Wolo Tɛtrɛɛ ni Saa Mɔ Tsui He

AKALAA woji tɛtrɛbii babaoo ni aleee efalɛ yɛ je lɛŋ he fɛɛ he koni akɛgbe saji kɛ hiɛtserɛjiemɔ he hɔmɔ ni yeɔ nikanelɔi lɛ.

Mɛni haa esoroɔ wolo tɛtrɛɛ ni ohiɛ nɛɛ kwraa lɛ? Ekolɛ, wolo ni nyiɛ sɛɛ nɛɛ, ni Buu Mɔɔ Asafo lɛ nitsumɔ he nine ni yɔɔ Germany lɛ nine shɛ nɔ lɛ, baanyɛ aha hetoo:

“Miida nyɛ shi waa, suɔmɔ nyɛmimɛi, yɛ nyɛ mɔdɛŋbɔɔ kɛ nitsumɔ lɛ hewɔ. Beni mikɛ mibihii enyɔ lɛ jɛ kpeei kɛba shia lɛ, eyɛ mli akɛ atswa gbɛkɛ 9:30 moŋ, shi esa akɛ mabo Buu-Mɔɔ hee [ni yɔɔ kasɛt nɔ] lɛ toi. Beni mishaa tsɛŋsii lɛ amli lɛ, mibɔi klɛŋklɛŋ nikasemɔ ni yɔɔ (April 1, 1995) mli lɛ toiboo. Minu he akɛ esa akɛ mabo toi shikome ekoŋŋ, no hewɔ lɛ mifo mi-kpatashi nitsumɔ lɛ mli ni mikane saneyitso [“Ojara Wa yɛ Nyɔŋmɔ Hiɛ!”] lɛ yɛ Buu-Mɔɔ lɛ mli kɛnyiɛ kasɛt lɛ sɛɛ. Esa mitsui he waa, titri lɛ kukuji ejwɛ kɛ enumɔ lɛ. Kɛkɛ ni no sɛɛ lɛ yaafonui bɔi hoo—shi esɛɛ etsɛɛɛ tsɔ̃. Miida Yehowa shi waa akɛ miyɛ wala mli ni mifata ewebii ahe, ni ákɛ, mi kɛ mɛi krokomɛi babaoo ni fata he lɛ baanyɛ aha ale egbɛi lɛ. Lɛlɛŋ, yiŋtoo ko bɛ ni baaha manu he akɛ mihe bɛ sɛɛnamɔ. Yehowa mumɔ lɛ kɛ ewebii yɛ. Eba akɛ wɔ fɛɛ wɔɔŋmɛ wɔtsui shi ni wɔdamɔ shi shiŋŋ yɛ hemɔkɛyeli lɛ mli, akɛ gbɔmɛi ni efee ekome. Mikɛ Kristofoi asuɔmɔ miiŋa nyɛ, nyɛnyɛmi yoo ni yɔɔ hemɔkɛyeli lɛ mli.”

Buu-Mɔɔ lɛ kɛ nibii babaoo haa fe saji ni ehaa aleɔ kɛkɛ. Esaa ekanelɔi lɛ atsuii ahe ni etsuɔ amɛ taomɔ nii kɛha mumɔŋ niyenii kpakpa kɛ hewalɛwoo yɛ be ni sa mli lɛ ahe nii. Hɛɛ, Buu-Mɔɔ haa ‘niyenii yɛ be ni sa mli.’—Mateo 24:45.