Shweshweeshwe Shihilɛ ní Aaaná yɛ Jeŋ ni Osharai Eyi Mli Obɔ Mli

NÍ AAANYIƐ yɛ shikpɔŋ ni afu okplɛmii bibii yɛ mli lɛ nɔ lɛ baanyɛ afee nɔ ni gbeɔ mɔ. Shi ani efeŋ nɔ ni yeɔ ebuaa bo akɛ ooohiɛ shikpɔŋ he mfoniri ni tsɔɔ hei ni akɛ okplɛmii bibii lɛ ehɔlɔ lɛ? Kɛfata he lɛ, ŋɔɔ lɛ akɛ atsɔse bo koni oyɔse okplɛmii bibii srɔtoi lɛ. Eka shi faŋŋ akɛ, nilee ni tamɔ nakai lɛ baaba oshara ni aaaba akɛ aaanyɛ ato bo kpá loo agbe bo lɛ shi.

Abaanyɛ akɛ Biblia lɛ ato nakai shikpɔŋ he mfoniri kɛ tsɔsemɔ ni akɛhaa mɔ yɛ bɔ ni aaafee ayɔse okplɛmii bibii lɛ he. Ŋaalee ni eko bɛ ni kɛ lɛ yeɔ egbɔ kɛji akɛ eba bɔ ni aaafee akwa osharai ni atsu naagbai ni baa shihilɛ mli lɛ ahe nii yɔɔ Biblia lɛ mli.

Kadimɔ shiwoo ni haa mɔ tsui nyɔɔ emli nɛɛ ni anaa yɛ Abɛi 2:10, 11 lɛ, akɛ: “Ejaakɛ ŋaalee aaabote otsui mli ni nilee aaaŋɔɔ osusuma naa; jwɛŋmɔ aaabaa oyi jogbaŋŋ, sane shishinumɔ aaabu ohe.” Ŋaalee kɛ sane shishinumɔ ni atsĩ tã yɛ biɛ lɛ jɛɛɛ adesa ŋɔɔ shi moŋ ejɛ ŋwɛi. “Shi mɔ ni boɔ [ŋaalee ni jɛ ŋwɛi] toi lɛ aaahi shi shweshweeshwe, ni ehe aaajɔ lɛ ní efɔŋ gbeyeishemɔ bɛŋ.” (Abɛi 1:33) Nyɛhaa wɔkwɛa bɔ ni Biblia lɛ baanyɛ aha wɔ shweshweeshwefeemɔ aya hiɛ ni eye ebua wɔ ni wɔkwa naagbai babaoo.

Ní Aaatsi He Kɛaajɛ Osharai ni Nyɛɔ Egbeɔ Mɔ lɛ Ahe

Yibɔi ni World Health Organization (WHO [Jeŋ Hewalɛnamɔ Gbɛjianɔtoo]) kala lɛ tsɔɔ akɛ gbelei ni gbɛjegbɛ nɔ osharai kɛbaa yɛ je lɛŋ fɛɛ daa afi lɛ shɛɔ 1,171,000. Epilaa mɛi krokomɛi ni miihe ashɛ akpe toi akpei 40, ni nɔ ni aaashɛ mɛi ni fa fe akpe toi akpei 8 jeɔ kpa yɛ be kakadaŋŋ mli.

Eyɛ mli akɛ anyɛŋ afee shweshweeshwe kwraa kɛmɔ shi beni akudɔɔ tsɔne moŋ, shi wɔfeɔ shweshweeshwe waa kɛ́ wɔbo tsɔnekudɔmɔ he mlai atoi. Beni Biblia lɛ wieɔ nɔyeli hegbɛi ni feɔ tsɔnekudɔmɔ he mlai ni amɛkwɛɔ koni akɛtsu nii lɛ he lɛ, ekɛɛ akɛ: “Mɔ fɛɛ mɔ aba ehe shi aha hegbɛi ni yeɔ nɔ lɛ.” (Romabii 13:1) Tsɔnekudɔlɔi ni kɛ ŋaawoo nɛɛ tsuɔ nii lɛ baa nɔ ni baanyɛ aha tsɔne mli oshara ni bei pii lɛ naagbai ni naa wawai jɛɔ mli baa lɛ shi.

