Maŋtsɛyeli Jajelɔi Bɔ Amaniɛ

Awo Shidaamɔ ni Yɔɔ Shiŋŋ ni Akɔ Yɛ Skul lɛ He Nyɔmɔ

BIBLIA lɛ gba efɔ̃ shi akɛ: “Obii lɛ fɛɛ aaafee Yehowa kaselɔi, ni mahã obii lɛ hejɔlɛ babaoo.” (Yesaia 54:13) Kɛji aalɛɛ mli lɛ, abaanyɛ akɛ “obii lɛ fɛɛ” ato Nyɔŋmɔ tsuji akuu ni yɔɔ shikpɔŋ nɔ, ni gbekɛbii bibii fɛɛ fata he lɛ he. Ŋmɛnɛ, fɔlɔi ni ji Kristofoi kwɛɔ akɛ amɛbii miifee “Yehowa kaselɔi” yɛ shia kɛ Kristofoi akpeei ashishi.

Shi, gbekɛbii Kristofoi ni yaa skul lɛ kɛ kaai ni mli wa kpeɔ. Bei pii lɛ, amɛnaa akɛ ehe miihia ni amɛdamɔ nɔ ni amɛkase kɛjɛ Biblia lɛ mli lɛ nɔ amɛkɔ shidaamɔ ni mli wa. Kɛ amɛfee nakai lɛ, nɔ ni baajɛ mli aba lɛ he aaanyɛ aba sɛɛnamɔ kɛha nikaselɔi kɛ tsɔɔlɔi fɛɛ, taakɛ niiashikpamɔ ni jɛ Micronesia nɛɛ tsɔɔ lɛ.

Tsɔɔlɔi ni yɔɔ maŋ lɛ mli skul ko yɛ Pasifik anaigbɛ ŋshɔkpɔ ni ji Tol nɔ, yɛ Chuuk Islands lɛ kɛɛ gbekɛbii lɛ fɛɛ akɛ amɛsaa amɛhe ni amɛkɛ amɛhe awo skul Halloween gbijurɔyeli ko mli. Skulbii ni ji Odasefoi lɛ le akɛ he wulamɔi kɛ atadei ni akɛmiifee sisai, mumɔi fɔji, kɛ ayɛi ahe mfoniri—ni fɛɛ kɔɔ mumɔi atsɛmɔ nifeemɔi ahe lɛ, baanyɛ aba gbijurɔyeli lɛ mli. Gbekɛbii nɛɛ ahenilee eŋmɛŋ amɛ gbɛ ni amɛkɛ amɛhe awo mli.a

Amɛna amɛle kɛjɛ Biblia mli tsɔsemɔ ni amɛna yɛ shia kɛ Kristofoi asafo lɛ mli lɛ mli akɛ nifeemɔi ni tamɔ nɛkɛ esaaa Nyɔŋmɔ hiɛ, kɛji aafee kɛha hiɛtserɛjiemɔ folo kɛkɛ po. Bɔni afee ni eye ebua amɛ ni amɛtsɔɔ amɛshidaamɔ lɛ mli faŋŋ lɛ, gbekɛbii lɛ fɔ̃ nine amɛtsɛ Barak, ni ji Odasefoi maŋsɛɛ sanekpakpa shiɛlɔi ni yɔɔ ŋshɔkpɔ lɛ nɔ lɛ ateŋ mɔ kome, koni ekɛ amɛtsɔɔlɔi lɛ abawie.

Beni amɛnu sane naatsɔɔmɔ lɛ sɛɛ lɛ, tsɔɔlɔi lɛ to gbɛjianɔ kɛha kpee ni ji enyɔ, koni Barak anyɛ ekɛ tsɔɔlɔi ni yɔɔ skul lɛ fɛɛ awie. Barak kɛ anɔkwalei mamɔ̃ shi yɛ kpee nɛɛ mli, ni ekɛtsɔɔ bɔ ni Halloween ji eha diɛŋtsɛ. Ejie esane lɛ kɛjɛ Buu Mɔɔ Asafo lɛ woji sɔrɔtoi babaoo kɛ woji krokomɛi hu mli. Tsɔɔlɔi kɛ skul nɔkwɛlɔi lɛ anaa kpɛ amɛhe waa yɛ nɔ ni amɛkase yɛ gbijurɔyeli lɛ shishijee, eyinɔsane, kɛ jamɔ nifeemɔ ni eji lɛ he. Amɛkpɛ amɛyiŋ akɛ esa akɛ tsɔɔlɔi akuu lɛ fɛɛ akpe ni amɛkwɛ bɔ ni amɛbaatsu shihilɛ lɛ he nii amɛha.

Gbii fioo sɛɛ lɛ, atswa yiŋkpɛɛ ko ni akpaaa gbɛ he adafi. Afo gbɛjianɔtoi fɛɛ kɛha Halloween gbijurɔyeli lɛ mli. Skul lɛ yeŋ Halloween lɛ kwraa nakai afi lɛ. Kwɛ nɔ kpakpa ni jɛ Odasefoi gbekɛbii nɛɛ afai shi ni amɛtswa akɛ amɛbaafee nɔ ni ja yɛ skul lɛ mli kɛba! Esaaa ni gbekɛbii sheɔ gbeyei loo amɛhiɛ gboɔ akɛ amɛaakɔ shidaamɔ ni yɔɔ shiŋŋ kɛha Biblia mli anɔkwale lɛ.

Yɛ je lɛŋ he fɛɛ he lɛ, Yehowa Odasefoi tsɔɔ amɛbii lɛ ni amɛkase nii waa yɛ skul. Atsɔseɔ Odasefoi gbekɛbii lɛ hu koni amɛhi shi yɛ Biblia shishitoo mlai anaa, ní amɛkɛ hegbɛ ni amɛnaa lɛ atsu nii ni amɛkɛ skulbii krokomɛi awie amɛ hiɛnɔkamɔ kɛ hemɔkɛyelii ahe. Kɛji nibii kpakpai jɛɛɛ mli baaa, loo ebaaa oya nɔŋŋ po tamɔ bɔ ni eba lɛ yɛ sane nɛɛ mli lɛ, kɛlɛ, gbekɛbii lɛ baanyɛ ana hekɛnɔfɔɔ kɛ miishɛɛ ni jɛɔ jalɛ nifeemɔ mli kɛbaa lɛ eko. Ni nɔ ni he hiaa fe no ji akɛ, amɛbaanyɛ amɛna nɔmimaa akɛ amɛ ŋwɛi Tsɛ lɛ naa he miishɛɛ, ni ebaajɔɔ amɛ yɛ amɛtoiboo ni amɛfeɔ yɛ anɔkwayeli mli lɛ hewɔ.

[Shishigbɛ niŋmaa]