Amɛbua Amɛhe Naa akɛ Yijielɔi ni Yɔɔ Miishɛɛ
BENI Nyɔŋmɔ blema webii lɛ bua amɛhe naa kɛha jamɔ lɛ, afa amɛ ni ‘amɛmii ashɛ amɛhe jogbaŋŋ.’ (5 Mose 16:15) Yɛ anɔkwale mli lɛ, Yehowa Odasefoi 1995/96 “Miishɛɛ Yijielɔi” Kpokpaa Wulu nɔ Kpeei lɛ eha amɛna yiŋtoi kpakpai ni amɛaadamɔ nɔ amɛna miishɛɛ.
Kɛjɛ be mli ni kpeei ni afeɔ kɛtsaraa nɔ nɛɛ je shishi lɛ, amɛtswa hemɔkɛyeli amɛma shi. Amɛtsɔɔ bɔ ni aaafee ana miishɛɛ hu yɛ jeŋ ni miishɛɛ bɛ mli lɛ mli. Nyɛhaa wɔsusua kpee gbii lɛ ahe gbi kome gbi kome wɔkwɛa.
‘Nyɛjiea Yehowa Yi, Nyɛ Gbɔmɛi . . . Nyɛmii Ashɛa Nyɛhe!’
Kpee lɛ klɛŋklɛŋ gbi lɛ yitso damɔ Lala 149:1, 2 nɔ. Wiemɔ, “Wɔyɛ Yiŋtoo ni Wɔɔdamɔ nɔ Wɔmli Afili Wɔ kɛ Miishɛɛ” lɛ wie gbɛ ni aaatsɔ nɔ akɛ gbalɛ ni yɔɔ Yesaia yitso 35 lɛ atsu nii lɛ he. Eba mli yɛ blema Israel kɛ titri lɛ yɛ wɔgbii nɛɛ amli beni asaa akɛ Yehowa jalɔi ba shweremɔ kɛ hewalɛnamɔ mli ekoŋŋ yɛ mumɔŋ paradeiso lɛ. No hewɔ lɛ, kpeeyalɔi lɛ yɛ nɔ ni amɛaadamɔ nɔ amɛbolɔ kɛ miishɛɛ yɛ nɔ ni Nyɔŋmɔ eto eyiŋ yɛ he kɛha ewebii yɛ mumɔŋ paradeiso kɛ agbɛnɛ yɛ Paradeiso diɛŋtsɛ ni ebaa ebɛŋkɛ kpaakpa lɛ mli lɛ hewɔ.
Wiemɔ krɛdɛɛ, “Aje Gbɛ Ahala Amɛ akɛ Yijielɔi ni Yɔɔ Miishɛɛ yɛ Jeŋ Fɛɛ,” lɛ ha sanebimɔ: Mɛni haa esoroɔ wɔ yɛ je nɛɛ he? lɛ hetoo. No ji ekome ni wɔfee ni wɔkɛjaa Yehowa lɛ. Yehowa Odasefoi wieɔ ni amɛtsɔɔ nii yɛ ekomefeemɔ mli, ni he fɛɛ he ni amɛhiɔ yɛ shikpɔŋ nɛɛ nɔ lɛ kɔɔɔ he eko. Amɛmli filiɔ amɛ hu yɛ Yehowa yiŋtoo wulu akɛ ebaatse egbɛi krɔŋkrɔŋ lɛ he ni ebu jeŋ muu fɛɛ maŋtsɛ ni eji lɛ bem kɛtsɔ e-Maŋtsɛyeli lɛ nɔ lɛ hu he. Shi, mɛɛ gbɛ nɔ Yehowa tsɔɔ eyeɔ ebuaa wɔ yɛ koni wɔna gbɛhe yɛ eyiŋtoo mli? Ekɛ e-Wiemɔ krɔŋkrɔŋ lɛ mli anɔkwale lɛ ewo wɔdɛŋ. Nyɔŋmɔ kɛ emumɔ krɔŋkrɔŋ lɛ eha wɔ. Ekɛ jeŋ muu fɛɛ nyɛmifeemɔ kɛ gbɛjianɔtoo kɛha jamɔ krɔŋŋ ejɔɔ wɔ. Wɔ majimaji ateŋ weku lɛ yeɔ ebuaa wɔ koni wɔkɛ miishɛɛ babaoo ni eyi tsuiŋ obɔ asɔmɔ Yehowa.
