Gɔŋ ni Kwɔ Fe Himalayas lɛ Kwɔɔ
HIMALAYAS! Mɛni nakai wiemɔi lɛ kɛbaa ojwɛŋmɔ mli? Gɔji ni yɔɔ gbeyei ni ais yɔɔ nɔ, ni ahum ni naa wa tswaa yɛ nɔ? Bɔ ni ashweɔ ni aye nɔ kunim, ni adamɔ shikpɔŋ nɔ gɔŋ ni kwɔ fe fɛɛ lɛ nɔ? Kɛha wɔteŋ mɛi pii lɛ, ni wɔɔkwɔ Everest Gɔŋ lɛ, yɛ Himalaya Gɔji ni yɔɔ Nepal lɛ ateŋ lɛ, baafee nɔ ni ehiŋ feemɔ. Ni kɛlɛ, ŋmɛnɛ, mɛi pii yɛ Nepal ni amɛmiikwɔ gɔŋ ko ni kwɔ fe Himalayas lɛ! Dani wɔɔle gbɛfãa ni kɛ mɔ yaa gɔŋ ni kwɔ gojoo nɛɛ nɔ lɛ he sane lɛ, nyɛhaa wɔkwɛa Nepal Maŋtsɛyeli bibioo ni yɔɔ fɛo lɛ.
Nepal—Gɔŋ Maŋtsɛyeli Lɛ
Nepal Maŋtsɛyeli lɛ ekaaa ejaakɛ eji maŋtsɛmɛi anɔyeli fioo ni eshwɛ ni yɔɔ je lɛŋ lɛ ateŋ ekome, ni agbɛnɛ ejeee jeŋ maŋtsɛyeli, shi moŋ eji jamɔ mli nɔ̃. Nepal ji Hindu maŋ kome pɛ ni yɔɔ je lɛ mli. Emli gbɔmɛi akpekpei 20 lɛ ateŋ mɛi ni fa ji Hindubii. Shi, sɔrɔto-feemɔ kpele yɛ shihilɛi ni emli bii lɛ jɛ mli lɛ amli. Mɛi ni jɛ kooyigbɛ, gɔji ashikpɔji lɛ anɔ ji Tibet-Burman bii titri, ni mɛi ni jɛ wuoyigbɛ ŋa kplanaai lɛ anɔ lɛ ji Indo-Aryan bii titri. Nepali ji maŋ lɛ wiemɔ titri kɛ wiemɔ ni gbɔmɛi lɛ ateŋ oha fɛɛ mli 60 wieɔ. Mɛi ni eshwɛ lɛ wieɔ wekui awiemɔi sɔrɔtoi fe 18.
Nepal shikamɔ yɛ bloblo tamɔ koji-ejwɛ, kɛjɛ boka kɛmiiya anai feɔ kilomitai 880 kɛ kilomitai 200 kɛjɛ kooyigbɛ kɛmiiba wuoyigbɛ. Everest Gɔŋ lɛ, gɔŋ ni kwɔ fe fɛɛ yɛ je lɛŋ ni feɔ mitai 8,848, kɛ gɔji krokomɛi kpaanyɔ ni fe mitai 8,000 lɛ fata Himalayas ni yɔɔ gbeyei lɛ, ni feɔ maŋ lɛ husu yɛ kooyigbɛ lɛ ahe. Gɔji ni baa shi kɛ kpaakpoi kɛ jɔɔi lɛ yɛ Nepal teŋgbɛ. Nɔ ni yɔɔ wuoyigbɛ kwraa lolo, ni kɛ India jeɔ husu ji Tarai, okwaayeli shikpɔŋ ni baa nii babaoo lɛ.
Kathmandu, maŋtiase lɛ, ni yɔɔ shikpɔŋ lɛ teŋgbɛ lɛ ji he ko diɛŋtsɛ ni yɔɔ fɛo ni gbɛfalɔi sumɔɔ jɛmɛ. Akɛ mɛi woɔ kɔɔyɔŋ lɛlɛ mli kɛfoɔ shi yɛ gɔji wuji lɛ anɔ, amɛyakwɛɔ kooloi ashihilɛ hei, kɛ hei pii ni ashɛraa shi yɛ. Afɔɔ Nepal tsɛmɔ yɛ bei komɛi amli akɛ nyɔŋmɔi lɛ ajɔɔ, ejaakɛ jamɔ tsuɔ babaoo yɛ gbɔmɛi lɛ ashihilɛ mli. Nyɔŋmɔjamɔ hewɔ hu ni gbɔmɛi akpekpei abɔ faa gbɛ kɛjɛɔ jeŋ fɛɛ kɛbaa “gɔŋ” ni kwɔ fe Himalayas lɛ nɔ lɛ.
