Maŋtsɛyeli Jajelɔi Bɔ Amaniɛ

Tsutsu Henyɛlɔi Efee Ekome Kɛmiisɔmɔ Yehowa

“KLƐŊKLƐŊ kwraa ni minu Yehowa Odasefoi ahe sane ji be mli ni misɔmɔɔ akɛ asraafonyo bulɔ yɛ Bosnia,” taakɛ Branko tsɔɔ mli lɛ.a

Branko miitsu nii akɛ bulɔ yɛ helatsamɔ he ni akwɛɔ mɛi ni epila lɛ yɛ lɛ. Datrɛfoi lɛ ateŋ mɔ kome kɛ Odasefoi kaseɔ Biblia lɛ, ni beni eshɛ enɔ kɛha gbɛkɛ nitsumɔ lɛ, etsɔɔ Branko nibii babaoo ni ekase yɛ Biblia lɛ he lɛ mli jogbaŋŋ.

Nɔ ni Branko nu nakai gbɛkɛ lɛ tsirɛ lɛ waa, aahu akɛ eŋmɛɛ etu lɛ he efɔ̃ shi amrɔ nɔŋŋ. Etao Odasefoi lɛ asɛɛ gbɛ, ni eetao ni ekase nibii babaoo. No sɛɛ be fioo ko, beni efã kɛyahi Europa maŋ kroko nɔ lɛ, Branko tao he ni Maŋtsɛyeli Asa yɔɔ ni etee Yugoslaviabii Yehowa Odasefoi asafo lɛ kpee ko. Jɛmɛ ji he ni Branko kɛ Slobodan yakpe yɛ.

Slobodan hu jɛ Bosnia kɛba jɛmɛ, ni etsu nii akɛ mɔ ni kɛ ehe eha yɛ nakai ta koome lɛ nɔŋŋ mli tamɔ Branko nɔŋŋ—shi amɛfata fãi sɔrɔtoi enyɔ he kɛwuu. Slobodan wuu eha Serbiabii, kɛte shi ewo Croatiabii lɛ. Beni mɛi enyɔ lɛ kpeɔ lɛ, no mli lɛ Slobodan ebatsɔ Yehowa Odasefonyo ni abaptisi lɛ. Ekɛɛ Branko, etsutsu henyɛlɔ lɛ akɛ eesumɔ ni ekɛ lɛ akase Biblia lɛ. Beni nikasemɔ lɛ yaa nɔ lɛ, Branko kase Yehowa he nii babaoo, ni suɔmɔ ni eyɔɔ kɛha Nyɔŋmɔ lɛ bada waa. Enɛ tsirɛ Branko ni ejɔɔ ewala nɔ eha Bɔlɔ lɛ. Yɛ October 1993 mli lɛ, ekɛ nu mli baptisimɔ fee ehenɔjɔɔmɔ lɛ he okadi.

Mɛɛ gbɛ nɔ tsɔ ni Slobodan batsɔ Yehowa Odasefonyo? Eshi he ni awuɔ ta lɛ yɛ lɛ yɛ Bosnia be saŋŋ kɛtsɔ hiɛ. No mli lɛ ekane Odasefoi awoji lɛ ekomɛi, shi Odasefoi enyɔ komɛi ba eŋɔɔ yɛ shia yɛ 1992 shishijee mli gbɛ dani miishɛɛ ni eyɔɔ yɛ Nyɔŋmɔ Wiemɔ lɛ he lɛ babɔi daa. Namɔ tee Slobodan ŋɔɔ, ni ekɛɛ lɛ akɛ ekɛ lɛ baakase Biblia lɛ? Lɛ ji Mujo, ni lɛ hu ejɛ Bosnia, shi lɛ lɛ atsɔse lɛ akɛ Muslim. Beni Biblia mli nikasemɔ lɛ yaa hiɛ lɛ, Mujo kɛ Slobodan, ni be ko lɛ henyɛlɔi ji amɛ lɛ, naa be ni amɛtaraa shi yɛ he kome kutuu daa gbi ni amɛwoɔ amɛhemɔkɛyeli hewalɛ.

Ta ni awuu yɛ tsutsu Yugoslavia lɛ ekpata gbɔmɛi akpei ohai abɔ awala hiɛ. Shi amrɔ nɛɛ Branko, Slobodan, kɛ Mujo miisɔmɔ akɛ sanekpakpa lɛ he be-fɛɛ shiɛlɔi yɛ Yehowa Odasefoi asafo kome lɛ nɔŋŋ mli. Amɛye wekui kɛ wiemɔ kui ateŋ béi nɔ kunim, ni amrɔ nɛɛ amɛtaoɔ toiŋjɔlɛ sɛɛ gbɛ, yɛ be mli ni amɛbaa amɛhe shi amɛhaa Bɔlɔ lɛ, Yehowa.

Shi mɛni kɛ tsakemɔi nɛɛ ba? Suɔmɔ ni amɛyɔɔ kɛha Yehowa, kɛ bulɛ ni amɛyɔɔ kɛha Biblia lɛ, kɛ shwe ni amɛshweɔ ni amɛkɛ Biblia mli anɔkwale lɛ atsu nii yɛ amɛshihilɛ mli lɛ. Taakɛ Ŋmalɛ Krɔŋkrɔŋ lɛ kɛɔ lɛ, “Nyɔŋmɔ wiemɔ hiɛ kã ni eyɛ hewalɛ . . . ni eji tsuiiaŋ susumɔi kɛ jwɛŋmɔi lɛ akojolɔ.”—Hebribii 4:12.

[Shishigbɛ niŋmaa]