Mumɔŋ Heyeli ni Akɛbahaa Mɛi ni Awo Amɛ Tsuŋ

“WƆMƐ nyɛ aahu.” “Milà yɛ nyɛbaa lɛ he yɛ gbɛkɛi fioo ni eho nɛɛ amli.” “Wɔmiida bo shi akɛ ohãa mɔ ko basaraa wɔ daa.” “Wɔmiisumɔ ni wɔjie hiɛsɔɔ ni wɔyɔɔ lɛ kpo wɔtsɔɔ yɛ jɔɔmɔ fɛɛ jɔɔmɔ ni esaaa wɔ, ni wɔnáa kɛjɛɔ Yehowa kɛ egbɛjianɔtoo lɛ dɛŋ lɛ he kɛ mumɔŋ niyenii ni ekɛha wɔ yɛ be ni sa mli hewɔ lɛ he.”

Mɛni ji yiŋtoo ni yɔɔ hiɛsɔɔ wiemɔi nɛɛ asɛɛ? Wiemɔi nɛɛ jɛ mɛi ni awo amɛ tsuŋ yɛ tsuŋwoohei sɔrɔtoi ni yɔɔ Mexico lɛ ekomɛi amli lɛ aŋɔɔ. Amɛhiɛ esɔ jwɛŋmɔ ni Yehowa Odasefoi gbalaa kɛbaa amɛnɔ, ni kɛ mumɔŋ heyeli ebaha amɛ yɛ tsuŋwoohe po lɛ. Tsuŋwoohei 42 yɛ Mexico, ni Yehowa Odasefoi yatsuɔ mɛi ni yɔɔ mli lɛ amumɔŋ hiamɔ nii ahe nii. Atsɛɔ nɛkɛ hei nɛɛ akɛ Centro Readaptación Social (Adesai Ashihilɛ Saamɔ Nitsumɔ Hé). Afeɔ Kristofoi akpeei ni woɔ yibii babaoo lɛ po daa yɛ nɛkɛ tsuŋwoohei nɛɛ ekomɛi amli. Akɛ nɔkwɛmɔ nɔ lɛ, beni akane amɛ nyɛsɛɛ nɛɛ lɛ, gbɔmɛi aaafee 380 baa kpeei lɛ yɛ nɛkɛ hei nɛɛ. Yɛ nakai be lɛ mli lɛ, kɛ aja mli lɛ, aafee shia Biblia mli nikasemɔi 350. Gbɔmɛi 37 ahe esa akɛ amɛaaje shiɛmɔ shishi, ni 32 ejɔɔ amɛ wala nɔ amɛha Yehowa, ni amɛkɛ nu mli baptisimɔ efee enɛ he okadi.

Bɔ ni Atsuɔ Nitsumɔ lɛ Ahaa

Te Yehowa Odasefoi feɔ tɛŋŋ amɛtsuɔ amɛ shiɛmɔ nitsumɔ lɛ yɛ nɛkɛ hei nɛɛ? Klɛŋklɛŋ lɛ, amɛyaa nitsulɔi ni kwɛɔ nɔ lɛ aŋɔɔ ni amɛbiɔ ni aŋma wolo ni haa amɛ hegbɛ ni amɛbote tsuŋwoohe lɛ, ni amɛtsɔɔ yiŋtoi ahewɔ ni amɛbaa amɛbasara jɛmɛ lɛ—ni amɛtsɔɔ gbokɛlɛfoi lɛ bɔ ni amɛaafee amɛha amɛ shihilɛ ahi kɛya hiɛ, koni amɛsɔmɔ Nyɔŋmɔ yɛ gbɛ ni baasa ehiɛ lɛ nɔ.

Yɛ shihilɛi sɔrɔtoi lɛ eko fɛɛ eko mli lɛ, nitsumɔ mli onukpai lɛ haa amɛ hegbɛ. Nɛkɛ onukpai nɛɛ ahiɛ sɔɔ Biblia mli tsɔsemɔ ni akɛhaa mɛi ni awo amɛ tsuŋ lɛ. Tsuŋwoohe lɛ onukpai lɛ eyɔse akɛ Yehowa Odasefoi kɛ hebuu he mlai ni ato yɛ nɛkɛ hei nɛɛ tsuɔ nii. Amɛŋmɛ nɛkɛ shiɛlɔi ni basaraa amɛ nɛɛ agbɛ koni amɛkɛ ɔfis sɔrɔtoi, niyeli tsũi kɛ shwapoi lɛ atsu nii ni amɛkɛfee amɛkpeei lɛ. Yɛ he kome ko lɛ, aŋmɛ Odasefoi lɛ agbɛ po koni amɛma Maŋtsɛyeli Asa bibioo ko, taakɛ atsɔɔ yɛ niiashikpamɔ ni nyiɛ sɛɛ ni nɔkwɛlɔ gbɛfalɔ ko ni yɔɔ Mexico wuoyi-bokagbɛ gba lɛ mli lɛ.