Aaafee afii 2,700 ni eho nɛ, ni akɛ mumɔ tsirɛ Hebri gbalɔ Yesaia koni egba akɛ, “naagbee gbii lɛ amli lɛ, Yehowa we lɛ gɔŋ lɛ aaama shi yɛ gɔji lɛ ayiteaŋ . . . Ni majimaji pii aaatee ayakɛɛ akɛ: ‘Nyɛbaa ni wɔyakwɔa Yehowa gɔŋ lɛ, . . . koni etsɔɔ wɔ egbɛi lɛ, ni wɔnyiɛ etempɔŋi lɛ anɔ.’ ” (Yesaia 2:2, 3) Akɛ Yehowa, Bɔlɔ kɛ jeŋ muu fɛɛ Maŋtsɛ Nɔyelɔ lɛ jamɔ krɔŋŋ ni awo nɔ lɛ toɔ gɔŋ, ni awo nɔ grɔŋŋ fe jamɔi fɛɛ ni tamɔ gɔji lɛ he. Sane ni kɔɔ jeŋ muu fɛɛ tsɔsemɔ nitsumɔ ko he lɛ yeɔ ebuaa gbɔmɛi ni anɔkwale lɛ he hɔmɔ yeɔ amɛ lɛ koni amɛkase Yehowa gbɛ̀i lɛ. Te fee tɛŋŋ ni nɛkɛ nitsumɔ nɛɛ je shishi yɛ Nepal?
Shishijee Fiofio
Asraafonyo ko ni fata Ŋleshi Asraafoi ahe yɛ Jeŋ Ta II lɛ mli lɛ miitao anɔkwa jamɔ. Efɔlɔi, Nepalbii ni yɔɔ Hindu jamɔ mli lɛ etsake amɛjamɔ kɛtee Katolik jamɔ mli. Beni edaa lɛ, ena jwɛŋmɔ ni bɛ amagai ajamɔ mli lɛ, ekpoo tsɔɔmɔi tamɔ hɛl-la ni atsɔɔ lɛ, ni eje Protestant sɔlemɔi lɛ ahemɔkɛyelii amlipɛimɔ shishi. Shi etsui enyɔɔɔ emli.
Japanbii mɔ lɛ akɛ gbokɛlɛfonyo yɛ he ni ale tsutsu akɛ Rangoon, Burma lɛ, ni asraafonyo nɛɛ sɔle koni eje gbokɛlɛfoi aŋsara lɛ mli shihilɛ ni naa wa waa lɛ mli, koni eyatsa anɔkwa jamɔ ni etaoɔ lɛ nɔ. Yɛ sɛɛ mli lɛ enyɛ ejo foi kɛjɛ mɛi ni mɔ lɛ lɛ adɛŋ, ni eyana wolo bibioo ko, Where Are the Dead?, [Nɛgbɛ Gbohii lɛ Yɔɔ?] ni J. F. Rutherford ŋma lɛ yɛ skul tsɔɔlɔ ko ni ye ebua lɛ lɛ shia. Akɛni eyoo anɔkwale ko yɛ enɛ mli hewɔ lɛ, ekɛ miishɛɛ kpɛlɛ nɔ akɛ, ekɛ Yehowa Odasefoi baakase nii beni amɛba eŋɔɔ yɛ Rangoon, yɛ 1947 lɛ. Abaptisi lɛ yɛ nyɔji fioo sɛɛ, ni etsɛɛɛ ni eŋa obalayoo lɛ hu nyiɛ sɛɛ. Amɛkpɛ amɛyiŋ akɛ amɛbaaku amɛ sɛɛ kɛya India, ni amɛyahi amɛmaŋ yɛ Kalimpong, yɛ kooyi-bokagbɛ gɔji lɛ anɔ. Amɛfɔ amɛbii enyɔ lɛ yɛ biɛ ni amɛtsɔse amɛ. Amɛshi jɛmɛ kɛtee Kathmandu yɛ March 1970.
