Nitsumɔ Babaoo Husui lɛ Anaa ni Adamɔɔ

BENI Richard kɛ Lusia tsɔɔ bɔ ni amɛnanemɛi Buu Mɔɔ Biblia Gilead Skul klas ni ji 105 lɛ mli nikaselɔi lɛ feɔ amɛnii amɛhaa lɛ mli lɛ, amɛkɛɛ: “Akaŋshii mumɔ ko kwraa bɛ jɛmɛ. Mɔ fɛɛ mɔ miisumɔ ni mɔ kroko lɛ aye omanye. Esoro wɔ fɛɛ kwraa, shi yɛ wɔgbɛfaŋ lɛ, nikaselɔ fɛɛ nikaselɔ jara wa.” Lowell ni ji klasbii lɛ ateŋ mɔ ko lɛ kpɛlɛ nɔ, ni ekɛfata he akɛ: “Srɔtofeemɔi ni yɔɔ wɔteŋ lɛ eha wɔbɛŋkɛ wɔteŋ mɔ fɛɛ mɔ.”

Esoro klasbii ni gbe nikasemɔ naa yɛ September 12, 1998 lɛ kwraa lɛɛlɛŋ. Nikaselɔi lɛ ateŋ mɛi komɛi etsu gbɛgbamɔ nitsumɔ lɛ yɛ hei ni Maŋtsɛyeli shiɛlɔi ahe hiaa waa diɛŋtsɛ yɛ; mɛi krokomɛi kɛ anɔkwayeli esɔmɔ yɛ he ni bɛŋkɛ amɛshia. Ehe bahia ni amɛteŋ mɛi fioo komɛi, tamɔ Mats kɛ Rose-Marie kɛ be kakadaŋŋ atsu nii waa diɛŋtsɛ bɔni afee ni amɛha amɛ Blɔfo wiemɔ aya hiɛ dani amɛba skul lɛ. Nikaselɔi lɛ ateŋ mɛi babaoo kɛ be kakadaŋŋ esusu maŋsɛɛ sanekpakpa shiɛmɔ nitsumɔ lɛ he kɛjɛ amɛgbekɛbiiashi. Gbalashihilɛ mli hefatalɔi komɛi bi enɛ mli gbɛ shii 12; kwɛ bɔ ni amɛmii shɛ amɛhe beni afɔ̃ amɛ nine koni amɛba klas ni ji 105 lɛ!

Otsii 20 mli tsɔsemɔ dɛŋdɛŋ lɛ baho etee kɛ foi. Dani nikaselɔi lɛ aaaná ale lɛ, no mli lɛ amɛku sɛɛ amɛkɛ amɛnaagbee nifeemɔ ni amɛŋmala lɛ eha, amɛkɛ amɛnaagbee saji ahe amaniɛ ni amɛbɔ lɛ eha, ni nikasemɔ naagbee gbi lɛ eshɛ.

Nifeemɔ lɛ mli sɛinɔtalɔ, Albert Schroeder ni ji Yehowa Odasefoi a-Nɔyeli Kuu lɛ mlinyo lɛ kai klasbii lɛ akɛ, ‘amɛdamɔ Biblia mli tsɔsemɔ he nikasemɔ mli nitsumɔi babaoo husui lɛ anaa,’ ni amɛji mɛi ni baa yɛ mɛi krokomɛi ni fa fe 7,000 ni etsɔ amɛhiɛ kɛba Gilead lɛ asɛɛ. Nɔ ni etsĩ tã waa ji akɛ, yɛ hulutsoo be lɛ mli lɛ, nikaselɔi lɛ ená hegbɛ ko ni yɔɔ srɔto ni ji mɛi ni etsu nii aahu akɛ maŋsɛɛ sanekpakpa shiɛlɔi ni amɛkɛ amɛ bɔɔ beni mɛnɛɛmɛi basara jeŋ fɛɛ nitsumɔhe yitso lɛ kɛfata majimaji ateŋ kpeei lɛ ahe lɛ.