“Wɔhe ni Wɔɔtse ni Je lɛ Akawo Wɔhe Muji” lɛ ma bɔ ni ehe hiaa ni hiɛaŋkwɛmɔ kɛ gbɔmɛi amlijiemɔ he tɔmɔ akaba wɔteŋ lɛ nɔ mi. (Yakobo 2:5-9) Ekolɛ mɛi komɛi kɛ mɛi ni amɛshihilɛ tamɔ amɛ nɔ̃ loo amɛji niiatsɛmɛi lɛ pɛ baabɔ, ni amɛbaaku amɛhiɛ amɛshwie nanemɛi Kristofoi ni ji ohiafoi loo amɛbɛ nii lɛ anɔ. Ekolɛ mɛi krokomɛi baasumɔ mɛi ni yɔɔ gbɛnaa nii yɛ asafo lɛ mli lɛ asane. Amɛhiɛ kpaa nɔ akɛ hegbɛ ni da fe fɛɛ ni mɔ ko baanyɛ ana ji Odasefonyo ni eji kɛha Yehowa. No hewɔ lɛ, wɔkaŋmɛ gbɛ ni je lɛ sui wo wɔhe muji ni efite toiŋjɔlɛ ni yɔɔ asafo lɛ mli lɛ.—2 Petro 3:14.
Wiemɔ, “Ani Misaa Mihe akɛ Mabote Gbalashihilɛ Mli?” lɛ tsɔɔ mli akɛ mɛi pii boteɔ gbalashihilɛ mli oya tsɔ̃. Mɛi komɛi boteɔ gbalashihilɛ mli koni amɛjo shihilɛ ko ni mli wa yɛ shia lɛ naa foi, loo akɛni amɛ tipɛŋfoi miibote gbalashihilɛ mli hewɔ. Shi kɛlɛ, nɔ ni fata yiŋtoi ni sa kɛha gbalashihilɛ lɛ he ji bɔ ni mɛi enyɔ lɛ fɛɛ sumɔɔ ni amɛtiu teokrase otii, suɔmɔ diɛŋtsɛ, bɔ ni hefatalɔ kɛ shweshweeshwe feemɔ he ehia, kɛ bɔ ni ashweɔ akɛ aaafɔ bii. Mumɔŋ tsɔsemɔ he miihia yɛ hesaamɔ kɛha gbalashihilɛ mli lɛ mli. Nibii krokomɛi hu ji, bɔ ni ehe hiaa ni ana sui ni asumɔɔ kɛtsɔ gbɔmɔ hee lɛ woo nɔ. Nilee yɛ mli hu akɛ aaabi ni ale kɛji akɛ tsakpaa diɛŋtsɛ yɛ hefatalɔ ni akpaa lɛ gbɛ lɛ kɛ Yehowa teŋ, ni ekɛ bulɛ haa mɛi krokomɛi. Nilee yɛ ŋaawoo ni ataoɔ kɛjɛɔ Kristofoi ni amɛdara lɛ aŋɔɔ hu mli.—Abɛi 11:14.
Nɔ ni nyiɛ sanegbaa ni haa mɔ hiɛtɛjemɔ nɛɛ sɛɛ ji eko ni eyitso ji, “Fɔlɔi ni Naa Amɛbii Ahe Miishɛɛ.” Bi fɔmɔ feɔ miishɛɛ kpele be yɛ bei pii amli. Shi, bii afɔmɔ hu kɛ gbɛnaa nii ni tsii baa. (Lala 127:3) No hewɔ lɛ, ehe miihia ni atsɔɔ gbekɛbii lɛ ni amɛsumɔ Yehowa. Fɔlɔi baanyɛ afee enɛ kɛtsɔ Yehowa he ni amɛaawie amɛtsɔɔ amɛbii lɛ be fɛɛ be, kɛ e-Wiemɔ lɛ mli shishitoo mlai ni amɛkɛaatsu nii yɛ weku lɛ mli lɛ nɔ.
