Mɛni Hewɔ Bei Nɛɛ Ii Bei Fɔji Nɛkɛ Lɛ?
KƐJI ota shi ni ookane adafitswaa wolo loo ookwɛ TV nɔ adafitswaa saji loo oobo redio adafitswaa saji atoi lɛ, okpaa gbɛ akɛ obaanu adafitswaa fɔŋ ko, aloo jeee nakai? Ekolɛ efeŋ bo naakpɛɛ akɛ ooole akɛ ta ko ni awuɔ lɛ miiya nɔ lolo, ákɛ yiwalɛ kɛ awuiyeli egbɛ eshwa babaoo lolo, aloo ákɛ hɔmɔ miigbala shikpɔŋ ko ni kpaako eyaa hiɛ lɛ nɔ bii ahewalɛ fɛɛ.
Kɛji he ni oyɔɔ lɛ kɛ hei ni nibii nɛɛ yaa nɔ yɛ lɛ jɛkɛ fioo lɛ, no lɛ ekolɛ nɛkɛ amaniɛbɔi nɛɛ eyaaa nɔ ehaooo bo babaoo be fɛɛ be. Ejaakɛ, namɔ baanyɛ anu he aha nɛkɛ gbɔmɛi babaoo ni naa amanehulu nɛɛ fɛɛ? Ni kɛ́ nakai po lɛ, ewa waa akɛ wɔɔya nɔ wɔhi shi akɛ mɛi ni nɔ ko tsirɛɛɛ amɛ, kɛji wɔkɛ bɔ ni amanehului saa aŋkroaŋkroi ahe lɛ miikpe hiɛ-kɛ-hiɛ. Yɛ wiemɔ kroko mli lɛ, yɛ be mli ni eji nɔ kome akɛ aaakane ta ko ni awuɔ lɛ he saji ni asusu mɛi abɔ ni egboi yɛ mli lɛ he lɛ, eji nɔ kroko hu kwraa akɛ aaakane gbekɛ fioo ko ni atsɛɔ lɛ Adnan, ni ji Bosnia gbekɛ nuu ko ni eye afii nɛɛhu, ni enyɛ gbo beni okpɛlɛm ko bakpata amɛshia lɛ hiɛ lɛ he saji. No sɛɛ nyɔji fioo ko lɛ, atswa Adnan tsɛ tu ni egbo beni amɛnyiɛ kutuu kɛyaa yɛ gbɛjegbɛ ko nɔ lɛ. Otsii fioo komɛi asɛɛ lɛ, eekwɛ ni enyɛmi yoo hu ho lá aahu kɛyashi be mli ni egbo, yɛ okpɛlɛm ni atswa ni ebagbee amɛskul yale lɛ mli, ni esa ehe lɛ hewɔ. Datrɛfoi ni fee Adnan tsofa yɛ jwɛŋmɔŋ haomɔ hewɔ lɛ na akɛ gbekɛ nuu lɛ henumɔ egbo, ebɛ henumɔ ko kwraa dɔŋŋ—kɛ saji amli ni ataoɔ ale po. Gbeyeishemɔi kɛ nibii ni etsɔ mli kɛho lɛ akaimɔ fiteɔ ehiɛnɔkamɔ yɛ jetsɛremɔ beaŋ; lamɔi ni yɔɔ gbeyei tsĩɛɔ lɛ ni efiteɔ ewɔ, ni ehaaa ena hejɔɔmɔ kpakpa. Adnan jeee mɔ ko ni aawie ehe saji kɛkɛ. Eji gbekɛ ko ni miina amanehulu; ehe saji tsirɛɔ wɔ ni wɔnuɔ he wɔhaa lɛ waa diɛŋtsɛ.
Nakai nɔŋŋ eji yɛ je lɛŋ shihilɛi fɔji krokomɛi hu ahe. Eji nɔ kome akɛ aaakane hɔmɔ he saji; eji nɔ kroko kwraa akɛ aaana gbekɛ yoo fioo ni eye afii enumɔ, ní emusu eda agbo yɛ ehiɛ ni eniji kɛ enaji efee legelege tamɔ bɔlɔwui, ní eyɛ wala mli ni hɔmɔ miiye lɛ waa. Eji nɔ kome akɛ aaakane awuiyeli he saji; eji nɔ kroko hu kwraa akɛ aaanu akɛ ayayi yoo okulafo ko ni eda yɛ afii amli lɛ waa, aju lɛ, ni ato lɛ kaabonaa. Eji nɔ kome akɛ aaakane bɔ ni weku shihilɛ fiteɔ lɛ he saji; eji nɔ kroko hu akɛ aaaná ale akɛ yoofɔyoo ko eje gbɛ ewa lɛ diɛŋtsɛ ebi yi kɛ hɔmɔ, ni ekɛ yiwalɛ efee lɛ niseniianii.
