Yehowa Odasefoi ni Yɔɔ Jeŋ Fɛɛ—Brazil
BRAZIL ji shikpɔŋ ko ni da yɛ gbɛi babaoo nɔ. Yɛ edalɛ kɛ emli gbɔmɛi ayifalɛ naa lɛ, eji shikpɔŋ ni da fe fɛɛ ni gbeɔ yi feɔ enumɔ yɛ je lɛŋ. Eehe ehe South America shikpɔŋ lɛ fɛɛ fa kpotoo, ni gbɔmɛi ni yɔɔ jɛmɛ lɛ fa fe maji krokomɛi fɛɛ ni eshwɛ lɛ amlibii anaabuamɔ. Brazil hu yɛ koo ni nugbɔ nɛɔ yɛ mli fe fɛɛ eko yɛ je lɛŋ. Ni shikpɔŋ nɔ faa ni da fe fɛɛ—Amazon lɛ, hoɔ kɛtsɔɔ nakai koo lɛ mli.
Brazil da hu yɛ shishinumɔ kroko naa. Mɛi ni shiɛɔ Nyɔŋmɔ Maŋtsɛyeli lɛ he sanekpakpa lɛ ayifalɛ miibɛŋkɛ 400,000, ni mɛi fe 1,000,000 ba Kristo gbele lɛ Kaimɔ lɛ shishi yɛ nyɛsɛɛ afi lɛ mli. No hewɔ lɛ shikpɔŋ nɛɛ yɛ sɔrɔto kwraa yɛ Maŋtsɛyeli-shiɛmɔ nitsumɔ lɛ gbɛfaŋ. Niiashikpamɔi ni ba nyɛsɛɛ nɛɛ yeɔ enɛ he odase.
Sɔɔmɔ yɛ He ni Hiamɔ lɛ Da Yɛ
Antonio kɛ eŋa kpɛ yiŋ ko ni wa waa akɛ amɛbaashi amɛ wekumɛi kɛ nitsumɔ kpakpa ni amɛnaa nyɔmɔwoo babaoo kɛjɛɔ mli yɛ São Paulo lɛ koni amɛyasɔmɔ yɛ he ni Maŋtsɛyeli shiɛlɔi ahe hiaa babaoo yɛ, yɛ Minas Gerais maŋ lɛ mli. Sikle feemɔ nitsumɔ he ko mli nitsulɔi fata amɛ shikpɔŋkuku lɛ he. Amɛje shia Biblia mli nikasemɔi nɛɛhu shishi yɛ klɛŋklɛŋ gbi ni amɛje shiɛmɔ shishi yɛ jɛmɛ lɛ. Beni shɛɔ nyɔji 18 lɛ, amɛmiifee nikasemɔi fe 40!
Kɛjɛ shishijee lɛ, amɛfee kpeei yɛ nitsumɔ he lɛ diɛŋtsɛ. Shi, shiɛlɔi heei lɛ miisumɔ ni amɛna Maŋtsɛyeli Asa diɛŋtsɛ. No hewɔ lɛ amɛyatao bɔs koni ekɛ mɛi 75 aya asafo ni bɛŋkɛ amɛ lɛ. Kɛkɛ ni kpee be bashɛ; Biblia kaselɔi heei lɛ ateŋ mɛi 45 tee ni abibii amɛ saji. Abaptisi mɛnɛɛmɛi ateŋ mɛi 15 yɛ nakai be lɛ mli. Ni miishɛɛ yaafonui babaoo ho!
Akɛ bɔs nitsumɔ he lɛ nɔŋŋ to gbɛfaa krokomɛi ahe gbɛjianɔ, ni onukpai lɛ tse nyɔmɔwoo lɛ nɔ. Akɛni Antonio hiɛ esɔ hewɔ lɛ, ekɛ Biblia kasemɔ wolo ko ke nitsumɔtsɛ lɛ. Ekpɛlɛ nɔ akɛ ebaaje Biblia lɛ kasemɔ shishi nakai gbɛkɛ lɛ nɔŋŋ, ni abaptisi lɛ beni ekɛ hiɛdɔɔ ekase nii lɛ sɛɛ nyɔji babaoo. Klɛŋklɛŋ lɛ, eŋa te shi wo nikasemɔ lɛ, shi beni be shwieɔ mli lɛ, ehe jɔ. Ŋmɛnɛ, lɛ hu ebatsɔ Yehowa Odasefonyo ni abaptisi lɛ.