Kpee lɛ klɛŋklɛŋ gbi lɛ ba naagbee kɛ naakpɛɛ sane—wolo hee bibioo, Yehowa Odasefoi kɛ Wolo-Kasemɔ ni ajie lɛ kpo. Etsɔɔ mli faŋŋ akɛ Odasefoi “woɔ amɛbii lɛ hewalɛ ni amɛtsu nii waa ni amɛkɛ hiɛdɔɔ atsu nitsumɔi ni akɛwoɔ amɛdɛŋ yɛ skul lɛ ahe nii.” Wolo nɛɛ hu tsɔɔ nii ni yɔɔ naakpɛɛ ni ejɛ nikanemɔ kɛ niŋmaa skul sɔrɔtoi ni Yehowa Odasefoi efee afii babaoo yɛ Nigeria, Mexico, kɛ maji krokomɛi anɔ lɛ mli eba. Esa akɛ wolo bibioo lɛ aye abua tsɔɔlɔi ni amɛna akɛ wɔbuɔ wolo-kasemɔ akɛ ehe hiaa waa.
“Okɛ Yijiemɔ Afɔle Aha Nyɔŋmɔ Daa”
Akɛ gbi ni ji enyɔ lɛ saneyitso damɔ Hebribii 13:15 nɔ. Leebi gbɛjianɔtoo lɛ kɛ wiemɔi ni ahaa kɛtsaraa nɔ, “Tsɛmɔ akɛ Ajie Yehowa Yi lɛ Nɔheremɔ” ba. Afii abɔ ni mɔ ko eye etsiii tsɛmɔ nɛɛ nɔheremɔ naa. Lala 148:12 woɔ obalahii, obalayei, onukpai kɛ gbekɛbii ahewalɛ ni amɛjie Yehowa yi. Yehowa tsuji ni yɔɔ miishɛɛ lɛ ateŋ mɛi pii enyɛ amɛha amɛ yijiemɔ lɛ etee hiɛ. Mɛi fe 600,000 naa be-fɛɛ shiɛmɔ nitsumɔ, loo gbɛgbamɔ sɔɔmɔ lɛ mli gbɛfaŋnɔ yɛ jeŋ fɛɛ. Mɛi fe 14,000 kɛ amɛhe woɔ gbɛgbamɔ krɛdɛɛ nitsumɔ lɛ mli, ni mɛi ni fe 15,000 yɛ Betel sɔɔmɔ mli.
“Yehowa Gbɛjianɔtoo lɛ ni Wɔkɛ lɛ Aaasɔmɔ yɛ Anɔkwayeli Mli” ji wiemɔ ni tsɔɔ akɛ anɔkwayeli he miihia Nyɔŋmɔ tsuji. Ni aaaye Yehowa anɔkwa tsɔɔ ehe ni aaakpɛtɛ kɛ hetuu-kɛhamɔ ni mli wa aahu akɛ efeɔ tamɔ ama ko ni kpɛtɛɔ nii ahe waa. Anɔkwayeli biɔ ni wɔkwa gbɛ ni wɔɔje wɔku Biblia kitai amli, kɛ mɛi krokomɛi naa wɔ loo anaaa wɔ. Ebiɔ hu ni wɔkɛ anɔkwayeli afi Biblia tsɔɔmɔi ni anaa yɛ Buu-Mɔɔ lɛ kɛ Awake! woji tɛtrɛbii lɛ amli lɛ kɛ agbɛnɛ mumɔŋ niyenii krokomɛi fɛɛ ni Buu Mɔɔ Asafo lɛ kɛhaa lɛ sɛɛ. Nɔ ni nyiɛ wiemɔ nɛɛ sɛɛ ji baptisimɔ wiemɔ lɛ. Mɛɛ miishɛɛ ana nɛkɛ, beni mɛi ni kɛ amɛhe ha ni abaptisi amɛ lɛ kɛ amɛ henɔjɔɔmɔ kɛha Yehowa lɛ he odaseyeli ha lɛ!
Wiemɔi ni yɔɔ Hoshea 4:1-3 lɛ kɛ nɔkwɛmɔ nɔ kɛha shwane wiemɔ, “Jeŋba Kpakpa loo Jeŋba Gbonyo—Te Nɔ ni Odiɔ Sɛɛ?” lɛ ha. Eyɛ mli akɛ bɔ ni je lɛ buɔ jeŋba kpakpa ehaa lɛ efite moŋ, shi esa akɛ Kristofoi ajie “mɔdɛŋbɔɔ fɛɛ” kpo ni amɛkɛtiu jeŋba ni nɔ bɛ. (2 Petro 1:5) Enɛ jeɔ shishi kɛ bɔ ni mɔ ko jwɛŋɔ ehaa. Kɛ esusumɔi hi lɛ, ebaawie wiemɔi ni he tse, ni hi, ni tswaa mɔ emaa shi, ni ebaabɔ mɔdɛŋ ni eye anɔkwa yɛ bɔ ni ekɛ mɛi yeɔ haa lɛ mli. Jeŋba kpakpa sɛɛdii hu tsɔɔ mɔdɛŋ ni abɔɔ koni afee mɔ ni nuɔ sane shishi kɛ mɔ ni naa naanyo Kristofonyo ni miipiŋ yɛ haomɔ loo nɔnyɛɛ ko hewɔ lɛ mɔbɔ.—1 Tesalonikabii 5:14.