Yiŋtoo kroko hu ni haa akudɔɔ tsɔne shweshweeshwe ji bulɛ ni ayɔɔ kɛha wala. Biblia lɛ wieɔ Yehowa Nyɔŋmɔ he akɛ: “Bo oŋɔɔ wala nubu yɔɔ.” (Lala 36:10) No hewɔ lɛ, wala ji nikeenii ni jɛ ŋwɛi. No hewɔ lɛ, wɔbɛ hegbɛ ni wɔkɛaahe nakai nikeenii lɛ kɛaajɛ mɔ ko dɛŋ loo ni wɔɔtsɔɔ bulɛ ni wɔbɛ kɛha wala, ní wɔ diɛŋtsɛ wɔnɔ̃ fata he.—1 Mose 9:5, 6.

Yɛ adebɔɔ su naa lɛ, nɔ ni fata bulɛ ni wɔɔná wɔha adesa wala lɛ he ji ni wɔɔkwɛ koni wɔ kar kɛ shia afee shweshweeshwe bɔ ni sa. Asusuɔ shweshweeshwefeemɔ he waa diɛŋtsɛ yɛ blema Israel yɛ shihilɛ fɛɛ shihilɛ mli. Ákɛ nɔkwɛmɔnɔ lɛ, kɛ́ ama shia lɛ, Nyɔŋmɔ Mla biɔ koni atswa gbogbo kɛbɔle tsũ lɛ yiteŋ—he ko ni weku lɛ feɔ amɛnii babaoo yɛ lɛ. “Foo afabaŋ okɛbɔle otsũ lɛ yiteŋ, koni mɔ ko akajɛ jɛi ebagbee shi ní lá ko yi sɔ̃ miiba oshia lɛ nɔ.” (5 Mose 22:8) Kɛ mɔ ko bagbee shi akɛni akɛ shweshweeshwefeemɔ he mla nɛɛ tsuuu nii hewɔ lɛ, Nyɔŋmɔ haa nɔtsɛ lɛ yeɔ sɔ̃. Ŋwanejee ko bɛ he akɛ, shishitoo mla ni suɔmɔ yɔɔ mli ni yɔɔ mla nɛɛ kɛ nitsumɔ mli lɛ baaba osharai ashi yɛ nitsumɔhe loo yɛ hiɛtserɛjiemɔ mli po.

Tsofai Fɔ̃ji ni Nyɛɔ Egbeɔ Mɔ lɛ Nɔ Kunimyeli

Taakɛ WHO tsɔɔ lɛ, amrɔ nɛɛ zigaret shɛrelɔi ni fa fe akpekpei toi akpe kome yɔɔ je lɛŋ, ni abaanyɛ akɛɛ akɛ tawa shɛremɔ gbeɔ aaafee mɛi akpekpei ejwɛ daa afi. Aakpa gbɛ akɛ yibɔ nɛɛ baaya hiɛ fe nɔ ni shɛɔ akpekpei 10 yɛ afii 20 kɛmiishɛ 30 ni baa lɛ mli. Tawa shɛrelɔi krokomɛi akpekpei abɔ kɛ mɛi ni kɛ “hiɛtserɛjiemɔ” he tsofai tsuɔ nii lɛ hu baafite amɛ hewalɛnamɔ kɛ shihilɛ kpakpa lɛ yɛ tsofai fɔ̃ji ni amɛkɛtsuɔ nii lɛ hewɔ.

Yɛ be mli ni Nyɔŋmɔ Wiemɔ lɛ etsĩii tawa shɛremɔ kɛ tsofai fɔ̃ji ni akɛtsuɔ nii lɛ atã tɛ̃ɛ lɛ, emli shishitoo mlai lɛ baanyɛ abu wɔhe kɛjɛ nɛkɛ nifeemɔi nɛɛ ahe. Ákɛ nɔkwɛmɔnɔ lɛ, 2 Korintobii 7:1 woɔ ŋaa akɛ: “Nyɛhaa wɔtsuua wɔhe kɛjɛa heloo kɛ mumɔ fɛɛ he muji mli.” Ŋwanejee ko bɛ he akɛ tawa shɛremɔ kɛ tsofai fɔ̃ji kɛ tsofai babaoo ni yeɔ mɔ awui fiteɔ heloo lɛ aloo ewoɔ he muji. Nɔ ni fe fɛɛ lɛ, Nyɔŋmɔ miisumɔ ni wɔgbɔmɔtsei lɛ ‘ahe atse’ ni tsɔɔ krɔŋŋfeemɔ ni muji ko bɛ he. (Romabii 12:1) Ani okpɛlɛɛɛ nɔ akɛ shishitoo mlai nɛɛ kɛ nitsumɔ baaha osharai ni baa mɔ wala shihilɛ he lɛ aba shi kwraa?

