Kunimyeli Kroko Kɛha Yehowa Odasefoi yɛ Greece

YƐ October 6, 1995 lɛ, Athens Kojomɔ He ko ni kojolɔi etɛ kwɛɔ nɔ lɛ bo mla naa sane ko ni kɔɔ Yehowa Odasefoi be-fɛɛ sɔɔlɔi enyɔ komɛi ahe lɛ toi. Amɛ naafolɔmɔ lɛ ji shiɛmɔ ni akɛtsakeɔ mɔ hemɔkɛyeli, ni polisifonyo ko ji mɔ ni yasãmã amɛ beni Odasefoi lɛ etee eŋɔɔ yɛ shia ni amɛba lɛ sɛɛ.

Saji ni kojolɔ ni ji sɛinɔtalɔ lɛ bi lɛ tsɔɔ akɛ eyɛ Yehowa Odasefoi lɛ anitsumɔ lɛ he miishɛɛ waa diɛŋtsɛ. Akɛ nɔkwɛmɔ nɔ lɛ, ebi akɛ: “Bei enyiɛ nɛ ni obɔi nitsumɔ nɛɛ tsumɔ? Te gbɔmɛi kɛ bo yeɔ amɛhaa tɛŋŋ yɛ afii abɔ ni eho lɛ amli? Te ahereɔ onitsumɔ lɛ nɔ ahaa tɛŋŋ? Mɛni okɛɔ gbɔmɛi lɛ yɛ amɛ shinaai anaa?” Mɛi ni yɔɔ kojomɔ he lɛ fɛɛ bo odaseyeli fɛfɛo ni akɛha lɛ toi jogbaŋŋ diɛŋtsɛ.

Nɔ ni fee Odasefoi lɛ naakpɛɛ waa ji akɛ, mlalelɔ ni damɔ nɔyeli lɛ najiaŋ lɛ po wie kɛfã amɛhe. “Yehowa Odasefoi yɛ mla naa hegbɛ, jeee ni amɛkɛhe amɛ-Nyɔŋmɔ lɛ amɛye ni amɛja lɛ kɛkɛ,” taakɛ ewie yɛ enaagbee wiemɔ lɛ mli lɛ, “shi moŋ ni amɛgbɛ amɛhemɔkɛyeli lɛ hu amɛshwã yɛ shinaai anaa, yɛ maŋbii ahenaabuamɔ hei, kɛ agbɛnɛ yɛ gbɛjegbɛi anɔ, ni amɛkɛ amɛwoji lɛ po ahã yaka kɛji amɛmiisumɔ ni amɛfee nakai.” Mlalelɔ ni damɔ nɔyeli lɛ najiaŋ lɛ tsĩ yiŋkpɛi sɔrɔtoi ni tsɔɔ ŋmɛɛmɔ ni kojomɔ hei kɛ Maŋ Akuashɔŋ lɛ efã ni aŋmɛɛ amɛhe lɛ atã. Etsĩ sane ko ni ba, ni ji Kokkinakis kɛ Greece, ni Europa Adesa Hegbɛi a-Kojomɔ He lɛ bu Yehowa Odasefoi lɛ bem yɛ mli lɛ tã.a “Ofainɛ kadimɔ,” taakɛ mlalelɔ ni damɔ maŋ lɛ najiaŋ lɛ bɔ kɔkɔ lɛ, “ákɛ Greece wo shika akɛ etoigbalamɔ po yɛ sane nɛɛ mli. No hewɔ lɛ, kɛ abi ni wɔkojo saji ni tamɔ nɛkɛ lɛ, esa akɛ wɔkwɛ jogbaŋŋ. Yɛ anɔkwale mli lɛ, klɛŋklɛŋ kwraa lɛ, kulɛ esaaa ni akɛ saji nɛɛ baa kojomɔ he kwraa po.”

Yɛ mlalelɔ ni damɔ nɔyeli lɛ najiaŋ lɛ wiemɔ lɛ sɛɛ lɛ, ehe ehiaaa ni Odasefoi lɛ amlalelɔ lɛ awie babaoo dɔŋŋ. Shi kɛlɛ, eŋɔ hegbɛ lɛ ni ekɛma nɔ mi akɛ mla ni awo yɛ shiɛmɔ ni akɛtsakeɔ mɔ jamɔ he lɛ kɛ maŋ lɛ mla gbɛjianɔtoo kpaaa gbee, ni ákɛ eeya nɔ eewo Greece hiɛgbele yɛ majimaji ahiɛ waa diɛŋtsɛ.

Kojolɔ ni ji sɛinɔtalɔ lɛ kwɛ kojolɔi krokomɛi enyɔ lɛ ahiɛ kɛkɛ, ni amɛ fɛɛ amɛkpɛlɛ nɔ akɛ aŋmɛɛ nyɛmi nuu lɛ kɛ nyɛmi yoo lɛ he kwraa. Kojomɔ lɛ, ni hé ŋmɛlɛtswaa kome kɛ minitii nyɔŋma lɛ, fee kunimyeli kɛha Yehowa gbɛi lɛ kɛ ewebii lɛ fɛɛ.

Kɛjɛ be mli ni Europa Adesa Hegbɛi a-Kojomɔ He lɛ ye Kokkinakis sane lɛ sɛɛ kɛbaa nɛɛ, enɛ ji shii ejwɛ nɔ̃ ni aŋmɛɛɔ mɛi ahe yɛ shiɛmɔ ni akɛtsakeɔ mɔ jamɔ lɛ he saji amli. Yehowa Odasefoi ni yɔɔ Greece lɛ amii shɛɔ amɛhe waa akɛ agbɛnɛ naagbai ni amɛkɛkpeɔ yɛ amɛ shiɛmɔ nitsumɔ lɛ gbɛfaŋ lɛ bɛ dɔŋŋ, ni ákɛ amɛbaanyɛ amɛtsa nitsumɔ lɛ nɔ ni akɛ naatsii ko baaa amɛnɔ dɔŋŋ.

[Shishigbɛ niŋmai]