Sanebimɔi ni Jɛ Kanelɔi Adɛŋ

Taakɛ Galatabii 6:8 tsɔɔ lɛ, “mɔ ni duɔ nii yɛ lɛ diɛŋtsɛ eheloo mli lɛ, eheloo lɛ mli ebaakpa fitemɔ kɛjɛ; shi mɔ ni duɔ nii yɛ mumɔ mli lɛ, mumɔ lɛ mli nɔŋŋ ebaakpa naanɔ wala kɛjɛ.” Mɛɛ “mumɔ” atsɔɔ nɛɛ, ni mɛɛ gbɛ nɔ wɔɔtsɔ wɔkpa wala kɛjɛ mli?

Hebri kɛ Hela wiemɔi ni atsɔɔ shishi akɛ “mumɔ” hiɛ shishinumɔi sɔrɔtoi, tamɔ: (1) Nyɔŋmɔ nifeemɔ hewalɛ, (2) wala hewalɛ ni yɔɔ gbɔmɛi loo kooloi amli, (3) mɔ ko jwɛŋmɔŋ kanyamɔ hewalɛ, kɛ (4) mumɔŋ gbɔmɔ loo ŋwɛibɔfo. Nɔ ni ato naa nɛɛ klɛŋklɛŋ nɔ lɛ—Nyɔŋmɔ nifeemɔ hewalɛ lɛ—ji shishinumɔ ni wɔnaa yɛ Galatabii 6:8 lɛ.

Tsɔ hiɛ okadi Galatabii 3:2, he ni wɔnaa ni akɛ “mumɔ” lɛ tsu nii yɛ klɛŋklɛŋ kwraa yɛ Galatabii awolo lɛ mli lɛ. Paulo bi Kristofoi akɛ: “Mla nitsumɔi amli nyɛna mumɔ lɛ kɛjɛ, aloo hemɔkɛyeli toiboo lɛŋ?” Kɛkɛ ni yɛ Galatabii 3:5 lɛ, ekɛ nakai “mumɔ” lɛ tsa hewalɛ nitsumɔi ni afeɔ lɛ. No hewɔ lɛ, “mumɔ” ni ewieɔ he lɛ ji mumɔ krɔŋkrɔŋ lɛ, Nyɔŋmɔ nifeemɔ hewalɛ ni anaaa lɛ.

Yɛ sɛɛ mli lɛ, Paulo kɛ sɔrɔto-feemɔ ni ka mumɔ lɛ kɛ heloo lɛ teŋ lɛ to he yɛ Galatabii 5:16. Wɔkaneɔ akɛ: “Shi miikɛɛ: Nyɛnyiɛa yɛ mumɔ naa, ni nyɛfeŋ heloo akɔnɔi lɛ anaa nii.” Ekɛ “heloo akɔnɔi” lɛ miitsɔɔ adesa esha heloo lɛ. No hewɔ lɛ, eto “heloo lɛ nitsumɔi” anaa yɛ Galatabii 5:19-23 ni ekɛto sɔrɔto-feemɔ ni ka no kɛ “mumɔ lɛ yibii” lɛ teŋ lɛ he.

No hewɔ lɛ, yɛ Galatabii 6:8 lɛ, esa akɛ “mɔ ni duɔ nii yɛ lɛ diɛŋtsɛ eheloo mli lɛ” afee mɔ ni ŋmɛɔ gbɛ koni adesa eshafeemɔ akɔnɔi, ni kɛ ehe woɔ “heloo lɛ nitsumɔi” amli lɛ akudɔ lɛ. Ebaakpa nɔ ni jɛɔ jeŋba ni tamɔ nɛkɛ ni fiteɔ lɛ mli baa lɛ akɛ yibii, ni kɛji akɛ etsakeee lɛ, eka shi faŋŋ akɛ enaŋ wala yɛ Nyɔŋmɔ Maŋtsɛyeli lɛ mli loo eshishi.—1 Korintobii 6:9, 10.

Akɛ Kristofoi ni amɛtu amɛhe amɛha lɛ, esa akɛ wɔsumɔ akɛ ‘wɔɔdu nii yɛ Nyɔŋmɔ mumɔ lɛ mli.’ Nɔ ni yɔɔ enɛ mli ji ni wɔɔhi shi yɛ gbɛ ni ŋmɛɔ mumɔ krɔŋkrɔŋ lɛ gbɛ koni etsu nii yɛ heyeli mli yɛ wɔshihilɛi amli, ni eye ebua wɔ ni wɔjie eyibii lɛ kpo. Esa akɛ wɔha enɛ ahi wɔjwɛŋmɔ mli beni wɔkpɛɔ wɔyiŋ yɛ nɔ ni wɔbaakane loo nɔ̃ tɛlivishin nɔ nibii ni wɔɔkwɛ lɛ he. Wɔduɔ nii yɛ mumɔ mli beni wɔboɔ nɔ ni yaa nɔ yɛ asafoŋ kpeei ashishi lɛ toi ni wɔbɔɔ mɔdɛŋ ni wɔkɛ ŋaawoo ni jɛ onukpai ni mumɔ lɛ ehala amɛ lɛ ŋɔɔ atsu nii lɛ.—Bɔfoi lɛ Asaji 20:28.

Nɔ ni yɔɔ miishɛɛ ji akɛ, Galatabii 6:8 baa naagbee kɛ nɔmimaa akɛ, yɛ be mli ni wɔduɔ nii yɛ mumɔ krɔŋkrɔŋ lɛ kɛ gbeekpamɔ naa lɛ, wɔbaafee mɛi ni “mumɔ lɛ mli nɔŋŋ [wɔ]baakpa naanɔ wala kɛjɛ.” Hɛɛ, Nyɔŋmɔ kɛ naanɔ wala ni damɔ Kristo kpɔmɔ nɔ lɛ nɔ baaha kɛtsɔ mumɔ krɔŋkrɔŋ lɛ nifeemɔ nɔ.—Mateo 19:29; 25:46; Yohane 3:14-16; Romabii 2:6, 7; Efesobii 1:⁠7.