“Yɛ 1991 mra mli ni wɔbɔ̃i tsuŋwoohe ni yɔɔ Tehuantepec yɛ Oaxaca, he ni wɔna ni mumɔŋ hɔmɔ yɔɔ jɛmɛ waa lɛ saramɔ. Etsɛɛɛ ni wɔbɔi Biblia mli nikasemɔi 27 afeemɔ. Yɛ miishɛɛ ni gbokɛlɛfoi lɛ yɔɔ hewɔ lɛ, ato asafoŋ kpeei enumɔ he gbɛjianɔ. Gbokɛlɛfoi lɛ ateŋ mɔ kome ni jie suɔmɔ babaoo ni eyɔɔ kɛha Yehowa lɛ kpo lɛ kpɛ eyiŋ akɛ ebaama Maŋtsɛyeli Asa bibioo ko yɛ he ni tsuŋwoohe lɛ yɔɔ lɛ, bɔni afee ni ana he ko ni akɛbaafee kpeei yɛ. Etee tsuŋwoohe nɔkwɛlɔ lɛ ŋɔɔ ni eyabi gbɛ, ni nitsumɔ mli onukpai lɛ kɛ lɛ kpã gbee diɛŋtsɛ. Yɛ December 1992 shishijee mli lɛ, gbokɛlɛfoi ekpaa ahe basa akɛ sanekpakpa shiɛlɔi. Yɛ nɔyaa ni amɛjie lɛ kpo lɛ hewɔ lɛ, ato gbɛjianɔ koni afee Kaimɔ lɛ yɛ tsuŋwoohe lɛ mli. Wɔbi gbokɛlɛfoi anɔkwɛlɔ lɛ gbɛ koni wɔkɛ okadi nibii—aboloo kɛ wein—lɛ aba, beni akɛ ŋmɛlɛtswai ejwɛ esusu saji ahe lɛ sɛɛ lɛ, aŋmɛ wɔ gbɛ.

“Eba mli nakai yɛ April 3, 1993 (gbii etɛ dani Kaimɔ lɛ yeli shɛ lɛ) akɛ, ajie gbokɛlɛfoi lɛ ekomɛi kɛjɛ tsuŋwoo lɛ mli. Beni mɔ kome ni ji shiɛlɔ lɛ nine shɛ ewoji ni tsɔɔ akɛ ajie lɛ kɛjɛ tsuŋwoo lɛ mli lɛ nɔ lɛ, ebi koni ekɛ tsuŋwoohe nɔkwɛlɔ lɛ awie koni aŋmɛ lɛ gbɛ ni ehi shi kɛyashi beni aaagbe Kaimɔ lɛ yeli naa. Enɛ ha nɔkwɛlɔ lɛ naa kpɛ ehe diɛŋtsɛ, akɛni enɛ jeee nɔ ko ni afɔɔ bimɔ hewɔ, shi yɛ miishɛɛ kpele ni gbokɛlɛfonyo lɛ yɔɔ akɛ eeeya Kaimɔ lɛ yɛ tsuŋwoohe lɛ hewɔ lɛ, ekpɛlɛ nibimɔ lɛ nɔ. Gbɔmɛi 53 ni miishɛɛ yaafonui jɛ amɛ hiŋmɛiiaŋ yɛ nifeemɔ lɛ naagbee lɛ ba Kaimɔ lɛ yeli shishi. Wɔkpɛlɛ nɔ akɛ wɔɔtsɛ kuu nɛɛ akɛ ‘Heyeli Cereso,’ ejaakɛ amɛye amɛhe yɛ mumɔŋ shishinumɔ naa.”

