“Tsuishitoo Ehia Nyɛ”
“TSUISHITOO ehia” wɔ, kɛji wɔnine aaashɛ “shiwoo lɛ” nɔ. (Hebribii 10:36) Biblia woloŋlelɔ ko tsɔɔ mli akɛ bei komɛi lɛ, Hela wiemɔ kɛha “tsuishitoo” ni bɔfo Paulo kɛtsu nii yɛ ŋmalɛ nɛɛ mli lɛ tsɔɔ “nyɛ ni tso loo kwɛ̃ɛnii ko nyɛɔ ehiɔ shi yɛ shihilɛi ni mli wa waa, kɛ shihilɛi ni ehiii kwraa mli.”
Fɔfɔi ko ni tamɔ nɛkɛ kwɛ̃ɔ yɛ Europa gɔji lɛ anɔ. Nɔ ni yɔɔ miishɛɛ waa yɛ ehe ji akɛ, atsɛɔ lɛ akɛ ohiɔ-shi-kɛyaa-naanɔ. Shi yɛ anɔkwale mli lɛ, nɛkɛ Alps gɔji lɛ anɔ fɔfɔi nɛɛ ehiii shi kɛyaaa naanɔ, shi enyɛɔ edamɔɔ shihilɛi sɔrɔtoi anaa aahu afii abɔ, ni egbaa afoforo fɛfɛo ni anaa he miishɛɛ waa daa afi latsaa be mli. The New Encyclopædia Britannica tsɔɔ mli akɛ akɛ gbɛi ni ji ohiɔ-shi-kɛyaa-naanɔ nɛɛ ha fɔfɔi lɛ yɛ bɔ ni “enyɛɔ edamɔɔ shihilɛi ni mli wa naa, kɛ bɔ ni etsɛɔ waa” lɛ hewɔ. (Gbɛi ni akɛtsɛɔ nɛkɛ fɔfɔi ni fata Sempervivum kuu lɛ he, yɛ jeŋ nilee he nikasemɔ mli lɛ hu shishinumɔ ji “ohiɔ-shi-kɛyaa-naanɔ.”)
Nɔ ni haa nɛkɛ fɔfɔi ni tsɛɔ nɛɛ feɔ nɔ ni sa kadimɔ waa ji akɛ enyɛɔ ekwɛ̃ɔ yɛ hei ni jɛmɛ shihilɛ ehiii fe fɛɛ. Anyɛɔ anaa yɛ gɔji ni nɔ kwɔlɔ ni kɔɔyɔɔ tswaa waa yɛ nɔ hu lɛ anɔ, hei ni kɔɔyɔɔ mli tsakemɔ nyɛɔ ebaa shi aahu kɛbashɛɔ 35° C yɛ ŋmɛlɛtswai 24 pɛ mli. Enyɛɔ enaa shishifã yɛ tɛsaai ateaŋ fɔji amli, kɛji ena sũ bibioo pɛ kɛkɛ. Mɛni ji nyɛ ni enyɛɔ edamɔɔ shihilɛi ni mli wa waa naa nɛɛ he teemɔŋ saji komɛi?
Ohiɔ-shi-kɛyaa-naanɔ fɔfɔi nɛɛ baai yɛ titrii, ni enyɛɔ ekɛ nu toɔ mli jogbaŋŋ. Enɛ haa enyɛɔ ekɛ nu falɛ ni enaa kɛjɛɔ nugbɔnɛmɔ loo snoo ni sereɔ mli lɛ fɛɛ tsuɔ nii kɛmɔɔ shi. Kɛfata he lɛ, ekwɛ̃ɔ yɛ kui amli, ni amɛ fɛɛ amɛfeɔ amɛhewalɛ ekome bɔni afee ni amɛfãi anyɛ amɔmɔ tɛsaai lɛ waa kɛdamɔ shi. Akɛni amɛfãi boteɔ tɛsaai ateŋ fɔji amli hewɔ lɛ, enyɛɔ enaa hebuu kɛjɛɔ kɔɔyɔŋ tsakemɔi ni ehiii lɛ ahe, eyɛ mli akɛ ekolɛ sũ fioo pɛ mli amɛboteɔ. Yɛ wiemɔ kroko mli lɛ, ehiɔ shi kɛtsɔ shihilɛi ni mli wa nɛɛ ni ekɛtsuɔ nii jogbaŋŋ bɔ ni eeenyɛ kɛha esɛɛnamɔ lɛ nɔ.
Kɛ wɔɔwie yɛ mumɔŋ shishinumɔ naa lɛ, ekolɛ wɔnaa wɔhe yɛ shihilɛi komɛi ni kaa bɔ ni wɔ tsuishiŋmɛɛ ji lɛ ekwɛɔ lɛ amli. Mɛni baaye abua wɔ ni wɔŋmɛ wɔtsui shi yɛ kaa shishi? Taakɛ ohiɔ-shi-kɛyaa-naanɔ fɔfɔi lɛ ji lɛ, wɔ hu wɔbaanyɛ wɔkɛ Nyɔŋmɔ Wiemɔ lɛ mli nu ni haa mɔ wala lɛ ato wɔmli, ni wɔkɛ wɔhe akpɛtɛ anɔkwa Kristofoi ahe gbagbalii kɛha sɛɛfimɔ kɛ hebuu. Nɔ ni fe fɛɛ lɛ, taakɛ Alps gɔji lɛ anɔ fɔfɔi nɛɛ feɔ lɛ, esa akɛ wɔkpɛtɛ wɔ “tɛsaa,” ni ji Yehowa, kɛ agbɛnɛ e-Wiemɔ lɛ kɛ egbɛjianɔtoo lɛ hu he gbagbalii bɔ ni anyɛŋ afã wɔ.—2 Samuel 22:3.
Lɛlɛŋ, ohiɔ-shi-kɛyaa-naanɔ fɔfɔi lɛ feɔ kaimɔ nii ni yɔɔ fɛo, ni tsɔɔ akɛ, kɛ wɔyaje shihilɛi ni mli wa waa mli po lɛ, wɔbaanyɛ wɔŋmɛ wɔtsui shi kɛji wɔkɛ nibii ni wɔyɔɔ lɛ fɛɛ tsu nii jogbaŋŋ kɛmɔ shi. Yehowa maa nɔ mi ehaa wɔ akɛ nɛkɛ tsuishiŋmɛɛ nɛɛ baaha ‘wɔnine ashɛ shiwooi lɛ anɔ,’ ni enɛ baatsɔɔ diɛŋtsɛ akɛ wɔbaahi shi kɛya naanɔ.—Hebribii 6:12; Mateo 25:46.