Hemɔkɛyeli Tsirɛ lɛ ni Efee Nɔ Ko

BENI Yehowa kɛ nitsumɔ wo Mose dɛŋ akɛ enyiɛ Israel maŋ lɛ hiɛ kɛjɛ Mizraim nyɔŋyeli mli lɛ, klɛŋklɛŋ lɛ, Mose kpa fai ni akɛ nɛkɛ nitsumɔ akaha lɛ, ni ekɛɛ: “Ofainɛ, mi-Nuntsɔ [Yehowa]! Minaa tseee kɛjɛ jeeŋmɔ beebe kɛ beyinɔ hu ni okɛ otsulɔ wie nɛɛ fɛɛ; shi mijeee wielɔ ko ni mililɛi hu tsii.” (2 Mose 4:10) Hɛɛ, Mose nuuu he akɛ esa kɛha nɛkɛ nitsumɔ wulu ni tsii nɛɛ.

Nakai nɔŋŋ hu ŋmɛnɛ, Yehowa tsuji pii nuɔ he bei komɛi akɛ amɛsaaa mɛi ni tsuɔ nitsumɔi komɛi ni akɛwo amɛdɛŋ lɛ ahe nii. Akɛ nɔkwɛmɔ nɔ lɛ, Kristofonyo nɔkwɛlɔ ko ni atsɛɔ lɛ Theodore gba akɛ: “Yɛ nibii fɛɛ ni Yehowa kɛɔ mi akɛ mitsu lɛ ateŋ lɛ, shiɛmɔ nitsumɔ lɛ ji nɔ ni wa fe fɛɛ. Beni miji gbekɛ lɛ, minyiɛɔ oya kɛyaa shinaa lɛ naa, kɛkɛ lɛ mikwa tamɔ nɔ ni miitswa enaa ŋmɛlɛ lɛ, kɛkɛ lɛ minyiɛ blɛoo kɛshi jɛmɛ, kɛ hiɛnɔkamɔ akɛ mɔ ko nuŋ mihe, ni anaŋ mi hu. Beni mida saŋŋ lɛ, mikpa nakai feemɔ, shi kɛ misusu he akɛ wɔbaaya shia kɛ shia pɛ, kɛkɛ lɛ hela diɛŋtsɛ emɔ mi. Kɛbashi ŋmɛnɛ po, hela mɔɔ mi dani mishiɔ shia kɛyaa shiɛmɔ, shi miyaa hu kɛ̃.”

Mɛni ye ebua Mose kɛ ŋmɛnɛŋmɛnɛ beaŋ Odasefoi tamɔ Theodore ni amɛnyɛ amɛkpee gbeyeishemɔi nɛɛ anaa? Biblia lɛ haa hetoo akɛ: “Hemɔkɛyeli [Mose] kɛje Mizraim, . . . ejaakɛ emɔ mɔ ni anaaa lɛ lɛ mli tamɔ nɔ ni eena lɛ.”—Hebribii 11:27.

Lɛlɛŋ, kɛtsɔ Yehowa mli hemɔkɛyeli namɔ nɔ lɛ, Mose nyɛ eye henumɔi ni ena akɛ esaaa lɛ anɔ ni etsu nitsumɔi ni akɛwo edɛŋ akɛ kojolɔ, gbalɔ, maŋ hiɛnyiɛlɔ, Mla kpaŋmɔ lɛ teŋdamɔlɔ, tatsɛ, yinɔsane ŋmalɔ, kɛ Biblia ŋmalɔ lɛ he nii.

Nakai nɔŋŋ kɛ wɔ hu wɔna hemɔkɛyeli tamɔ Mose lɛ, wɔbaanyiɛ tamɔ nɔ ni ‘wɔmiina Mɔ ni anaaa lɛ lɛ.’ Hemɔkɛyeli ni tamɔ nɛkɛ woɔ mɔ ekaa, ni ehaa wɔnyɛɔ wɔtsuɔ wɔ Kristofoi agbɛnaa nii ahe nii—kɛji wɔnuɔ he po akɛ wɔjeee mɛi ni sa kɛha nomɛi.