Sɔlemɔi lɛ Kpá Fai

“Paapa lɛ Kɛ Sɔlemɔ lɛ Tee Saneyelihe.” “Sanemlipɛimɔ kɛ Yiwalɛ kɛ Yudafoi Ahe Hetsɛ̃ —Sɔlemɔ lɛ Miito Etɔmɔ Nɔkpɛlɛmɔ He Gbɛjianɔ.”a “Tɔmɔ Nɔkpɛlɛmɔ yɛ Mɛi Ahiɛkpatamɔ lɛ Hewɔ.” “Methodistbii Kpá Indiabii ni Yɔɔ Anaigbɛ Shɔŋŋ lɛ Fai.”

ANI ókane saneyitsei ni tamɔ enɛɛmɛi yɛ adafitswaa woji amli? Etamɔ nɔ ni sɔlemɔi lɛ miiya nɔ be fɛɛ be amɛmiikpɛlɛ amɛtɔmɔi anɔ, ni amɛmiikpa nɔ ni amɛfee afii ohai abɔ ni eho lɛ he fai. Adafitswaa gbɛ̀i lɛ miigbala jwɛŋmɔ kɛmiiya tɔmɔi anɔkpɛlɛmɔ hee ni paapa lɛ kɛtsuɔ nii lɛ nɔ be fɛɛ be.

Beni Paapa lɛ Bi Koni Akɛ Tɔmɔ lɛ Ake

Vatican saji ahe amaniɛbɔlɔ Luigi Accattoli kɛɛ yɛ ewolo ni ji Quando il papa chiede perdono (Beni Paapa lɛ Bi Koni Akɛ Tɔmɔ lɛ Ake) lɛ mli akɛ, yɛ afi 1980 kɛ afi 1996 teŋgbɛ lɛ, John Paul II ‘yɔse Sɔlemɔ lɛ yinɔsane mli tɔmɔi loo ebi koni akɛ tɔmɔ lɛ ake,’ kɛ hoo lɛ shii 94. Taakɛ Accattoli tsɔɔ lɛ, “yɛ Katolik Sɔlemɔ lɛ mli lɛ, paapa lɛ pɛ baanyɛ atsɔɔ tɔmɔ nɔkpɛlɛmɔ yɛ gbɛ ni ja nɔ.” Ni enɛ ji nɔ ni efee, beni ewieɔ Katolik yinɔsane mli bei ni teeɔ naataamɔ shi fe fɛɛ lɛ—Sɛŋmɔtso he Tawuu, tai, sɛɛfimɔ ni akɛhaa yiwalɛ nɔyelii, sɔlemɔi lɛ amligbálamɔ, Yudafoi ahe hetsɛ̃, Sanemlipɛimɔi kɛ Yiwalɛ lɛ, Mafia lɛ, kɛ hewolonɔ su mlijiemɔ. Yɛ wolo fioo ko ni aŋma kɛmaje sɔlemɔ mli onukpai yɛ afi 1994 (ni mɛi komɛi susuɔ akɛ no ji osɔfonukpai awolo ni he hiaa fe fɛɛ lɛ), John Paul II to “afii akpe lɛ mli eshai ahe fai ni akpáa yɛ mɛi fɛɛ ahewɔ” lɛ he gbɛjianɔ.

Osɔfonukpai babaoo enyiɛ paapa lɛ nɔkwɛmɔnɔ lɛ sɛɛ. Yɛ December 1994 lɛ, Italy adafitswaa wolo Il Giornale bɔ amaniɛ akɛ: “Amerika osɔfonukpai pii eba tɛlivishiŋ nɔ ni amɛbi koni maŋbii kɛ amɛtɔmɔi ake amɛ.” Yɛ mɛni he? Yɛ osɔfoi ni kɛ gbekɛbii wɔɔ lɛ he naagba ni amɛbaa lɛ shi, ni amɛkɛyeɔ gbekɛbii babaoo ni amɛkɛ amɛ ewɔ lɛ awui lɛ hewɔ. Yɛ January 1995 lɛ, adafitswaa wolo ni ji La Repubblica bɔ “ekpakpa ko ni afeko eko pɛŋ yɛ ŋmɛnɛŋmɛnɛ beaŋ Katolik jamɔ yinɔsane mli lɛ” he amaniɛ—awie dioo ni Paapa Pius XII fee yɛ Mɛi Ahiɛkpatamɔ he lɛ naagba lɛ he. Yɛ January 1995 lɛ, nakai adafitswaa wolo lɛ nɔŋŋ bɔ amaniɛ akɛ Germany osɔfoi akuu lɛ bi koni akɛ Roma Katolikbii ni fi Nazibii awuiyeli sɛɛ lɛ “atɔmɔi babaoo” lɛ ake amɛ. Protestant sɔlemɔi babaoo hu kɛ amɛhe ewo wiemɔ ni amɛwieɔ kɛshiɔ amɛ diɛŋtsɛ amɛhe lɛ mli.

Mɛni Hewɔ?

Biblia lɛ woɔ wɔ hewalɛ koni wɔbi ni akɛ wɔhe eshai ake wɔ kɛ́ wɔtɔ̃, ni mɛi babaoo jieɔ sɔlemɔi lɛ ayi kɛ́ amɛwie amɛshi amɛ diɛŋtsɛ amɛhe. (Yakobo 5:16) Shi mɛni hewɔ ni sɔlemɔi lɛ feɔ enɛ? Te esa akɛ esa bɔ ni wɔnaa amɛ wɔhaa lɛ he eha tɛŋŋ?

[Shishigbɛ niŋmai]