Maŋtsɛyeli Jajelɔi Bɔ Amaniɛ

Abaawa Anɔkwa Kristofoi Ayi

KƐJƐ Habel gbii amli tɔ̃ɔ kɛbashi ŋmɛnɛ, Yehowa tsuji babaoo eŋmɛ amɛtsui shi yɛ jamɔ mli yiwaa shishi. (Luka 11:49-51) Ni enɛ bɛ naakpɛɛ, ejaakɛ Biblia lɛ bɔɔ kɔkɔ akɛ “mɛi fɛɛ hu ni taoɔ akɛ amɛaahi shi yɛ Nyɔŋmɔ jamɔ naa yɛ Kristo Yesu mli lɛ, aaawa amɛ yi”! (2 Timoteo 3:12) Enɛ hewɔ lɛ, atsi Yehowa Odasefoi anaa loo amɛyɛ yiwaa shishi, yɛ maji fe 25 mli ŋmɛnɛ.

Yɛ maŋ ko nɔ, he ni jeee tsĩ kɛkɛ atsĩ Yehowa Odasefoi anaa yɛ, shi moŋ jamɔi amli bii waa amɛ yi hu lɛ, sanekpakpa shiɛlɔi ni fa fe 12,000 miiya nɔ amɛmiitsu nii kɛ ekaa lolo, ni amɛkɛ gbɔmɛi ni fa fe 15,000 miikase Biblia lɛ. Shi kɛlɛ, amɛtsuɔ amɛ shiɛmɔ nitsumɔ lɛ yɛ ŋaa mli. Bɔ ni amɛfɔɔ feemɔ ji akɛ, amɛfeɔ amɛ Kristofoi akpeei yɛ mɛi ashiai amli, ni amɛkwɛɔ amɛhe nɔ jogbaŋŋ kɛ́ amɛbaafɔ̃ mɛi ni yɔɔ wiemɔ lɛ he miishɛɛ lɛ anine kɛba kpeei nɛɛ ashishi.

Nyɛsɛɛ nɛɛ, nɔyeli lɛ egbɔjɔ nibii amli fioo eha Odasefoi lɛ, ni amrɔ nɛɛ amɛtsuɔ amɛ nitsumɔ lɛ mli nibii babaoo ni akɛ naagba tsɔ̃ baaa amɛ nɔ. Shi kɛlɛ, jamɔ kui sɔrɔtoi lɛ kɛ hewalɛ ni amɛyɔɔ yɛ mɛi anɔ lɛ etsu nii ni amɛkɛtee naagba shi.

Yɛ maŋtiase ko mli lɛ, mɛi babaoo aaashɛ 200 ni amɛmli efu, ni amɛye jamɔ he sɛkɛ, ke yuu kɛmiiba shia mli he ni Yehowa Odasefoi aaashɛ 50 feɔ asafoŋ kpee ko yɛ lɛ. Mɛi babaoo ni baa amɛbafee basabasa nɛɛ ateŋ mɛi komɛi hiɛ tɛi ni amɛmiibolɔ kɛ jamɔ mli wiemɔi komɛi. Eka shi faŋŋ akɛ amɛ yiŋtoo ji ni amɛbatutua Odasefoi lɛ ni amɛfite nibii yɛ shia lɛ mli. Eka shi faŋŋ akɛ jamɔ mli hiɛnyiɛlɔi lɛ kɛ be saŋŋ ekwɛ kpeei ni amɛyaa lɛ aahu, ni amɛmɛ kɛyashi be ni sa jogbaŋŋ ni amɛkɛaatutua amɛ. Gbɔmɛi babaoo ni baa amɛbafee basabasa nɛɛ miihe amɛbote shia lɛ mli nɔŋŋ pɛ kɛkɛ ni polisifoi 15 bashɛ jɛmɛ ni amɛfã mɛi babaoo nɛɛ akɛ amɛgbɛ amɛshwã. Enɛ fee Odasefoi lɛ naakpɛɛ, ejaakɛ amɛteŋ mɔ ko kwraa naaa hegbɛ ni ekɛaatswa polisifoi lɛ adafi.

Shi, shitee-kɛ-wolɔi lɛ ye omanye yɛ bei krokomɛi amli. Amɔmɔ Odasefoi babaoo kɛtee kojomɔ he ni abu amɛ fɔ ni ayawo amɛ tsuŋ. Saji ni ayeɔ yɛ kojomɔ he nɛɛ ekome eye afii babaoo ni agbeee naa, ni anaa faŋŋ akɛ mɛi ni folɔɔ mɛi anaa lɛ bɛ sane lɛ he miishɛɛ dɔŋŋ. Shi, maŋ lɛ mli osɔfo lɛ yawo amɛyiŋ, ni asaa atsɛ sane lɛ yisɛɛ kɛtee kojomɔ he lɛ ekoŋŋ, ni abu Odasefonyo lɛ fɔ ni ayawo lɛ tsuŋ.

Yɛ he kroko hu lɛ, Odasefoi akuu ko kpe yɛ mɔ ko shia koni amɛkai Nuntsɔ lɛ Gbɛkɛnaashi Niyenii lɛ. Sɛɛ mli yɛ nakai gbi lɛ gbɛkɛ lɛ, polisifoi babaoo ba amɛbamɔ shiatsɛ lɛ kɛ onukpa ni kwɛ kpee lɛ nɔ lɛ. Aje gbɛ ayi amɛ waa yɛ polisifoi anitsumɔ he lɛ. Atsɔ yiwalɛ gbɛ nɔ abibii amɛ saji ŋmɛlɛtswai babaoo. Odasefoi lɛ ateŋ mɔ kome hu mia ehiɛ ni edamɔ piŋmɔ ni akɛba enɔ, ni ji nu bu ko ni mli ejɔ ŋanii, ni akɛ lɛ wo mli lɛ naa.

Mɛni hewɔ ni polisifoi lɛ tutuaa amɛ lɛ? Shikome ekoŋŋ lɛ, kuu ko ni eye jamɔ he sɛkɛ hɔ polisifoi lɛ anifeemɔ nɛɛ sɛɛ, kɛ maŋ lɛ mli osɔfo lɛ hu yelikɛbuamɔ. Sɛɛ mli lɛ, polisifoi a-onukpa lɛ ha eje kpo faŋŋ akɛ amɔmɔ mɛi lɛ ní eleee he nɔ ko kwraa. Amɛkpa fai, ni agbala mɛi ni yi nyɛmimɛi lɛ atoi yɛ no hewɔ.

Yehowa Odasefoi yaa nɔ amɛshiɛɔ Nyɔŋmɔ Maŋtsɛyeli lɛ he sanekpakpa lɛ yɛ je lɛŋ fɛɛ, yɛ shitee-kɛ-woo ni naa wa waa po shishi. Amɛnyiɛɔ Yesu ŋaawoo nɛɛ sɛɛ, akɛ: “Naa! Miitsu nyɛ tamɔ too gwantɛŋi yɛ klaji ateŋ; no hewɔ lɛ nyɛhiɛ atɛ̃a tamɔ onufui, ni nyɛfea kpoo tamɔ okpoi.”—Mateo 10:16.

[Mfoniri ni yɔɔ baafa 31]

Habel ji mɔ klɛŋklɛŋ ni awa lɛ yi