Nikasemɔ Kɛmiijɛ Loofɔji kɛ Fɔfɔii Aŋɔɔ

MƐNI gbɔmɛi susuɔ he yɛ bei pii amli ŋmɛnɛ fe nɔ fɛɛ nɔ? Kɛha mɛi ni fa lɛ, no ji shika ni fa ni amɛaana ni amɛkɛkwɛ amɛ weku loo ni amɛaaha amɛshihilɛ aya hiɛ.

Ni mɔ ko aaana shika ni fa ni ekɛaakwɛ ehe kɛ eweku hu ji nɔ titri ni asusuɔ he beni Yesu Kristo yɔɔ shikpɔŋ nɔ lɛ. Shi ebɔ kɔkɔ akɛ, nii ahesusumɔ ni ja nɛɛ baanyɛ atsɔ yeyeeye-feemɔ ni tsiɔ mumɔŋ nibii agbɛ. Bɔni afee ni efee enɛ he nɔkwɛmɔ nɔ lɛ, Yesu kɛɛ ekaselɔi lɛ akɛ amɛkwɛ loofɔji kɛ fɔfɔii jogbaŋŋ.

Ehe miihia ni loofɔji aye nii gbi fɛɛ gbi—kɛ aja mli lɛ babaoo fe bɔ ni wɔfeɔ, yɛ bɔ ni amɛ niyeli babaoo kɛ egbɛlɛmɔ yɛ amɛ musuŋ he gbɛjianɔtoo lɛ ji hewɔ. Agbɛnɛ hu, amɛnyɛŋ amɛdu wui, amɛkpa, loo ni amɛbua niyenii anaa amɛto kɛha wɔsɛɛ. Ni kɛlɛ, taakɛ Yesu kɛɛ lɛ, wɔ “Tsɛ ni yɔɔ ŋwɛi lɛ lɛɔ amɛ kɛ̃.” (Mateo 6:26) Nakai nɔŋŋ hu Nyɔŋmɔ kɛ hehaa nii fɛfɛji wulaa “ŋa nɔ fɔfɔii.”—Mateo 6:28-30.

Yesu maa nɔ mi kɛhaa wɔ akɛ, kɛ wɔha heloonaa hiamɔ nii hi amɛ gbɛhe ni sa, ni wɔha mumɔŋ nibii fee nɔ ni he hiaa waa lɛ, Nyɔŋmɔ baakwɛ ni wɔ hu wɔna niyenii kɛ hehaa nii ni he hiaa. Kɛji akɛ Yehowa Nyɔŋmɔ kwɛɔ loofɔji kɛ fɔfɔii lɛ, bɔ fɛɛ bɔ ni ji lɛ, ebaakwɛ mɛi ni sumɔɔ lɛ ni ‘amɛyaa nɔ amɛtaoɔ maŋtsɛyeli lɛ kɛ ejalɛ lɛ’ kɛ̃. (Mateo 6:33) Ani okɛ Nyɔŋmɔ Maŋtsɛyeli lɛ he nibii miiye klɛŋklɛŋ gbɛhe yɛ oshihilɛ mli?