatsamɔhe lɛ nitsulɔ ko ni ná Maŋtsɛyeli shɛɛ sane lɛ he miishɛɛ waa lɛ agba sane, ni wɔkɛ lɛ feɔ Biblia mli nikasemɔ yɛ be kukuoo mli. Gbi lɛ eko po lɛ, wɔjie vidio ni kɔɔ Noa he lɛ wɔtsɔɔ lɛ kɛ eweku lɛ. Nakai gbi lɛ enanemɛi kɛ akutsoŋbii ni miitao amɛkwɛ vidio lɛ eko lɛ ba, ni etsɛɛɛ ni shĩa lɛ yi obɔ. Amɛteŋ mɔ fɛɛ mɔ enu Noa sane lɛ, shi amrɔ nɛɛ amɛbaanyɛ amɛkwɛ nɔ ni ba lɛ yɛ tɛlivishiŋ nɔ. Hiɛsɔɔ ni amɛjie lɛ kpo lɛ taa mɔ tsuiŋ waa. Sɛɛ mli lɛ, amɛŋmɛ wɔ okpɔlɔ krɛdɛɛ kɛha niyeli, ni amɛkɛ no da wɔ shi, ni asaŋ amɛbi ni wɔwɔ nakai gbɛkɛ lɛ. Ehe bahia ni wɔshi nɔŋŋ koni wɔtsa wɔgbɛfãa kakadaŋŋ lɛ nɔ, shi kɛlɛ wɔná miishɛɛ akɛ wɔnyɛ wɔkɛ heshibalɔi nɛɛ gba sanekpakpa lɛ he sane.”

Tsɔne kudɔlɔ kroko ni atsɛɔ lɛ Israel lɛ wie nibii ni amɛkɛkpe yɛ gbɛ ko ni amɛfã yɛ be kroko mli kɛtee Bangui ni ji he ni wɔyaa lɛ ahe. Ekɛɛ akɛ: “Beni wɔbɛŋkɛɔ Bangui lɛ, he fɛɛ he ni wɔbaashɛ lɛ wɔnaa akɛ asraafoi etsĩ gbɛ lɛ. Heniianaa lɛ, asraafoi ni wɔna lɛ ateŋ mɛi pii jie naanyobɔɔ su kpo amɛtsɔɔ wɔ akɛni amɛyoo wɔtsɔne lɛ ni wɔkɛfã gbɛ kɛbatsɔ biɛ nɛɛ pɛŋ lɛ hewɔ. Amɛfɔ̃ wɔ nine koni wɔkɛ amɛ abagba sane, ni amɛkɛ miishɛɛ ŋɔ Biblia kasemɔ he woji ni wɔkɛha amɛ lɛ. Akɛni amɛbuɔ woji akɛ ehe yɛ sɛɛnamɔ waa kɛha amɛ hewɔ lɛ, amɛŋmalaa amɛgbɛi, be ni akɛ wolo lɛ ha amɛ kɛ mɔ ni kɛha amɛ lɛ gbɛi amɛwoɔ mli. Asraafoi lɛ ateŋ mɛi komɛi yɛ wekumɛi ni ji Odasefoi, ni enɛ ji yiŋtoo kroko hewɔ ni amɛjie naanyobɔɔ su kpo lɛ.”

Joseph ni ji tsɔne kudɔlɔi lɛ ateŋ mɔ ni yɔɔ niiashikpamɔ fe fɛɛ lɛ wie nɔ ni esusuɔ akɛ eji nɔ ni sa kadimɔ waa yɛ amɛgbɛfaai lɛ amli—beni amɛshɛ he ni amɛyaa lɛ. Etsɔɔ mli akɛ, yɛ gbɛfãai lɛ eko mli lɛ: “Beni eshwɛ shitoi fioo komɛi ni wɔbaashɛ Bangui lɛ, wɔtswa wɔnyɛmimɛi lɛ tɛlifon akɛ etsɛŋ kwraa ni wɔbaashɛ shi. Amɛnyiɛ wɔhiɛ kɛkpa maŋtiase lɛ mli, ni amɛye amɛbua wɔ ni wɔnine shɛ mla naa woji ni he baahia wɔ lɛ anɔ. Beni wɔshɛ shi lɛ, mɛi fɛɛ ni yɔɔ nitsumɔhe nine lɛ ba amɛkɛ miishɛɛ baŋa wɔ kɛ fuamɔi. Yɛ ŋmɛlɛtswai fioo komɛi amli lɛ, mɛi jɛ Asafoi ni bɛŋkɛ jɛmɛ lɛ amli amɛbaye amɛbua wɔ kɛjie adekai ohai abɔ ni Bibliai, woji wuji, woji bibii, kɛ woji tɛtrɛbii yɔɔ mli lɛ kɛjɛ tsɔne lɛ mli kɛwo woji atoohe lɛ.”