Wiemɔ kroko, “Kwɛmɔ Ohe Jogbaŋŋ yɛ Abonsam Tsɔnei Ahe,” lɛ bɔ Kristofoi kɔkɔ yɛ amɛhe ni amɛaaŋmɛɛ amɛha daimonioi ahewalɛi lɛ he. Yɛ helatsamɔ gbɛfaŋ lɛ, esa akɛ Kristofoi akwɛ gbɛ ni atsɔɔ nɔ atsuɔ enɛ he nii, tamɔ mɛi ajwɛŋmɔ nɔ hewalɛ ni anaa, ni tamɔ mumɔi atsɛmɔ nifeemɔ lɛ jogbaŋŋ. Kɛ jeee nakai lɛ, nɔ ni aŋkroaŋkroi feɔ ni amɛkɛkwɛɔ amɛ gbɔmɔtsoŋ hewalɛnamɔ nɔ lɛ ji amɛ diɛŋtsɛ amɛ teemɔŋ sane.
Gbi ni ji enyɔ lɛ ba naagbee kɛ naakpɛɛ nii ni yɔɔ miishɛɛ—wolo hee ni anyɛɔ akɛwoɔ kotoku mli ni aje gbɛ afee koni akɛye abua gbɔmɛi ni yɔɔ tsuijurɔ lɛ ni amɛya amɛhiɛ oyayaayai kɛyashɛ henɔjɔɔmɔ kɛ baptisimɔ he. Wolo hee ni hiɛ baafai 192 nɛɛ gbɛi ji Nilee Ni Kɛ Mɔ Yaa Naanɔ Wala Mli. Nilee wolo lɛ kɛ anɔkwale lɛ haa yɛ gbɛ ni tswaa mɔ maa shi nɔ. Ewieee apasa tsɔɔmɔi ni ahaa anaa akɛ ebɛ mli lɛ ahe tsɔ̃. Esa akɛ bɔ ni wiemɔ lɛ mli tse ha kɛ sane naatsɔɔmɔ ni ja kɛ nitsumɔ lɛ aha wolo nɛɛ kɛ Biblia kasemɔi afee mlɛo, ni eye ebua ni gbɔmɛi anu Nyɔŋmɔ he nilee ni shɛjeɔ mɔ mii lɛ shishi.
“Nyɛnyaa ni Nyɛmli Afilia Nyɛ Kɛyaa Naanɔ”
Wiemɔi ni jɛ Yesaia 65:18 nɛɛ ji kpee lɛ gbi ni ji etɛ lɛ saneyitso. Biblia gbalɛ mlibaa kɛ enine tsɔɔ 1914 akɛ afi ni yiwalɛ gbɛjianɔtoo nɛɛ bote enaagbee gbii lɛ amli. No hewɔ lɛ wiemɔi ni ahaa kɛtsaraa nɔ ni eyitso ji “Miishɛɛ Yijielɔi ni Yɔɔ Gbɛjianɔtoo Nɛɛ Naagbee Mli” lɛ gbala toibolɔi lɛ ajwɛŋmɔ waa. Wielɔi lɛ tsɔɔ bɔ ni je nɛɛ hiɛjoomɔ kɛ yiwalɛ mumɔ lɛ gbalaa akpekpei toi akpei abɔ kɛyaa lɛ mli. Yɛ be ni sa mli lɛ, amɛbaabote kojomɔ mli akɛ je ni Satan ji enɔyelɔ lɛ fã. No hewɔ lɛ, be ni akɛaahala nii amli lɛ nɛ. Mɛɛ afa wɔsumɔɔ ni wɔhi? Ani wɔmiisumɔ ni wɔja Yehowa ni wɔfi maŋtsɛ ni eji lɛ sɛɛ, aloo wɔbaaŋmɛ gbɛ ni Satan afee wɔ nɔyelɔ, kɛtsɔ nibii ni saa ehiɛ ni wɔɔfee nɔ? Esa akɛ wɔ fɛɛ wɔdamɔ Yehowa masɛi ni yiŋkɔshikɔshi-feemɔ bɛ mli.
