Awo Zechariah Wa tsuŋ yɛ Singapore kɛjɛ August 2025

Yehowa Odasefoi Ni Awo Amɛ Tsuŋ Yɛ Amɛhemɔkɛyeli Hewɔ—He Ni Eba Yɛ

Be ni shɛɔ December 2025 lɛ, Yehowa Odasefoi ni awo amɛ tsuŋ yɛ je lɛŋ hei srɔtoi yɛ amɛhemɔkɛyeli lɛ hewɔ lɛ fa fe 261.

Kuu ko ni ji, International Covenant on Civil and Political Rights lɛ amlai lɛ eko (article 18) tsɔɔ mli akɛ, mɔ fɛɛ mɔ yɛ hegbɛ akɛ enáa heyeli yɛ nɔ ni esusuɔ, kɛ nɔ ni eheɔ eyeɔ lɛ he koni edamɔ no nɔ efee enii, ni eyɛ hegbɛ hu akɛ ekɛ ehe dɔmɔɔ jamɔ ni esumɔɔ koni ekɛ ehe awo jamɔ lɛ nifeemɔi amli. Kɛ̃lɛ, yɛ maji komɛi anɔ lɛ, nɔyelii lɛ eŋmɛɛɛ Yehowa Odasefoi lɛ gbɛ ni amɛkɛ amɛhe awo amɛjamɔ nifeemɔi lɛ amli. Amɛwoɔ Yehowa Odasefoi lɛ tsuŋ yɛ amɛjamɔŋ hemɔkɛyelii lɛ hewɔ, loo amɛhenilee ni eŋmɛɛɛ amɛ gbɛ ni amɛkɛ amɛhe awo asraafoi anitsumɔ mli lɛ hewɔ.

Azerbaijan

Eyɛ mli akɛ Azerbaijan yafata Council of Europe lɛ he yɛ afi 2001 moŋ, shi kɛbashi bianɛ lɛ, etoko gbɛjianɔ kpakpa ko ehãko mɛi ni amɛhenilee ni eŋmɛɛɛ amɛ gbɛ ni amɛkɛ amɛhe awo asraafoi anitsumɔ mli hewɔ lɛ, amɛbaasumɔ ni amɛtsu nɔ kroko moŋ kɛsɔmɔ maŋ lɛ. No hewɔ lɛ, kɛ́ atsɛ Yehowa Odasefonyo ko akɛ eyatsu asraafoi anitsumɔ kɛsɔmɔ maŋ lɛ, ni ebi koni ahã lɛ nɔ kroko ni etsu kɛsɔmɔ maŋ lɛ, afooo edaaŋ. Kɛ́ eba lɛ nakai lɛ, nɔ ko bɛ ni ebaanyɛ efee yɛ he akɛ ja ejɛ bulɛ mli ehã amɛle akɛ enyɛŋ ni ekɛ ehe awo asraafoi anitsumɔ lɛ mli. Enɛ hãa amralo lɛ folɔɔ enaa akɛ eyɛ nyɛmɔ ni ekɛbaatsu asraafoi anitsumɔ lɛ shi esumɔɔɔ ni etsuɔ, ni kɛ́ saneyelihe bua sane lɛ akɛ nɔ ni awieɔ ji anɔkwale lɛ, ayawoɔ lɛ tsuŋ. Amrɔ nɛɛ awo Yehowa Odasefonyo ko tsuŋ.

Klikimɔ biɛ kɛdaunlodi Yehowa Odasefoi ni awo amɛ tsuŋ yɛ amɛhemɔkɛyeli hewɔ yɛ Azerbaijan lɛ agbɛ́i.

