Yehowa Baabaa Shikpɔŋ lɛ Yi

AŊAA kɔɔyɔŋ lɛji adaamɔ he ko ni yɔɔ Maldives ŋshɔkpɔ lɛ nɔ lɛ ŋmɛlɛtswai babaoo daa gbi. Mɛni hewɔ? Ejaakɛ ŋshɔ ni yiɔ lɛ fɔɔ kɔɔyɔŋ lɛji ashiyimɔ he lɛ, ni kɔɔyɔŋ lɛji ashiyimɔ efeee nɔ ni yɔɔ shweshweeshwe. Jeŋ nilelɔi komɛi sheɔ gbeyei akɛ, ŋshɔ lɛ baayi kɛ hoo lɛ, kɛyashɛ mita 1, yɛ Maldives ŋshɔkpɔi lɛ anɔ yɛ afii oha ni baaba lɛ mli. Yɛ be mli ni enɛ tamɔ nɔ ko ni faaa lɛ, ŋshɔ falɛ ni tamɔ nɛkɛ baanyɛ afite ŋshɔkpɔi ni ji maji kpawo kwraa kɛjɛ shikpɔŋ he mfoniri lɛ nɔ. Yɛ anɔkwale mli lɛ, taakɛ UN Chronicle lɛ tsɔɔ lɛ, eŋwɛiyaa mitai 2 baanyɛ ashiu ŋshɔkpɔi akuu ni feɔ ŋshɔkpɔi 1,200 lɛ fɛɛ!

Mɛni haa ŋshɔ lɛ yiɔ lɛ? Taakɛ UN Environment Program lɛ tsɔɔ lɛ, kɔɔyɔɔ ni ebɔle shikpɔŋ lɛ he mli mujiwoo kɛtsɔ “kɔɔyɔɔ ni ebɔɔ yɔɔ mli ni ashiɔ awoɔ kɔɔyɔŋ ni haa shikpɔŋ lɛ nɔ dɔɔ” lɛ haa ŋshɔ mli nui ni bɛŋkɛ shikpɔji ni nɔ dɔɔ lɛ mli lɛɛɔ, ni ehaa ais ni eshɔ̃ keketee agbo tamɔ ŋshɔkpɔ lɛ sereɔ, ni ehaa ŋshɔ lɛ ŋɛlɛ yiɔ. Panos Institute ni yɔɔ London lɛ kɛɔ akɛ ekolɛ mujiwoo “ekanya jeŋ muu fɛɛ hiɛkpatamɔ ni baa fiofio ni tsakeɔ shikpɔŋ kɛ ŋshɔ husui tete po.”

Jeŋ nilelɔi miiwie jeŋ muu fɛɛ dɔlɛ ni yɔɔ lɛ he lolo. Shi wɔbaanyɛ wɔna nɔmimaa akɛ nibii ni ebɔle shikpɔŋ lɛ he kɛkpe lɛ ahe naagbai etsiŋ Nyɔŋmɔ yiŋtoo naa. Biblia lɛ kɛɔ akɛ: “Aŋɔ je lɛ hu ama shi shiŋŋ ni ehosoŋ.” (1 Kronika 16:30) Yehowa yɛ hewalɛ yɛ nibii ni ebɔle shikpɔŋ lɛ he kɛkpe lɛ fɛɛ nɔ, ni wɔmli baanyɛ afili wɔ akɛ etsɛŋ ni ebaahere shikpɔŋ lɛ kɛ adesai ayiwala kɛjɛ hiɛkpatamɔ mli.—Lala 24:1, 2; 135:6; 2 Petro 3:13.

[He ni Mfoniri ni yɔɔ baafa 31 lɛ Jɛ]

Nitɛŋmɔ lɛ damɔ NASA mfoniri nɔ