Maŋtsɛyeli Jajelɔi Bɔ Amaniɛ

“Nyɔŋmɔ Wiemɔ lɛ Shwere”

KRISTOFOI asafo lɛ shwere kɛjɛ emli bii aaashɛ 120 kɛyashɛ nɔ ni fe 3,000 yɛ be mli ni ato shishi lɛ sɛɛ ŋmɛlɛtswaa fioo pɛ mli. (Bɔfoi lɛ Asaji 1:15; 2:41) Biblia lɛ tsɔɔ mli akɛ “Nyɔŋmɔ wiemɔ lɛ shwere, ni kaselɔi lɛ ayi bafa babaoo diɛŋtsɛ yɛ Yerusalem.” (Bɔfoi lɛ Asaji 6:7) Yɛ afii fioo pɛ sɛɛ lɛ, asafo hee ni ato shishi lɛ batsɔ asafo ni yɔɔ shikpɔŋ wuji sɔrɔtoi babaoo nɔ, ni ana Kristofoi yɛ Afrika, Asia, kɛ Europa.

Kristofoi asafo lɛ miina shweremɔ oyayaayai ni tamɔ nakai nɔŋŋ ŋmɛnɛ. Akɛ nɔkwɛmɔ nɔ lɛ, yɛ Mexico nɛkɛ lɛ, yɛ afii enumɔ pɛ mli lɛ, Maŋtsɛyeli jajelɔi lɛ ayifalɛ etee hiɛ kɛ nɔ ni fe 130,000 kɛyashɛ 443,640! Yɛ 1995 mli lɛ, gbɔmɛi fɛɛ ni yɔɔ Mexico lɛ ateŋ mɔ 1 yɛ mɛi 59 mli ba Kristo gbele lɛ Kaimɔ ni Yehowa Odasefoi yeɔ he gbijurɔ lɛ shishi. Ni kɛlɛ, agbeko mumɔŋ nikpamɔ ni yaa nɔ yɛ nakai maŋ lɛ mli lɛ naa, taakɛ niiashikpamɔ ni nyiɛ sɛɛ lɛ feɔ he mfoniri lɛ.—Mateo 9:37, 38.

Mɛi ni yɔɔ maŋtiase ko mli yɛ Chiapas maŋ lɛ mli lɛ ateŋ mɔ ko kwraa ekpɛlɛɛɛ ni Yehowa Odasefoi kɛ lɛ afee shia Biblia mli nikasemɔ, yɛ be mli ni amɛshiɛ sanekpakpa lɛ yɛ nakai kpokpaa lɛ nɔ aaashɛ afii 20 sɔŋŋ lɛ sɛɛ. Eyɛ faŋŋ akɛ nuu ko ni ale lɛ akɛ mɔ ko ni feɔ mɛi basabasa ji mɔ ni ewo maŋbii lɛ ateŋ mɛi pii ahe gbeyei. Amɛmiishe nɔ ni ebaafee amɛ kɛji ena ele akɛ amɛkɛ Odasefoi miikase Biblia lɛ he gbeyei.

Odasefoi ekaalɔi enyɔ komɛi ni fã kɛtee nakai kpokpaa lɛ nɔ lɛ kpɛ amɛyiŋ akɛ amɛbaatsu naagba lɛ he nii kɛtsɔ nuu nɛɛ ŋɔɔ ni amɛtee tɛɛ lɛ nɔ. Beni amɛyashɛ eshia lɛ, amɛtswa eshinaa lɛ ni eŋa here nɔ, ni ebo shɛɛ sane ni amɛhiɛ lɛ toi jogbaŋŋ. Yoo lɛ ná nɔ ni Biblia lɛ wieɔ yɛ shikpɔŋ nɔ paradeiso shihilɛ he lɛ he miishɛɛ waa titri. Shi ekpɛlɛ nɔ akɛ, kɛji ekɛɛ ebaakase Biblia lɛ, ewu baaha nibii amli awa waa kɛha lɛ. Ni Odasefoi lɛ tsɔɔ mli faŋŋ amɛha lɛ akɛ kɛji ekaseee nɔ ni Biblia lɛ kɛɔ lɛ jogbaŋŋ lɛ, no lɛ eleŋ bɔ ni eeefee esɔmɔ Nyɔŋmɔ ni ena naanɔ wala mli ŋɔɔmɔ yɛ shikpɔŋ nɔ kɔkɔɔkɔ. Kɛkɛ ni ekpɛlɛ Biblia mli nikasemɔ nɔ.

Taakɛ ekpaa gbɛ lɛ, ewu naaa yiŋkpɛɛ ni efee nɛɛ he miishɛɛ. No hewɔ lɛ eŋmɛɛɛ lɛ gbɛ ni eta ekar ni eyɔɔ lɛ mli kɛya Kristofoi akpeei, eyɛ mli akɛ eŋmɛɔ lɛ gbɛ ni ekɛtsuɔ yiŋtoi krokomɛi ahe nii. Yɛ eshitee-kɛ-woo lɛ fɛɛ sɛɛ lɛ, yoo lɛ nyiɛɔ kɛyaa Yehowa Odasefoi a-Maŋtsɛyeli Asa ni bɛŋkɛ amɛ fe fɛɛ, ni kɛ amɛ jekɛmɔ ji kilomitai nyɔŋma lɛ nɔ. Etsɛɛɛ kɛkɛ ni maŋ lɛ mli bii krokomɛi na ekaa kɛ efaishitswaa ni eyɔɔ lɛ. Kɛkɛ ni gbɔmɛi lɛ bɔi Odasefoi lɛ toiboo kɛ amɛba amɛshiai amli. Mɛi komɛi po fataa yoo lɛ he kɛyaa kpeei. Yɛ be fioo sɛɛ lɛ, Odasefoi lɛ bɔi Biblia mli nikasemɔi 20 sɔŋŋ feemɔ yɛ nakai maŋ lɛ mli!

Yoo nɛɛ naanyo ko hu kpɛ eyiŋ akɛ ebaakase Biblia lɛ yɛ shitee-kɛ-woo ni ewu kɛba enɔ lɛ fɛɛ sɛɛ. Nɔ ni yɔɔ naakpɛɛ ji akɛ, klɛŋklɛŋ yoo lɛ wu ji mɔ ni wo lɛ hewalɛ akɛ efee nakai. Beni nuu nɛɛ kɛ yoo lɛ wu lɛ yawie pɛ kɛkɛ ni shitee-kɛ-woo lɛ sɛɛ fo. Nɛkɛ ji bɔ ni eba lɛ, akɛ yɛ afii 20 sɛɛ lɛ, yɛ naagbee lɛ Biblia mli anɔkwale dumɔ wu lɛ kwɛ̃, ni mɛi fe 15 miikase Biblia lɛ ni amɛyaa Kristofoi akpeei hu, ni amɛteŋ mɛi komɛi ji yei enyɔ nɛɛ, ni amrɔ nɛɛ amɛji sanekpakpa shiɛlɔi lɛ.