Kɛkɛ ni Nyɛminuu Schroeder tsɛ́ Max Larson ni ji Betel Nitsumɔi Ajinafoi Akuu lɛ mlinyo lɛ. Ewie saneyitso ni ji “Wolokasemɔ ni Kɛ Mɔ Yaa Naanɔ Wala Mli” lɛ he. Nyɛminuu Larson tsɛ́ Abɛi 1:5 sɛɛ, ní kɛɔ akɛ: “Ní nilelɔ anu ni eshwere yɛ nikasemɔ gbɛfaŋ, ní mɔ ni yɔɔ jwɛŋmɔ hu aná ŋaawoo kpakpa.” Hesaa he miihia dani afee maŋsɛɛ sanekpakpa shiɛlɔ ni nitsumɔ mɔɔ shi. Gbɔmɛi ni he esa lɛ damɔɔ maŋtsɛmɛi ahiɛ. (Abɛi 22:29) Beni akɛ nyɔji enumɔ etsɔse nikaselɔi lɛ agbe naa lɛ, awaje amɛ jogbaŋŋ ni amɛyadamɔ Maŋtsɛmɛi ni fe fɛɛ, Yehowa Nyɔŋmɔ kɛ Kristo Yesu najiaŋ.

David Olson ni tsuɔ nii yɛ Sɔɔmɔ Nitsumɔhe lɛ wie yɛ enɛ sɛɛ kɛ saneyitso ni ji, “Ye Obua Koni Yehowa Tsui Anya.” Ebi akɛ: “Mɛni adesai ni yeee emuu baanyɛ afee ni amɛkɛha Nyɔŋmɔ tsui anya?” Te aha hetoo aha tɛŋŋ? Amɛbaanyɛ amɛkɛ anɔkwayeli kɛ mlifilimɔ asɔmɔ lɛ. Yehowa miisumɔ ni ewebii aná sɔɔmɔ ni amɛkɛhaa lɛ lɛ mli ŋɔɔmɔ. Kɛ wɔkɛ mlifilimɔ fee Nyɔŋmɔ suɔmɔnaa nii lɛ, wɔhaa etsui nyaa. (Abɛi 27:11) Nyɛminuu Olson kane wolo ni jɛ gbalashihilɛ mli hefatalɔi ni gbe Gilead klas ni ji 104 naa lɛ adɛŋ. Ani amɛmiiná amɛnitsumɔ hee lɛ mli ŋɔɔmɔ? Amɛŋma yɛ amɛ asafo lɛ he akɛ: “Wɔyɛ aaafee shiɛlɔi 140, ni kɛ́ hoo lɛ, mɛi aaafee 250 kɛmiiya 300 baa kpee. Shiɛmɔ nitsumɔ ji emli nɔ ni fe fɛɛ. Wɔteŋ mɔ fɛɛ mɔ yɛ Biblia mli nikasemɔi ejwɛ, ni amɛteŋ mɛi komɛi ebɔi kpeei baa momo.”

Lyman Swingle ni yɔɔ Nɔyeli Kuu lɛ mli lɛ wie saneyitso ni ji “Be ni Okɛaamɛ Fioo Koni Okwɛ Bɔ ni Ájɔɔ Bo Aha” lɛ he. Gilead tsɔsemɔ kɛ jɔɔmɔi babaoo eba. Eye ebua nikaselɔi lɛ ni amɛná nilee babaoo, amɛná hiɛsɔɔ babaoo amɛha Yehowa gbɛjianɔtoo lɛ, ni amɛná sui ni he hiaa, tamɔ heshibaa. Nyɛminuu Swingle kɛɛ: “Eji niiashikpamɔ ni tsɔɔ heshibaa akɛ aaaba biɛ ni aná be koni akɛbo nitsɔɔmɔ toi,” ni ekɛfata he akɛ: “Nyɛshiɔ biɛ nyɛyaa be mli ni awaje nyɛ jogbaŋŋ koni nyɛkɛwo Yehowa nɔ gojoo.”