Russia

Yɛ April 2017 lɛ, Russia Saneyelihe Wulu Fe Fɛɛ lɛ mu sane naa akɛ, Yehowa Odasefoi ajamɔ lɛ teɔ shi ewoɔ maŋ lɛ, ni no hewɔ lɛ, atsĩ Yehowa Odasefoi ajamɔ lɛ naa, ni asumɔŋ ni ana akɛ amɛkɛ amɛhe miiwo amɛjamɔ nifeemɔi lɛ eko kwraa mli, ni agu asafo lɛ gbɛ́i ni akɛwo mla shishi lɛ. Enɛ hã nɔyeli lɛ ŋamɔ Yehowa Odasefoi lɛ anitsumɔhe nine ni yɔɔ jɛmɛ lɛ, Maŋtsɛyeli Asai lɛ, kɛ Kpeei Asai lɛ, ni awo mla akɛ akana ni amɛhiɛ Yehowa Odasefoi awoji lɛ eko kwraa. No sɛɛ lɛ, amralofoi lɛ kɛ amɛhiɛ ma Yehowa Odasefoi lɛ anɔ, amɛyagbɛlɛɔ Odasefoi lɛ anibii amli, amɛmɔmɔɔ amɛ kɛyaa saneyelihei. Nɔyeli lɛ kɛɛ Yehowa Odasefoi ajamɔ nifeemɔi lɛ teɔ shi ewoɔ maŋ lɛ. Bei pii lɛ, polisifoi boteɔ Odasefoi ashĩai amli trukaa ni amɛyawoɔ amɛhe gbeyei, amɛbolɔɔ amɛwoɔ amɛ, ni amɛmɔmɔɔ amɛ. Amrɔ nɛɛ lɛ, kɛ́ hooo kwraa lɛ, Yehowa Odasefoi 159 yɛ ni amɔmɔ amɛ; aaye amɛteŋ mɛi komɛi asane, abu mɛi komɛi fɔ ni ahã amɛmiitsu nitsumɔ ni wa kɛmiigbala amɛtoi, ni awo mɛi komɛi hu tsuŋ.

Klikimɔ biɛ kɛdaunlodi Yehowa Odasefoi ni awo amɛ tsuŋ yɛ amɛhemɔkɛyeli hewɔ yɛ Russia lɛ agbɛ́i.

Singapore

Yɛ Singapore lɛ, mlai lɛ biɔ ni nuu fɛɛ nuu atsu asraafoi anitsumɔ lɛ kɛsɔmɔ maŋ lɛ kɛyashi be ko, ni obɛ hegbɛ ni okɛ ojamɔŋ hemɔkɛyeli loo ohenilee jieɔ onaa, kɛ́ jeee nakai lɛ abaawo bo tsuŋ nɔ ni baanyɛ ashɛ nyɔji 30. Eyɛ mli akɛ Jeŋmaji Ekomefeemɔ Kuu lɛ ekɛɛ Singapore koni eŋmɛ gbɛ ni mɛi ni amɛjamɔŋ hemɔkɛyeli, loo amɛhenilee eŋmɛɛɛ amɛ gbɛ ni amɛtsu asraafoi anitsumɔ lɛ akatsu moŋ, shi kɛbashi bianɛ lɛ, Singapore ekpɛlɛko. Amrɔ nɛɛ awo Yehowa Odasefoi oblahii 11 tsuŋ yɛ jɛmɛ akɛni amɛhenilee eŋmɛɛɛ amɛ gbɛ ni amɛkɛ amɛhe awo asraafoi anitsumɔ mli lɛ hewɔ, ni oblahii nɛɛ ateŋ 5 lɛ, enɛ ji shii enyɔ nɔ ni awoɔ amɛ tsuŋ yɛ sane nɛɛ nɔŋŋ hewɔ.

Klikimɔ biɛ kɛdaunlodi Yehowa Odasefoi ni awo amɛ tsuŋ yɛ amɛhemɔkɛyeli hewɔ yɛ Singapore lɛ agbɛ́i.

