Jamɔ Mli Nifeemɔ ni Shishinumɔ Bɛ Mli?

KATOLIKBII kɛ amɛhe ewo jamɔ nifeemɔ ni ji esha-jajemɔ mli afii ohai pii. Kɛlɛ, kɛha mɛi pii lɛ, eji nifeemɔ ni sɛɛnamɔ ko bɛ he. Beni nɔtsamɔ skul nɔkwɛlɔ ko ni atsɛɔ lɛ Bob susuɔ egbekɛbiiashi he lɛ, ekɛɛ: “No mli lɛ miyeko afii nyɔŋmai enyɔ, ni mibuuu lɛ akɛ eji hiɛdɔɔ sane yɛ nakai beaŋ po.” Mɛni hewɔ? Kɛha lɛ lɛ, esha-jajemɔ ebatsɔ kusum nifeemɔ ni shishinumɔ bɛ mli. Etsɔɔ mli akɛ: “Esha-jajemɔ tamɔ nɔ ni okɛ odekai fɛɛ ni eyi obɔ kɛ eshai miiba abaha nuu ni heɔ too yɛ kɔɔyɔŋ lɛji adaamɔ he lɛ. Ebiɔ bo ohe eshai lɛ ahe saji, kɛkɛ lɛ eha otsɔ mli kɛho beni owo too yɛ nibii fɛfɛji komɛi ni ohe beni oyɔɔ maŋsɛɛ lɛ he lɛ.”

Nakai nɔŋŋ hu beni Frank Wessling ŋmaa yɛ U.S. Catholic lɛ mli lɛ, etsɔɔ esha-jajemɔ ni yaa nɔ lɛ mli akɛ “gbɛtsɔɔmɔ ni yɔɔ mlɛo kwraa ni eko nyiɛ eko sɛɛ, ni jeɔ shishi kɛjɛɔ eshai bibii ni afolɔɔ mli nɔ kɛtsɔ tsuitsakemɔ he sɔlemɔ ni akase awo yitsoŋ ni akɛɔ kɛyaa kusum nifeemɔ ni damɔ sɔlemɔ lɛ mla kɛ esha he awerɛho fioo ni ayeɔ nɔ.” Te Wessling mu sane naa eha tɛŋŋ? Ekɛɛ: “Miyɛ nɔmimaa akɛ Esha-jajemɔ hi kɛha susuma lɛ. Shi gbɛ ni Katolikbii tsɔɔ nɔ amɛfeɔ lɛ lɛ ji naagba.”

Biblia lɛ tsɔɔ esha-jajemɔ mli yɛ gbɛ ni yɔɔ sɔrɔto kwraa nɔ. Nɔ ni he hiaa fe fɛɛ ji esha ni aaajaje atsɔɔ Nyɔŋmɔ. (Lala 32:1-5) Ni Kristofonyo kaselɔ Yakobo ŋma akɛ: “Kɛ nyɛteŋ mɔ ko he waaa lɛ lɛ, etsɛ asafo lɛ mli onukpai lɛ kɛba eŋɔɔ, ni amɛkpa lɛ mu yɛ Nuntsɔ [Yehowa] gbɛi amli ni amɛsɔle amɛha lɛ, . . . Nyɛjajea nyɛ nɔtɔmɔi nyɛtsɔɔa nyɛhe, ni nyɛsɔlea nyɛhaa nyɛhe, ni nyɛhe atã.”—Yakobo 5:14, 16.

Kristofonyo ni esha etsii yɛ enɔ lɛ baanyɛ atsɛ asafo lɛ mli nɔkwɛlɔi lɛ, ni amɛbaanyɛ amɛkɛ ŋaawoo ni jɛ Biblia lɛ mli ni anyɛɔ atsuɔ he nii aha, koni eye ebua efɔŋ feelɔ lɛ ni etsi ehe kɛjɛ eshafeemɔ gbɛ lɛ he. Nɔkwɛlɔi lɛ baanyɛ amɛkɛ hewalɛwoo ni sa aha yɛ be mli ni amɛkwɛɔ bɔ ni mɔ ni he yeɔ yɛ mumɔŋ lɛ yaa nɔ ehaa lɛ. Kwɛ bɔ ni esoro enɛ kwraa yɛ esha-jajemɔ he kusum nifeemɔ ni yaa nɔ yɛ sɔlemɔi lɛ amli ŋmɛnɛ lɛ he! Akɛni yelikɛbuamɔ ni asafo lɛ mli onukpai lɛ kɛhaa lɛ wajeɔ amɛ hewɔ lɛ, efɔŋ feelɔi ni amɛtsake amɛtsui lɛ baanyɛ ana hejɔlɛ ni David nu he lɛ eko, taakɛ ewie he yɛ lala ko mli lɛ: “Mijaje mihe esha mitsɔɔ, ni minɔsha lɛ, mikɛteee. Mikɛɛ akɛ: ‘Majaje minɔtɔmɔ matsɔɔ Yehowa.’ Ni bo lɛ, okɛ mihe esha nɔsha lɛ fa mi.”—Lala 32:5.