“Anɔkwayeli Bibioo”

Yehowa Odasefonyo ko ni yɔɔ South Africa ni atsɛɔ lɛ Danielle lɛ na baagi ko ni mɔ ko eshi yɛ kɔfi shɔp ko mli. Shika kɛ credit kaadii yɛ baagi lɛ mli. Danielle bɔ mɔdɛŋ akɛ ekɛ baagi lɛ baaku sɛɛ kɛyahã nɔtsɛ lɛ, no hewɔ lɛ, etao mɔ lɛ adrɛs loo fon nɔmba, shi nuu ko gbɛ́i ena. Ebɔ mɔdɛŋ akɛ ebaatsɔ mɔ lɛ bank lɛ nɔ enine ashɛ enɔ shi no hu eyayeee omanye. Danielle nijiaŋ ejeee wui, etswa fon nɔmba ni yɔɔ receipt ni dokita ko kɛhã lɛ nɔ ni ena yɛ baagi lɛ mli lɛ. Yoo ni hereɔ gbɔi ni wó fon lɛ nɔ lɛ kɛɛ Danielle akɛ ekɛ enɔmba lɛ baahã nuu lɛ.

Be ni atswa nuu lɛ kɛjɛ edɔkita lɛ ɔfis lɛ ni akɛɛ lɛ akɛ Danielle ena ebaagi lɛ ni eetao lɛ ni ekɛhã lɛ lɛ, enaa kpɛ ehe. Be ni etee koni eyahe ebaagi lɛ, eyana Danielle kɛ epapa ni amɛŋa lɛ. Amɛŋɔ hegbɛ lɛ kɛtsɔɔ lɛ nɔ hewɔ ni amɛtao lɛ aahu lɛ. Amɛtsɔɔ lɛ akɛ, akɛ Yehowa Odasefoi lɛ amɛbɔɔ mɔdɛŋ akɛ amɛbaahi shi yɛ Biblia mli shishitoo mlai anaa. No hewɔ ni be fɛɛ be lɛ amɛsumɔɔ akɛ amɛye anɔkwa lɛ.​—Hebribii 13:18.

Ŋmɛlɛtswaa fioo ko sɛɛ lɛ, nuu lɛ sɛndi Danielle kɛ epapa mɛsej kɛda amɛ shi ekoŋŋ yɛ baagi lɛ kɛ shika ni amɛkɛbahã lɛ lɛ hewɔ. Eŋma akɛ: “Mihiɛ esɔ mɔdɛŋ ni nyɛbɔ kɛtao misɛɛ gbɛ lɛ waa. Mimii shɛ mihe waa be ni mina bo kɛ oweku lɛ, ni mihiɛ kpaŋ nɔ ni nyɛjɛ nyɛtsui mli nyɛfee nɛɛ kɛ naanyobɔɔ su ni nyɛjie kpo nyɛtsɔɔ mi lɛ nɔ kɔkɔɔkɔ. Miitao mahã nyɛle akɛ mihiɛ esɔ nɔ ni nyɛfee nyɛhã mi lɛ waa, no hewɔ lɛ, miisumɔ ni mikɛ shika nɛɛ afĩ nyɛ nitsumɔ lɛ sɛɛ. Mile akɛ nyɛkɛ nibii babaoo shãa afɔle kɛsɔmɔɔ Nyɔŋmɔ. Anɔkwa ni Danielle ye nɛɛ tsɔɔ akɛ nyɛhiɛɔ shi yɛ nibii ni nyɛtsɔɔ mɛi lɛ anaa. No hewɔ lɛ, nyɛyiwaladɔŋŋ ekoŋŋ ni miibi ni Nyɔŋmɔ ajɔɔ nyɛshiɛmɔ lɛ nɔ.”

Nyɔji fioo komɛi asɛɛ lɛ, Danielle papa kɛ nuu lɛ kpe ekoŋŋ. Nuu lɛ kɛɛ lɛ akɛ, nyɛsɛɛ nɛɛ be ni etee nihemɔ lɛ, lɛ hu ena pɔɔsu ko kã shikpɔŋ. Be ni ena nɔtsɛ lɛ ni ekɛhã lɛ lɛ, egba lɛ nɔ ni tsirɛ lɛ ni efee nakai lɛ. Nyɛsɛɛ nɛɛ lɛ, lɛ hu ebaaji laaje ni mɔ ko kɛbahã lɛ. Ewie akɛ: “Kɛ́ ojie mlihilɛ kpo otsɔɔ mɔ ko ni oye lɛ anɔkwa yɛ nɔ ko bibioo mli lɛ, wɔsɛɛ lɛ, lɛ hu ebaafee nakai nɔŋŋ ehã mɛi krokomɛi, ni mɛi fɛɛ ni yɔɔ akutso lɛ mli lɛ baaná shihilɛ kpakpa.”