Daniel Sydlik, ni lɛ hu eji Nɔyeli Kuu lɛ mlinyo lɛ wie saneyitso ni ji “Kwɛ Bɔ ni Nyɛmiishɛɛ Fá Babaoo—No Hewɔ lɛ Mɛni Hewɔ Nyɛhaoɔ Nyɛhe?” lɛ he. Ewo hewalɛ akɛ, kɛ́ naagbai te shi lɛ, nyɛtaoa gbɛtsɔɔmɔ kɛjɛa Ŋmalɛi lɛ amli. Nyɛminuu Sydlik hala Mateo yitso 6 lɛ mli kukuji ni ekɛtsɔɔ gbɛ ni abaanyɛ atsɔ nɔ afee enɛ. Hemɔkɛyeli ni bɛ baanyɛ aha wɔhao yɛ heloonaa nibii ahe, tamɔ niyenii kɛ atadewoo. Shi kɛlɛ, Yehowa le nɔ ni he hiaa wɔ. (Mateo 6:25, 30) Tsuiyeli baaha naagbai ni baa daa gbi lɛ mli awo wu kɛkɛ. (Mateo 6:34) Yɛ gbɛ kroko nɔ lɛ, hesaamɔ ko he miihia. (Okɛto Luka 14:28 he.) Nyɛminuu Sydlik tsɔɔ mli akɛ: “Nɔ ni Yesu guɔ lɛ jeee wɔsɛɛ be ni akɛ nilee susuɔ he lɛ, shi moŋ ehe haomɔ ni nilee bɛ mli lɛ. Nɔ ko he nitsumɔ ji tsamɔi ni hi fe fɛɛ lɛ ateŋ ekome kɛha yeyeeyefeemɔ. Kɛ wɔfee yeyeeye lɛ, nilee yɛ mli akɛ wɔɔbɔi anɔkwale lɛ he wiemɔ.”

Shɛɛyeli Ŋaawoo ni Nitsɔɔlɔi lɛ Kɛha

Gilead tsɔɔlɔi lɛ ateŋ mɛi etɛ wie kɛnyiɛ sɛɛ. Karl Adams ji mɔ ni wie klɛŋklɛŋ yɛ saneyitso lɛ ni ji “Mɛni Okɛbaato Yehowa Najiaŋ?” lɛ he. Ewiemɔ lɛ damɔ Lala 116 ní ekolɛ Yesu kɛfee lala ni elá yɛ gbɛkɛ dani egbele baashɛ lɛ. (Mateo 26:30, NW shishigbɛ niŋmaa) Mɛni Yesu susuɔ he beni eláa wiemɔi ni ji: “Mɛni maŋɔto Yehowa najiaŋ yɛ ejurɔ fɛɛ ni efee mi lɛ hewɔ” lɛ? (Lala 116:12) Ekolɛ eesusu gbɔmɔtso ni eye emuu ni Yehowa esaa eto lɛ lɛ he. (Hebribii 10:5) Yɛ gbi ni baanyiɛ sɛɛ lɛ nɔ lɛ, ekɛ nakai gbɔmɔtso lɛ baashã afɔle, ní ekɛtsɔɔ bɔ ni esuɔmɔ lɛ mli kwɔ ha. Klas ni ji 105 lɛ mli nikaselɔi lɛ kɛ nyɔji enumɔ ni etsɔ hiɛ lɛ esa amɛnaa Yehowa nikpakpai lɛ. Amrɔ nɛɛ amɛbaatsɔɔ suɔmɔ ni amɛyɔɔ kɛha Nyɔŋmɔ kɛtsɔ amɛmaŋsɛɛ sanekpakpa shiɛmɔ nitsumɔ ni amɛtsuɔ waa lɛ nɔ.

