Ani obaanyɛ Osumɔ Nyɔŋmɔ Lɛɛlɛŋ?
NYƆŊMƆ kɛɛ: “Mɔ ko mɔ ko enaŋ mi, ni eyi aaana wala.” (2 Mose 33:20) Agbɛnɛ, kɛjɛ be mli ni agbe Biblia lɛ naa kɛbaa nɛɛ, odaseyeli ko bɛ ni tsɔɔ akɛ, adesa ko kɛ lɛ eye sharamɔ tɛ̃ɛ. Ani onaaa akɛ ewa—ni enyɛŋ eba lɛ nakai po—akɛ ooona suɔmɔ ni mli kwɔ oha mɔ ko ni onako lɛ tɛ̃ɛ loo onuko ehe diɛŋtsɛ da? Ani eeenyɛ eba diɛŋtsɛ ákɛ, akɛ jeŋ muu fɛɛ Bɔlɔ lɛ aaana wekukpaa ni suɔmɔ yɔɔ mli?
Ŋwanejee ko bɛ nyɛ ni aaanyɛ akɛ Nyɔŋmɔ ana teemɔŋ wekukpaa ni bɛŋkɛ ni miishɛɛ yɔɔ mli lɛ he. Wɔkaneɔ yɛ 5 Mose 6:5 akɛ, afã Israel maŋ lɛ akɛ: “Suɔmɔ Yehowa, o-Nyɔŋmɔ lɛ, kɛ otsui fɛɛ, kɛ osusuma fɛɛ, kɛ ohewalɛ fɛɛ.” Yɛ sɛɛ mli lɛ, Yesu Kristo ma nɛkɛ mla nɛɛ nɔ mi eha esɛɛnyiɛlɔi lɛ, ni ekɛfata he akɛ: “Kitai lɛ amli otu kɛ ewulu nɛ.” (Mateo 22:37, 38) Ani Biblia lɛ baawo wɔ ŋaa ni wɔsumɔ Nyɔŋmɔ, kɛ nine nyɛŋ ashɛ wekukpaa ni tamɔ nɛkɛ nɔ?
Shi ani Yehowa kpaa wɔ gbɛ ni wɔsumɔ lɛ akɛni efã kɛkɛ? Dabi. Nyɔŋmɔ bɔ klɛŋklɛŋ adesai enyɔ lɛ bɔ ni amɛaanyɛ amɛsumɔ lɛ. Anyɛɛɛ Adam kɛ Hawa nɔ awooo amɛkɛ amɛ Bɔlɔ lɛ teŋ suɔmɔ wekukpaa ko mli. Shi moŋ, Nyɔŋmɔ kɛ amɛ wo shihilɛi kpakpa ni aaaha amɛnyɛ amɛna hedɔɔ amɛha lɛ lɛ amli. Amɛ amɛbaahala nɔ ni amɛsumɔɔ—amɛbɛŋkɛ Nyɔŋmɔ he kpaakpa loo amɛgbala amɛhe shi kɛjɛ ehe.
Adam kɛ Hawa hala akɛ amɛaatse atua. (1 Mose 2:16, 17; 3:6, 7) Shi kɛlɛ, amɛ shwiei baana nyɛmɔ ni amɛkɛaaná amɛ kɛ Bɔlɔ lɛ teŋ wekukpaa ni suɔmɔ yɔɔ mli.
Anɔkwa Nyɔŋmɔ lɛ ni Akɛ Lɛ Aaanyiɛ
Akɛ nɔkwɛmɔ nɔ lɛ, awie Abraham he yɛ Biblia lɛ mli akɛ Nyɔŋmɔ “shieŋtsɛ.” (Yakobo 2:23) Ni kɛlɛ, jeee Abraham ji mɔ pɛ ni na Nyɔŋmɔ naanyobɔɔ ni bɛŋkɛ kpaakpa mli ŋɔɔmɔ. Biblia lɛ wieɔ adesai krokomɛi ni yeee emuu ni jie hedɔɔ diɛŋtsɛ kpo amɛha Yehowa, ni kɛ ‘anɔkwa Nyɔŋmɔ lɛ nyiɛ’ lɛ ahe.—1 Mose 5:24; 6:9; Hiob 29:4; Lala 25:14; Abɛi 3:32.
Akɛ suɔmɔ kɛ hedɔɔ kɛha Nyɔŋmɔ fɔɔɔ Nyɔŋmɔ blema tsuji lɛ. Esa akɛ amɛtao ni amɛná. Yɛ mɛɛ gbɛ nɔ? Kɛtsɔ le ni amɛaale lɛ kɛtsɔ lɛ diɛŋtsɛ egbɛi, Yehowa, lɛ nɔ. (2 Mose 3:13-15; 6:2, 3) Kɛtsɔ le ni amɛaale akɛ eyɛ shihilɛ mli kɛ e-Nyɔŋmɔyeli lɛ nɔ. (Hebribii 11:6) Kɛtsɔ esuɔmɔ nifeemɔi lɛ anɔjwɛŋmɔ yɛ bei pii amli lɛ nɔ. (Lala 63:7) Kɛtsɔ amɛtsuiiaŋ susumɔi ni amɛaajie lɛ kpo amɛtsɔɔ Nyɔŋmɔ yɛ sɔlemɔ mli lɛ nɔ. (Lala 39:13) Kɛtsɔ ejurɔ ni efeɔ lɛ kasemɔ nɔ. (Zakaria 9:17) Kɛtsɔ efɔŋ ni aaafee ashi lɛ lɛ he gbeyeishemɔ kpakpa ni aaana nɔ.—Abɛi 16:6.
Ani obaanyɛ otsɔ Nyɔŋmɔ shieŋtsɛ ni okɛ lɛ anyiɛ? Eji anɔkwale akɛ, onyɛŋ ona Nyɔŋmɔ loo ni ooonu egbee. Shi kɛlɛ, Yehowa fɔ̃ɔ bo nine ni obatsɔ ‘gbɔ yɛ ebuu mli,’ eshieŋtsɛ. (Lala 15:1-5) No hewɔ lɛ, obaanyɛ osumɔ Nyɔŋmɔ. Shi, te ooofee tɛŋŋ ona okɛ lɛ teŋ wekukpaa ni bɛŋkɛ ni hedɔɔ yɔɔ mli?