Nepal Maŋnɔkwɛmɔ Gbɛjianɔtoo lɛ egu shiɛmɔ kɛ jamɔ tsakemɔ. Awoɔ mɔ fɛɛ mɔ ni aaana akɛ eetsɔɔ nɔ ni akɛɛ atsɛɔ lɛ maŋsɛɛ jamɔ lɛ tsuŋ afii kpawo, ni awoɔ mɔ ni yafataa jamɔ ni tamɔ nɛkɛ lɛ he lɛ tsuŋ afii etɛ kɛ shika ni fa ni aheɔ kɛjɛɔ edɛŋ. No hewɔ lɛ esa akɛ akɛ hiɛtɛɛ ashiɛ. Shia kɛ shia sɔɔmɔ lɛ tsɔɔ akɛ kɛ atee shia ko lɛ, kɛkɛ lɛ ashi jɛmɛ kɛtee he kroko kwraa ayatsu nii yɛ jɛmɛ. No hewɔ lɛ, trukaa odaseyeli tsu babaoo yɛ sanekpakpa lɛ gbɛɛ-kɛ-shwamɔ mli.
Shweremɔ baaa oya. Maŋ kɛ emlibii aaafee akpekpei nyɔŋma lɛ ha sɔɔmɔ lɛ fee nɔ ni jeɔ mɔ nijiaŋ wui. Adu dumɔwui lɛ yɛ be mli ni weku kome nɛɛ yeɔ nanemɛi, akutseiaŋbii, nitsumɔ-tsɛmɛi, kɛ nanemɛi nitsulɔi odase lɛ. Amɛfeɔ kpeei daa yɛ amɛshia, ni amɛfɔɔ mɛi ni yɔɔ wiemɔ lɛ he miishɛɛ lɛ nine koni amɛbafata amɛhe. Yɛ naagbee lɛ, yɛ March 1974, beni amɛtee nɔ amɛkɛ hekamɔ etɛo ni amɛshwã nɔ nu afii ejwɛ sɛɛ lɛ, klɛŋklɛŋ yibii ni jɛ Nepal lɛ ba— ni nakai yibii lɛ jɛ he ni akpaaa gbɛ!
Beni ayaa shia kɛ shia lɛ, shiɛlɔ lɛ kɛ nuu niiatsɛ ko ni ji odehei aweku lɛ mli nyo ko woloŋmalɔ wie. Nuu lɛ kɛɛ lɛ akɛ: “Okɛ mibinuu lɛ awie.” Binuu lɛ kpɛlɛ Biblia lɛ kasemɔ nɔ. Yɛ be ni sa mli lɛ, etsake enitsumɔ, ejaakɛ no mli lɛ asɔshwɛmɔ shishi etsuɔ nii yɛ. Etsɛ ni ji Hindunyo kpanaa lɛ te shi wo lɛ. Ni kɛlɛ, obalanyo nɛɛ damɔ shi kɛha Yehowa. Mɛni jɛ mli ba? Yɛ sɛɛ mli lɛ etsɛ kpa shi ni eteɔ ewoɔ lɛ lɛ, ni ewekumɛi akuu ko ni bɛŋkɛ kpaakpa kpɛlɛ Biblia mli anɔkwale lɛ nɔ. Eesɔmɔ bianɛ akɛ onukpa yɛ Kristofoi asafo lɛ mli.
Bɔni afee ni amɛhi shi akɛ mɛi ni he wa yɛ mumɔŋ ni amɛbo Ŋmalɛ naa famɔ akɛ amɛkakwa amɛhe naabuamɔ lɛ toi lɛ, kuu fioo ni yɔɔ Kathmandu lɛ feɔ kpeei daa yɛ shia ko mli. Shi, nɔ ni nyɛmimɛi lɛ laajeɔ titri ji kpeei wuji ni amɛnyɛɛɛ amɛya lɛ. Mɛi ni baanyɛ afee nakai lɛ faa gbɛ kɛyaa India kɛha kpeei wuji lɛ—gɔji anɔ gbɛfãa kakadaŋŋ ni heɔ shika pii.
