Bei ni Mli Wa Kɛha Mɛi ni Egbɔlɔ Lɛ

MAMA ONIYAN ni eye afii 68 lɛ hi shi yɛ maŋtiase ko ni ale waa ni yɔɔ Afrika Anaigbɛ lɛ mli. Beni eji obalayoo fioo lɛ, esusuɔ be mli ni ebaagbɔ ni ebaaná nitsumɔ mli hejɔɔmɔ kpakpa, ni ebii kɛ enabii baabɔle ehe kɛkpe lɛ ahe. Shi yɛ no najiaŋ lɛ, eye egbii lɛ kɛhɔ̃ɔ aiswɔta yɛ hulu lɛ nɔ. Shika fioo ni enáa lɛ yeɔ ebua lɛ ni ehiɔ shi. Ebihii enyɔ lɛ eyahi maŋ kroko mli yɛ he ko shɔŋŋ. Amɛmaje lɛ shika etsɛ waa.

Be ko ni eho lɛ, abuɔ mɛi ni egbɔlɔ ni yɔɔ Afrika lɛ waa. Abuɔ amɛ yɛ niiashikpamɔ kɛ nilee ni amɛyɔɔ, ní ŋaalee kɛ sɛɛyoomɔ ní bei pii lɛ amɛkɛhaa lɛ fata he lɛ hewɔ. Amɛyeɔ amɛbuaa koni atsɔse nabii. Obalahii kɛ obalayei biɔ amɛ ŋaawoo kɛ amɛ nɔkpɛlɛmɔ. Gbɔmɛi lɛ hiɔ shi yɛ Biblia mli ŋaawoo lɛ kɛ gbeekpamɔ naa: “Tee shi yɛ yiteŋwajiatsɛ hiɛ, ni owo nuumo [loo yoomo] hiɛ nyam.”—3 Mose 19:32.

Bei etsake. Ohia, nibii ajara ni ewa, nitsumɔ ni bɛ, kɛ mɛi babaoo ni shiɔ kɛyaa maŋtiasei lɛ amli lɛ eshi mɛi ni egbɔlɔ lɛ koni amɛkwɛ amɛhe. Kenya HelpAge nɔkwɛlɔ nukpa, Camillus Were kɛɛ: “Nɔ ni afɔɔ feemɔ, ni ji sɛɛfimɔ kɛ kwɛmɔ ni akɛhaa mɛi ni egbɔlɔ lɛ eba shi kwraa.”

Yɛ anɔkwale mli lɛ, wekui amligbalamɔ lɛ jeee nɔ ko ni yɔɔ sɔrɔto yɛ Afrika maji lɛ amli. Beni Guardian Weekly adafitswaa wolo lɛ wieɔ kɛkɔɔ Japan he lɛ, ebɔ amaniɛ akɛ: “Tsutsu lɛ, Japanbii agbɛjianɔtoo ni jara wa ni Confucianism shi amɛha ákɛ gboshinii lɛ damɔ wekukpaa hetuu-kɛ-hamɔ nɔ̃, shi akrowai ni ashiɔ mli kɛyaa maji wuji amli lɛ hako eye omanye, kɛ agbɛnɛ wekui amligbalamɔ lɛ hu: ŋmɛnɛ, Japanbii oha mlijaa 85 gboiɔ yɛ helatsamɔhei loo yɛ hei ni akwɛɔ mɛi ni egbɔlɔ yɛ lɛ amli.”

Bɔ fɛɛ bɔ ni shihilɛ lɛ ji ha fɛɛ sɛɛ lɛ, mɛi ni sumɔɔ akɛ amɛsa Nyɔŋmɔ hiɛ yɛ anɔkwale mli lɛ kɛ woo haa amɛfɔlɔi. Amɛkɛ Biblia ŋaawoo lɛ tsuɔ nii: “Wo otsɛ kɛ onyɛ, . . . koni ahi ahao, ni otsɛ yɛ shikpɔŋ lɛ nɔ.” (Efesobii 6:2, 3) Eyɛ mli akɛ woo kɛ kwɛmɔ ni akɛaaha fɔlɔi ni egbɔlɔ lɛ bɛ mlɛo daa gbi moŋ, shi ebaanyɛ ekɛ nyɔmɔwoi babaoo aba.