Joseph kɛfata he akɛ: “Bei komɛi lɛ, atadei, aspaaterei kɛ gbekɛbii anibii ni mɛi kɛke fata wɔjatsu ni wɔkɛyaa maŋ ni bɛŋkɛ wɔ ni ji Democratic Republic of Congo lɛ mli lɛ he. Kwɛ miishɛɛ ni enɛ ji beni wɔnaa akɛ nyɛmimɛi lɛ ahiɛ yɛ ŋmɔlɔŋmɔlɔ, ni tsɔɔ bɔ ni amɛhiɛ esɔ enɛ waa lɛ!”

Kɛ́ wɔkɛ gbi kome jɔɔ wɔhe lɛ, wɔsaa wɔtsɔne lɛ, ni wɔkuɔ wɔsɛɛ kɛtsɔɔ gbɛ ni wɔtsɔ nɔ kɛba lɛ nɔ. Wɔkɛ naagbai kpeɔ, shi niiashikpamɔ ni yɔɔ miishɛɛ ni wɔná lɛ haaa naagbai nɛɛ ateŋ eko kwraa agba wɔnaa.

Gbɛfãai ni jɛkɛ, nugbɔnɛmɔi ni naa wa, gbɛjegbɛi ni nɔ ehiii, lɔletai ni baa shi, kɛ tsɔne ni fiteɔ lɛ baanyɛ afee nɔ ni jeɔ mɔ nijiaŋ wui. Asraafoi ni feɔ basabasa ni amɛkɛkpeɔ lɛ bafee kaa be fɛɛ be. Kɛlɛ, nɔ ni haa amɛnáa miishɛɛ waa ji Maŋtsɛyeli lɛ he sanekpakpa lɛ ni amɛkɛ yahaa mɛi ni yɔɔ Afrika hei ni etse amɛhe banee lɛ, kɛ hewalɛ ni sanekpakpa lɛ náa yɛ mɛi ni kpɛlɛɔ nɔ lɛ anɔ lɛ.

Ákɛ nɔkwɛmɔnɔ lɛ, yɛ woji ni akɛyahaa nɛɛ hewɔ lɛ, mɔ ko ni yɔɔ akrowa ko ni etse ehe banee yɛ Central African Republic, ni bɛŋkɛ Sudan maŋ lɛ husu lɛ naa lɛ, kaneɔ Biblia lɛ ni atsɔɔ shishi kɛba ŋmɛnɛŋmɛnɛ wiemɔ mli lɛ. Eŋa kaseɔ Buu-Mɔɔ heei ni baa lɛ, ni amɛbii lɛ náa wolo ni ji Kasemɔ Nii Kɛjɛ Tsɔɔlɔ Kpele lɛ Ŋɔɔ lɛ ni amɛkaseɔ lɛ he sɛɛ.b Amɛ kɛ mɛi krokomɛi ni yɔɔ akrowai nɛɛ amli lɛ náa Nyɔŋmɔ he nilee taakɛ amɛnanemɛi Kristofoi ni yɔɔ maŋ wuji lɛ amli lɛ hu náa eko lɛ pɛpɛɛpɛ. Yɛ anɔkwale mli lɛ, enɛ haa mɔ tsui nyɔɔ emli waa!

[Shishigbɛ niŋmai]

[Shikpɔŋ he mfonirii/​Mfoniri ni yɔɔ baafa 9]

(Kɛ́ ootao ona bɔ ni saji nɛɛ ji diɛŋtsɛ lɛ, no lɛ kwɛmɔ wolo lɛ mli)

CAMEROON

Douala

CENTRAL AFRICAN REPUBLIC

Bangui

[Mfoniri ni yɔɔ baafa 9]

Joseph

[Mfoniri ni yɔɔ baafa 9]

Emmanuel

[Mfoniri ni yɔɔ baafa 10]

Aajie woji kɛmiijɛ tsɔne lɛ mli yɛ Bangui

[Mfoniri ni yɔɔ baafa 10]

Nitsumɔhe nine ni yɔɔ Bangui yɛ Central African Republic lɛ