Mark Noumair, Gilead tsɔɔlɔ ni ji enyɔ ní bawie lɛ, wo nikaselɔi lɛ ŋaa akɛ: “Nyɛyaa Nɔ Nyɛfea Nɔ ni Ja.” Beni ahɔɔ Yosef akɛ nyɔŋ yɛ Mizraim lɛ, eŋmɛ etsui shi yɛ afii 13 niseniianiifeemɔ ni esaaa lɛ mli. Ani eŋmɛ gbɛ koni mɛi krokomɛi atɔ̃mɔi aha ekpa sɔɔmɔ? Dabi, etee nɔ efee nɔ ni ja. Kɛkɛ ni yɛ Nyɔŋmɔ be ni sa mli lɛ, ajie Yosef kɛjɛ ekaai lɛ amli. Trukaa ni shihilɛ lɛ tsake kɛjɛ tsuŋwoo mli kɛtee shihilɛ yɛ maŋtsɛwe. (1 Mose, yitsei 37-50) Nitsɔɔlɔ lɛ bi enikaselɔi lɛ akɛ: Kɛ nyɛ gbɛkpamɔi baaa mli yɛ nyɛmaŋsɛɛ sanekpakpa shiɛmɔ nitsumɔ lɛ mli lɛ, ani nyɛbaakpa lo? Ani nyɛbaaŋmɛ gbɛ koni nyɛnijiaŋ aje wui? Aloo nyɛbaaŋmɛ nyɛtsui shi, taakɛ Yosef fee lɛ?”

Yɛ naagbee lɛ, Wallace Liverance, mɔ ni ŋmalaa mɛi agbɛi ewoɔ Gilead Skul lɛ mli lɛ kwɛ miishɛɛ sanegbaa ni ekɛ klasbii lɛ ná lɛ nɔ, ni saneyitso lɛ ji “Nyɛtswaa Maŋtsɛ lɛ kɛ Maŋtsɛyeli lɛ He Adafi.” Nikaselɔi lɛ ateŋ mɛi komɛi gba niiashikpamɔi ni amɛná beni amɛshiɛɔ yɛ shia kɛ shia, yɛ shwapoi anaa, kɛ gbɛjegbɛi anɔ lɛ. Mɛi krokomɛi wie bɔ ni amɛtee amɛyaye mɛi ni wieɔ wiemɔ kroko lɛ odase. Ni kɛlɛ, mɛi krokomɛi tsɔɔ bɔ ni ashiɛɔ atsɔɔ mɛi ni esoro amɛ jamɔ. Mɛi ni egbe nikasemɔ naa lɛ fɛɛ miishwe koni amɛkɛ amɛhe awo sɔɔmɔ nitsumɔ lɛ mli kɛmɔ shi yɛ maŋsɛɛ sanekpakpa shiɛmɔ nitsumɔ lɛ mli.

Mɛi ni Kɛ Miishɛɛ Etsu Nii Aahu akɛ Maŋsɛɛ Sanekpakpa Shiɛlɔi

Wiemɔ ni nyiɛ sɛɛ, ni yitso ji, “Miishɛɛ Nibii ni Jɛɔ Maŋsɛɛ Sanekpakpa Shiɛmɔ Nitsumɔ lɛ Mli” ji nɔ ni Robert Wallen kɛha, ni nɔ ni fata he ji saji ni ebibii nyɛmimɛi ejwɛ ni tsuɔ nii yɛ nitsumɔhe yitso lɛ ní nyɛsɛɛ nɛɛ amɛkɛ maŋsɛɛ sanekpakpa shiɛlɔi ni he esa ni tswaa mɔ maa shi ebɔ lɛ. Nakai maŋsɛɛ sanekpakpa shiɛlɔi lɛ kɛ oyaiyeli ekpɛlɛ nɔ akɛ, ejeee nɔ ni waaa kɛhaaa amɛ akɛ amɛaakase wiemɔ hee, ní amɛtsake amɛhe amɛwo kusum kroko mli, aloo ní amɛaale kɔɔyɔŋ tsakemɔ kroko mli shihilɛ. Agbɛnɛ hiɛ ni tseɔ shia lɛ he piŋmɔi lɛ yɛ ní esa akɛ adamɔ naa. Bei komɛi lɛ, helai ahe naagbai teɔ shi. Shi yɛ fɛɛ sɛɛ lɛ, maŋsɛɛ sanekpakpa shiɛlɔi lɛ tee nɔ amɛhiɛ jwɛŋmɔ kpakpa mli, ni ajɔɔ amɛ shifimɔ lɛ. Amɛteŋ mɛi komɛi eha mɛi babaoo ebaná Yehowa he nilee. Mɛi krokomɛi hu eye ebua yɛ gbɛi srɔtoi anɔ koni amɛkɛha Maŋtsɛyeli nitsumɔ muu lɛ fɛɛ aya hiɛ yɛ amɛshikpɔji anɔ.