Hiɛ sɔɔ Yehowa Odasefoi anitsumɔ lɛ waa yɛ nɛkɛ hei nɛɛ. Yɛ nɛkɛ tsuŋwoohei nɛɛ ekome mli lɛ, mɔ ni kwɛɔ jɛmɛ lɛ jieɔ yi yɛ faŋŋ mli akɛ Yehowa Odasefoi akpeei ni ayaa lɛ ji “helatsamɔ” kɛha mɛi ni yɔɔ tsuŋ lɛ atsakemɔ yɛ oyaiyeli mli.

Gbɔmɛi Atsakemɔ He Gbɛjianɔtoo ni Yeɔ Omanye

Yehowa Odasefoi anitsumɔ lɛ eha anyɛ atsake gbokɛlɛfoi babaoo. Yɛ be mli ni eji anɔkwale akɛ mɛi ni ehi tsuŋwoo mli lɛ yaboteɔ awuiyeli shihilɛ mli ekoŋŋ beni ajie amɛ kɛjɛ tsuŋwoo lɛ mli nɔŋŋ lɛ, mɛi ni ekpɛlɛ Nyɔŋmɔ Wiemɔ lɛ mli shɛɛ sane lɛ nɔ lɛlɛŋ lɛ etsake kwraa. Amɛtsakemɔ lɛ haa wɔkaiɔ bɔfo Paulo wiemɔi nɛɛ: “Ajwamaŋbɔlɔi . . . loo julɔi loo hiɛjoolɔi loo dãatɔlɔi loo mɛi ajɛlɔi loo amimyelɔi anine shɛŋ Nyɔŋmɔ maŋtsɛyeli lɛ nɔ kwraa. Ni nɛkɛ nyɛteŋ mɛi komɛi yɔɔ sa; shi agbɛnɛ aju nyɛhe, ni asaŋ atsuu nyɛhe, ni abu nyɛ bem hu yɛ Nuntsɔ Yesu gbɛi kɛ wɔ-Nyɔŋmɔ lɛ Mumɔ mli.”—1 Korintobii 6:9-11.

Amɛsu kɛ baŋ tsakemɔ ni ekaaa lɛ jeɔ kpo kɛ amɛjie amɛhenumɔi akpo. Miguel, ni yɔɔ Campeche tsuŋwoohe ni yɔɔ Campeche Maŋtiase lɛ mli lɛ tsɔɔ mli nɛkɛ: “Ŋmɛnɛ lɛ, manyɛ mikɛ mlifilimɔ akɛɛ akɛ mibuɔ mihe akɛ mifata tooi krokomɛi ni yɔɔ hiɛnɔkamɔ ni aŋma yɛ 2 Petro 3:13 kɛ Mateo 5:5 lɛ ahe.” José, ni yɔɔ tsuŋwoohe ni yɔɔ Koben, Campeche lɛ wie akɛ: “Eyɛ mli akɛ gbokɛlɛfonyo ji mi, ni ekolɛ awui ni miye lɛ mli wa waa moŋ, shi minuɔ shishi akɛ Yehowa mli hi waa ni eboɔ misɔlemɔi kɛ faikpamɔi atoi. Ebaanyɛ ekɛ mitɔ̃mɔi ake mi ní eha mi hegbɛ ni mikɛ mihe awo Nyɔŋmɔ Maŋtsɛyeli lɛ sanekpakpa lɛ shiɛmɔ mli yɛ miwala be ni eshwɛ lɛ mli. Wɔmiida wɔ onukpai lɛ ashi yɛ be ni amɛŋɔ kɛbasara wɔ yɛ tsuŋwoohe lɛ, koni Nyɔŋmɔ Maŋtsɛyeli shiwoi lɛ ahe aba sɛɛnamɔ aha wɔ lɛ. Mɛɛ jɔɔmɔi ni ŋɔɔ nɛ! Ani manyɛ makɛɛ akɛ gbokɛlɛfonyo ji mi? Dabi, Yehowa eha mi mumɔŋ heyeli ni mitaoɔ lɛ.”