Sui ni Yɔɔ Oshara lɛ Anɔyeli

Mɛi babaoo yeɔ nii ni amɛnuɔ nii kɛtekeɔ nɔ. Nɔ ni baanyɛ afata nii ni ayeɔ kɛtekeɔ nɔ lɛ he kɛba ji sikli hela, kansa, kɛ tsuihela. Dãatɔɔ haa aboteɔ naagbai krokomɛi hu amli, tamɔ dãanumɔ shɛii, mlɛbo hela, wekui ni mli egbala, kɛ tsɔnei amli osharai. Yɛ gbɛ kroko nɔ lɛ, niyeli ni atsiɔ he kɛjɛɔ he kpɛŋŋ lɛ hu baanyɛ aye mɔ awui ni ebaanyɛ egbele gbɛ kɛha niyeli he naagbai ni woɔ wala he gbeyei, tamɔ niyenii ni asumɔɔɔ ni ayeɔ.

Eyɛ mli akɛ Biblia lɛ jeee tsofafeemɔ he nikasemɔ wolo moŋ, shi ekɛ ŋaawoo ni yɔɔ tɛ̃ɛ haa yɛ bɔ ni esa akɛ aŋmɛ pɛpɛɛpɛ yɛ niyeli kɛ ninumɔ mli lɛ he. “Bo lɛ, bo toi, mibi, ní ole nii, ni oha otsui anyiɛ gbɛ lɛ nɔ tɛ̃ɛ. Kaaŋɔ ohe ofutu dãatɔlɔi kɛ mɛi ni feɔ loo he fú lɛ! Ejaakɛ dãatɔlɔ kɛ fulɔ lɛ, amɛaaye ohia.” (Abɛi 23:19-21) Ni kɛlɛ, Biblia lɛ kɛɔ akɛ esa akɛ niyeli kɛ ninumɔ afee nɔ ni ŋɔɔ. “Kɛ́ gbɔmɔ fɛɛ gbɔmɔ aaaye ni enu, ni eye nii kpakpai amli ŋɔɔmɔ yɛ edeŋmegbomɔ fɛɛ mli lɛ, Nyɔŋmɔ nikeenii ni.”—Jajelɔ 3:13.

Biblia lɛ hu woɔ hewalɛ koni aná jwɛŋmɔ ni ŋmɛɔ pɛpɛɛpɛ yɛ kpɔiaŋgbɔlemɔ mli, ni emaa nɔ mi akɛ “gbɔmɔtso he mɔdɛŋbɔɔ he sɛɛnamɔ faaa.” Shi ekɛfata he akɛ: “Nyɔŋmɔ jamɔ he yɛ sɛɛnamɔ yɛ nii fiaa mli, ni eyɛ wala ni yɔɔ agbɛnɛ nɛɛ kɛ nɔ ni baaba lɛ he shiwoo.” (1 Timoteo 4:8) Ekolɛ obaabi akɛ: ‘Yɛ mɛɛ gbɛ nɔ Nyɔŋmɔ jamɔ he yɔɔ sɛɛnamɔ amrɔ nɛɛ po?’ Yɛ gbɛ̀i babaoo nɔ. Kɛfata mumɔŋ nibii ni he hiaa ni ekɛbaa mɔ ko shihilɛ mli lɛ he lɛ, Nyɔŋmɔ jamɔŋ hetuu-kɛhamɔ haa sui ni he yɔɔ sɛɛnamɔ tamɔ suɔmɔ, miishɛɛ, toiŋjɔlɛ, kɛ henɔyeli shwereɔ—ni fɛɛ haa jwɛŋmɔ kpakpa kɛ hewalɛnamɔ kpakpa yaa nɔ.—Galatabii 5:22, 23.

Nibii ni Naa Wa ni Jɛɔ Jeŋba Shara Mli Baa

Ŋmɛnɛ, mɛi akpekpei abɔ ekpoo jeŋba he naatsĩi nibii fɛɛ. AIDS hela wulu lɛ hu ji nibii ni jɛɔ mli baa lɛ ateŋ eko. Taakɛ WHO tsɔɔ lɛ, kɛjɛ beni AIDS hela wulu lɛ je shishi nɛɛ, mɛi ni fa fe akpekpei 16 egboi, ni amrɔ nɛɛ, aaafee mɛi akpekpei 34 ená HIV, ni ji muawa ni kɛ AIDS baa lɛ eko. Mɛi babaoo ni yeɔ AIDS lɛ ná hela lɛ kɛtsɔ bɔlɛnamɔ mli nifeemɔ ni esaaa, abuii kɛ amɛnaa muawai ni akɛgbuɔ mɔ ní mɛi ni sumɔɔ tsofai fɔ̃ji kɛtsuɔ nii, loo lá ni helai yɔɔ mli ni agbalaa awoɔ mɔ mli lɛ nɔ.

