Ha Ola lɛ Akpɛ!

YƐ NAAGBEE lɛ, be eshɛ ni nuumo lɛ kɛ ehiŋmɛii baana Mesia ni awo shi yɛ ehe lɛ! Kɛtsɔ ŋwɛi kpojiemɔ nɔ lɛ, Simeon le akɛ “egboŋ ja ena Nuntsɔ [Yehowa] Kristo lɛ dã.” (Luka 2:26) Shi kwɛ mlifilimɔ ni eji beni Simeon bote sɔlemɔ we lɛ ni Maria kɛ Yosef kɛ abifao Yesu wo edɛŋ lɛ! Ekɛ yijiemɔ ha Nyɔŋmɔ, ni ekɛɛ: “Agbɛnɛ ha otsulɔ aya, [Nuntsɔ Maŋtsɛ], . . . yɛ hejɔlɛ mli; ejaakɛ mihiŋmɛii ena owalaheremɔ lɛ, . . . la ni aaatɛje jeŋmaji lɛ ahiɛ ni eeewo omaŋ Israel hiɛ nyam lɛ.”—Luka 2:27-32; okɛto Yesaia 42:1-6 he.

Yesu hi shi akɛ “la” kɛha je lɛ, kɛjɛ ebaptisimɔ beni eye afii 30 lɛ nɔ aahu kɛyashi egbele mli. Yɛ mɛɛ gbɛi anɔ? Egbɛ mumɔŋ la eshwã kɛtsɔ Nyɔŋmɔ Maŋtsɛyeli kɛ E-yiŋtoi ni eshiɛ etsɔɔ lɛ nɔ. Ekpa jamɔ mli amale tsɔɔmɔi ahe mama ni etsɔɔ nibii ni ji duŋ nitsumɔi lɛ faŋŋ ni ana ale. (Mateo 15:3-9; Galatabii 5:19-21) No hewɔ lɛ, Yesu nyɛ ewie yɛ gbɛ ni ja nɔ akɛ: “Mi ji le lɛ mli la lɛ.”—Yohane 8:12.

Yesu gbo yɛ afi 33 Ŋ.B. Ani la lɛ gbo yɛ nakai beaŋ? Eka shi faŋŋ akɛ dabi kwraa! Beni eyɔɔ shikpɔŋ nɛɛ nɔ lolo lɛ, Yesu kɛɛ ekaselɔi lɛ akɛ: “Nyɛhaa nyɛla atsoa yɛ gbɔmɛi ahiɛ.” (Mateo 5:16) Yɛ enɛ kɛ gbeekpamɔ naa lɛ, yɛ Yesu gbele sɛɛ lɛ, esɛɛnyiɛlɔi lɛ tee nɔ amɛha la lɛ kpɛ.

Kristofoi jieɔ Yehowa la lɛ kpo amɛtsɔɔ ŋmɛnɛ kɛtsɔɔ amɛhe ni amɛkɛwoɔ shiɛmɔ nitsumɔ lɛ mli lɛ nɔ, yɛ Yesu kasemɔ mli. ‘Amɛyaa nɔ amɛnyiɛɔ tamɔ la bii,’ ni amɛkɛmaa nɔ mi akɛ amɛji Kristofoi ashihilɛ he nɔkwɛmɔ nii ni mɛi fɛɛ naa faŋŋ.—Efesobii 5:8.