Yei ni Yɔɔ Jeŋ Fɛɛ

BENI klɛŋklɛŋ adesai enyɔ lɛ tse atua amɛshi Nyɔŋmɔ lɛ, Yehowa gba haomɔi ni baajɛ mli aba ni baaba amɛyi enyɔ lɛ kɛ amɛshwiei anɔ lɛ he sane efɔ shi. Yehowa kɛɛ Hawa akɛ: “Owu lɛ sɛɛ gbɛ oootao, ni lɛ eeeye onɔ.” (1 Mose 3:16) Biblia lɛ yaa nɔ ewoɔ bulɛ ni mli kwɔ ni aaana aha yei lɛ he hewalɛ, ni yei akpekpei toi abɔ naa miishɛɛ shihilɛ ni haa mɔ tsui nyɔɔ emli lɛ mli ŋɔɔmɔ ejaakɛ amɛkɛ amɛ wekui kɛ Biblia shishitoo mlai tsuɔ nii.

Shi taakɛ nyɛsɛɛ amaniɛbɔɔ ko ni kɔɔ hegbɛi ni adesai yɔɔ lɛ he lɛ tsɔɔ lɛ, yei pii yɛ jeŋ fɛɛ ni ashwieɔ amɛhiɛ shi, ashishiuɔ amɛ, ni abaa amɛ shi. Yɛ be mli ni ewieɔ amaniɛbɔɔ lɛ he lɛ, International Herald Tribune lɛ kɛɛ: “Amaniɛbɔɔ ni jɛ maji 193 nɔ ni akɛ tɔlɛ etsɔɔ mli fitsofitso lɛ . . . tsɔɔ shihilɛ ni yɔɔ mɔbɔ waa ni kɔɔ daa gbi hiɛaŋkwɛmɔ kɛ niseniianii ni afeɔ yei lɛ he.”

Nɔkwɛmɔ nii fioo komɛi nɛ: Yɛ Afrika teŋgbɛ lɛ, esa akɛ yei atsu ŋmɔ mli nitsumɔ babaoo ni wa lɛ, ni mɛi ejwɛ fɛɛ ejwɛ ni yaa skul lɛ ateŋ mɔ kome pɛ ji yoo. Maŋ ko yɛ ni mla eŋmɛɛɛ gbɛ akɛ yei afite gbala, shi jeee hii. Afrika maŋ ko nɔ mla ŋmɛ̃ɛɔ wu ni gbeɔ eŋa beni eyamɔ lɛ yɛ gbalafitemɔ mli lɛ he, shi mla lɛ eŋmɛɛɛ ŋa ni gbeɔ ewu yɛ shihilɛ ni tamɔ nakai nɔŋŋ mli lɛ he.

Amaniɛbɔɔ lɛ kɛɔ akɛ hei komɛi yɛ South America ni polisifoi enaaa yei ni ayi amɛ lɛ mɔbɔ. Ni yei ni tsuɔ nii yɛ guɔyeli nitsumɔ hei lɛ anyɔmɔwoo baa shi fe oha mlijaa 30 kɛmiiya 40 fe hii anyɔmɔwoo.

Hei komɛi yɛ Asia ni anyɛ̃ɔ yei anɔ afoɔ amɛ fɔmɔ ni afiteɔ amɛ musu. Maŋ ko yɛ ni yei ajwamaŋi ni yɔɔ jɛmɛ lɛ ayifalɛ shɛɔ 500,000, ni amɛteŋ mɛi pii yɛ ni amɛfɔlɔi ni miitao shika ni amɛkɛhe shiai heei amɛha amɛhe lɛ hɔ̃ɔ amɛ amɛwo nitsumɔ ni tamɔ nɛkɛ mli. Esa akɛ polisifoi ni yɔɔ maŋ kroko nɔ atsu “yinii he gbelei” ahe nii—wu gbeɔ eŋa loo nuu lɛ wekumɛi gbeɔ ŋa lɛ ejaakɛ eyinii lɛ shɛɛɛ nɔ ni amɛkpa gbɛ lɛ.

Biblia lɛ maa nɔ mi yɛ Yesu Kristo he akɛ: “Ejaakɛ eeejie ohiafoi ni bolɔɔ lɛ, kɛ nɔ̃nalɔ ni bɛ bualɔ lɛ. Eeena ohiafo kɛ mɔ ni efi lɛ lɛ mɔbɔ, ni ehere mɛi ni efi amɛ lɛ asusumai ayiwala. Eeekpɔ amɛ susuma kɛaajɛ fifiamɔ kɛ yiwalɛ mli, ni amɛla jara aaawa yɛ ehiɛ.” (Lala 72:12-14) No hewɔ lɛ wɔyɛ nɔ ni wɔɔdamɔ nɔ wɔna jwɛŋmɔ kpakpa; yei ni yɔɔ jeŋ fɛɛ lɛ baanyɛ akwɛ shihilɛi ni asaa ni baahi shi yɛ nakai be lɛ mli lɛ gbɛ.