“Miishɛɛ Yijielɔi” Kpee Wulu Ani Obaaya Eko?

MIISHƐƐ! Ani nakai wiemɔ lɛ tamɔ nɔ ni afɔɔɔ numɔ, nɔ ni akɛfɔɔɔ nitsumɔ po, yɛ nɛkɛ be ni eyi kɛ haomɔ nɛɛ mli? Eka shi faŋŋ akɛ adafitswaa woji haaa wɔ yiŋtoi babaoo ni wɔɔdamɔ nɔ wɔna miishɛɛ. Wiemɔ kui ateŋ tai, hɔmɔ ni egbɛ eshwa he fɛɛ he, nitsumɔ ni anaaa, mujiwoo ni yɔɔ oshara, maŋkwramɔŋ shihilɛ ni bɛ shiŋŋ, awuiyeli—jeee nibii ni haa mɔ tsui yiɔ obɔ kɛ miishɛɛ nɛ, aloo jeee nakai?

Ŋmɛnɛ, mɛi pii kɛ ekaa bɔɔ mɔdɛŋ akɛ amɛaana shihilɛ mli ŋɔɔmɔ. Shi miishɛɛ hu? Awieɔ miishɛɛ he akɛ “nyamɔ shihilɛ; mlifilimɔ.” Jeee mɛi pii naa miishɛɛ diɛŋtsɛ, ni kɛ amɛna eko po lɛ, bei pii lɛ ehiɔ shi be kukuoo pɛ.

Ni kɛlɛ, beni ewieɔ wɔ gbii nɛɛ ahe lɛ, Biblia lɛ gba efɔ shi akɛ: ‘Bɔ ni Nuntsɔ Yehowa kɛɛ nɛ: “Naa! Mitsuji lɛ aaanya. Naa! Mitsuji lɛ aaala kɛ tsuijurɔ.” ’ (Yesaia 65:13, 14) Te aaafee tɛŋŋ ni eeeba nakai hu?

Kɛ ootao hetoo lɛ, wɔmiifɔ̃ bo nine ni oba kpokpaa wulu nɔ kpeei ni Yehowa Odasefoi baafee yɛ 1995 mli lɛ ekome shishi. Kpee lɛ yitso ji “Miishɛɛ Yijielɔi,” ni aheee mɛi ni baaba lɛ nɔ ko. Abaato kpee nɛɛ he gbɛjianɔ akɛ wiemɔi ni damɔ Biblia lɛ nɔ, kɛ nɔkwɛmɔ nii, sanegbaai, kɛ nibii krokomɛi babaoo. Abaama saneyitso ni ji miishɛɛ lɛ nɔ mi, yɛ kpee lɛ shishi wiemɔi lɛ fɛɛ mli.

Kpeei lɛ jeɔ shishi yɛ United States yɛ June mli, ni ebaatsa nɔ yɛ je lɛŋ maŋtiasei pii amli, aahu kɛyashi 1996 mli. Ekolɛ, abaafee eko yɛ he ni bɛŋkɛ bo. Mɛni hewɔ obiii Yehowa Odasefoi ni yɔɔ he ni oyɔɔ lɛ? Wɔkɛ miishɛɛ miifɔ̃ bo nine ni oba jɛmɛ.