Te Ooofee Tɛŋŋ Obu Obii Ahe?

BENI Wernera kɛ afii abɔ etee skul ko ni yɔɔ akutso lɛ mli lɛ sɛɛ lɛ, ekɛ oblahii kɛ oblayei krokomɛi aaafee 3,000 je nɔtsamɔ nikasemɔ skul ko shishi yɛ São Paulo, Brazil. Enɛ ji klɛŋklɛŋ kwraa ni enaa akɛ enanemɛi skulbii kɛ tsofai fɔji miitsu nii ní amɛmiihɔɔ. Akɛni edaaa yɛ gbɔmɔtsoŋ hewɔ lɛ, etsɛɛɛ kɛkɛ ni skulbii ni etsɛ yɛ jɛmɛ lɛ nyɛ enɔ ni ekɛ ehe wo shihilɛ gbonyo mli.

Werner nyɛmiyoo Eva hu yɛ naagbai. Akɛni eetao ni ebɔ mɔdɛŋ jogbaŋŋ hewɔ lɛ, ekase nii waa aahu ni egbɔjɔ kwraa ni ená jwɛŋmɔŋ hela. Taakɛ gbekɛbii ni miidara kɛmiitsɔmɔ onukpai ji lɛ, gbɔmɔtsoŋ kɛ henumɔŋ hebuu he miihia Werner kɛ Eva fɛɛ. Mɛɛ yelikɛbuamɔ he hiaa obii lɛ? Te ooofee tɛŋŋ osaa amɛ kɛha shihilɛ beni amɛtsɔmɔ onukpai? Lɛɛlɛŋ, mɛɛ wɔsɛɛ shihilɛ otaoɔ ohaa obii?

Nibii Babaoo He Miihia Amɛ Fe Daaŋ Ŋmãa

Bo lɛ okɛ be fioo ko asusu naagbai ni fɔlɔi kɛkpeɔ ŋmɛnɛ yɛ amɛbii lɛ ahebuu mli lɛ he okwɛ. Yɛ weku shihilɛ kpakpa ni efite, kɛ ohiayeli ni faa hewɔ lɛ, yɛ maji pii anɔ lɛ, gbekɛbii ni wɔɔ gbɛjegbɛi ahe lɛ miifa babaoo diɛŋtsɛ. Nɔ ni ejɛ hebuu ni anyɛɛɛ akɛha gbekɛbii koni akɛ amɛ akatsu nii yɛ gbɛ ni esaaa nɔ lɛ mli eba ji apaayeli. Tsofai fɔji ni akɛtsuɔ nii hu fiteɔ gbekɛbii babaoo. Ákɛ nɔkwɛmɔnɔ lɛ, beni Brazil gbekɛ ko ni eye kɛjɛ afii nyɔŋma kɛ etɛ kɛyaa lɛ bɔi tsofai fɔji kɛ nitsumɔ lɛ, toiŋjɔlɛ laaje yɛ eshia. Kɛfata henumɔŋ nɔnyɛɛ ni efɔlɔi lɛ ná lɛ he lɛ, amɛpiŋ kɛtao shika ni akɛbaatsa lɛ, ni tsofai fɔji ahɔɔlɔi ni ejieee mɔbɔnalɛ kpo lɛ ba amɛshia amɛbabi nyɔmɔ.

Shi kɛlɛ, yɛ shihilɛ mli nɔnyɛɛi fɛɛ sɛɛ lɛ, jeee niyenii, atadewoo, kɛ wɔɔhe pɛ fɔlɔi pii yaa nɔ amɛpeleɔ kɛtaoɔ kɛhaa amɛbii, shi moŋ amɛbuɔ amɛhe kɛjɛɔ awuiyeli, tsofai fɔji kɛ nitsumɔ, kɛ naagbai krokomɛi ahe. Mɔdɛŋbɔɔ ni sa jogbaŋŋ ji enɛ, shi ani no pɛ kɛkɛ fa? Ni hebuu kɛmiijɛ henumɔŋ kɛ mumɔŋ awuiyeli he lɛ hu? Gbɔmɛi pii eyɔse akɛ, nɔ ni fata omanye ni fɔlɔi yeɔ yɛ amɛnitsumɔ mli lɛ he ji, ni amɛtsu kaai ni kɔɔ nanemɛi kɛ hiɛtserɛjiemɔ ni amɛbii lɛ halaa lɛ ahe nii. Shi kɛlɛ, mɛɛ gbɛ nɔ fɔlɔi baanyɛ atsɔ, koni amɛkafee kpɛŋŋ tsɔ̃ aloo mɛi ni ŋmɛɔ nɔ fɛɛ nɔ feemɔ gbɛ tsɔ̃? Aaafɔ̃ bo nine koni osusu saji ahetooi ni yɔɔ sane ni nyiɛ sɛɛ lɛ mli lɛ he.

[Shishigbɛ niŋmai]