Amɛ Naanyo ni Fe Fɛɛ lɛ Waje Amɛ

NAANYOBƆƆ ko yɛ ni wajeɔ Yehowa Odasefoi titri. No ji amɛ wekukpaa ni jara wa waa ni ka amɛkɛ amɛ Naanyo ni fe fɛɛ, Yehowa Nyɔŋmɔ teŋ lɛ. (Okɛto Yakobo 2:23 he.) Efiɔ amɛsɛɛ yɛ amɛ hemɔkɛyeli he kaai ni da fe fɛɛ lɛ mli.

Mɛi pii ejie Odasefoi ayi yɛ emuuyeli mli ni amɛhiɛ yɛ yiwalɛ nɔyelii ashishi ni amɛna ni aŋmala ashwie shi lɛ hewɔ. Amɛteŋ mɔ kome ji Jiří Krupička, jwɛŋmɔ kɛ adebɔɔ he nilelɔ ni fã kɛjɛ Czechoslovakia yɛ 1968 yɛ be mli ni ekɛ afii pii ehi Komunist gbokɛlɛfoi aŋsaraŋ lɛ. Ewie Odasefoi ni awo amɛ tsuŋ yɛ maŋ saji ni amɛkɛ amɛhe wooo mli hewɔ lɛ anɔnaa kɛ amɛ shidaamɔ ni yɔɔ shiŋŋ lɛ he yɛ ewolo, Renesance rozumu (Nilee he Nilee Hee) lɛ mli.

Awo Odasefoi pii atsuŋ yɛ Komunist nɔyeli lɛ shishi yɛ amɛ hemɔkɛyeli hewɔ. Eyɛ mli akɛ awo amɛ tsuŋ moŋ, shi amɛkpɛlɛɛɛ nɔ akɛ amɛaatsa uranium ni akɛfeɔ tawuu nibii lɛ. (Yesaia 2:4) Krupička gba nɔ ko ni ena yɛ bui ni atsaa nibii nɛɛ kɛjɛɔ mli lɛ ekome naa yɛ 1952. Ena nɔ ko tamɔ gbɔmɛi enyɔ ni damɔ shi tamɔ ais amagai yɛ fɛi be ni naa wa waa lɛ mli. Akɛ tsɛŋsi balei eha amɛyitsei kɛ ŋwɛigbɛ gbɔmɔtsei lɛ ahe.

Krupička ŋma akɛ: “Amɛwo gbokɛlɛfoi atadei ni etsɛrɛ kɛdamɔ jɛmɛ kɛjɛ leebi maaŋkpa. Te amɛaafee tɛŋŋ amɛnyɛ amɛdamɔ shi be kakadaŋŋ nɛkɛ yɛ naji ni eshɔ̃ nɔ? Kɛtsɔ hewalɛ ni hemɔkɛyeli yɔɔ lɛ nɔ. Balei lɛ egbɔlɔ ni amɛbɔ ŋkanale. Yiwalɔ ko nyɛ nɔ ewo amɛyitsei kɛtsɔ amɛkɔji anɔ ni bɔ ni ekɛ hewalɛ fee ha lɛ gbala amɛtadei lɛ kɛyafolɔ hii nɛɛ ateŋ mɔ kome hewolo ni la miitsere kɛmiijɛ etade lɛ niji amli.

“Gbokɛlɛfoi anɔkwɛlɔ lɛ ha wɔ kuu lɛ wá yɛ amɛhiɛ, ni asraafoi onukpa lɛ ha wɔ wiemɔ kuku. Ekɛɛ, kɛ akpoo nitsumɔ lɛ, eji atuatsemɔ, ni agbalaa toi yɛ he. Buului awiemɔ ko ni akɛtsɔɔ mɔ yiŋ ni kɔɔ tawuu kɛ gbɔmɔgbee he ko bɛ ni baaye abua mɛi ni teɔ shi woɔ tawuu nɛɛ, nɛkɛ kwasafoŋ henyɛlɔi nɛɛ.”

Asraafoi onukpa lɛ kɔ dade adabaŋ ko ni ekɛtswa balei lɛ ekome waa. Gbɔmɔ ni yɔɔ mli lɛ gbee shi ni nɔ enyɔ̃ enɔ ni bale lɛ hɔ eyitso lolo. Nɔ ni nyiɛ sɛɛ ba lɛ ka Krupička kaimɔ mli waa.

Ekɛɛ:“Anu lala gbee ni miiba kɛmiijɛ balei lɛ amli. Gbɛɛmɔ ni jije blɛoo, sɔlemɔ blɛoo kɛha Nyɔŋmɔ ni baanyɛ anu nɔ fɛɛ nɔ kɛjɛ he fɛɛ he—aabɔ mɔdɛŋ po ni ala kɛjɛ uranium balei memeji ni ebɔ ŋkanale lɛ amli. Enuɔ lɛ waa fe lalɔi alala ni miigbɛɛ yɛ sɔlemɔtsu agbo ko mli.”

Nɔyeli lɛ ku sɛɛ ekpɛlɛ Yehowa Odasefoi anitsumɔ ni yaa nɔ yɛ Czech Republic lɛ nɔ ekoŋŋ yɛ mla naa yɛ September 1, 1993. Czech Odasefoi lɛ amli filiɔ amɛ bianɛ akɛ amɛnyɛ amɛmiitsu amɛ Kristofoi atsɔsemɔ nitsumɔ lɛ yɛ heyeli mli. Hɛɛ, eŋɔɔ amɛnaa akɛ amɛaagba Yehowa, amɛ Naanyo ni fe fɛɛ lɛ he sane amɛtsɔɔ mɛi krokomɛi.

[Mfoniri ni yɔɔ baafa 7]

Kpeeyalɔi yɛ Czech Republic