Mɔ ni wie kɛgbe naa ji Carey Barber, Nɔyeli Kuu lɛ mlinyo. Etĩ “Nyɔŋmɔ Shihilɛ Gbɛ” kpee wulu mli nifeemɔ lɛ mli saji otii amli. Ebi etoibolɔi lɛ akɛ: “Mɛɛ hewalɛ kpee lɛ shishi nifeemɔ lɛ ná yɛ okɛ Yehowa teŋ wekukpaa mli?” Wielɔ lɛ kɛ jɔɔmɔi ni jɛɔ Nyɔŋmɔ gbɛ lɛ sɛɛnyiɛmɔ mli kɛbaa lɛ to mɛi ni nyiɛɔ je lɛ gbɛ lɛ sɛɛ lɛ anaagbee ni eŋɔɔɔ kwraa lɛ he. Beni ewieɔ tɔ̃mɔ ni Mose tɔ̃ yɛ Meriba lɛ he lɛ, ebɔ kɔkɔ akɛ: “Beni mɔ ko kɛ anɔkwayeli esɔmɔ afii babaoo po lɛ, Yehowa ekuuu ehiɛ eshwieee E-mlai ni ja lɛ anɔ tɔ̃mɔ fioo ko po nɔ.” (4 Mose 20:2-13) Eba akɛ Nyɔŋmɔ sɔɔlɔi fɛɛ ni yɔɔ he fɛɛ he lɛ baamɔ amɛsɔɔmɔ hegbɛi ni jara wa lɛ mli tswɛ!

Be eshɛ ni akɛ mɛi ni egbe nikasemɔ naa lɛ ayijiemɔ woji baaha amɛ. Kɛkɛ ni klasbii lɛ anajiaŋdamɔlɔ ko kane wolo ko ni tsɔɔ hiɛsɔɔ kɛha tsɔsemɔ ni nikaselɔi lɛ anine eshɛ nɔ lɛ. Yɛ naagbee lala kɛ sɔlemɔ ni jɛ tsuiŋ sɛɛ lɛ, agbe nikasemɔ naagbee nifeemɔ lɛ naa. Shi kɛha klas ni ji 105 lɛ, shishijee kɛkɛ nɛ, ejaakɛ maŋsɛɛ sanekpakpa shiɛlɔi lɛ ‘damɔ nitsumɔ babaoo husui lɛ anaa.’

[Mfoniri ni yɔɔ baafa 23]

Klasbii lɛ Ahe Saji

Maji srɔtoi anɔ ni amɛjɛ kɛba: 9

Maji srɔtoi ni aha amɛ nitsumɔ yɛ mli: 17

Nikaselɔi lɛ ayifalɛ: 48

Mɛi abɔ ni ji gbalashihilɛ mli hefatalɔi: 24

Afii abɔ ni amɛye lɛ mlijaa: 33

Afii abɔ ni amɛkɛhi anɔkwale lɛ mli lɛ mlijaa: 16

Afii abɔ ni amɛkɛsɔmɔ kɛ amɛbe fɛɛ mlijaa: 12

[Akrabatsa ni yɔɔ baafa 22]

Amɛhala Be-Fɛɛ Sɔɔmɔ Lɛ?