Eyɛ dɔlɛ waa akɛ aaakane nibii ni tamɔ enɛɛmɛi. Shi kwɛ bɔ ni ewa po fe nakai kɛji nɛkɛ jeŋ muu fɛɛ haomɔi nɛɛ eko sa wɔhe tɛ̃ɛ! Kɛ efɔŋ ko ba bo diɛŋtsɛ onɔ lɛ, shihilɛ ni yaa nɔ yɛ je lɛŋ fɛɛ, ni awieɔ he yɛ je lɛŋ adafitswaa saji amli lɛ baanyɛ aye onɔ kunim kwraa. Eyɛ gbeyei akɛ aaakpɛlɛ anɔkwale ni eji lɛ nɔ akɛ amanehului ni awuiyeli, ta, hɔmɔ, kɛ helai kɛbaa lɛ miiya nɔ eefa babaoo bɔ ni anako eko ni tamɔ nakai dã yɛ adesai ayinɔsane mli. Nibii ni jɛɔ bɔ ni atsuɔ shihilɛi diɛŋtsɛ ni yaa nɔ yɛ afii 20 nɛɛ mli lɛ ahe nii ahaa lɛ mli kɛbaa lɛ mli baanyɛ awa waa diɛŋtsɛ—yiŋfutumɔ, gbeyeishemɔ, kɛ jwɛŋmɔŋ haomɔ efa babaoo.
Gbɔmɛi ni yɔɔ jamɔi pii amli miitao hetooi kɛha sanebimɔi ni haoɔ mɔ, tamɔ akɛ, Mɛni hewɔ nibii efite kwraa nɛkɛ? Mɛni baaba adesai anɔ wɔsɛɛ?
Dɔlɛ sane ji akɛ, bei pii lɛ, jamɔi ni yɔɔ ŋmɛnɛ lɛ kɛ hetooi ni haa mɔ tsui nyɔɔ emli haaa. Beni ona sanebimɔ ni yɔɔ wolo tɛtrɛɛ nɛɛ hiɛgbɛ lɛ klɛŋklɛŋ kwraa lɛ, ekolɛ osusu he kɛ yiŋkɔshikɔshi feemɔ—ni eji nifeemɔ ni anuɔ shishi. Bei pii lɛ, jamɔ kui ni yɔɔ keketee lɛ bɔɔ mɔdɛŋ akɛ amɛkɛ shishitsɔɔmɔi komɛi ni bɛ Biblia lɛ mli—gbi kɛ ŋmɛlɛtswaa pɔtɛɛ ni je nɛɛ hiɛkpatamɔ aaaba lɛ aaaha. (Kwɛmɔ Mateo 24:36.) Mɛi ni ŋmaa wolo tɛtrɛɛ nɛɛ sumɔɔ ni amɛha Biblia lɛ diɛŋtsɛ atsɔɔ emli saji amli. Ekolɛ eeefee bo naakpɛɛ akɛ ooole akɛ bɔ ni Biblia lɛ wieɔ naagbee gbii lɛ ahe ehaa lɛ ji anɔkwa saji, ni nilee yɛ mli. Ni Biblia lɛ feɔ babaoo fe nɔ hewɔ ni bei nɛɛ ji bei fɔji lɛ mlitsɔɔmɔ ni ekɛhaa kɛkɛ. Ehaa mɔ hiɛnɔkamɔ hu kɛhaa wɔsɛɛ, hiɛnɔkamɔ ni shɛjeɔ mɔ mii diɛŋtsɛ. Wɔmiifɔ̃ bo nine ni okane saji ni nyiɛ sɛɛ lɛ koni ona bɔ ni enɛ baa lɛ ehaa.
[He ni Mfoniri ni yɔɔ baafa 3 lɛ Jɛ]
Jobard/Sipa Press