Maŋtsɛyeli Jajelɔi Bɔ Amaniɛ

Gbekɛbii Miijaje Sanekpakpa lɛ yɛ Afrika

YESU shitee lɛ sɛɛ be fioo ko lɛ, eba mli akɛ Afrika nuu ko miiya Yerusalem. Biblia lɛ etsɔɔɔ egbɛi. Bɔ ni ale lɛ nɔŋŋ ji akɛ eji “Etiopiabii amaŋnyɛ Kandake lɛ piafonyo ni abuɔ ni kwɛɔ ejwetri fɛɛ nɔ.” Mɛni hewɔ ni atsĩ etã yɛ Biblia lɛ mli lɛ? Ejaakɛ ŋwɛibɔfo ko tsɔɔ Kristofonyo sanekpakpa jajelɔ Filipo gbɛ koni eyajaje “Yesu he sanekpakpa lɛ” etsɔɔ lɛ. Nɛkɛ Etiopianyo nɛɛ ji Afrikanyo klɛŋklɛŋ ni aŋma ehe sane afɔ shi akɛ ebatsɔ Kristofoi asafo lɛ mlinyo.—Bɔfoi lɛ Asaji 8:26-39.

Ŋmɛnɛ, ayɛ Yehowa Odasefoi akpei ohai abɔ yɛ Afrika. Amɛkɛ hegbɛ fɛɛ hegbɛ tsuɔ nii ni amɛkɛ mɛi krokomɛi gbaa sanekpakpa ni kɔɔ Yesu he lɛ he sane. Niiashikpamɔi ni nyiɛ sɛɛ lɛ tsɔɔ akɛ gbekɛbii ni yɔɔ Afrika lɛ po yɛ gbɛfaŋnɔ yɛ enɛ mli.

◻ Sandy kɛ Priya, ni ji gbekɛbii yei enyɔ ni amɛye afii 11, yɛ Nairobi, Kenya lɛ, yɛ akutso kome mli. Amɛfeɔ ekome kɛshwɛɔ, ni amɛkaneɔ amɛ adesã woji hu. Priya fɔlɔi kɛ Yehowa Odasefoi bɔi Biblia lɛ kasemɔ. Agbɛnɛ Priya bana woji heei krokomɛi ni ekɛbaafata woji ni eyɔɔ momo lɛ ahe, ni ekome ko yɛ mli ni bafee nɔ ni esumɔɔ waa fe fɛɛ, ni ji Tsɔɔlɔ Kpele lɛ Toiboo, ni Watchtower Bible and Tract Society lɛ fee lɛ. Ekɛ e-Tsɔɔlɔ Kpele wolo lɛ ma enaanyo Sandy, ni gbekɛbii yei enyɔ nɛɛ bɔi wolo lɛ kasemɔ daa gbi.

Shi, Sandy mami, Una, yaa Anglikan Sɔlemɔ lɛ, ni esumɔɔɔ ni ebiyoo lɛ kaneɔ Yehowa Odasefoi awoji. Yɛ emami shitee-kɛ-woo nɛɛ fɛɛ sɛɛ lɛ, nikasemɔ lɛ tee nɔ. Gbi ko lɛ, Sandy kpa emami fai akɛ ebabo amɛ sanegbaa lɛ toi shikome pɛ kɛkɛ. Yitso ni gbekɛbii yei enyɔ nɛɛ kane nakai gbi lɛ hiɛ saneyitso ni ji “Hii Enyɔ ni Ye Fɔmɔ Gbii Lɛ.” Una bo toi ni ena he miishɛɛ waa. Oya nɔŋŋ ni eyanina Priya mami kɛ Biblia mli sanebimɔi babaoo.

Priya mami to gbɛjianɔ koni Odasefonyo ko kɛ Una akase Biblia lɛ. Etsɛɛɛ kɛkɛ ni Una diɛŋtsɛ hu kɛ enaanyo nitsulɔ Dolly bɔi nɔ ni ekaseɔ lɛ he sane gbaa. Yɛ nakai beaŋ fɛɛ lɛ, Priya ni eye afii 11 lɛ kã he etee ehiɛ waa, ni ekpɛ eyiŋ akɛ ekɛ nu mli baptisimɔ baafee ehenɔjɔɔmɔ kɛha Yehowa Nyɔŋmɔ lɛ he okadi yɛ Yehowa Odasefoi akpokpaa wulu nɔ kpee ko shishi. Nɔ ni fee Priya miishɛɛ waa ji akɛ, abaptisi Una kɛ Dolly hu, yɛ nakai kpee lɛ nɔŋŋ shishi!

◻ Afrika maji komɛi yɛ ni akɛ Yehowa Odasefoi anitsumɔ lɛ woko woji amli yɛ jɛmɛ. Yɛ shikpɔji nɛɛ ekome nɔ lɛ, efɔɔ kaa akɛ anaa Odasefoi lɛ ajamɔ mli nifeemɔi kɛ amɛhemɔkɛyelii lɛ ahe tsui waa ni aŋmɛɔ amɛ gbɛ. Yɛ nakai maŋ lɛŋ skul ko lɛ, aŋmɛ gbekɛ nuu ko ni eye afii kpawo, kɛ enyɛmi nuu fioo ni eye afii ekpaa—ni amɛji Odasefoi abii—lɛ gbɛ ni amɛshi skul tsu lɛ mli beni skulbii lɛ kɛɔ jamɔ sɔlemɔ lɛ.

Gbi ko lɛ, tsɔɔlɔ hee ko bi ni gbekɛbii nɛɛ afata gbekɛbii krokomɛi lɛ ahe yɛ sɔlemɔ mli. Gbekɛ nuu onukpa lɛ ekpɛlɛɛɛ, ni tsɔɔlɔ lɛ yi lɛ. Enyɛmi nuu fioo, Shadrack, ni eye afii ekpaa lɛ wie doo akɛ eesumɔ ni eyana tsɔɔlɔ nukpa lɛ yɛ e-ɔfis lɛ. Tsɔɔlɔ nukpa lɛ kɛ tsɔɔlɔ hee lɛ bi lɛ nɔ hewɔ ni esumɔɔɔ ni efata mɛi krokomɛi lɛ ahe lɛ. Amɛbi lɛ akɛ ani eeshe gbeyei akɛ efɔlɔi baayi lɛ yɛ no hewɔ lo. Ekɛ Arabik wiemɔ ni mli tse ha hetoo akɛ: “Dabi, Nyɔŋmɔ ni mijaa lɛ jeee sakasaka Nyɔŋmɔ, shi moŋ gbɛjianɔtolɔ kpakpa. Minyɛŋ mafee Yehowa Odasefonyo yɛ shia, kɛ jamɔ kroko mlinyo yɛ skul!” Enɛ hewɔ lɛ, aŋmɛ lɛ gbɛ akɛ ebaanyɛ ejie ehe yɛ mli.

Yɛ ebaptisimɔ lɛ sɛɛ lɛ, Etiopianyo ni atsi eta yɛ Bɔfoi lɛ Asaji awolo lɛ mli lɛ “yi gbɛ kɛ nyamɔ.” (Bɔfoi lɛ Asaji 8:39) Nakai nɔŋŋ hu ŋmɛnɛ, Maŋtsɛyeli jajelɔi ni yɔɔ Afrika shikpɔŋ wulu agbo lɛ nɔ lɛ naa miishɛɛ yɛ hegbɛ ni amɛna ni ‘amɛkɛjajeɔ Yesu he sanekpakpa lɛ’ hewɔ.—Bɔfoi lɛ Asaji 8:35.