Nibii krokomɛi ni jɛɔ jeŋba shara nifeemɔi amli kɛbaa lɛ hu ji gbɛ̃i ni baa fɔmɔ nii ahe, babaso, mlɛbo mli helai B kɛ C, kɛ sampuu. Eyɛ mli akɛ no mli lɛ akɛ tsofafeemɔ mli wiemɔi ni tamɔ nakai tsuuu nii yɛ Biblia beaŋ moŋ, shi ale gbɔmɔtso lɛ he nii ni bɔlɛnamɔ mli helai komɛi ni fa babaoo yɛ nakai beaŋ lɛ feɔ he lɛ. Ákɛ nɔkwɛmɔnɔ lɛ, Abɛi 7:23 wieɔ nii gbeyeigbeyei ni jɛɔ ajwamaŋbɔɔ mli kɛbaa lɛ he akɛ ‘gãi ni miitsu mlɛbo mli.’ Bei pii lɛ, sampuu feɔ mlɛbo lɛ, tamɔ mlɛbo mli hela feɔ lɛ pɛpɛɛpɛ. Hɛɛ, kwɛ bɔ ni Biblia mli ŋaawoo ni tsɔɔ akɛ Kristofoi ‘ahi lá kɛ ajwamaŋbɔɔ lɛ’ yɔɔ ebe naa pɛpɛɛpɛ ni suɔmɔ yɔɔ mli ha!—Bɔfoi lɛ Asaji 15:28, 29.

Shika Suɔmɔ He Tsɔne Lɛ

Yɛ mɔdɛŋ ni abɔɔ koni aná nii mramra hewɔ lɛ, mɛi babaoo kɛ amɛshika woɔ oshara wulu mli. Mɔbɔ sane ji akɛ, bei pii lɛ, osharai ni tamɔ nɛkɛ ni akɛ he woɔ mli lɛ kɛ shika ni jeɔ mɔ dɛŋ loo hiɛkpatamɔ baa. Shi kɛlɛ, yɛ Nyɔŋmɔ tsulɔ lɛ gbɛfaŋ lɛ, Biblia lɛ kɛɔ akɛ: “Ebɔ mɔdɛŋ ni ekɛ eniji atsu nitsumɔ kpakpa, koni ená nɔ ko ni ekɛha mɔ ni ehia lɛ lɛ.” (Efesobii 4:28) Lɛɛlɛŋ, ekolɛ jeee be fɛɛ be mɔ ni tsuɔ nii waa lɛ baaná nii babaoo. Ni kɛlɛ, eyɛ jwɛŋmɔŋ toiŋjɔlɛ, ebuɔ ehe, ni ekolɛ eyɛ shika po ni ebaanyɛ ekɛha koni akɛtsu yiŋtoo kpakpa he nii.

Biblia lɛ bɔɔ kɔkɔ akɛ: “Mɛi ni taoɔ nii pii aná lɛ gbeeɔ kaa kɛ tsɔne kɛ kwashiai akɔnɔi pii ni fiteɔ mɔ ní tsiɔ mɛi ewoɔ hiɛkpatamɔ kɛ laajemɔ mli lɛ amli. Ejaakɛ nibii fɔ̃ji fɛɛ ashishifã ji shika suɔmɔ ní mɛi komɛi di sɛɛ . . . ni amɛkɛ piŋmɔi babaoo egbulɔ amɛhe lɛ.” (1 Timoteo 6:9, 10) Ŋwanejee ko kwraa bɛ he akɛ mɛi babaoo “ni taoɔ nii pii aná lɛ” tsɔmɔɔ niiatsɛmɛi. Shi mɛni amɛlaajeɔ? Ani ejeee anɔkwale akɛ amɛ hewalɛnamɔ, weku, mumɔŋ shidaamɔ, kɛ amɛwɔ kpakpa boteɔ naagba mli?—Jajelɔ 5:11.