Ben ni ji mɔ ko ni egbe klas 105 lɛ naa lɛ kɛɛ: “Beni midako lɛ, no mli lɛ mitooo gbɛjianɔ ko kwraa akɛ matsu gbɛgbamɔ nitsumɔ lɛ.” Ekɛfata he akɛ: “Misusu akɛ mɛi ni yɔɔ nyɛmɔi krɛdɛɛi komɛi ni esoro amɛshihilɛi kwraa lɛ pɛ ji mɛi ni baanyɛ atsu gbɛgbamɔ nitsumɔ lɛ. Shi mikase akɛ esa akɛ maná suɔmɔ maha shiɛmɔ nitsumɔ lɛ. Kɛkɛ ni gbi ko lɛ, miyɔse akɛ gbɛgbalɔ ni mafee lɛ ji gbɛ ko kɛkɛ ni atsɔɔ nɔ akɛnáa sɔɔmɔ nitsumɔ lɛ mli gbɛfaŋnɔ babaoo. No ji be mli ni miyɔse akɛ manyɛ mafee gbɛgbalɔ.”

Lusia gba akɛ: “Akɛ bulɛ haa be-fɛɛ sɔɔlɔi yɛ wɔ shia mli be fɛɛ be.” Ekaiɔ mlifilimɔ ni baa asafo ni eyɔɔ mli lɛ mli be fɛɛ be ni maŋsɛɛ sanekpakpa shiɛlɔi lɛ basaraa amɛ lɛ. Ekɛɛ akɛ: “Beni midaa lɛ, abanu shishi akɛ be-fɛɛ sɔɔmɔ baafata migbɛjianɔtoo he.”

Theodis nyɛ gbo beni eye afii 15. Ekɛɛ: “Yɛ nakai be lɛ mli lɛ, no mli asafo lɛ yeɔ ebuaa mi waa diɛŋtsɛ, no hewɔ lɛ mibi mihe akɛ, ‘Mɛni manyɛ mafee koni mikɛtsɔɔ hiɛsɔɔ?’ ” Enɛ ha ekɛ ehe wo be-fɛɛ sɔɔmɔ lɛ mli ni amrɔ nɛɛ eyɛ maŋsɛɛ sanekpakpa shiɛmɔ nitsumɔ lɛ mli.

[Mfoniri ni yɔɔ baafa 25]

Buu Mɔɔ Biblia Gilead Skul Klasbii ni Ji 105 ni Gbe Nikasemɔ Naa

Gbɛi ni yɔɔ shishigbɛ lɛ miitsɔɔ bɔ ni amɛdamɔ shi lɛ mli, kɛjɛ hiɛgbɛ kɛyaa sɛɛgbɛ, ni amɛgbɛi lɛ jeɔ shishi kɛjɛɔ abɛku gbɛ kɛyaa ninejurɔ gbɛ

(1) Sampson, M.; Brown, I.; Heggli, G.; Abuyen, E.; Desbois, M.; Pourthié, P. (2) Kassam, G.; Lindberg, R.; Dapuzzo, A.; Taylor, C.; LeFevre, K.; Walker, S. (3) Baker, L.; Pellas, M.; Woggon, E.; Böhne, C.; Asplund, J.; Haile, J. (4) Pourthié, T.; Whittaker, J.; Palmer, L.; Norton, S.; Gering, M.; Haile, W. (5) Walker, J.; Böhne, A.; Groenveld, C.; Washington, M.; Whittaker, D.; Abuyen, J. (6) Gering, W.; Washington, K.; Pellas, M.; Desbois, R.; Heggli, T.; Asplund, Å. (7) Woggon, B.; LeFevre, R.; Taylor, L.; Brown, T.; Groenveld, R.; Palmer, R. (8) Norton, P.; Sampson, T.; Baker, C.; Lindberg, M.; Kassam, M.; Dapuzzo, M.