Ani Obaanyɛ Ohe Nyɔŋmɔ Ko ni Yɔɔ Diɛŋtsɛ Nɔ Oye?

“EHE ehiaaa ni ohe Nyɔŋmɔ nɔ oye dani otsɔ Kristofonyo . . . Wɔji jamɔ mli hiɛtsakemɔ fã ko bianɛ, shi yɛ afii ohai 21 lɛ mli lɛ sɔlemɔ lɛ baaya nɔ ni Nyɔŋmɔ ko bɛ mli yɛ jamɔ mli nifeemɔ lɛ shishinumɔ naa,” taakɛ Britania univɛsiti osɔfo nukpa ko tsɔɔ mli lɛ. No mli lɛ, eewie yɛ Sea of Faith gbɛjianɔtoo lɛ ni kɛ hoo lɛ Britania osɔfoi oha kɛ amɛgbɛi ewo shishi lɛ najiaŋ. Nɛkɛ “Kristofoi ni heɔ yeɔ akɛ Nyɔŋmɔ ko bɛ” nɛɛ ma nɔ mi akɛ gbɔmɛi ji mɛi ni to jamɔ shishi, ni taakɛ amɛ mli bii lɛ ateŋ mɔ kome kɛɛ lɛ, Nyɔŋmɔ lɛ “yiŋsusumɔ ko” kɛkɛ ni. Nyɔŋmɔ ko ni he yɔɔ naakpɛɛ kɛ amɛsusumɔi kpaaa gbee dɔŋŋ.

Yɛ afii 1960 lɛ amli lɛ, sabla ko ni ale waa ji, “Nyɔŋmɔ egbo.” Enɛ haa akaiɔ German jeŋ nilelɔ Friedrich Nietzsche ni hi shi yɛ afii ohai 19 lɛ mli lɛ jwɛŋmɔi ni eyɔɔ lɛ, ni eha obalahii kɛ obalayei pii hegbɛ ni amɛfeɔ nɔ ni amɛsumɔɔ, ni amɛkɛ amɛhe woɔ bɔlɛnamɔ kɛ tsofai fɔji kɛ nitsumɔ mli bɔ ni amɛsumɔɔ ní jeŋba ko etsiii amɛnaa. Shi ani heyeli ni tamɔ nakai ni fɔfɔi gbekɛbii, (gbekɛbii ni nyaa suɔmɔ kɛ toiŋjɔlɛ he) taakɛ abale amɛ lɛ, ná lɛ nyiɛ amɛhiɛ kɛtee shihilɛ ni miishɛɛ yɔɔ mli ni haa mɔ tsui nyɔɔ emli waa lɛ mli?

Yɛ nakai afii nyɔŋma lɛ nɔŋŋ mli lɛ, Anglican osɔfonukpa John A. T. Robinson fee ewolo ni kɛ naataamɔ ba, ni ji Honest to God lɛ. Enanemɛi osɔfoi lɛ pii wie amɛshi lɛ yɛ susumɔ ni eyɔɔ yɛ Nyɔŋmɔ he akɛ “eji niiashikpamɔ ni adesa yɔɔ lɛ he susumɔ ko kɛkɛ lɛ” hewɔ. Nyɔŋmɔjamɔ he nilelɔ Keith Ward bi akɛ: “Ani Nyɔŋmɔ mli hemɔkɛyeli ji hemɔkɛyeli folo ko ni ebe eho, ní amrɔ nɛɛ nilelɔi eshɛ amɛfɔ̃?” Beni lɛ diɛŋtsɛ ehaa hetoo lɛ, ekɛɛ: “Nɔ ko bɛ ni he hiaa yɛ jamɔ mli ŋmɛnɛ fe ni aaaku sɛɛ aná kusum nifeemɔ he nilee ni yɔɔ Nyɔŋmɔ he lɛ ekoŋŋ.”

Piŋmɔ kɛ Nyɔŋmɔ Ko ni Yɔɔ Diɛŋtsɛ

Eji nɔ ko ni waa kɛhaa gbɔmɛi pii ni heɔ Nyɔŋmɔ ko ni yɔɔ diɛŋtsɛ nɔ amɛyeɔ lɛ akɛ amɛkɛ amɛhemɔkɛyeli lɛ aaato osharai kɛ piŋmɔi ni amɛkɛkpeɔ lɛ ahe. Akɛ nɔkwɛmɔnɔ lɛ, yɛ March 1996 mli lɛ, atswa gbekɛbii bibii 16 kɛ amɛtsɔɔlɔ tu ni agbe amɛ yɛ Dunblane, Scotland. Yoo ko ni yiŋ efee lɛ yaa lɛ wie akɛ: “Minuuu nɔ ni Nyɔŋmɔ feɔ lɛ shishi kwraa.” Atsɔɔ bɔ ni oshara lɛ naa wa ha lɛ mli yɛ wolo bibioo ko nɔ kɛ fɔfɔi ni ashi ashwie gbekɛbii lɛ askul lɛ agbo lɛ naa. Wiemɔi ni yɔɔ nɔ ji, “MƐNI HEWƆ?” Dunblane Sɔlemɔtsu Agbo lɛ osɔfo lɛ ha hetoo akɛ: “Anyɛŋ atsɔɔ mli. Wɔnyɛŋ wɔha nɔ hewɔ ni esa akɛ enɛ aba lɛ hetoo.”

Be kroko yɛ nakai afi lɛ nɔŋŋ mli lɛ, agbe Church of England osɔfo obalanuu ni ale lɛ waa lɛ yɛ yiwalɛ gbɛ nɔ. Church Times adafitswaa wolo lɛ bɔ amaniɛ akɛ, asafo ko ni ejijaa lɛ nu ni osɔfo ni yeɔ ebua osɔfonukpa ni yɔɔ Liverpool lɛ miiwie “Nyɔŋmɔ shinaa ni eyashi waa kɛ sanebimɔ akɛ mɛni hewɔ? mɛni hewɔ?” lɛ he. Nɛkɛ osɔfo nɛɛ hu bɛ miishɛjemɔ wiemɔi ni jɛ Nyɔŋmɔ ko ni yɔɔ diɛŋtsɛ ŋɔɔ.

Belɛ mɛni wɔbaahe wɔye? Jwɛŋmɔ yɛ mli akɛ aaahe Nyɔŋmɔ ko ni yɔɔ diɛŋtsɛ lɛ nɔ aye. No titri haa anyɛɔ ahaa sanebimɔi ni haoɔ mɔ, ni atee lɛ shi yɛ yiteŋgbɛ lɛ ahetoo. Wɔmiifɔ̃ bo nine koni osusu odaseyeli ni akɛha ni yɔɔ saji ni nyiɛ sɛɛ lɛ amli lɛ he.

[Mfoniri ni yɔɔ baafa 3]

Wolo bibioo lɛ bi akɛ “Mɛni hewɔ?”

[He ni Sane lɛ Jɛ]

NEWSTEAM No. 278468/Sipa Press