“Ŋoo Hɔ̃ɔmɔ” yɛ Mozambique
FRANCISCO COANA, ajinafoi ni kwɛɔ sɔɔmɔ nitsumɔ lɛ nɔ yɛ Mozambique lɛ ateŋ mɔ kome hi “tsɔsemɔ ŋsaraŋ” afii nyɔŋma. Egba eniiashikpamɔ nɛɛ: “Mile akɛ wɔkɛ be kpalaŋŋ ko baahi biɛ, no hewɔ lɛ mibi kpokpaa nɔkwɛlɔ lɛ kɛ manyɛ matsa nɔ akɛ daa gbɛgbalɔ. Shi te mafee tɛŋŋ ni mana ŋmɛlɛtswai abɔ ni ataoɔ lɛ. Te mafee tɛŋŋ ni manyɛ mikɛ be ni fa awo maŋ sɔɔmɔ nitsumɔ lɛ mli, akɛni etamɔ akɛ mɛi ni yɔɔ ŋsara lɛ mli lɛ ateŋ mɔ fɛɛ mɔ ji Yehowa Odasefonyo lɛ? Mikɛɛ akɛ maya Milange, maŋ ni ejɛkɛmɔ feɔ kilomitai 47 lɛ mli, koni mana mɛi mashiɛ maha amɛ.
“Eyɛ mli akɛ aŋmɛɛɛ wɔ gbɛ ni wɔshi ŋsara lɛ mli moŋ, shi abɛ keketee yɛ nɛkɛ mla nɛɛ nɔ yeli he. Minyɛɔ mikaiɔ bɔ ni mitee koo lɛ mli, ni miyakula shi, ni misɔle koni mana hegbɛ ni mashiɛ maha gbɔmɛi ni yɔɔ maŋ lɛ mli lɛ. Etsɛɛɛ ni Yehowa ha hetoo.
“Miyana nuu ko ni yɔɔ baisikel, ni mikɛ lɛ to gbɛjianɔ. Ekpɛlɛ nɔ akɛ, kɛji akɛ mihu eŋmɔ ni dalɛ shɛɔ hɛkta 3/4 dani nugbɔnɛmɔ lɛ je shishi lɛ, ekɛ baisikel nɛɛ baaha mi akɛ nyɔmɔwoo. No hewɔ lɛ mikɛ leebi fɛɛ leebi tsu nii yɛ eŋmɔ lɛ mli. Yehowa jɔɔ nɛkɛ gbɛjianɔtoo nɛɛ nɔ, ejaakɛ yɛ naagbee lɛ minine shɛ baisikel lɛ nɔ.
“Nɔ ni jɛ mli ba ji akɛ, minyɛ miyashɛ Milange maŋ wulu lɛ mli ni mitsu migbɛgbamɔ nitsumɔ lɛ he nii kɛmɔ shi yɛ maŋ ni woɔ yibii pii nɛɛ mli. Akɛni atsi wɔ nitsumɔ lɛ naa hewɔ lɛ, esa akɛ wɔtsɔ ŋaa gbɛ nɔ ni wɔha gbɔmɛi lɛ ale anɔkwale lɛ. Mikɛ woji wuji kɛ woji tɛtrɛbii hɔlɔ miŋwɛi atade loo shɛt lɛ mli obɔ, kɛkɛ ni miloo ŋoo miwo kotoku mli, kɛkɛ ni mikɛje ŋoo hɔɔmɔ nitsumɔ shishi. Yɛ nɔ najiaŋ ni mahɔ̃ɔ ŋoo lɛ meticais 5 lɛ, mihɔɔ lɛ meticais 15. (Kɛ ŋoo lɛ jara waaa lɛ, abaahe fɛɛ, ni minaŋ ŋoo ni mikɛbaatsu nii ni mikɛshiɛ dɔŋŋ!) Misanegbaa lɛ tee nɔ yɛ gbɛ ni tamɔ nɛkɛ nɔ:
“ ‘Oje koo! Miihɔɔ ŋoo ŋmɛnɛ.’
“ ‘Enyiɛ ni?’
“ ‘Meticais nyɔŋma kɛ enumɔ.’
“ ‘Dabi, dabi. Ejara wa kwraa tsɔ!’
“ ‘Hɛɛ, mikpɛlɛɔ nɔ akɛ ejara wa. Shi kɛ osusuɔ akɛ ejara wa bianɛ lɛ, bo lɛ mɛɛ fioo, ejaakɛ ejara baawa waa fe nɛkɛ yɛ wɔsɛɛ be mli. Ani ole akɛ agba enɛ he sane afɔ shi yɛ Biblia lɛ mli?’
“ ‘Mikaneko enɛ yɛ mi-Biblia lɛ mli da.’
“ ‘Shi eyɛ mli. Okɛ o-Biblia lɛ aba ni matsɔɔ bo.’
“ Kɛkɛ lɛ sanegbaa eje shishi ni akɛ e-Biblia lɛ miitsu nii, koni minɔ̃ lɛ ahɔ mi-shɛt lɛ mli. Migbalaa jwɛŋmɔ kɛyaa Kpojiemɔ yitso 6, ni kɔɔ shihilɛi ni mli wawai kɛ hɔmɔ he lɛ nɔ. Kɛ mina akɛ miishɛɛ miiba lɛ, mijieɔ Anɔkwale ni kɛ Mɔ Yaa Naanɔ Wala Mli loo Good News to Make You Happy wolo lɛ ni mijeɔ Biblia kasemɔ diɛŋtsɛ shishi.
“Nɔ ni jɛ mli ba ji akɛ, minyɛ mije kuu ni feɔ mɛi 15 ni yɔɔ wiemɔ lɛ he miishɛɛ shishi yɛ Milange. Shi etsɛɛɛ ni nɔyelɔi lɛ bayoo wɔ nitsumɔ lɛ. Gbi ko beni miifee Biblia mli nikasemɔ lɛ pɛ kɛkɛ ni polisifoi lɛ ba mli trukaa ni amɛbamɔmɔ wɔ. Amɔmɔ wɔ fɛɛ ni weku lɛ mli gbekɛbii bibii po fata he kɛtee maŋ lɛ tsuŋwoo he. Beni wɔye nyɔŋ kome yɛ jɛmɛ lɛ, akɛ wɔ fɛɛ ba ŋsara lɛ mli ekoŋŋ.”
Niiashikpamɔi nɛɛ baaa ekãa ni wɔnyɛmimɛi lɛ yɔɔ lɛ shi. Shi moŋ, Francisco kɛ eweku lɛ, kɛ amɛnyɛmimɛi akpei abɔ ni yɔɔ ŋsara lɛ mli lɛ, jáa ni amɛshiɛɔ bianɛ yɛ heyeli shihilɛi amli yɛ Mozambique.