Mɛni haa gbɔmɔgbelɔi, mɛi ni toɔ yei kabonaa, mɛi ni shãa mɛi anibii, julɔi, kɛ mɛi krokomɛi tsakeɔ kɛbatsɔmɔɔ Kristofoi ni jeŋba hi jogbaŋŋ lɛ? Taakɛ nɛkɛ hii nɛɛ nɔŋŋ tsɔɔ lɛ, enɛ jɛ Nyɔŋmɔ Wiemɔ lɛ tsakemɔ hewalɛ lɛ kɛ mɛi ni etu amɛhe amɛha lɛlɛŋ ni akɛ amɛ bɔɔ lɛ. Tiburcio, ni awo lɛ tsuŋ yɛ Mazatlán, ni yɔɔ Sinaloa tsuŋwoohe lɛ sane lɛ tsɔɔ omanye ni gbɔmɛi atsakemɔ nitsumɔ gbɛjianɔtoo nɛɛ eye. Éhi tsuŋwoohe aahu yɛ Concordia, Sinaloa, he ni eyɔɔ naagba yɛ, yɛ emli ni woɔ la waa fe nine lɛ hewɔ. Eŋa ji Yehowa Odasefoi lɛ ateŋ mɔ kome, ni no mli lɛ efeɔ lɛ niseniianii, kɛ eba koni ebasara lɛ yɛ tsuŋwoohe lɛ po. Yoo lɛ to etsui shi ni ebasaraa lɛ daa, no hewɔ lɛ ebi lɛ koni ekɛ Obaanyɛ Ohi Shi Kɛya Naanɔ yɛ Paradeiso yɛ Shikpɔŋ Nɔ wolo lɛ eko abaha lɛ, ni lɛ diɛŋtsɛ ebɔi kasemɔ.a Kɛkɛ ni ebi ni mɔ ko aba tsuŋwoohe lɛ ni ekɛ lɛ abakase nii. Ebɔi hiɛyaa yɛ mumɔŋ, ni wekukpaa ni kã ekɛ mɛi krokomɛi ateŋ lɛ bahi jogbaŋŋ. Ajie lɛ kɛtee tsuŋwoohe ni yɔɔ Mazatlán, he ni kuu ko yɔɔ ni amɛkaseɔ Biblia lɛ, ni amrɔ nɛɛ eji shiɛlɔ. Ewie akɛ: “Amrɔ nɛɛ, ni mifata miŋa kɛ mibii kɛ minanemɛi ni mikɛ amɛ yɔɔ tsuŋwoohe lɛ ahe nɛɛ, midaa shi akɛ minyɛɔ miboɔ Biblia mli anɔkwalei atoi yɛ biɛ nɛɛ, kɛ hiɛnɔkamɔ akɛ, abaajie mi yɛ tsuŋwoohe lɛ, yɛ wɔsɛɛ be ni ebɛŋkɛ lɛ mli, koni manyɛ maya kpeei bibii kɛ asafoŋ kpeei fɛɛ.”

Agbɛnɛ hu, Conrado ni daa shi yɛ tsakemɔi ni enyɛ efee yɛ eshihilɛ mli waa hewɔ lɛ hu yɛ. Ekɛ gbalashihilɛ mli naagbai ni naa wa waa kpe aahu akɛ eŋa shĩ lɛ. No hewɔ lɛ eyatao abobaa he kɛtsɔ tsofai fɔji kɛ nitsumɔ nɔ. Etsɛɛɛ ni ebɔi tsofai fɔji ahɔɔmɔ. Amɔ lɛ ni awo lɛ tsuŋ yɛ wii kɛ kokein ni ekɛwoɔ lɛlɛ mli kɛyaa maŋsɛɛ lɛ hewɔ. Kuu ko yɛ tsuŋwoohe lɛ ni Yehowa Odasefoi kɛ amɛ kaseɔ Biblia lɛ, ni afɔ lɛ nine akɛ ebafata amɛhe kɛkase nii. Ejie ehenumɔi akpo nɛkɛ: “Mihiɛ sɔ bɔ ni ato kpeei ni afeɔ lɛ ahe gbɛjianɔ jogbaŋŋ lɛ, gbɛjianɔ ni ato ni atsɔɔ woji lɛ anɔ akɛpɛiɔ saji amli lɛ, kɛ anɔkwale ni eji akɛ nɔ fɛɛ nɔ damɔ Biblia lɛ nɔ lɛ. Oya nɔŋŋ ni mibi koni akɛ mi akase Biblia lɛ, ni mibɔi kpeei yaa.” Enɛ ba yɛ January 1993 mli. Amrɔ nɛɛ, ajie Conrado yɛ tsuŋwoohe lɛ, ni eeya nɔ eeshwere yɛ Kristofoi asafo lɛ mli.