Mɛɛ miishɛɛ be eji nɛkɛ, beni ato kpokpaa wulu nɔ kpee lɛ fɛɛ he gbɛjianɔ yɛ shia ni amɛfeɔ kpeei yɛ mli lɛ! Susumɔ nyɛmimɛi hii ejwɛ, ni India Nitsumɔ He Nine lɛ mli nyo fata he, ni miitsu kpee lɛ shishi wiemɔi lɛ fɛɛ he nii lɛ he okwɛ! Afee Biblia mli drama lɛ po. Yɛ mɛɛ gbɛ nɔ? Asha beni asaa he ni afeɔ drama lɛ yɛ India lɛ mfoniri ni afee lɛ slide. Ni Ajie nɛkɛ mfoniri nɛɛ yɛ Nepal, ni kasɛt ni tswaa amɛwiemɔi lɛ fata he. Toibolɔi lɛ amii shɛ he waa. Te toibolɔi nɛɛ ayifalɛ yɔɔ ha tɛŋŋ? Gbɔmɛi nyɔŋma kɛ kpaanyɔ!
Yelikɛbuamɔ ni jɛ maŋsɛɛ ni aaana aha shiɛmɔ nitsumɔ lɛ baaa tsɔ. Anyɛɛɛ atsu maŋsɛɛ sanekpakpa shiɛmɔ nitsumɔ lɛ, ni ewa akɛ maŋsɛɛ bii aaana heloo gbɛfaŋ nitsumɔ yɛ jɛmɛ. Shi India Odasefoi enyɔ ko na nitsumɔ yɛ Nepal yɛ bei sɔrɔtoi amli, ni amɛye afii pii yɛ Kathmandu amɛkɛye amɛbua asafo hee ni ato shishi lɛ. Beni shɛɔ 1976 lɛ, Maŋtsɛyeli shiɛlɔi 17 yɛ Kathmandu. Nyɛmimɛi lɛ ma amɛ diɛŋtsɛ amɛ Maŋtsɛyeli Asa yɛ 1985. Beni ama agbe naa lɛ, aje daa afi kpokpaa wulu nɔ kpeei lɛ, kɛ agbɛnɛ kpeei krokomɛi afeemɔ shishi yɛ jɛmɛ be fɛɛ be. Asa lɛ ji jamɔ krɔŋŋ shikwɛɛ he diɛŋtsɛ yɛ nakai gɔji ashikpɔŋkuku ni yɔɔ shɔŋŋ lɛ nɔ.
Shweremɔ Yɛ Naagbai lɛ Fɛɛ Sɛɛ
Yɛ nakai shishijee afii lɛ amli lɛ, shiɛmɔ nitsumɔ lɛ ni akɛ henɔkwɛmɔ babaoo tsu lɛ haaa nɔyelɔi lɛ ayoo nɔ ni yaa nɔ lɛ pii tsɔ. Shi kɛmiiba 1984 naagbee mli ni aje shishi akɛ naatsii bɔi baa. Amɔ nyɛminuu kɛ nyɛmimɛi yei etɛ ko ni atsi amɛ naa gbii ejwɛ dani aŋmɛɛ amɛhe kɛ kɔkɔbɔɔ akɛ, amɛkpa amɛ nitsumɔi lɛ. Amɔmɔ mɛi nɛɛhu yɛ akrowa ko mli beni amɛfeɔ Biblia mli nikasemɔi yɛ amɛshiai. Atsi amɛteŋ mɛi ekpaa naa yɛ tsuŋwoo he, gbii 43. Amɔmɔ mɛi krokomɛi babaoo hu, shi afeee nɔ ko yɛ mla naa ashiii amɛ.
Yɛ nyɛsɛɛ nɛɛ nɔŋŋ, yɛ 1989 mli lɛ, amɔmɔ nyɛmimɛi hii kɛ yei lɛ fɛɛ ni amɛkpe yɛ Asafo Woloŋ Nikasemɔ ko shishi lɛ, ni atsi amɛ naa gbii etɛ ni aŋmɛɛ amɛhe. Yɛ bei komɛi amli lɛ, akɛɔ amɛ akɛ amɛkɛ amɛwaonaa gbɛi awo wolo shishi akɛ amɛshiɛŋ dɔŋŋ. Amɛkpɛlɛɛɛ nɔ. Aŋmɛɛ mɛi komɛi ahe beni amɛkɛ amɛwaonaa gbɛi wo wolo shishi akɛ amɛbaasumɔ ni amɛna amanehulu akɛ amɛmiishiɛ moŋ kɛ amɔmɔ amɛ lɛ.
