‘Amɛhiɔ Shi yɛ Amɛ Jamɔŋ Tsɔsemɔ Naa’

YOO ko ni jɛ Miami, Florida, U.S.A., kɛ wolo nɛɛ maje maŋ lɛ mli adafitswaa wolo ko: “Ashá mibinuu shika kotoku Kɛjɛ etade kotoku mli yɛ Dec. 10, yɛ he ni ahɔ̃ɔ atadei memeji yɛ. Nibii ni yɔɔ mli ji etsɔne kudɔmɔ he wolo kɛ Social Security wolo, kɛ nibii krokomɛi kɛ agbɛnɛ shika ni shɛɔ dɔlai 260.

“Beni ebɔ nɔ ni elaaje lɛ he amaniɛ etsɔɔ enitsumɔ mli onukpa lɛ sɛɛ lɛ, eba shia. Kɛmiiya gbɛkɛnaashi fioo ni obalayoo ko ni wieɔ Spanish tswa lɛ tɛlifon kɛtsɔ [tɛlifon] nitsulɔ ko ni tsɔɔ ewiemɔ lɛ shishi eha lɛ lɛ nɔ, ni ekɛɛ lɛ akɛ, ena eshika kotoku lɛ.

“Yoo lɛ kɛ eshia adrɛs ha lɛ. . . . Ni ekɛ eshika kotoku lɛ ha lɛ, nɔ fɛɛ nɔ yɛ mli, ni dɔlai 260 lɛ fata he.

“Ena ni julɔ lɛ miiju eshika kotoku lɛ ni ebolɔ. Julɔ lɛ ŋmɛɛ shika kotoku lɛ he ni ejo foi. No mli lɛ enaaa mibinuu lɛ dɔŋŋ, no hewɔ lɛ, ekɛ shika kotoku lɛ tee shia ni etswa lɛ tɛlifon.

“Nakai obalayoo lɛ kɛ eweku lɛ ji Yehowa Odasefoi. Eyɛ faŋŋ akɛ amɛhiɔ shi yɛ amɛ jamɔ mli tsɔsemɔ lɛ naa.”

Yehowa Odasefoi ejieee anɔkwayeli kpo koni gbɔmɛi ajie amɛyi. (Efesobii 6:7) Shi moŋ, amɛmiisumɔ waa ni amɛkɛ yijiemɔ abaha amɛ ŋwɛi Tsɛ, Yehowa. (1 Korintobii 10:31) Suɔmɔ ni amɛyɔɔ kɛha Nyɔŋmɔ kɛ naanyo gbɔmɔ tsirɛɔ amɛ koni amɛjaje “sanekpakpa” ni kɔɔ Nyɔŋmɔ Maŋtsɛyeli lɛ he lɛ. (Mateo 24:14) Nyɔŋmɔ ewo shi akɛ ebaatsɔ Maŋtsɛyeli lɛ nɔ ni etsake shikpɔŋ lɛ efee lɛ paradeiso ni yɔɔ fɛo. Kɛkɛ lɛ shikpɔŋ lɛ efeŋ he ni yɔɔ fɛo ni anaa diɛŋtsɛ kɛkɛ, shi he ni jeŋba ni nɔ kwɔ yɔɔ, he ni anɔkwayeli baahi shi kɛya naanɔ.—Hebribii 13:18; 2 Petro 3:13.