Mɔ ni le nii lɛ yɔseɔ akɛ “jeee gbɔmɔ nii ni ená ni eteke nɔ lɛ mli ewala yɔɔ.” (Luka 12:15) Shika kɛ nibii komɛi ahe hiaa yɛ shihilɛi babaoo mli. Yɛ anɔkwale mli lɛ, Biblia lɛ kɛɔ akɛ “shika hu tamɔ hɔɔŋ,” shi ekɛfata he akɛ “nɔ ni nilee kɛfe ji akɛ nilee hereɔ etsɛ yiwala.” (Jajelɔ 7:12) Ákɛ nɔ ni tamɔɔɔ shika lɛ, nilee kɛ ŋaalee kpakpa baanyɛ aye abua wɔ yɛ shihilɛi fɛɛ mli, shi titri lɛ yɛ saji ni kɔɔ wɔ wala he lɛ he.—Abɛi 4:5-9.

Be Mli ni Ŋaalee Pɛ Baabu Wɔhe

Etsɛŋ ni anɔkwa ŋaalee ‘baahere etsɛmɛi ayiwala’ yɛ gbɛ ni eko bako nakai dã lɛ nɔ—hebuu kɛtsɔ “amanehulu babaoo” ni bɛŋkɛɔ oyayaayai lɛ mli, beni Nyɔŋmɔ kpataa mɛi fɔ̃ji lɛ ahiɛ lɛ. (Mateo 24:21) Yɛ nakai be lɛ mli lɛ gbɔmɛi baashɛrɛ amɛshika amɛshwie gbɛjegbɛi lɛ anɔ akɛ “nɔ ko ní anyaŋeɔ,” taakɛ Biblia lɛ tsɔɔ lɛ. Mɛni hewɔ? Ejaakɛ no mli lɛ amɛ́kase yɛ gbɛ ni wa waa nɔ akɛ shika kɛ jwiɛtɛi heŋ wala ehaŋ amɛ yɛ “Yehowa mlifu gbi lɛ” nɔ. (Ezekiel 7:19) Yɛ gbɛ kroko nɔ lɛ, “asafo babaoo” ni tsɔ ŋaa gbɛ nɔ ‘amɛbɔ jwetrii amɛha amɛhe yɛ ŋwɛi’ kɛtsɔ mumɔŋ nibii ni amɛkɛye klɛŋklɛŋ gbɛhe yɛ amɛshihilɛ mli lɛ nɔ lɛ baaná amɛnii ni amɛkɛto jogbaŋŋ lɛ he sɛɛ ni amɛná naanɔ wala yɛ paradeiso shikpɔŋ nɔ.—Kpojiemɔ 7:9, 14; 21:3, 4; Mateo 6:19, 20.

Te wɔɔfee tɛŋŋ wɔná wɔsɛɛ be ni yɔɔ shweshweeshwe nɛɛ? Yesu ha hetoo akɛ: “Shi enɛ ji naanɔ wala lɛ, ákɛ amɛle bo, anɔkwa Nyɔŋmɔ kome lɛ, kɛ Yesu Kristo, mɔ ni otsu lɛ.” (Yohane 17:3) Mɛi akpekpei abɔ ená nilee nɛɛ yɛ Nyɔŋmɔ Wiemɔ ni ji Biblia lɛ mli. Jeee akɛ mɛi ni tamɔ nɛkɛ ená wɔsɛɛ be he hiɛnɔkamɔ ni yɔɔ naakpɛɛ kɛkɛ shi amɛnáa toiŋjɔlɛ kɛ shweshweeshwefeemɔ ko amrɔ nɛɛ hu. Etamɔ bɔ ni lalatsɛ lɛ tsɔɔ mli lɛ pɛpɛɛpɛ, akɛ: “Hejɔlɛ mli kwraa po ni makã shi mawɔ yɛ; ejaakɛ bo, Yehowa, okome ohaa mihiɔ shi shweshweeshwe.”—Lala 4:9.

Ani obaanyɛ osusu he kroko hu ni obaaná saji ni baanyɛ aye abua bo koni eha osharai ni baa ohewalɛnamɔ kɛ owala he lɛ aba shi lɛ he yɛ jɛmɛ taakɛ Biblia lɛ feɔ lɛ? Wolo ko kwraa bɛ ni yɔɔ hegbɛ ni Biblia lɛ yɔɔ lɛ, ni wolo ko kwraa bɛ ni baanyɛ aye abua bo koni oná anɔkwa shweshweeshwe shihilɛ yɛ ŋmɛnɛ jeŋ ni oshara eyi mli obɔ nɛɛ mli. Mɛni hewɔ opɛiii mli lolo?

