‘Oo, Mina ni Kulɛ Mɔ Fɛɛ Mɔ Tamɔ Amɛ!’

Enɛ ji wiemɔi ni adafitswaa wolo mli niŋmalɔ ko ŋma yɛ Luxembourg adafitswaa wolo ni atsɛɔ lɛ Letzebuerger Journal lɛ mli. Namɛi ahe ewieɔ nɛɛ?

Etee Poland kɛha Auschwitz kpɔmɔ lɛ afii 50 namɔ he gbijurɔyeli lɛ ni ekadi akɛ atsĩii kuu kome ko ni na amanehulu babaoo diɛŋtsɛ yɛ jɛmɛ lɛ tã kwraa. Etsɔɔ mɛi ni nɛkɛ kuu nɛɛ ji yɛ eniŋmaa ni je kpo yɛ February 2, 1995 lɛ mli akɛ Yehowa Odasefoi, ni eŋma akɛ: “Tsuŋwoo he loo gbokɛlɛfoi aŋsara ni jɛmɛ wa waa fe fɛɛ, aloo amɛhe gbeyeiwoo akɛ amɛhiɛ baakpata yɛ tsuŋwoo hei ni akɛ hɔmɔ waa mɛi ayi lɛ amli, aloo yɛ lema loo tsɔne ni akɛfolɔɔ mɛi ayi lɛ anaa lɛ eko kwraa haaa amɛkpoo amɛhemɔkɛyeli lɛ.” Etee nɔ akɛ: “SS asraafoi ni yitseiaŋ wa waa lɛ po anaa kpɛ amɛhe yɛ ekaa ni Yehowa Odasefoi kɛtee amɛgbele mli tɔ̃ɔ lɛ he.”

Yehowa Odasefoi taooo gbele akɛ la odasefoi. Shi, taakɛ Kristofoi ni hi shi yɛ klɛŋklɛŋ afii oha lɛ mli lɛ ji lɛ, amɛteŋ mɛi akpei abɔ hala gbele moŋ fe ni amɛaaŋmɛɛ amɛ Kristofoi ashishitoo mlai ahe ni akɛsaa. Hemɔkɛyeli ni tamɔ nɛkɛ kadi amɛ akɛ esoro amɛ kwraa yɛ Third Reich yiwalɛ nɔyeli gbii lɛ amli.

Niŋmalɔ nɛɛ kɛfata he akɛ: “Oo, mina ni kulɛ gbɔmɛi fɛɛ tamɔ Yehowa Odasefoi!” Eji amɛtamɔ amɛ kulɛ, awuŋ jeŋ ta ni ji enyɔ lɛ kɔkɔɔkɔ.