Yɛ naagbai nɛɛ fɛɛ sɛɛ lɛ, nyɛmimɛi lɛ tee nɔ amɛkɛ ekãa jaje Maŋtsɛyeli lɛ he sanekpakpa lɛ. Akɛ nɔkwɛmɔ nɔ lɛ, yɛ 1985, afi ni no sɛɛ ni nɔyeli lɛ bɔi nitsumɔ lɛ naatsii lɛ, ana oha mlijaa 21 yɛ shiɛlɔi ayifalɛ mli. Kɛ aja mli lɛ, shiɛlɔi 35 lɛ kɛ ŋmɛlɛtswai 20 tsu nii daa nyɔŋ nɔ amɛkɛwie jamɔ krɔŋŋ lɛ he amɛtsɔɔ mɛi krokomɛi.
Beni be hoɔ lɛ, maŋkwramɔŋ tsakemɔi ahe kɔɔyɔɔ bɔi tswaa yɛ Nepal. Nɔyeli lɛ mli onukpai je shishi amɛyoo akɛ Yehowa Odasefoi wooo maŋ lɛ he gbeyei. Yɛ anɔkwale mli lɛ, amɛ Biblia kasemɔ nitsumɔ lɛ na gbɔmɛi lɛ anɔ hewalɛ yɛ gbɛ kpakpa nɔ, efee amɛ maŋ bii kpakpai. Maŋ onukpai lɛ na akɛ, ama anɔkwayeli, nitsumɔ ni akɛ hewalɛ tsuɔ, kɛ jeŋba kpakpa nɔ mi akɛ shishijee taomɔ nii kɛha Yehowa jálɔi.
Aye odase jogbaŋŋ beni tsutsu Hindu yoo ko ni etu ehe eha batsɔ Odasefonyo ni ekpoo lá ni akɛaaha lɛ lɛ. Datrɛfoi lɛ anaa kpɛ amɛhe yɛ efaishitwaa kɛ eshidaamɔ kɛ enilee hewɔ. Aye abua yoo nɛɛ ni ekase anɔkwale lɛ kɛtsɔ wolo bibioo, Na Wala Mli Ŋɔɔmɔ yɛ Shikpɔŋ Nɔ Kɛya Naanɔ! lɛ nɔ. Yɛ shitee-kɛ-woo kɛ fɛoyeli ni eweku lɛ kɛba enɔ lɛ fɛɛ sɛɛ lɛ, abaptisi lɛ yɛ 1990 beni eehe ena afii 70. Yɛ sɛɛ mli lɛ, enane mli ku, ni yɛ be mli ni epiŋɔ kɛ helai krokomɛi hu lɛ, ehe bahia ni afee lɛ opireshɛn. Ekɛ otsii enyɔ damɔ nɔnyɛɛ ni jɛ datrɛfoi kɛ wekumɛi aŋɔɔ ba akɛ ekpɛlɛ ni aha lɛ la lɛ naa. Yɛ naagbee lɛ, datrɛfoi lɛ fee lɛ opireshɛn lɛ yɛ omanyeyeli mli ni la fataaa he. Eyɛ mli akɛ amrɔ nɛɛ enyɛɛɛ enyiɛ pii moŋ, shi nɛkɛ nyɛmi yoo anɔkwafo nɛɛ taa egbo naa daa leebi ni efɔ̃ɔ mɛi ni yaa kɛ baa lɛ nine ni amɛbatara emasɛi ni amɛbo saji kpakpai komɛi atoi.
Nepal Ŋmɛnɛ
Te eyɔɔ tɛŋŋ yɛ Nepal ŋmɛnɛ? Yehowa Odasefoi naa jamɔ mli heyeli mli ŋɔɔmɔ kpakpa taakɛ amɛnyɛmimɛi feɔ yɛ jeŋ fɛɛ lɛ. Kɛjɛ be mli ni okadi gɔŋ-kwɔlɔ kome loo mɛi enyɔ je shishi amɛkɛ amɛhe yafata mɛi ni kwɔɔ anɔkwa jamɔ gɔŋ lɛ ahe nɛɛ, gbɔmɛi ni faa babaoo ekɛɛ akɛ, ‘Nyɛbaa, ni nyɛhaa wɔyaa Yehowa gɔŋ lɛ nɔ.’ Beni 1989 shɛɔ lɛ, kɛ aja mli lɛ, mɛi 43 kɛ amɛhe woɔ shiɛmɔ nitsumɔ lɛ mli daa nyɔŋ nɔ, ni 204 ba Kristo gbele lɛ Kaimɔ lɛ yɛ nakai afi lɛ mli.