South Korea

Yɛ October 26, 2020 lɛ, South Korea nɔyeli lɛ to gbɛjianɔ koni ahã mɛi ni amɛhenilee eŋmɛɛɛ amɛ gbɛ ni amɛkɛ amɛhe awo asraafoi anitsumɔ mli lɛ atsu nɔ kroko kɛsɔmɔ maŋ lɛ, ni atsɛɔ gbɛjianɔtoo nɛɛ yɛ Blɔfo mli akɛ alternative civilian service (ACS). Shi mɛi ewie eshi gbɛjianɔtoo nɛɛ akɛ enaa wa tsɔ, ni eji toigbalamɔ ejaakɛ ahãa atsuɔ lɛ nyɔji 36 sɔŋŋ ni ji afii 3, ni ji be ni akɛsɔmɔɔ yɛ asraafoi anitsumɔ mli lɛ toi enyɔ. Mɛi kɛ sane nɛɛ etee saneyelihei, shi yɛ afi 2024 lɛ, South Korea saneyelihe ni kwɛɔ maŋ mla saji anɔ lɛ bua akɛ, naagba ko kwraa bɛ nakai gbɛjianɔtoo lɛ he, no hewɔ lɛ aya nɔ akɛtsu nii. Eyɛ mli akɛ gbɛjianɔtoo nɛɛ naa wa tsɔ moŋ, shi Yehowa Odasefoi oblahii pii ehala akɛ amɛbaatsu ACS lɛ moŋ fe ni amɛkɛ amɛhe baawo asraafoi anitsumɔ lɛ mli. Shi kɛbashi bianɛ lɛ, Yehowa Odasefoi oblahii 14 ekpɛlɛko akɛ amɛbaatsu ACS lɛ. No hewɔ lɛ, awo amɛteŋ mɔ kome tsuŋ, ni aaye mɛi 12 asane, ni no sɛɛ lɛ ekolɛ abaawo amɛ hu tsuŋ.

Klikimɔ biɛ kɛdaunlodi Yehowa Odasefoi ni awo amɛ tsuŋ yɛ amɛhemɔkɛyeli hewɔ yɛ South Korea lɛ agbɛ́i.

Ukraine

Nɔ ni miihe ashɛ afii 30 nɛ lɛ, Yehowa Odasefoi ni yɔɔ Ukraine lɛ ená mla ko ni awo lɛ he sɛɛ. Mla lɛ ŋmɛɔ gbɛ koni mɛi ni amɛhenilee eŋmɛɛɛ amɛ gbɛ ni amɛkɛ amɛhe awo asraafoi anitsumɔ mli lɛ, atsu nɔ kroko kɛsɔmɔ maŋ lɛ. Be ni ta lɛ je shishi yɛ Ukraine yɛ February 24, 2022 lɛ, nɔyeli lɛ bi ni maŋbii lɛ kɛ amɛhe ayawo asraafoi anitsumɔ mli. Shi akɛni nɔ ko bɛ mla lɛ mli ni tsɔɔ nitsumɔi ni mɛi ni amɛjamɔ loo amɛhenilee eŋmɛɛɛ amɛ gbɛ akɛ amɛtsu asraafoi anitsumɔ lɛ baanyɛ atsu kɛ́ ta ba maŋ lɛ mli hewɔ lɛ, akɛ mɛi ni kɛɛ amɛkɛ amɛhe wooo asraafoi anitsumɔ mli lɛ tee saneyelihe ni ayawo amɛ tsuŋ. Amrɔ nɛɛ, awo Yehowa Odasefoi ejwɛ tsuŋ, ni amɔmɔ mɛi ekpaa hu ni aaye amɛsane koni ayawo amɛ tsuŋ. Mɛi etɛ komɛi ni le adesai ahegbɛi ahe mlai amli jogbaŋŋ, ni Jeŋmaji Ekomefeemɔ Kuu lɛ hala koni amɛkwɛ sane lɛ mli lɛ bɔ amaniɛ akɛ, Ukraine etsɔko mla naa nitsumɔ ko ni mɛi ni amɛjamɔ loo amɛhenilee eŋmɛɛɛ amɛ gbɛ akɛ amɛtsu asraafoi anitsumɔ lɛ baanyɛ atsu kɛ́ ta ba maŋ lɛ mli, no hewɔ lɛ, esaaa akɛ awoɔ mɛi tsuŋ yɛ sane nɛɛ he.

Klikimɔ biɛ kɛdaunlodi Yehowa Odasefoi ni awo amɛ tsuŋ yɛ amɛhemɔkɛyeli hewɔ yɛ Ukraine lɛ agbɛ́i.

“Nyɛkaia mɛi ni awo amɛ tsuŋ lɛ, tamɔ nɔ ni awo nyɛ kɛ amɛ fɛɛ tsuŋ.”—Hebribii 13:3.