Mɛi Pii Kɛɔ akɛ Amɛyɛ Hemɔkɛyeli

YOO ko ni yɔɔ Brazil, ni sumɔɔ Nyɔŋmɔ jamɔ lɛ jaje akɛ: “Yesu he yɛ naakpɛɛ! Ehe yɛ naakpɛɛ kɛkɛ!” Eji anɔkwale akɛ, ŋwanejee ko bɛ hewalɛ ni Yesu gbɛi lɛ yɔɔ lɛ he. Gbɔmɛi ejɛ amɛsuɔmɔ mli amɛná nɔ̃ ni amɛgboi amɛha lɛ yɛ yinɔsane be fɛɛ mli.

Bɔfo Petro kɛ bɔfo Yohane shiɛ ‘yɛ Yesu gbɛi lɛ anɔ’ yɛ Yerusalem. Enɛ ni amɛfee hewɔ lɛ, amɔmɔ amɛ ni ayi amɛ. Kɛlɛ, “amɛje akuashɔŋ lɛ hiɛ amɛtee kɛ miishɛɛ, akɛ egbɛi lɛ ahewɔ lɛ abu amɛ mɛi ni sa akɛ abɔ amɛ ahora.”—Bɔfoi lɛ Asaji 5:28, 41.

Antipa hu ji klɛŋklɛŋ afii oha lɛ mli Kristofonyo ni kɛ bulɛ ni mli kwɔ ha Yesu gbɛi lɛ. Yesu wie ehe yɛ Biblia lɛ mli naagbee wolo ni ji Kpojiemɔ lɛ mli akɛ, “midasefonyo anɔkwafo, ni agbe lɛ yɛ nyɛteŋ, he ni Satan yɔɔ lɛ.” (Kpojiemɔ 2:13) Antipa kɛ Kristofoi krokomɛi ni yɔɔ Pergamo lɛ kpoo akɛ amɛaakwa Kristo mli hemɔkɛyeli ni amɛyɔɔ lɛ. Antipa hiɛ Yesu gbɛi lɛ mli kpɛŋŋ, ni enɛ ha elaaje ewala po!

Aaafee afii nyɔŋmai enumɔ sɛɛ, yɛ afi 155 Ŋ.B. lɛ, mɔ ko ni kɛɔ akɛ Kristofonyo ji lɛ, ni atsɛɔ lɛ Polycarp lɛ kɛ kaa ni tamɔ nakai nɔŋŋ kpe beni afã lɛ koni ebɔ Kristo ahora lɛ. Hetoo ni eha ji akɛ: “Mikɛ afii 86 esɔmɔ Lɛ, ni Efeko mi nɔ ko fɔŋ ko. Te mafee tɛŋŋ malomɔ mi-Maŋtsɛ ni here miyiwala lɛ?” Akɛni ekpoo akɛ eeekwa Kristo hewɔ lɛ, ashã Polycarp yɛ tso he.

Bɔfoi lɛ, Antipa, kɛ mɛi krokomɛi miisumɔ koni amɛkɛ gbele asɔo Kristo he odaseyeli lɛ naa! Ni gbɔmɛi ni yɔɔ ŋmɛnɛ lɛ hu?

Yesu Gbɛi lɛ Ŋmɛnɛ

Yesu gbɛi lɛ yaa nɔ ekanyaa henumɔi ni mli wa. Yɛ Latin Amɛrika lɛ, sɔlemɔi ni kɛɔ akɛ amɛheɔ Yesu nɔ amɛyeɔ lɛ etee hiɛ oyayaayai yɛ nyɛsɛɛ afii nyɔŋmai fioo ni eho nɛɛ amli. Ni yɛ akrowai bibii lɛ amli po lɛ, Pentekoste sɔlemɔ lɛ yɛ jɛmɛ. Yɛ nakai beaŋ nɔŋŋ lɛ, maŋkwramɔŋ nɔnyɛɛ ni yɔɔ nakai sɔlemɔi lɛ amli lɛ miishwere. Ákɛ nɔkwɛmɔnɔ lɛ, yɛ Brazil Mlawoo Gwabɔɔ lɛ kɛ Ajinafoi a-Gwabɔɔ lɛ mli lɛ, sɛii 31 yɛ ni nɛkɛ sɔlemɔi nɛɛ amli bii lɛ taraa nɔ.

Yesu ji mɔ titri hu yɛ jamɔ kui heei ni yɔɔ United States lɛ ateŋ. Esɛɛnyiɛlɔi lɛ tsɛɔ amɛhe akɛ Shiwoo Mlihiɛlɔi. Time adafitswaa wolo lɛ bɔ amaniɛ yɛ afi 1997 mli akɛ, mɛi ni baa amɛkpeei lɛ ayifalɛ tee hiɛ kɛjɛ mɛi 4,200 yɛ afi 1991 mli kɛtee mɛi akpekpei 1.1 yɛ afi 1996 mli. Elalai lɛ ateŋ ekome kɛɔ akɛ: “Oo ye kunim yɛ Yesu mli, mi Yiwalaherelɔ kɛmiiya naanɔ.”

Ni kɛlɛ, jeee henumɔi fɛɛ ni Yesu gbɛi lɛ kanyaa lɛ ebafee nɔ ni abuɔ. Bei pii lɛ, awuɔ ta yɛ egbɛi lɛ amli. Agbe Yudafoi babaoo yɛ awuiyeli gbɛ nɔ, agbe mɛi ni heee Nyɔŋmɔ nɔ amɛyeee, afee mɛi ni wieɔ shiɔ jamɔ lɛ niseniianii, afolɔ amɛ dukuduku, ni ashã amɛ yɛ tso he—fɛɛ yɛ Yesu gbɛi amli. Ni yɛ nyɛsɛɛ nɛɛ nɔŋŋ lɛ, sanekpakpa jajemɔ ni akɛyeɔ jara lɛ ebafee nɔ ni ale waa. Enɛɛmɛi fɛɛ ji Yesu gbɛi lɛ kɛ nɔ ni edamɔ shi kɛha diɛŋtsɛ lɛ kɛ nitsumɔ yɛ gbɛ fɔŋ ni yɔɔ nyaŋemɔ nɔ!

Kɛfata he lɛ, eteeɔ sanebimɔi komɛi ni he hiaa ashi: Mɛni ji nɔ ni yɔɔ hemɔkɛyeli ni aaaná yɛ Yesu gbɛi lɛ amli lɛ mli? Ni mɛɛ susumɔ Yehowa Odasefoi hiɛ yɛ nɛkɛ sane nɛɛ he? Sane ni nyiɛ sɛɛ lɛ baaha sanebimɔi nɛɛ ahetoo.