Kpee lɛ maŋshiɛmɔ, “Nyɛjiea Naanɔ Maŋtsɛ lɛ Yi!” lɛ kɛ sane ni mli wa ni abaanyɛ ajwɛŋ he ha mɛi fɛɛ ni ba kpee lɛ. Eyɛ mli akɛ naanɔ he jwɛŋmɔ tamɔ nii ni tekeɔ adesai ni yɔɔ wudɔɔ lɛ ajwɛŋmɔ moŋ, shi Yehowa nuɔ shishi kwraa. Lalatsɛ lɛ la akɛ: “Yehowa ji maŋtsɛ kɛjɛ naanɔ kɛyashi naanɔ.” (Lala 10:16) Nɛkɛ naanɔ Maŋtsɛ nɛɛ egbele gbɛ kɛha adesai koni amɛna naanɔ wala mli ŋɔɔmɔ kɛtsɔ e-Bi, Yesu Kristo nɔ. (Yohane 17:3) Wielɔ lɛ kɛɛ: “Hɛɛ, wɔ adesai eshafeelɔi lɛ baanyɛ ana naanɔ wala kɛtsɔ ŋwɛi tsɔsemɔ kɛ Yesu kpɔmɔ afɔleshaa lɛ mli hemɔkɛyeli nɔ.”
Beni kpee lɛ bɛŋkɛɔ enaagbee lɛ, naagbee wiemɔ, ni eyitso ji, “Nyɛkɛ Miishɛɛ Ajiea Yehowa Yi Gbi Fɛɛ Gbi” lɛ wo mɛi ni ba lɛ hewalɛ waa. Eji miishɛɛ sane akɛ aaanu nɔyaa he amaniɛbɔɔi ni kɔɔ kaselɔ-feemɔ nitsumɔ lɛ he yɛ jeŋ fɛɛ. Ni etsirɛ kpeeyalɔi lɛ koni ‘amɛjɔɔ Yehowa gbi fɛɛ gbi ni amɛjie egbɛi lɛ yi kɛya naanɔ.’—Lala 145:2.
Adesa ni afeɔ lɛ niseniianii ni anyɛŋ awie he haaa je lɛ ana miishɛɛ. Shi kɛlɛ, aŋkroaŋkroi ni yɔɔ Yehowa mli hemɔkɛyeli ni yeɔ emuu baanyɛ ana miishɛɛ ni Nyɔŋmɔ gbeyeishemɔ yɔɔ mli. Akɛni amɛji jeŋ muu fɛɛ nyɛmifeemɔ hewɔ lɛ, Yehowa Odasefoi baanyɛ ati Lala 35:27, 28 mli wiemɔi ni nyiɛ sɛɛ nɛɛ amli: “Mɛi ni naa mijalɛ lɛ he miishɛɛ lɛ, ha amɛbɔ oshe kɛ nyamɔ; amɛkɛɛ daa akɛ: ‘Yehowa je agbo, lɛ mɔ ni enaa etsulɔ ejurɔyeli he miishɛɛ lɛ!’ Ni mililɛi aaagba ojalɛ kɛ oyijiemɔ lɛ he sane daa nɛɛ.”
[Mfonirii ni yɔɔ baafa 7]
Wekui baana wolo bibioo, “Yehowa Odasefoi kɛ Wolo-Kasemɔ” lɛ he sɛɛ
[Mfonirii ni yɔɔ baafa 8, 9]
Wolo hee, “Nilee Ni Kɛ Mɔ Yaa Naanɔ Wala Mli” lɛ kɛ Biblia mli anɔkwalei haa yɛ gbɛ ni tswaa mɔ maa shi nɔ
[Mfoniri ni yɔɔ baafa 9]
Abaptisi mɛi pii akɛfee amɛ henɔjɔɔmɔ kɛha Yehowa lɛ he okadi
[Mfoniri ni yɔɔ baafa 9]
Drama, “Woo ni Akɛaaha Mɛi ni Sa lɛ Yɛ Amɛ Gbɔlɛ Afii Amli” lɛ kanya mɛi ni baa kpee lɛ waa