Maŋtsɛyeli Jajelɔi Bɔ Amaniɛ

Obalahii kɛ Obalayei Jie Nyɔŋmɔ Yi yɛ Democratic Republic of Congo

YƐ AFII ohai abɔ ni eho nɛ lɛ, lalatsɛ lɛ kɛ miishɛɛ fɔ̃ obalahii kɛ obalayei anine koni amɛbafata he kɛjie naanɔ Maŋtsɛ lɛ yi: “Obalahii kɛ obalayei hu, onukpai kɛ gbekɛbii bluublu: . . . amɛjie Yehowa gbɛi lɛ yi; ejaakɛ ekome too egbɛi kwɔ gojoo.” (Lala 148:12, 13) Niiashikpamɔi ni nyiɛ sɛɛ ni jɛ Democratic Republic of Congo lɛ maa nɛkɛ hegbɛ ni nɔ ko kɛ lɛ yeee egbɔ nɛɛ nɔ mi.

• Gbɛgbalɔ krɛdɛɛ ko shiatsɛ ná Yehowa Odasefoi ajeŋba he miishɛɛ waa. No hewɔ lɛ, eŋmɛ Odasefoi lɛ agbɛ koni amɛkɛ ebiyoo, Fifi ni eye afii enumɔ lɛ akase Biblia lɛ. Be ni ena bɔ ni Fifi yaa hiɛ yɛ My Book of Bible Storiesa lɛ kasemɔ mli lɛ sɛɛ lɛ, etsɛ ŋmɛ lɛ gbɛ koni eya kpeei yɛ Maŋtsɛyeli Asa lɛ nɔ. Jɛmɛ ji he ni Fifi, ni ji gbekɛ yoo fioo lɛ kase Maŋtsɛyeli lalai kɛjɛ Odasefoi alala wolo lɛ mli yɛ. Esumɔɔ lala 4 ni hiɛ saneyitso akɛ “Nyɔŋmɔ Paradeiso he Shiwoo” lɛ waa diɛŋtsɛ.

Gbi ko lɛ, Fifi tsɛ to eyiŋ akɛ ekɛ lɛ baaya esɔlemɔ lɛ. Nɔ ni fee mɔ fɛɛ mɔ naakpɛɛ ji akɛ Fifi kpoo akɛ eeela sɔlemɔ lɛ lalai lɛ. Mɛni hewɔ? Ejaakɛ enu he akɛ lalai ni alaa yɛ etsɛ sɔlemɔ lɛ kɛ nɔ ni ekase kɛjɛ e-Biblia mli nikasemɔ mli lɛ kpãaa gbee. Yɛ no najiaŋ lɛ, ekɛ ekãa la Maŋtsɛyeli lala ni esumɔɔ lɛ.

Yɛ mɔdɛŋ sɔrɔtoi ni abɔ koni akɛtsake ejwɛŋmɔ ni ayeee omanye lɛ fɛɛ sɛɛ lɛ, sɔlemɔ lɛ mli hiɛnyiɛlɔi lɛ to amɛyiŋ akɛ amɛbaashwie Fifi ni eye afii enumɔ lɛ! Yɛ yiwalɛ nibii nɛɛ fɛɛ sɛɛ lɛ, etsɛ ŋmɛ etsui shi. Ená miishɛɛ akɛ Fifi ekɔ shidaamɔ ni yɔɔ shiŋŋ nakai yɛ nɔ ni eheɔ eyeɔ lɛ he. Fifi tsɛ kɛ enyɛ fɛɛ miisumɔ koni etsa nɔ ni ekɛ Yehowa Odasefoi abɔ.

• Beni gbekɛ nuu ko ni atsɛɔ lɛ Lukodi ni eye kɛjɛ afii nyɔŋma kɛ etɛ kɛyaa lɛ to eyiŋ akɛ ekɛ Yehowa Odasefoi aaakase Biblia lɛ, etsɛ te shi ewo enɛ waa diɛŋtsɛ. Be ko beni Lukodi saa ehe koni eya kpee yɛ Maŋtsɛyeli Asa lɛ nɔ lɛ, etsɛ kɛ klante wo ehe gbeyei. Yɛ be kroko mli lɛ, Lukodi tsɛ kɛ tso tswa lɛ, ni enɛ ha ená pilamɔ ni mli kwɔ yɛ esɛɛ. Yɛ bɔ ni yiwaa lɛ mli wa ha lɛ fɛɛ sɛɛ lɛ, Lukodi mɔ efaishi ni etswa akɛ ebaatsɔ Yehowa Odasefoi lɛ ateŋ mɔ kome lɛ mli kpɛŋŋ. Etee nɔ etee hiɛ ni ená baptisimɔ. Amrɔ nɛɛ eesɔmɔ akɛ daa gbɛgbalɔ.

Sona, Lukodi nyɛmi yoo fioo lɛ nya shidaamɔ ni enyɛmi nuu lɛ kɔ lɛ he waa diɛŋtsɛ akɛ lɛ hu eje shishi ekɛ Yehowa Odasefoi lɛ bɔi Biblia lɛ kasemɔ. Shi kɛ̃lɛ, bɔni afee ni etsĩ enaa ni ekakase nii lɛ, amɛtsɛ kɛ Sona tee skul ko yɛ akrowa kroko ni Odasefoi bɛ jɛmɛ lɛ mli. Shi kɛlɛ, Sona ha efee esu akɛ ebaawie nibii ni ekase lɛ he saji etsɔɔ mɛi krokomɛi. Nɔ ni jɛ mli ba ji akɛ enyɛ nyɛmi yoo bi hu baná he miishɛɛ.

Beni Odasefoi ni yɔɔ akrowa ni tsa nɔ lɛ nu Sona shiɛmɔ nitsumɔ lɛ he sane lɛ, amɛbasara lɛ ni amɛto gbɛjianɔ koni amɛkɛ lɛ afee shia Biblia mli nikasemɔ daa. Etee nɔ etee ehiɛ ni etsɛɛɛ ni ebafata enyɛmi nuu lɛ he akɛ Yehowa Odasefonyo ni ejɔɔ ehe nɔ, ni abaptisi lɛ. Kɛfata he lɛ, amrɔ nɛɛ enyɛ nyɛmi yoo lɛ ji shiɛlɔ ni abaptisiko lɛ, ni afeɔ woloŋ nikasemɔ yɛ akrowa nɛɛ mli.

Kwɛ bɔ ni eyɔɔ naakpɛɛ kɛ miishɛɛ kɛji gbekɛbii fata he kɛjie Yehowa gbɛi lɛ yi!

[Shishigbɛ niŋmai]