Akɛ shiɛlɔi 22 ni yɔɔ ekãa to asafo ko shishi yɛ February 1992. Beni shɛɔ 1994 lɛ, yibɔ nɛɛ etee hiɛ kɛyashɛ 42, kɛ daa gbɛgbalɔi, loo sanekpakpa lɛ he be-fɛɛ shiɛlɔi 4. Yɛ enɛ hewɔ lɛ, Antonio mu sane naa akɛ: “Mikɛ miŋa ena akɛ, kɛ ‘wɔka Yehowa wɔkwɛ,’ taakɛ Maleaki 3:10 tsɔɔ lɛ, ‘ebaafɔse jɔɔmɔi babaoo eshwie wɔnɔ ni ateke nɔ.’ ”
Biblia Kasemɔ He Woji Kɛhamɔ
Ekolɛ yiŋtoo kroko ni haa shiɛmɔ nitsumɔ lɛ yaa hiɛ waa yɛ Brazil ji akɛ, Odasefoi lɛ kɛ Biblia kasemɔ he woji haa yɛ hegbɛ fɛɛ hegbɛ ni amɛaana mli. Akɛ nɔkwɛmɔ nɔ lɛ, asafo ko ŋma Buu Mɔɔ Asafo lɛ nitsumɔ he nine lɛ akɛ amɛmiitao Questions Young People Ask—Answers That Work wolo lɛ komekomei 250. Mɛni hewɔ amɛshɛɔ woji babaoo nɛkɛ?
Wolo lɛ tsɔɔ mli akɛ: ‘Skul sɔrɔtoi ni yɔɔ maŋ lɛ mli lɛ ateŋ ekome ekpɛ yiŋ akɛ amɛkɛ wolo nɛɛ baatsu nii akɛ nitsɔɔmɔ wolo yɛ klas lɛ ekome mli. Skul onukpai lɛ ayiŋkpɛɛ lɛ jɛ trukaa odase ni nikaselɔi ni amɛfɔlɔi ji Yehowa Odasefoi, kɛ skul nɔkwɛlɔi lɛ ateŋ mɔ kome ye lɛ hewɔ. Eba akɛ Yehowa aaaya nɔ ajɔɔ ewebii yɛ be mli ni amɛkɛ wolo nɛɛ tsuɔ nii amɛkɛ tsɔɔmɔ kpakpa haa lɛ.’ Hɛɛ, ni eba akɛ Yehowa aaaya nɔ ajɔɔ nɔyaa kpakpa ni baa yɛ Maŋtsɛyeli-shiɛmɔ nitsumɔ ni yaa nɔ yɛ Brazil shikpɔŋ ni da lɛ mli lɛ nɔ.
[Akrabatsa ni yɔɔ baafa 8]
MAŊ LƐ HE SANE
1994 Sɔɔmɔ Afi
YIFALƐ NI FE FƐƐ NI YAA SHIƐMƆ: 385,099
EMLIJAA: Odasefonyo 1 kɛha mɛi 404
MƐI NI BA KAIMƆ LƐ: 1,018,210
GBƐGBALƆI AMLIJAA: 38,348
BIBLIA KASEMƆI AMLIJAA: 461,343
MƐI NI ABAPTISI: 24,634
ASAFOI SƆRƆTOI AYIBƆ: 5,928
NITSUMƆ HE NINE: CESÁRIO LANGE
[Mfoniri ni yɔɔ baafa 9]
Kar ni akɛ tsɔne ni awieɔ awoɔ mli ni gbɛɛɔ ema nɔ ni akɛtsu nii yɛ São Paulo aaafee 1940
[Mfoniri ni yɔɔ baafa 9]
Odaseyeli yɛ Botanical Garden ni yɔɔ Rio de Janeiro lɛ mli
[Mfoniri ni yɔɔ baafa 9]
Nitsumɔ he nine ni yɔɔ Cesário Lange