Kɛkɛ ni taakɛ awo shi lɛ, Yehowa je shishi akɛ eeeha mɛi ni taoɔ anɔkwale lɛ anaabuamɔ kɛmiiba eshia lɛ afee oya. (Yesaia 60:22) Etsɛɛɛ tsɔ ni ato asafo ni ji enyɔ shishi yɛ Kathmandu, ni amrɔ nɛɛ kui enyɔ yɔɔ he ko banee yɛ maŋtiase lɛ sɛɛ. Yɛ April 1994 mli lɛ, Kristofoi 153 bu amɛshiɛmɔ nitsumɔ he akɔntaa—oha mlijaa 350 nɔyaa yɛ nɔ ni shɛɛɛ afii enumɔ mli! Amɛkɛ gbɔmɛi ni yɔɔ wiemɔ lɛ he miishɛɛ lɛ fee shia Biblia mli nikasemɔi 386. Mɛi ni ba 1994 Kaimɔ lɛ shishi ni ji 580 lɛ yɛ miishɛɛ waa. Mɛi 635 bua amɛhe naa amɛwo asa ko nɔ obɔ kɛha kpee krɛdɛɛ gbi lɛ, ni 20 kɛ amɛhe ha kɛha baptisimɔ. No hewɔ lɛ, nɔyaa babaoo ni Yehowa Odasefoi naa mli ŋɔɔmɔ yɛ jeŋ fɛɛ lɛ miiya nɔ yɛ Nepal maŋ bibioo lɛ hu mli.
Nepali wiemɔ mli woji ni afeɔ yɛ nyɛsɛɛ afii nɛɛ amli lɛ hu etee hiɛ waa, ni eye ebua heshibalɔi lɛ koni amɛmɔ anɔkwale lɛ mli kpɛŋŋ. Woji ashishitsɔɔlɔi ni atsɔɔ amɛ woji ashishitsɔɔmɔ he ŋaa kɛ bɔ ni akɛ kɔmpiuta tsuɔ nii yɛ India nitsumɔ he nine lɛ kɛ amɛbe fɛɛ miisɔmɔ bianɛ yɛ Kathmandu. Awula amɛ kɛha nitsumɔ lɛ mlilɛɛmɔ, Nepal teokrase lɛ miiya amɛhiɛ!
Kwɔɔ Kɛya Shɔŋŋ Fe Himalayas
Bo hu obaanyɛ ona gɔŋ ni kwɔ fe Himalayas lɛ kwɔɔ lɛ ŋɔɔmɔ mli gbɛfaŋnɔ. Nakai feemɔ etsɔɔɔ akɛ okɛ ohe miibɔ mɛi ni jɛ Nepal lɛ pɛ he, shi akpekpei abɔ “ni jɛ jeŋmaŋ fɛɛ jeŋmaŋ kɛ akutsei kɛ maji kɛ majianɔ wiemɔi amli” lɛ hu he. (Kpojiemɔ 7:9) Okɛ amɛ fɛɛ baana tsɔsemɔ ni baa kɛjɛɔ gɔji wuji tamɔ nɔ ni yɔɔ Nepal lɛ Bɔlɔ lɛ ŋɔɔ lɛ mli ŋɔɔmɔ. Obaana bɔ ni Bɔlɔ lɛ “jajeɔ saji,” ni obaanyɛ okpa be mli ni obaahi shi kɛya naanɔ yɛ shikpɔŋ ni atsuu nɔ ni efee fɛo lɛ nɔ lɛ gbɛ.—Yesaia 2:4, NW.
[Shikpɔŋ he mfoniri ni yɔɔ baafa 24]
(Kɛ́ ootao ona bɔ ni saji nɛɛ ji diɛŋtsɛ lɛ, no lɛ kwɛmɔ wolo lɛ mli)
Kathmandu
Everest Gɔŋ
[Mfoniri ni yɔɔ baafa 25]
Maŋtsɛyeli Asa lɛ sɛɛ yɛ Kathmandu
[Mfoniri ni yɔɔ baafa 26]
Nepalbii babaoo miina Biblia kasemɔi ahe sɛɛ