[Akrabatsa/Mfoniri ni yɔɔ baafa 6]

Hewalɛnamɔ kɛ Shweshweeshwe Shihilɛ Kpakpa—Yɛ Biblia lɛ Yelikɛbuamɔ Naa

Bɔni afee ni oblayoo ko ni atsɛɔ lɛ Janea lɛ ajo nɔ̃ diɛŋtsɛ ni baa shihilɛ mli lɛ naa foi lɛ, ekɛ wii, tawa, kokein, amphetamines, LSD, kɛ tsofai krokomɛi tsuɔ nii daa. Enuɔ dãa waa hu. Taakɛ Jane tsɔɔ lɛ, nakai nɔŋŋ ewu hu feɔ. Efee tamɔ nɔ ni amɛnaŋ wɔsɛɛ be kpakpa ko. Kɛkɛ ni Jane kɛ Yehowa Odasefoi bɔi sanegbaa. Ebɔi Kristofoi akpeeiyaa kɛ Buu-Mɔɔ kɛ ehefatalɔ wolo tɛtrɛɛ, Awake! lɛ kanemɔ ni eha ewu hu kane eko. Amɛ fɛɛ amɛkɛ Odasefoi lɛ bɔi Biblia lɛ kasemɔ. Beni amɛbaná hiɛsɔɔ amɛha Yehowa jalɛ tɛi ni nɔ kwɔlɔ lɛ, amɛfɔ̃ɔ tsofai fɔ̃ji fɛɛ kɛ nitsumɔ. Mɛni jɛ mli ba? Jane ŋma yɛ afii komɛi asɛɛ akɛ: “Wɔ shihilɛ hee lɛ eha wɔná miishɛɛ babaoo. Mihiɛ esɔ Yehowa waa yɛ e-Wiemɔ ni tsuuɔ mɔ he lɛ hewɔ kɛ shihilɛ kpakpa ni heyeli fata he ni wɔnyɛɔ wɔkɛtsuɔ nii amrɔ nɛɛ lɛ hewɔ.”

Kurt ni nɔ ni fata enitsumɔ he ji kɔmpiuta gbɛjianɔtoi lɛ sane lɛ tsɔɔ bɔ ni sɛɛnamɔ yɔɔ nitsulɔ anɔkwafo lɛ he lɛ mli jogbaŋŋ. Ehe miihia ni aná tsɔne hee, ni Kurt nitsumɔtsɛ lɛ kɛ tsɔne hee lɛ ní aaaná yɛ jara ní baa shi naa lɛ he nitsumɔ wo edɛŋ. Kurt yana nibii lɛ ahɔɔlɔ ni sa, ni akpɛlɛ jara ni asumɔɔ lɛ nɔ. Shi kɛlɛ, mɔ ni ŋmaa nibii ewoɔ woji amli ehaa nibii ahɔɔlɔ lɛ tɔ̃ yɛ jara ni eŋma ewo wolo mli lɛ mli, ni no ha aaafee (U.S. shika) dɔlai 40,000 je shika lɛ nɔ. Beni Kurt yɔse tɔmɔ lɛ, etsɛ́ nitsumɔhe lɛ, ni nitsumɔ nɔkwɛlɔ lɛ kɛɛ akɛ enako anɔkwayeli ni tamɔ nɛkɛ pɛŋ kɛjɛ beni ebɔi nitsumɔ afii 25 nɛ lɛ. Kurt tsɔɔ mli akɛ Biblia lɛ etsɔse ehenilee. Nɔ ni jɛ mli ba ji akɛ, nitsumɔ nɔkwɛlɔ lɛ bi koni abaha lɛ Awake! ní wieɔ nitsumɔ mli anɔkwayeli he lɛ ekomekomei 300 bɔni afee ni enyɛ ekɛha enanemɛi nitsulɔi lɛ. Yɛ Kurt gbɛfaŋ lɛ, enɔkwayeli lɛ ha awo enɔ yɛ nitsumɔ mli.

[Shishigbɛ niŋmaa]

[Mfoniri ni yɔɔ baafa 7]

“Mi ji Yehowa, o-Nyɔŋmɔ lɛ, mɔ ni tsɔɔo nii ni hi hao.”—YESAIA 48:17