Islas Marías Lɛ

Tsuŋwoohe ko yɛ Mexico ni asheɔ jɛmɛ gbeyei waa, ni feɔ ŋshɔkpɔi ejwɛ ni atsɛɔ amɛ akɛ Islas Marías. Gbokɛlɛfoi lɛ baanyɛ ashara shi kɛnyiɛ ŋshɔkpɔi ni agbalaa mɛi atoi yɛ nɔ, ni atsiɔ amɛnaa yɛ jɛmɛ lɛ anɔ. Amɛteŋ mɛi komɛi kɛ amɛŋamɛi kɛ bii hiɔ jɛmɛ.

Áto asafo bibioo ko shishi. Nyɛmimɛi hii etɛ ni jɛ Mazatlán lɛ fãa gbɛ kɛyaa jɛmɛ shikome yɛ nyɔŋ kome mli, ni amɛyeɔ amɛbuaa koni afee kpeei, amɛkɛ woji haa, ni amɛwoɔ amɛ hewalɛ. Bei komɛi lɛ kpokpaa nɔkwɛlɔ lɛ yaa jɛmɛ eyasaraa amɛ. Kɛ aja mli lɛ, gbɔmɛi ni baa lɛ ayibɔ shɛɔ kɛjɛ 20 kɛyashi 25. Mɛi ejwɛ ni abaptisi amɛ kɛ mɛi enyɔ ni abaptisiko amɛ ji shiɛlɔi ni yɔɔ jɛmɛ. Nɔkwɛlɔ gbɛfalɔ lɛ bɔ amaniɛ akɛ, “gbɔmɛi lɛ ateŋ mɛi komɛi nyiɛɔ kilomitai 17 [shitoi 10] kɛyaa kpeei Hɔgbaa, ni esa akɛ amɛkɛ oyaiyeli ashĩ kpee lɛ shishi koni amɛku amɛsɛɛ kɛya tsuŋwoohe lɛ dani atsɛ amɛgbɛi akɛle mɛi ni yɔɔ. Nyiɛmɔ folo ni anyiɛɔ oyayaayai lɛ po heɔ fe ŋmɛlɛtswai enyɔ kɛkuɔ sɛɛ kɛyaa.” Nyɛmimɛi lɛ ateŋ mɔ kome ni kase anɔkwale lɛ yɛ nakai tsuŋwoohe lɛ wie nyɛsɛɛ nɛɛ akɛ: “No mli lɛ minaa he miishɛɛ akɛ etsɛŋ ni aaajie mi kɛaajɛ tsuŋwoohe lɛ, shi amrɔ nɛɛ lɛ, ebaanyɛ efee be ni Yehowa sumɔɔ, akɛni yɛ migbɛfaŋ lɛ, miyɛ nitsumɔ babaoo ni matsu yɛ biɛ yɛ tsuŋwoohe lɛ mli lɛ hewɔ.”

Wɔyɛ miishɛɛ akɛ wɔɔna akɛ, anɔkwale lɛ miijie ehewalɛ kpo koni eha anɔkwafoi ni taoɔ gbɛ ni amɛaatsɔ nɔ amɛsa Yehowa hiɛ lɛ aye amɛhe. Ájie gbɔmɛi ni fa fe 12 ni kase anɔkwale lɛ, kɛjɛ tsuŋwoohe lɛ, abaptisi amɛ, ni amrɔ nɛɛ amɛmiihi shi yɛ gbɛ ni woo yɔɔ mli nɔ akɛ Nyɔŋmɔ sɔɔlɔi, ni amɛteŋ mɛi komɛi po ebatsɔmɔ asafoŋ onukpai. Afee hewalɛ ni Biblia lɛ yɔɔ akɛ ekɛaatsa tsuii ni ekɛtsake gbɔmɛi lɛ he mfoniri yɛ naakpɛɛ gbɛ nɔ. Kɛ nɛkɛ hii nɛɛ ni awo amɛ tsuŋ yɛ nifɔjianii ni amɛfee hewɔ lɛ yaje Nyɔŋmɔ Wiemɔ lɛ mli la gbɛ lɛ nɔ nɔŋŋ pɛ lɛ, amɛnáa anɔkwa heyeli ni Yesu wo shi yɛ he lɛ, beni ekɛɛ akɛ: “Nyɛaale anɔkwale lɛ, ni anɔkwale lɛ aaaha nyɛye nyɛhe.”—Yohane 8:32; Lala 119:105.

[Shishigbɛ niŋmai]

[Mfoniri ni yɔɔ baafa 23]

Mɛi pii na Kristofoi anɔkwalei ni amɛkase kɛjɛ tsuŋwoohei lɛ ahe sɛɛ